Yakobi mpe Ezau metula kiyenge

Yehova lakaka Yakobi ti yandi ketanina yandi kaka mutindu yandi taninaka Abrahami mpe Yisaka. Yakobi kuendaka vuanda na buala yina bakebokidilaka Harane, kuna yandi kuelaka, yandi butaka bana mingi, mpe yandi kumaka na kimvuama mingi.

Na manima Yehova tubilaka Yakobi: ‘Vutuka na buala ya batata na nge.’ Na yau Yakobi mpe dibuta na yandi bandaka kusala vuayaje mosi ya yinda samu na kuvutuka. Na nzila, bantu kuizaka kutana na Yakobi mpe batubaka: ‘Mpangi na nge Ezau kena kuiza kintuadi na babakala 400!’ Yakobi vuandaka banga ti Ezau sala yandi mpe dibuta na yandi yimbi. Yandi sambilaka Yehova: ‘Vukisa munu na diboko ya mpangi na munu.’ Kilumbu landaka, Yakobi tindilaka Ezau dikabu ya mameme, bankombo, bangombe, bakamela, mpe bampunda mingi.

Na mpipa, ntangu Yakobi vuandaka yandi mosi, yandi monaka mbasi mosi! Mbasi yango bandaka kunuana na yandi. Banuanaka tii na sunka. Atako Yakobi monaka mpasi, yandi bikaka ve. Mbasi yango tubaka: ‘Bika munu kuenda.’ Kasi Yakobi tubaka: ‘Munu kebika nge kaka kana nge mesakumuna munu.’

Nsukansuka mbasi yango sakumunaka Yakobi. Na ntangu yango Yakobi bakusaka ti Yehova kebika ve Ezau sala yandi yimbi.

Na sunka ntangu Yakobi vuandaka tala na distanse, yandi monaka Ezau na babakala 400. Yakobi kuendaka na ntuala ya dibuta na yandi mpe yandi fukamaka mbala 7 na ntuala ya mpangi na yandi. Ezau zawulaka mpe yandi yambaka Yakobi. Bampangi yango zole dilaka mpe batulaka kiyenge. Nge mekanisa ti Yehova kukimonaka yinki mutindu na bangolo yina Yakobi salaka samu na kutula kiyenge na mpangi na yandi?

Na manima Ezau vutukaka na yinzo na yandi, mpe Yakobi diaka kuendaka na yinzo na yandi. Yakobi vuandaka na bana ya babakala 12. Bankumbu na bau vuandaka Riben, Simeone, Levi, Yuda, Dani, Neftali, Gade, Ashere, Isakare, Zebulone, Yozefi, mpe Benjamen. Yehova sadilaka Yozefi, mosi ya bana ya Yakobi samu na kuvukisa bisadi na Yandi. Nge mezaba na yinki mutindu? Beto ketubila yau.