တၢ်ကစီၣ် အရ့ဒိၣ်ကတၢၢ်လၢ လံာ်စီဆှံအပူၤန့ၣ် မ့ၢ်ဝဲ ကစၢ်ယွၤအဘီအမုၢ်အဂ့ၢ်. ယဟိဝၤယွၤ ကသူဝဲအဘီအမုၢ်အံၤ ဒ်သိးအကမၤကဲထီၣ်က့ၤ ဟီၣ်ခိၣ်လၢ ပၤရဒံစူး ဒ်အတၢ်တိာ်ပာ် အိၣ်ဝဲလၢ အခီၣ်ထံးအသိးလီၤ. ကစၢ်ယွၤအဘီအမုၢ်န့ၣ် မ့ၢ်မနုၤလဲၣ်. ခဲအံၤကစၢ်ယွၤအဘီအမုၢ် ပၢတၢ်လၢမူခိၣ်လံန့ၣ် ပသ့ၣ်ညါဘၣ်ဒ်လဲၣ်. ကစၢ်ယွၤအဘီအမုၢ် မၤတ့ၢ်ဝဲ တၢ်မနုၤလဲၣ်. ဒီးခါဆူညါန့ၣ် ကစၢ်ယွၤအဘီအမုၢ် ကမၤဝဲ တၢ်မနုၤလဲၣ်. တၢ်မၤလိတခါအံၤ ဒီးတၢ်မၤလိလၢခံ ခံခါန့ၣ် ကပာ်ဖျါထီၣ်န့ၢ်ပှၤ တၢ်သံကွၢ်တဖၣ်အံၤ အတၢ်စံးဆၢ.

၁. ကစၢ်ယွၤအဘီအမုၢ်န့ၣ် မ့ၢ်မနုၤလဲၣ် ဒီးဘီမုၢ်အစီၤပၤန့ၣ် မ့ၢ်မတဂၤလဲၣ်.

ကစၢ်ယွၤအဘီအမုၢ်န့ၣ် မ့ၢ်ဝဲ တၢ်ပၢတၢ်ပြးတခါလၢ ယဟိဝၤယွၤ ဒုးအိၣ်ထီၣ်ဝဲ. ဒီးဘီမုၢ်အံၤ အစီၤပၤန့ၣ် မ့ၢ်ဝဲ ယ့ၣ်ၡူးခရံာ် ဒီးအဝဲပၢတၢ်လၢမူခိၣ်. (မးသဲ ၄:၁၇; ယိၤဟၣ် ၁၈:၃၆) ဘၣ်ဃးဒီး ယ့ၣ်ၡူးန့ၣ် လံာ်စီဆှံ တဲဝဲလၢ ‘ဒ်စီၤပၤတဂၤအသိး အဝဲကပၢတၢ် . . . လီၤထူလီၤယိာ်.’ (လူၤကၣ် ၁:​၃၂, ၃၃) ယ့ၣ်ၡူးကပၢဝဲ ကစၢ်ယွၤအဘီအမုၢ် ဒ်စီၤပၤတဂၤအသိး ဒီးအဝဲကပၢ ပှၤအိၣ်လၢ ဟီၣ်ခိၣ်ချၢကိးဂၤဒဲး.

၂. မတဂၤ ပၢဃုာ်တၢ်ဒီး ယ့ၣ်ၡူးလဲၣ်.

ယ့ၣ်ၡူးတပၢတၢ် ထဲတဂၤဘၣ်. ပှၤလၢ အအိၣ်ဟဲလၢ “ကလုာ်ဒူၣ်ကိးဒူၣ်ဒဲး, ပှၤတဲတၢ်အကျိာ် ကိးကျိာ်ဒဲး, ပှၤကိးဒူၣ်ဒဲး ဒီးပှၤကိးကလုာ်ဒဲးအကျါန့ၣ် . . . အဝဲသ့ၣ်ကပၢဝဲ ဟီၣ်ခိၣ်ဒီဘ့ၣ် ဒ်စီၤပၤတဖၣ် အသိးလီၤ.” (လီၣ်ဖျါ ၅:​၉, ၁၀) အဃိ ပှၤကပၢဃုာ်တၢ်ဒီး ယ့ၣ်ၡူးပှဲၤဂၤလဲၣ်. စးထီၣ်လၢ ယ့ၣ်ၡူးဟဲလီၤလၢ ဟီၣ်ခိၣ်ချၢ တုၤခဲအံၤန့ၣ် ပှၤဂီၢ်မုၢ်လၢ အကဲထီၣ်အပျဲၢ်အဘီၣ်န့ၣ် အိၣ်လၢ အကကွဲၢ်ညါ. ပှၤသ့ၣ်တဖၣ်အံၤကပၢဃုာ်တၢ်ဒီး ယ့ၣ်ၡူးကိးဂၤဒဲးဧါ. တပၢဃုာ်တၢ်ဒီး ယ့ၣ်ၡူးကိးဂၤဒဲးဘၣ်. ပှၤလၢ အကလဲၤထီၣ်လၢမူခိၣ် ဒီးကပၢဃုာ်တၢ်ဒီး ယ့ၣ်ၡူးန့ၣ် အိၣ်ထဲ တကလီၢ် လွံၢ်ကလး လွံၢ်ကထိလီၤ. (ဖး လီၣ်ဖျါ ၁၄:​၁-၄.) မ့မ့ၢ် ခရံာ်ဖိအဂၤတဖၣ် လၢကအိၣ်မူဘၣ်လၢ ဟီၣ်ခိၣ်ချၢန့ၣ် အဝဲသ့ၣ်ကကဲထီၣ်ဝဲ ကစၢ်ယွၤအဘီမုၢ် အပှၤထံဖိကီၢ်ဖိ.​—စံးထီၣ်ပတြၢၤ ၃၇:၂၉.

၃. ဘၣ်မနုၤအဃိ ကစၢ်ယွၤအဘီအမုၢ်န့ၣ် ဂ့ၤဒိၣ်န့ၢ်ဒံး ပှၤဟီၣ်ခိၣ်ဖိ အတၢ်ပၢတၢ်ပြးလဲၣ်.

ပှၤဟီၣ်ခိၣ်ဖိလၢ အပၢတၢ်တဖၣ် မ့ၢ်ဂုာ်ကျဲးစၢး မၤတၢ်လၢအဂ့ၤ သနာ်က့ အဝဲသ့ၣ်တအိၣ်ဒီး တၢ်သ့တၢ်ဘၣ်လၢ ကမၤဝဲတၢ်လၢ အအဲၣ်ဒိးမၤဝဲ ကိးမံၤဒဲးဘၣ်. လၢခံ ပှၤပၢတၢ် လၢအဂၤတဖၣ် ပၢက့ၤတၢ်လၢ ပှၤပၢတၢ်တဖၣ်အံၤအလီၢ်. ဒီးပှၤပၢတၢ်တဖၣ်အံၤ ဘၣ်သ့ၣ်သ့ၣ် ကကဲဝဲ ပှၤလၢ အအဲၣ်လီၤဒၣ်ထဲအသး ဒီးတအဲၣ်ဒိး မၤစၢၤပှၤဂၤဘၣ်. ဘၣ်ဆၣ် ကစၢ်ယွၤ “သူၣ်ထီၣ် ဘီမုၢ် တဘ့ၣ်လၢ အတဟးဂီၤ နီတဘျီဘၣ်.” (ဒၤနံးယ့လး ၂:၄၄) ဒီးကစၢ်ယွၤအဘီအမုၢ် အစီၤပၤယ့ၣ်ၡူးန့ၣ် ပှၤတပၢက့ၤတၢ် လၢအလီၢ်နီတဂၤဘၣ်. ယ့ၣ်ၡူးကပၢ ဟီၣ်ခိၣ်ဒီဘ့ၣ်ညါ ဒီးအဝဲ တကွၢ်ဒိၣ်ဆံးအါစှၤ ပှၤနီတဂၤဘၣ်. ယ့ၣ်ၡူးန့ၣ် အိၣ်ဒီးတၢ်အဲၣ်တၢ်ကွံ, တၢ်သူၣ်ဂ့ၤသးဝါ ဒီးအမၤတၢ် တီတီလိၤလိၤ. ဒီးအဝဲကသိၣ်လိဝဲ ပှၤဟီၣ်ခိၣ်ဖိတဖၣ် ဒ်သိးအဝဲသ့ၣ် ကရ့လိာ်သး လၢတၢ်အဲၣ်တၢ်ကွံအပူၤ, ကပာ်ဖျါထီၣ် တၢ်သူၣ်ဂ့ၤသးဝါ ဒီးကမၤတၢ် တီတီလိၤလိၤ.​—ဖး ယၡါယၤ ၁၁:၉.

၄. ကစၢ်ယွၤအဘီအမုၢ် ကပၢဝဲ ဟီၣ်ခိၣ်ဒီဘ့ၣ်ညါ

ပမ့ၢ်ထိၣ်သတြီၤ ယ့ၣ်ၡူးခရံာ် ဒီးပှၤပၢတၢ်အဂၤတဖၣ်န့ၣ် ယ့ၣ်ၡူးခရံာ် ဒိးန့ၢ်ဘၣ် တၢ်စိတၢ်ကမီၤ လၢကပၢတၢ်အဂီၢ် အါန့ၢ်ဒံးအဝဲသ့ၣ်. ဖး မးသဲ ၂၈:၁၈ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• ယ့ၣ်ၡူး အတၢ်စိတၢ်ကမီၤလၢ အကပၢတၢ် ဒီးပှၤဟီၣ်ခိၣ်ဖိ အတၢ်စိတၢ်ကမီၤလၢ အကပၢတၢ်န့ၣ် လီၤဆီလိာ်အသးဒ်လဲၣ်.

ပှၤဟီၣ်ခိၣ်ဖိအတၢ်ပၢန့ၣ် ဆီတလဲအသးထီဘိ ဒီးအဝဲသ့ၣ်ပၢဘၣ်တၢ်လၢ ဟီၣ်ကဝီၤ ထဲတဘ့ၣ်လီၤ. မ့မ့ၢ် ကစၢ်ယွၤအဘီအမုၢ်မီၤ, အတၢ်ပၢကမၤအသးဒ်လဲၣ်. ဖး ဒၤနံးယ့လး ၇:၁၄ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–

• ကစၢ်ယွၤအဘီအမုၢ်န့ၣ် “တဟးဂီၤနီတဘျီဘၣ်” အဃိ နဆိကမိၣ် အကကဲဘျုးလၢ ပဂီၢ်ဒ်လဲၣ်.

• ခီဖျိလၢ ကစၢ်ယွၤအဘီအမုၢ် ကပၢဟီၣ်ခိၣ်ဒီဘ့ၣ်ညါအဃိ နဆိကမိၣ် ကကဲဘျုးလၢ ပဂီၢ်ဒ်လဲၣ်.

၅. ပှၤဟီၣ်ခိၣ်ဖိ အတၢ်ပၢတၢ်ပြး ကဘၣ်တၢ်မၤဟးဂီၤကွံာ်အီၤ

ဘၣ်မနုၤအဃိ ကစၢ်ယွၤအဘီအမုၢ် ကြၢးပၢက့ၤတၢ်လၢ ပှၤဟီၣ်ခိၣ်ဖိ အတၢ်ပၢတၢ်ပြးအလီၢ်လဲၣ်. ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ.

တၢ်ဂီၤမူ– ကစၢ်ယွၤအဘီအမုၢ်န့ၣ် မ့ၢ်မနုၤလဲၣ်​—တၢ်ဂီၤမူဖုၣ်ကိာ် (၁:၄၁)

• ခီဖျိလၢ ပှၤဟီၣ်ခိၣ်ဖိပၢတၢ်အဃိ တၢ်ကဲထီၣ်အသးဒ်လဲၣ်.

ဖး စံၣ်တဲၤတဲလီၤတၢ် ၈:၉ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–

• နဆိကမိၣ် ကစၢ်ယွၤအဘီအမုၢ် ကြၢးပၢက့ၤတၢ်လၢ ပှၤဟီၣ်ခိၣ်ဖိ အတၢ်ပၢတၢ်ပြးအလီၢ်ဧါ. ဘၣ်မနုၤအဃိ နဆိကမိၣ်ဒ်န့ၣ်လဲၣ်.

၆. ပှၤလၢအပၢတၢ်လၢ ကစၢ်ယွၤအဘီအမုၢ် အပူၤန့ၣ် အဝဲသ့ၣ်မ့ၢ်ပှၤလၢ အနၢ်ပၢၢ်စၢၤပှၤ

ယ့ၣ်ၡူးလၢအမ့ၢ် ပစီၤပၤန့ၣ် အဝဲအိၣ်မူတ့ၢ်ဒ် ပှၤဟီၣ်ခိၣ်ဖိတဂၤအသိးအဃိ အဝဲ “ဒိသူၣ်ဒိသး ပတၢ်ဂံၢ်စၢ်ဘါစၢ်တဖၣ်” သ့. (ဧ့ၤဘြံၤ ၄:၁၅) တကးဒံးဘၣ် ယဟိဝၤယွၤ ဃုထၢထီၣ်ဝဲ ပှၤပိာ်မုၣ် ဒီးပှၤပိာ်ခွါလၢအသးတီ အဂၤ တကလီၢ် လွံၢ်ကလး လွံၢ်ကထိ လၢကပၢဃုာ်တၢ်ဒီး ယ့ၣ်ၡူး. ဒီးအဝဲသ့ၣ်ဟဲ “လၢကလုာ်ဒူၣ်ကိးဒူၣ်ဒဲး, ပှၤတဲတၢ်အကျိာ် ကိးကျိာ်ဒဲး, ပှၤကိးဒူၣ်ဒဲး ဒီးပှၤကိးကလုာ်ဒဲးအကျါ.”​—လီၣ်ဖျါ ၅:၉.

• နသ့ၣ်ညါဘၣ်လၢ ယ့ၣ်ၡူး ဒီးပှၤလၢ အပၢဃုာ်တၢ်ဒီးအီၤတဖၣ် နၢ်ပၢၢ်စၢၤ ပတၢ်တူၢ်ဘၣ် ဒီးသ့ၣ်ညါ ပတၢ်ကီတၢ်ခဲအဃိ နသးခုဧါ. ဘၣ်မနုၤအဃိ နသးခုလဲၣ်.

၇. ကစၢ်ယွၤအဘီအမုၢ် အတၢ်ပၢန့ၣ် အတၢ်သိၣ်တၢ်သီ ဂ့ၤဒိၣ်န့ၢ်ဒံး ပှၤဟီၣ်ခိၣ်ဖိ အတၢ်သိၣ်တၢ်သီ

ပှၤပၢတၢ်တဖၣ် ဒုးအိၣ်ထီၣ် တၢ်သိၣ်တၢ်သီလၢ အဝဲသ့ၣ်ဆိကမိၣ်ဝဲလၢ အကကဲဘျုး ဒီးကဒီသဒၢ အပှၤထံဖိကီၢ်ဖိ. ကစၢ်ယွၤအဘီအမုၢ် အတၢ်ပၢစ့ၢ်ကီး အိၣ်ဒီး တၢ်သိၣ်တၢ်သီလၢ အပှၤထံဖိကီၢ်ဖိ ကဘၣ်မၤထွဲဝဲ. ဖး ၁ ကရံၣ်သူး ၆:​၉-၁၁ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–

• ပှၤကိးဂၤဒဲး မ့ၢ်အိၣ်မူမၤထွဲ ကစၢ်ယွၤ အတၢ်သိၣ်တၢ်သီန့ၣ် နဆိကမိၣ် ဟီၣ်ခိၣ်တၢ်အိၣ်သး ကမၤအသးဒ်လဲၣ်.a

• ယဟိဝၤယွၤ အဲၣ်ဒိးဝဲလၢ အဘီအမုၢ် အထံဖိကီၢ်ဖိ ကအိၣ်မူမၤထွဲ အတၢ်သိၣ်တၢ်သီတဖၣ်အံၤန့ၣ် နဆိကမိၣ် အကြၢးဝဲဘၣ်ဝဲဧါ. ဘၣ်မနုၤအဃိ နဆိကမိၣ်ဒ်န့ၣ်လဲၣ်.

• လၢညါ ပှၤလၢအတအိၣ်မူမၤထွဲ တၢ်သိၣ်တၢ်သီတဖၣ်အံၤဘၣ်န့ၣ် အတၢ်အိၣ်မူ ဆီတလဲသးသ့န့ၣ် ပသ့ၣ်ညါဘၣ်ဒ်လဲၣ်. ​—ကွၢ် အဆၢဖိ ၁၁.

တၢ်ဂ့ၢ်လၢအရ့ဒိၣ်

ကစၢ်ယွၤအဘီအမုၢ်န့ၣ် မ့ၢ်ဝဲဒၣ် တၢ်ပၢတၢ်ပြးနီၢ်ကီၢ်တခါ လၢအအိၣ်လၢမူခိၣ် ဒီးကပၢဝဲ ဟီၣ်ခိၣ်ဒီဘ့ၣ်.

တၢ်ကွၢ်ကဒါက့ၤ

• မတဂၤ ကပၢတၢ်လၢ ကစၢ်ယွၤအဘီအမုၢ် အပူၤလဲၣ်.

• ကစၢ်ယွၤ အတၢ်ပၢန့ၣ် ဂ့ၤဒိၣ်န့ၢ်ဒံး ပှၤဟီၣ်ခိၣ်ဖိ အတၢ်ပၢဒ်လဲၣ်.

• ယဟိဝၤယွၤ အဲၣ်ဒိးဝဲလၢ အဘီအမုၢ် အထံဖိကီၢ်ဖိတဖၣ် ကမၤမနုၤလဲၣ်.

ဃုသ့ၣ်ညါ

ဖးကွၢ် ဘၣ်ဃးဒီး ယ့ၣ်ၡူးတဲဝဲလၢ ကစၢ်ယွၤအဘီအမုၢ်န့ၣ် အိၣ်ဖဲလဲၣ်.

“မ့ၢ်ကစၢ်ယွၤအဘီအမုၢ်န့ၣ် အအိၣ် လၢပသးကံၢ်ပူၤဧါ” (တၢ်မၤလိလၢ အအိၣ်လၢ online အဖီခိၣ်)

ဘၣ်မနုၤအဃိ ယဟိဝၤပှၤအုၣ်အသးတဖၣ် တဆီၣ်ထွဲဝဲ ပှၤဟီၣ်ခိၣ်ဖိအတၢ်ပၢဘၣ် ဘၣ်ဆၣ် ဆီၣ်ထွဲဝဲထဲ ကစၢ်ယွၤအတၢ်ပၢလဲၣ်.

ဟ့ၣ်လီၤသးလၢ ကစၢ်ယွၤအဘီအမုၢ်အဂီၢ် (၁:၄၃)

ဖးကွၢ် ဘၣ်ဃးဒီး ပှၤတကလီၢ် လွံၢ်ကလး လွံၢ်ကထိ လၢကစၢ်ယွၤဃုထၢထီၣ်ဝဲ လၢကပၢဃုာ်တၢ်ဒီး ယ့ၣ်ၡူးန့ၣ် လံာ်စီဆှံ ပာ်ဖျါထီၣ် အဝဲသ့ၣ် အဂ့ၢ်ဒ်လဲၣ်.

“မတၤသ့ၣ်တဖၣ် လဲၤထီၣ်လၢမူခိၣ်လဲၣ်” (တၢ်မၤလိလၢ အအိၣ်လၢ online အဖီခိၣ်)

ပိာ်မုၣ်တဂၤနာ်ဝဲလၢ ပှၤလၢအဒုးအိၣ်ထီၣ် တၢ်တီတၢ်လိၤလၢ ဟီၣ်ခိၣ်သ့န့ၣ် အိၣ်ထဲကစၢ်ယွၤတဂၤလီၤ. ဘၣ်မနုၤအဃိ အနာ်ဝဲဒ်န့ၣ်လဲၣ်, ဖးကွၢ်.

“ယသ့ၣ်ညါဘၣ်လၢ ဘၣ်မနုၤအဃိ တၢ်တတီတလိၤ ဟဲအိၣ်ထီၣ်လဲၣ်” (ပၢၢ်ထီၣ်! လါနိၣ်ဝ့ဘၢၣ် ၂၀၁၁)

ကစၢ်ယွၤအဘီအမုၢ် စးထီၣ်ပၢတၢ်လၢမူခိၣ်လၢ ၁၉၁၄ နံၣ်န့ၣ်လံ. ပှၤဟီၣ်ခိၣ်ဖိ ပၢဒံးတၢ်လၢ ဟီၣ်ခိၣ်ချၢ သနာ်က့ ဖဲတၢ်တနံၣ်န့ၣ် မုၢ်နံၤခံကတၢၢ်စးထီၣ်လံ. ပသ့ၣ်ညါဘၣ်ဒ်လဲၣ်. ခဲအံၤ ပကကွၢ်သကိး တၢ်လၢလံာ်စီဆှံ တဲဆိပာ်စၢၤဝဲ ဒီးစးထီၣ်လၢ ၁၉၁၄ နံၣ်န့ၣ် လၢဟီၣ်ခိၣ်ချၢ တၢ်ကဲထီၣ်အသးဒ်လဲၣ်. ဒီးပှၤဟီၣ်ခိၣ်ဖိ အတၢ်ပာ်သူၣ်ပာ်သးဒီး အလုၢ်လၢ်သကဲာ်ပဝး အိၣ်ဒ်လဲၣ်.

၁. လံာ်စီဆှံ တဲဆိပာ်စၢၤဝဲလၢ ကစၢ်ယွၤအဘီအမုၢ် ကစးထီၣ်ပၢတၢ်လၢ အခါဖဲလဲၣ်.

လၢလံာ်ဒၤနံးယ့လးအပူၤန့ၣ် ပသ့ၣ်ညါဘၣ်လၢ ကစၢ်ယွၤအဘီအမုၢ် ကစးထီၣ်ပၢတၢ်ဖဲ တၢ်ဆၢကတီၢ် “နွံနံၣ်” ကတၢၢ်ဝဲအခါ. (ဒၤနံးယ့လး ၄:​၁၆, ၁၇) ဝံဒၤနံးယ့လး တဲဆိပာ်စၢၤဝဲဒ်န့ၣ် အနံၣ်လၢ အကယၤတဖၣ် ဝံၤအလီၢ်ခံ တၢ်ဆၢကတီၢ် နွံနံၣ်န့ၣ် ယ့ၣ်ၡူးကိးစ့ၢ်ကီးဝဲလၢ “တၢ်ဆၢကတီၢ်လၢ အဘၣ် တၢ်ပာ်ပနီၣ်အီၤလၢ ပှၤကလုာ်တဖၣ်အဂီၢ်” ဒီးပထံၣ်ဘၣ်လၢ ဖဲယ့ၣ်ၡူးတဲဝဲဒ်န့ၣ်အခါ တၢ်ဆၢကတီၢ်အံၤ တကတၢၢ်ဒံးဘၣ်. (လူၤကၣ် ၂၁:၂၄) ဘၣ်ဆၣ် လၢတၢ်မၤလိအံၤအပူၤ ပကမၤလိဘၣ်လၢ တၢ်ဆၢကတီၢ် နွံနံၣ်န့ၣ် ကတၢၢ်ကွံာ်ဝဲဖဲ ၁၉၁၄ နံၣ်.

၂. စးထီၣ်လၢ ၁၉၁၄ နံၣ်န့ၣ် ဟီၣ်ခိၣ်တၢ်အိၣ်သး, ပှၤဟီၣ်ခိၣ်ဖိ အတၢ်ပာ်သူၣ်ပာ်သး ဒီးအလုၢ်လၢ်သကဲာ်ပဝး အိၣ်ဒ်လဲၣ်.

ယ့ၣ်ၡူး အပျဲၢ်အဘီၣ်တဖၣ် သံကွၢ်အီၤလၢ “နကဟဲက့ၤအိၣ်ဒီးပှၤ အဆၢကတီၢ် ဒီးတၢ်အစိၤလၢ အလီၢ်ခံကတၢၢ်န့ၣ် အတၢ်ပနီၣ် ကမ့ၢ်မနုၤလဲၣ်.” (မးသဲ ၂၄:၃) ယ့ၣ်ၡူး စံးဆၢက့ၤအဝဲသ့ၣ် ဒီးတဲဆိပာ်စၢၤဝဲလၢ အဝဲ မ့ၢ်စးထီၣ်ပၢတၢ် လၢကစၢ်ယွၤအဘီအမုၢ်အပူၤန့ၣ် တၢ်ကဟဲကဲထီၣ်အသးအါမံၤ. ဒီးတၢ်လၢ ကဟဲကဲထီၣ်အသး တဖၣ်အံၤအကျါ ပၣ်ဃုာ်ဒီး တၢ်ဒုးတၢ်ယၤ, တၢ်သၣ်ဝံၤလီၤဒိ ဒီးဟီၣ်ခိၣ်ဟူး. (ဖး မးသဲ ၂၄:၇.) တကးဒံးဘၣ် လံာ်စီဆှံ တဲဆိပာ်စၢၤဝဲလၢ ပှၤဟီၣ်ခိၣ်ဖိ အတၢ်ပာ်သူၣ်ပာ်သး ဒီးအလုၢ်လၢ်သကဲာ်ပဝး “လၢမုၢ်နံၤခံကတၢၢ်တဖၣ်အပူၤန့ၣ်” ကဒုးအိၣ်ထီၣ်ဝဲ “တၢ်ဆၢကတီၢ်လီၤဆီလၢ အကီအခဲသပှၢ်တၢၢ်.” (၂ တံၤမသ့း ၃:၁-၅) ဟီၣ်ခိၣ်တၢ်အိၣ်သး, ပှၤဟီၣ်ခိၣ်ဖိ အတၢ်ပာ်သူၣ်ပာ်သး ဒီးအလုၢ်လၢ်သကဲာ်ပဝးတဖၣ်အံၤ နးထီၣ်ဝဲ စးထီၣ်လၢ ၁၉၁၄ နံၣ်န့ၣ်လံ.

၃. စးထီၣ်လၢ ကစၢ်ယွၤအဘီအမုၢ် ပၢတၢ်န့ၣ် ဘၣ်မနုၤအဃိ ဟီၣ်ခိၣ်တၢ်အိၣ်သး နးထီၣ်လဲၣ်.

ယ့ၣ်ၡူးကဲထီၣ် ကစၢ်ယွၤအဘီအမုၢ် အစီၤပၤဝံၤအလီၢ်ခံ အဝဲဒုးတၢ်ဒီး မုၣ်ကီၤလံၢ် ဒီးအတၢ်ဝံတၢ်နါတဖၣ်. မုၣ်ကီၤလံၢ် တမၤနၢၤတၢ်ဘၣ်. ဒီးလံာ်စီဆှံ တဲဝဲလၢ “အဝဲဘၣ်တၢ်ကွံာ်လီၤအီၤလၢ ဟီၣ်ခိၣ်ချၢ ဒီးအမူခိၣ်ကလူးတဖၣ် ဘၣ်တၢ်ကွံာ်လီၤ အဝဲသ့ၣ်ဃုာ်ဒီးအီၤလီၤ.” (လီၣ်ဖျါ ၁၂:​၉, ၁၀, ၁၂) ခီဖျိလၢ မုၣ်ကီၤလံၢ် သ့ၣ်ညါဝဲလၢ အကဘၣ် တၢ်မၤဟးဂီၤကွံာ်အီၤအဃိ အသးပှံၢ်ထီၣ်တၢ်ဒိၣ်မး. အဃိ အဝဲဒုးအိၣ်ထီၣ် တၢ်ကီတၢ်ခဲ ဒီးတၢ်နးတၢ်ဖှီၣ် လၢဟီၣ်ခိၣ်ဒီဘ့ၣ်ညါ. ဒီးပနၢ်ပၢၢ်ဘၣ်လၢ ဟီၣ်ခိၣ်တၢ်အိၣ်သး နးထီၣ်ခီဖျိလၢ တၢ်ဂ့ၢ်သ့ၣ်တဖၣ်အံၤ ဘၣ်ဆၣ် ကစၢ်ယွၤအဘီအမုၢ် ကမၤဘၣ်ဂီၢ်က့ၤ တၢ်ကီတၢ်ခဲတဖၣ်အံၤခဲလၢာ်.

ဃုသ့ၣ်ညါအါထီၣ်

၄. တၢ်ဒွးတၢ်အနံၣ်အလါ လၢလံာ်စီဆှံပူၤန့ၣ် ပာ်ဖျါထီၣ်ဝဲလၢ ကစၢ်ယွၤအဘီအမုၢ် စးထီၣ်ပၢတၢ်လၢ ၁၉၁၄ နံၣ်

တၢ်ဂီၤမူ– ကစၢ်ယွၤအဘီအမုၢ် စးထီၣ်ပၢတၢ်လၢ ၁၉၁၄ (၅:၀၂)

လၢပျၢၤန့ၣ် ကစၢ်ယွၤ ဒုးမံမီၢ်ဝဲ ဘၤဘူၤလိၣ် အစီၤပၤနဘူၤကးန့စၢ် လၢတၢ်မံမီၢ်. တၢ်မံမီၢ်တခါန့ၣ် ဒီးတၢ်မံမီၢ်အခီပညီ လၢစီၤဒၤနံးယ့လး တဲဖျါထီၣ်ဝဲန့ၣ် ပဖးဘၣ်အီၤ လၢလံာ်စီဆှံအပူၤ. ဒီးတၢ်မံမီၢ်တခါန့ၣ် ပသ့ၣ်ညါဘၣ်လၢ အဘၣ်ထွဲဒီး စီၤနဘူၤကးန့စၢ် အတၢ်ပၢ ဒီးအဘၣ်ထွဲစ့ၢ်ကီးဒီး ကစၢ်ယွၤအဘီအမုၢ်.​—ဖး ဒၤနံးယ့လး ၄:၁၇.a

ဖး ဒၤနံးယ့လး ၄:​၂၀-၂၆ ဝံၤဒီး ကွၢ်တၢ်ဂီၤ ဒီးတဲသကိး တၢ်သံကွၢ် လၢလာ်တဖၣ်အံၤ–

• (၁) စီၤနဘူၤကးန့စၢ် မံမီၢ်ဝဲ မနုၤလဲၣ်. ​—ကွၢ် အဆၢဖိ ၂၀ ဒီး ၂၁.

• (၂) တၢ်ကကဲထီၣ်အသးဒီး သ့ၣ်တထူၣ်န့ၣ်ဒ်လဲၣ်. ​—ကွၢ် အဆၢဖိ ၂၃.

• (၃) တၢ်ဆၢကတီၢ် “နွံနံၣ်” ဝံၤအလီၢ်ခံ တၢ်ကကဲထီၣ် အသးဒ်လဲၣ်.​—ကွၢ် အဆၢဖိ ၂၆.

တၢ်မံမီၢ်လၢ အဘၣ်ဃးဒီး သ့ၣ်တထူၣ်န့ၣ် အဘၣ်ထွဲဒီး ကစၢ်ယွၤအဘီအမုၢ်ဒ်လဲၣ်

ဝံအတၢ်စံးပာ် (ဒၤနံးယ့လး ၄:​၂၀-၃၆)

တၢ်ပၢတၢ်ပြး

(၁) သ့ၣ်ဖးဒိၣ်တထူၣ်

တၢ်ပၢတၢ်ပြး ကတၢၢ်ကွံာ်

(၂) “ကူာ်လီၤကွံာ် သ့ၣ်တထူၣ်န့ၣ်” ဒီး “တၢ်ဆၢကတီၢ် ကလဲၤပူၤကွံာ် နွံနံၣ်”

တၢ်ပၢတၢ်ပြး အိၣ်ထီၣ်က့ၤ

(၃) “နကပၢဘၣ်ကဒါက့ၤ နဘီမုၢ်”

ဖဲဝံအတၢ်စံးပာ်တခါအံၤ ဟဲလၢထီၣ်ပှဲၤထီၣ် အဆိကတၢၢ်တဘျီန့ၣ် . . .

• (၄) သ့ၣ်တထူၣ်အံၤ ဒိလီၤဝဲ မတဂၤလဲၣ်. ​—ကွၢ် အဆၢဖိ ၂၂.

• (၅) စီၤနဘူၤကးန့စၢ် အတၢ်ပၢတၢ်ပြး ကတၢၢ်ကွံာ် အခါဖဲလဲၣ်.​—ဖး ဒၤနံးယ့လး ၄:၂၉–၃၃.

• (၆) တၢ်ဆၢကတီၢ် “နွံနံၣ်” ဝံၤအလီၢ်ခံ တၢ်ကဲထီၣ်အသးဒီး စီၤနဘူၤကးန့စၢ်ဒ်လဲၣ်.​—ဖး ဒၤနံးယ့လး ၄:​၃၄-၃၆.

ဝံအတၢ်စံးပာ်တခါအံၤ ဟဲလၢထီၣ်ပှဲၤထီၣ် အဆိကတၢၢ်တဘျီ

တၢ်ပၢတၢ်ပြး

(၄) ဘၤဘူၤလိၣ် အစီၤပၤနဘူၤကးန့စၢ်

တၢ်ပၢတၢ်ပြး ကတၢၢ်ကွံာ်

(၅) ချ.ခ.န ၆၀၆ နံၣ်ဝံၤအလီၢ်ခံ စီၤနဘူၤကးန့စၢ် ပျုၢ်ထီၣ်အဃိ အတပၢတၢ်လၢၤဘၣ် နွံနံၣ်ညါ

တၢ်ပၢတၢ်ပြး အိၣ်ထီၣ်က့ၤ

(၆) စီၤနဘူၤကးန့စၢ် တပျုၢ်လၢၤဘၣ်အဃိ အဝဲစးထီၣ် ပၢက့ၤတၢ်

ဖဲဝံအတၢ်စံးပာ်တခါအံၤ ဟဲလၢထီၣ်ပှဲၤထီၣ် ခံဘျီတဘျီန့ၣ် . . .

• (၇) သ့ၣ်တထူၣ်အံၤ ဒိလီၤဝဲ မတၤတဖၣ်လဲၣ်. ​—ဖး ၁ ကွဲးနီၣ်တၢ် ၂၉:၂၃.

• (၈) စီၤပၤတဖၣ် လၢအဘၣ်တၢ်ဒိလီၤအီၤ ဒ်သ့ၣ်တထူၣ်အံၤန့ၣ် အတၢ်ပၢတၢ်ပြး ကတၢၢ်ကွံာ် အခါဖဲလဲၣ်. ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ စီၤပၤတဖၣ်အံၤ အတၢ်ပၢ တက့ၤအိၣ်ထီၣ်ဒံးဘၣ်န့ၣ် ပသ့ၣ်ညါဘၣ်ဒ်လဲၣ်.​—ဖး လူၤကၣ် ၂၁:၂၄.

• (၉) တၢ်ပၢတၢ်ပြး အိၣ်ထီၣ်က့ၤလၢ အခါဖဲလဲၣ် ဒီးလၢတၢ်လီၢ်ဖဲလဲၣ်.

ဝံအတၢ်စံးပာ်တခါအံၤ ဟဲလၢထီၣ်ပှဲၤထီၣ်ဝဲ ခံဘျီတဘျီ

တၢ်ပၢတၢ်ပြး

(၇) အံၣ်စရ့လး အစီၤပၤတဖၣ် လၢအပၢဘၣ် ကစၢ်ယွၤအပှၤဂီၢ်မုၢ်

တၢ်ပၢတၢ်ပြး ကတၢၢ်ကွံာ်

(၈) ပှၤမၤဟးဂီၤကွံာ် ဝ့ၢ်ယရူၤၡလ့ၣ် ဒီးလၢ ၂၅၂၀ နံၣ်အတီၢ်ပူၤန့ၣ် အံၣ်စရ့လး အစီၤပၤတဖၣ် တပၢဘၣ်တၢ်လၢၤဘၣ်

တၢ်ပၢတၢ်ပြး အိၣ်ထီၣ်က့ၤ

(၉) ယ့ၣ်ၡူး စးထီၣ်ပၢတၢ်လၢမူခိၣ် ဒ်ကစၢ်ယွၤအဘီအမုၢ် အစီၤပၤအသိး

၅. စးထီၣ်လၢ ၁၉၁၄ နံၣ်န့ၣ် ဟီၣ်ခိၣ်တၢ်အိၣ်သး ဆီတလဲလံ

ကွၢ်တၢ်ဂီၤမူ.

တၢ်ဂီၤမူ– ဟီၣ်ခိၣ်တၢ်အိၣ်သး ဆီတလဲအသး စးထီၣ်လၢ ၁၉၁၄ နံၣ်လံၤလံၤလံ (၁:၁၀)

ယ့ၣ်ၡူး တဲဆိပာ်စၢၤဝဲလၢ အမ့ၢ်ကဲထီၣ်စီၤပၤန့ၣ် ဟီၣ်ခိၣ်တၢ်အိၣ်သး ကကဲထီၣ်အသးဒ်လဲၣ်. ဖး လူၤကၣ် ၂၁:​၉-၁၁ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• တၢ်အိၣ်သးလၢ လံာ်စီဆှံအဆၢတဖၣ်အံၤ ပာ်ဖျါထီၣ်ဝဲန့ၣ် နထံၣ်ဘၣ်ဒီး နၢ်ဟူဘၣ် တခါခါလံဧါ.

တၢ်မၢဖိပီလူး တဲဖျါထီၣ်ဝဲ လၢမုၢ်နံၤခံကတၢၢ် ဖဲပှၤဟီၣ်ခိၣ်ဖိ ပၢဒံးတၢ်အဆၢကတီၢ်န့ၣ် ပှၤဟီၣ်ခိၣ်ဖိ အတၢ်ပာ်သူၣ်ပာ်သး ဒီးအလုၢ်လၢ်သကဲာ်ပဝး ကအိၣ်ဒ်လဲၣ်. ဖး ၂ တံၤမသ့း ၃:​၁-၅ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• မုၢ်မဆါတနံၤအံၤ နထံၣ်ဘၣ် ပှၤဟီၣ်ခိၣ်ဖိ ပာ်ဖျါထီၣ် အတၢ်ပာ်သူၣ်ပာ်သး ဒီးအလုၢ်လၢ်သကဲာ်ပဝး ဒ်အံၤဧါ.

၆. ပာ်ဖျါထီၣ်လၢ နနာ်လၢ ခဲအံၤ ကစၢ်ယွၤအဘီအမုၢ် ပၢတၢ်လံ

ဖး မးသဲ ၂၄:​၃, ၁၄ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–

• တၢ်မၤအရ့ဒိၣ်တခါလၢ အပာ်ဖျါထီၣ်ဝဲလၢ ခဲအံၤ ကစၢ်ယွၤအဘီအမုၢ် ပၢတၢ်လံန့ၣ် မ့ၢ်တၢ်မၤမနုၤလဲၣ်.

• နပၣ်ဃုာ်လၢ တၢ်မၤလၢ အရ့ဒိၣ်တခါအံၤ ကသ့ဒ်လဲၣ်.

ခဲအံၤ ကစၢ်ယွၤအဘီအမုၢ် ပၢတၢ်လံ ဒီးတၢ်ဆၢကတီၢ်လၢ ကစၢ်ယွၤအဘီအမုၢ် ကပၢက့ၤ ဟီၣ်ခိၣ်ဒီဘ့ၣ်န့ၣ် အိၣ်ဘူးထီၣ်လံ. ဖး ဧ့ၤဘြံၤ ၁၀:​၂၄, ၂၅ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• ဒ်ပ “ထံၣ်မုၢ်နံၤ ဟဲဘူးထီၣ်ဝဲအသိး” ပဝဲကိးဂၤဒဲး ပကြၢးမၤတၢ်မနုၤလဲၣ်.

တၢ်ဂ့ၢ်လၢအရ့ဒိၣ်

ဝံအတၢ်စံးပာ်, တၢ်ဒွးတၢ်အနံၣ်အလါ လၢလံာ်စီဆှံပူၤ ဒီးဟီၣ်ခိၣ်တၢ်အိၣ်သးတဖၣ်န့ၣ် ပာ်ဖျါထီၣ်ဝဲလၢ ခဲအံၤ ကစၢ်ယွၤအဘီအမုၢ် ပၢတၢ်လံ. ပနာ်လၢ ကစၢ်ယွၤအဘီအမုၢ် ပၢတၢ်လံန့ၣ် ပပာ်ဖျါထီၣ်အီၤ သ့ခီဖျိ ပတဲဘၣ်ပှၤဂၤ ဒီးပထီၣ်တၢ်အိၣ်ဖှိၣ်.

တၢ်ကွၢ်ကဒါက့ၤ

• လံာ်ဒၤနံးယ့လး တဲဆိပာ်စၢၤဝဲလၢ တၢ်ဆၢကတီၢ် နွံနံၣ် မ့ၢ်ဝံၤန့ၣ် တၢ်ကကဲထီၣ်အသးဒ်လဲၣ်.

• ဘၣ်မနုၤအဃိ နနာ်လၢ ကစၢ်ယွၤအဘီအမုၢ် စးထီၣ်ပၢတၢ်လၢ ၁၉၁၄ နံၣ်လဲၣ်.

• နနာ်လၢ ခဲအံၤ ကစၢ်ယွၤအဘီအမုၢ် ပၢတၢ်လံန့ၣ် နပာ်ဖျါထီၣ် ကသ့ဒ်လဲၣ်.

ဃုသ့ၣ်ညါ

ဖးကွၢ် ဘၣ်ဃးဒီး ပှၤလၢအကွဲး တၢ်စံၣ်စိၤတဲစိၤ ဒီးပှၤအဂၤတဖၣ် တဲဖျါထီၣ်ဝဲလၢ စးထီၣ်လၢ ၁၉၁၄ နံၣ်န့ၣ် ဟီၣ်ခိၣ်တၢ်အိၣ်သး ဆီတလဲအသးဒ်လဲၣ်.

“ဆၢကတီၢ်ဖဲ လုၢ်လၢ်သကဲာ်ပဝး လၢအတဂ့ၤဘၣ် အိၣ်အါထီၣ်ဝဲအါမး” (ပၢၢ်ထီၣ်! လါအ့ဖြ့ၣ် ၂၀၀၇)

ဖးကွၢ် ဘၣ်ဃးဒီး ဝံအတၢ်စံးပာ်ဖဲ မးသဲ ၂၄:၁၄ န့ၣ်ဆီတလဲဝဲ ပိာ်ခွါတဂၤ အတၢ်အိၣ်မူဒ်လဲၣ်.

“ယဘၣ်သူၣ်ဘၣ်သး ဘ့း(စ်)ဘီ(လ်) အါန့ၢ်ဒံး တၢ်အဂၤ” (တၢ်ဂ့ၢ်လၢ အအိၣ်လၢ တၢးထီခိးတၢ် အပူၤ)

ဘၣ်မနုၤအဃိ ပတဲလၢ ဝံအတၢ်စံးပာ် လၢအအိၣ်ဖဲ ဒၤနံးယ့လး အဆၢဒိၣ် ၄ အပူၤန့ၣ် ဘၣ်ထွဲလိာ်သးဒီး ကစၢ်ယွၤအဘီအမုၢ်လဲၣ်.

“ကစၢ်ယွၤအဘီအမုၢ် စးထီၣ်ပၢတၢ်လၢ အခါဖဲလဲၣ် (အကူာ် ၁)” (တၢးထီခိးတၢ်, လါအီးကထိဘၢၣ် ၁, ၂၀၁၄)

တၢ်ဆၢကတီၢ် “နွံနံၣ်” လၢအအိၣ်လၢ ဒၤနံးယ့လး အဆၢဒိၣ် ၄ အပူၤ ကတၢၢ်ဝဲဖဲ ၁၉၁၄ နံၣ်န့ၣ် ပသ့ၣ်ညါဘၣ်ဒ်လဲၣ်.

“ကစၢ်ယွၤအဘီအမုၢ် စးထီၣ်ပၢတၢ်လၢ အခါဖဲလဲၣ် (အကူာ် ၂)” (တၢးထီခိးတၢ်, လါနိၣ်ဝ့ဘၢၣ် ၁, ၂၀၁၄)

ကစၢ်ယွၤအဘီအမုၢ် ပၢတၢ်လၢ မူခိၣ်လံ. တယံာ်လၢၤဘၣ်န့ၣ် ကစၢ်ယွၤအဘီအမုၢ် ကပၢဟီၣ်ခိၣ် ဒီးကမၤဂ့ၤထီၣ်က့ၤ ဟီၣ်ခိၣ်တၢ်အိၣ်သးလီၤ. အဃိ ခဲအံၤ ပကတဲသကိး တၢ်လၢ ကစၢ်ယွၤအဘီအမုၢ် ကမၤဝဲတနီၤ.

၁. ကစၢ်ယွၤအဘီအမုၢ် ကဒုးအိၣ်ထီၣ်က့ၤ တၢ်ဃူတၢ်ဖိး ဒီးတၢ်တီတၢ်လိၤ လၢဟီၣ်ခိၣ်ချၢဒ်လဲၣ်.

ဖဲအၢ်မက့းဒိၣ် အတၢ်ဒုးအဆၢကတီၢ်န့ၣ် ယ့ၣ်ၡူးလၢအမ့ၢ် ကစၢ်ယွၤအဘီအမုၢ် အစီၤပၤန့ၣ် ကမၤဟးဂီၤကွံာ် ပှၤအၢပှၤသီ ဒီးဟီၣ်ခိၣ်အတၢ်ပၢတၢ်ပြးတဖၣ်. (ဖး လီၣ်ဖျါ ၁၆:​၁၄, ၁၆) ဖဲန့ၣ်အခါ လံာ်စီဆှံ အတၢ်အၢၣ်လီၤ လၢအမ့ၢ် “တစိၢ်ဖိဒီးန့ၣ် ပှၤအၢပှၤသီ တအိၣ်လၢၤဘၣ်” န့ၣ်ကဟဲလၢထီၣ်ပှဲၤထီၣ်ဝဲလီၤ. (စံးထီၣ်ပတြၢၤ ၃၇:၁၀) တကးဒံးဘၣ် ယ့ၣ်ၡူး ကဒုးအိၣ်ထီၣ်ဝဲ တၢ်ဃူတၢ်ဖိး ဒီးတၢ်တီတၢ်လိၤ လၢဟီၣ်ခိၣ်ဒီဘ့ၣ်ညါ ခီဖျိ ကစၢ်ယွၤအဘီအမုၢ်.​—ဖး ယၡါယၤ ၁၁:၄.

၂. ဖဲကစၢ်ယွၤ အတၢ်ဘၣ်သး ဟဲလၢထီၣ်ပှဲၤထီၣ်လၢ ဟီၣ်ခိၣ်ချၢအခါ ပှၤဟီၣ်ခိၣ်ဖိ အတၢ်အိၣ်မူ ကမၤအသးဒ်လဲၣ်.

လၢကစၢ်ယွၤအဘီအမုၢ် အတၢ်ပၢဖီလာ်န့ၣ် “ပှၤတီပှၤလိၤ ကန့ၢ်သါဘၣ် ဟီၣ်ခိၣ် ဒီးအဝဲသ့ၣ် ကအိၣ်ဘၣ်ဝဲလၢ ဟီၣ်ခိၣ်ချၢ လီၤထူလီၤယိာ်လီၤ.” (စံးထီၣ်ပတြၢၤ ၃၇:၂၉) ထံၣ်တမှံကွၢ် ပှၤခဲလၢာ်လၢ ဟီၣ်ခိၣ်ချၢန့ၣ် ကကဲပှၤတီပှၤလိၤ, ကအဲၣ်ယဟိဝၤယွၤ ဒီးကအဲၣ်လိာ်သး တဂၤဒီးတဂၤ. ပှၤတဆိးက့ နီတဂၤဘၣ် ဒီးပှၤကိးဂၤဒဲး ကအိၣ်မူဘၣ် လီၤထူလီၤယိာ်.

၃. ပှၤအၢပှၤသီ ဟးဂီၤကွံာ်ဝံၤအလီၢ်ခံ ကစၢ်ယွၤအဘီအမုၢ် ကမၤဝဲမနုၤလဲၣ်.

ပှၤအၢပှၤသီ ဟးဂီၤကွံာ်ဝံၤအလီၢ်ခံ ယ့ၣ်ၡူးကပၢတၢ် ဒ်စီၤပၤအသိး အနံၣ်တကထိ. ဖဲအနံၣ်တကထိ အတီၢ်ပူၤန့ၣ် ယ့ၣ်ၡူး ဒီးပှၤလၢအပၢဃုာ်တၢ်ဒီးအီၤ အဂၤ တကလီၢ် လွံၢ်ကလး လွံၢ်ကထိန့ၣ် ကမၤစၢၤ ပှၤလၢအအိၣ်မူဘၣ် လၢဟီၣ်ခိၣ် ဒ်သိးအဝဲသ့ၣ်ကကဲထီၣ် ပှၤလၢပှၤပှဲၤ. ဒီးအနံၣ်တကထိ မ့ၢ်ပှဲၤထီၣ်န့ၣ် ဟီၣ်ခိၣ်အံၤ ကမ့ၢ်ဝဲ ပၤရဒံစူးလၢ အဃံအလၤ. ဒီးခီဖျိလၢ ပှၤဟီၣ်ခိၣ်ဖိတဖၣ် ကဒိကနၣ်ဝဲ ယဟိဝၤယွၤ အတၢ်သိၣ်တၢ်သီအဃိ အဝဲသ့ၣ် ကအိၣ်ဒီးတၢ်သးခု. အနံၣ်တကထိ မ့ၢ်ဝံၤန့ၣ် ယ့ၣ်ၡူးကဟ့ၣ်က့ၤ ဘီမုၢ်လၢ အပါယဟိဝၤယွၤ အစုပူၤ. ဒီးယဟိဝၤယွၤ အ “မံၤ [ကဘၣ်] တၢ်ပာ်စီဆှံအီၤ.” (မးသဲ ၆:​၉, ၁၀) ကစၢ်ယွၤအဘီအမုၢ်အံၤ ကပာ်ဖျါထီၣ်ဝဲလၢ ယဟိဝၤယွၤန့ၣ် အကဲဝဲပှၤပၢတၢ် လၢအဂ့ၤတဂၤ ဒီးအကဲပှၤလၢ အသူၣ်အိၣ်သးအိၣ် ပှၤလၢအအိၣ်လၢ အတၢ်ပၢအဖီလာ်. ဒီးလၢခံကတၢၢ်န့ၣ် ယဟိဝၤယွၤ ကမၤဟးဂီၤကွံာ် မုၣ်ကီၤလံၢ်, တၢ်ဝံတၢ်နါတဖၣ် ဒီးပှၤတဂၤဂ့ၤ တဂၤဂ့ၤလၢ အထီဒါ ကစၢ်ယွၤအတၢ်ပၢ. (လီၣ်ဖျါ ၂၀:​၇-၁၀) တကးဒံးဘၣ် တၢ်အိၣ်သးအဂ့ၤ လၢကစၢ်ယွၤအဘီအမုၢ် ဒုးအိၣ်ထီၣ်ဝဲန့ၣ် ကအိၣ်ဝဲ လီၤထူလီၤယိာ်.

ဃုသ့ၣ်ညါအါထီၣ်

၄. ကစၢ်ယွၤအဘီအမုၢ် ကမၤကတၢၢ်ကွံာ် ပှၤဟီၣ်ခိၣ်ဖိ အတၢ်ပၢတၢ်ပြး

လံာ်စီဆှံ တဲဝဲလၢ “ဖဲပှၤဟီၣ်ခိၣ်ဖိ ကဒဲကဒဲ ပၢလိာ်သး အဆၢကတီၢ်န့ၣ် ပှၤဘၣ်နးဘၣ်ဖှီၣ် ထီဘိ.” (စံၣ်တဲၤတဲလီၤတၢ် ၈:၉) အဃိ ယဟိဝၤယွၤ ကသူဝဲအဘီအမုၢ် ဒ်သိးကမၤကတၢၢ်ကွံာ်တၢ်တတီတလိၤတဖၣ်အံၤ.

ဖး ဒၤနံးယ့လး ၂:၄၄ ဒီး ၂ သ့းစၤလနံ ၁:​၆-၈ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–

• ပှၤဟီၣ်ခိၣ်ဖိလၢ အပၢတၢ်တဖၣ် ဒီးပှၤလၢအဆီၣ်ထွဲအဝဲသ့ၣ်န့ၣ် ယဟိဝၤယွၤ ဒီးအဖိခွါယ့ၣ်ၡူး ကမၤအဝဲသ့ၣ်ဒ်လဲၣ်.

• ဒ်နမၤလိဘၣ်အသိး ဘၣ်မနုၤအဃိ နနာ်လၢ တၢ်ခဲလၢာ်လၢ ယဟိဝၤယွၤဒီးယ့ၣ်ၡူး ကမၤဝဲန့ၣ် ကတီဝဲလိၤဝဲလဲၣ်.

၅. ယ့ၣ်ၡူးန့ၣ် အကဲစီၤပၤလၢ အဂ့ၤကတၢၢ်တဂၤ

ဒ်ကစၢ်ယွၤအဘီအမုၢ် အစီၤပၤတဂၤအသိး ယ့ၣ်ၡူးကမၤတၢ်အါမံၤလၢ အကဲဘျုးလၢ ပှၤဟီၣ်ခိၣ်ဖိအဂီၢ်. ကွၢ်တၢ်ဂီၤမူ လၢအပာ်ဖျါထီၣ်ဝဲလၢ ယ့ၣ်ၡူးအဲၣ်ဒိးမၤစၢၤ ပှၤဟီၣ်ခိၣ်ဖိ ဒီးကစၢ်ယွၤဟ့ၣ်လီၤအီၤ တၢ်စိတၢ်ကမီၤလၢ အကမၤစၢၤ ပှၤဟီၣ်ခိၣ်ဖိ.

တၢ်ဂီၤမူ– ယ့ၣ်ၡူးပာ်ဖျါထီၣ်ဝဲ တၢ်လၢယွၤအဘီအမုၢ် ကမၤဝဲ (၁:၁၃)

ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ တၢ်လၢအမၤဝဲတဖၣ်န့ၣ် ပာ်ဖျါထီၣ်ဝဲ တၢ်လၢကစၢ်ယွၤအဘီအမုၢ် ကမၤဝဲလၢခါဆူညါ. တၢ်ဆိၣ်ဂ့ၤ လၢလာ်တဖၣ်အံၤ နအဲၣ်ဒိးထံၣ်ဘၣ်အီၤ အဒိၣ်ကတၢၢ် ဖဲလဲၣ်တခါလဲၣ်. ဖးလံာ်စီဆှံအဆၢ လၢလာ်တဖၣ်အံၤ လၢအပာ်ဖျါထီၣ်န့ၢ်ပှၤ တၢ်ဆိၣ်ဂ့ၤလၢ ပကဒိးန့ၢ်ဘၣ်တဖၣ်.

၆. ခါဆူညါန့ၣ် ကစၢ်ယွၤအဘီအမုၢ် ကဒုးအိၣ်ထီၣ် တၢ်အိၣ်သး လၢအဂ့ၤကတၢၢ်

တၢ်ဂီၤမူ– ထံၣ်စိပာ်စၢၤ တၢ်လၢ အကဟဲလၢ ခါဆူညါ (၄:၃၈)

ဖး စံးထီၣ်ပတြၢၤ ၁၄၅:၁၆ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• နသ့ၣ်ညါဘၣ်လၢ ယဟိဝၤယွၤက “မၤလၢပှဲၤ တၢ်သးသမူခဲလၢာ် အတၢ်မိၣ်န့ၢ်သးလီတဖၣ်” အဃိ နသးမၤသးဒ်လဲၣ်.

တၢ်ဂ့ၢ်လၢအရ့ဒိၣ်

ကစၢ်ယွၤအဘီအမုၢ် ကမၤလၢထီၣ်ပှဲၤထီၣ်ဝဲ ကစၢ်ယွၤအတၢ်ဘၣ်သး. ဘီမုၢ်အံၤ ကမၤကဲထီၣ်က့ၤ ဟီၣ်ခိၣ်ဒီဘ့ၣ်လၢ ပၤရဒံစူး ဒီးလၢဟီၣ်ခိၣ်အံၤ ကအိၣ်တ့ၢ်က့ၤထဲ ပှၤလၢအဂ့ၤ ဒီးအဝဲသ့ၣ် ကဘူၣ်ထီၣ်ဘါထီၣ် ယဟိဝၤယွၤ လီၤထူလီၤယိာ်.

တၢ်ကွၢ်ကဒါက့ၤ

• ကစၢ်ယွၤအဘီအမုၢ် ကပာ်စီဆှံ ယဟိဝၤယွၤအမံၤ လၢကျဲဒ်လဲၣ်.

• ကစၢ်ယွၤအဘီအမုၢ် ကမၤလၢထီၣ်ပှဲၤထီၣ် လံာ်စီဆှံ အတၢ်စံးပာ်တဖၣ်န့ၣ် ဘၣ်မနုၤအဃိ ပနာ်သ့လဲၣ်.

• တၢ်ဆိၣ်ဂ့ၤလၢ ပကဒိးန့ၢ်ဘၣ် လၢကစၢ်ယွၤအဘီအမုၢ် တၢ်ပၢဖီလာ်န့ၣ် နအဲၣ်ဒိးထံၣ်ဘၣ် အဒိၣ်ကတၢၢ် ဖဲလဲၣ်တခါလဲၣ်.

ဃုသ့ၣ်ညါ

ဖးကွၢ် တၢ်ဂ့ၢ်လၢ အပာ်ဖျါထီၣ်ဝဲ အၢ်မက့းဒိၣ်န့ၣ် မ့ၢ်မနုၤလဲၣ်.

“အၢ်မက့းဒိၣ် အတၢ်ဒုးန့ၣ် မ့ၢ်မနုၤလဲၣ်” (တၢ်မၤလိလၢ အအိၣ်လၢ online အဖီခိၣ်)

ဃုသ့ၣ်ညါအါထီၣ် ဘၣ်ဃး “တၢ်နးတၢ်ဖှီၣ်ဖးဒိၣ်” အဂ့ၢ်.—မးသဲ ၂၄:၂၁.

“တၢ်နးတၢ်ဖှီၣ်ဖးဒိၣ်န့ၣ် မ့ၢ်မနုၤလဲၣ်” (တၢ်မၤလိလၢ အအိၣ်လၢ online အဖီခိၣ်)

ကွၢ်တၢ်ဂီၤမူ လၢအပာ်ဖျါထီၣ်ဝဲ ဟံၣ်ဖိဃီဖိတဖၣ် ထံၣ်တမှံလၢ အဝဲသ့ၣ်အိၣ်ဘၣ်တပူၤဃီလၢ ပၤရဒံစူးအပူၤန့ၣ် ကသ့ဒ်လဲၣ်.

ထံၣ်တမှံကွၢ်လၢ နအိၣ်လၢပၤရဒံစူးအပူၤ (၁:၅၀)

လၢတၢ်လဲၤခီဖျိ လၢအခိၣ်တီမ့ၢ်ဝဲ “ယသးဘၣ်တံာ်တာ်လၢ တၢ်သံကွၢ်အါဖျၢၣ်အဃိ” အပူၤန့ၣ် ဖးဘၣ်ဃးဒီး ပှၤတဂၤလၢ အထီဒါက့ၤ ပဒိၣ်ပပှၢ်န့ၣ် အထံၣ်န့ၢ်ဝဲ တၢ်စံးဆၢလၢ အဟးဃုဝဲ.

“လံာ်စီဆှံဆီတလဲ ပတၢ်အိၣ်မူ” (တၢ်ဂ့ၢ်လၢ အအိၣ်လၢ တၢးထီခိးတၢ် အပူၤ)