Gideoni nungaka bantu ya Madiani

Na manima, Yisaele pesaka diaka Yehova mukongoni mpe babandaka kusambila banzambi ya luvunu. Samu na bamvula 7, bantu ya Madiani vuandaka yiba bibulu ya Bayisaele mpe bavuandaka bebisa bilanga na bau. Samu na kutina bantu ya Madiani, Bayisaele vuandaka suama na madusu ya mabanga ya nene mpe na bamongo. Basambilaka Yehova samu yandi vukisa bau. Na yau, Yehova tindaka mbasi na ntuenia mosi ya bakala na nkumbu ya Gideoni. Mbasi yango tubaka: ‘Yehova mepona nge samu nge vuanda soda mosi ya kilendo.’ Gideoni yuvusaka: ‘Yinki mutindu munu kevukisa Yisaele? Munu kele muntu mpamba.’

Yinki mutindu Gideoni zabaka ti Yehova ponaka yandi mpenza? Yandi tulaka nkanda mosi ya dimeme na ntoto mpe yandi tubilaka Yehova ti: ‘Na sunka, kana mamue mebodisa kaka nkanda ya dimeme yayi kasi ntoto mebikana ya kuyuma, munu kezaba ti nge zola munu vukisa Yisaele.’ Na sunka ya kilumbu landaka, nkanda ya dimeme yango bolaka na maza kasi ntoto vuandaka ya kuyuma! Kasi Gideoni lombaka diaka ti na sunka ya kilumbu kelanda nkanda ya dimeme yango bikana ya kuyuma mpe ntoto bola na maza. Ntangu diambu yango salamaka, Gideoni ndimaka ti Yehova ponaka yandi. Yandi sangisaka basoda na yandi samu na kunuanisa bantu ya Madiani.

Yehova tubilaka Gideoni: ‘Munu kenungisa Bayisaele. Kasi lokola nge kele na basoda mingi, beno lenda kanisa ti beno menunga mvita na ngolo na beno mosi. Tubila muntu nionso yina kena kubanga yandi vutuka na yinzo na yandi.’ Na yau, basoda 22 000 vutukaka, mpe basoda 10 000 kaka bikanaka. Na manima Yehova tubaka: ‘Basoda kele kaka mingi. Nata bau na maza, mpe tubila bau bakunua maza. Baka kaka bayina kena kutala bambeni ntangu bakena kunua maza.’ Kaka bantu 300 vuandaka ya kukenga ntangu bavuandaka kunua maza. Yehova lakaka ti kaka mua babakala yango nde kenunga basoda 135 000 ya Madiani.

Na mpipa yango, Yehova tubilaka Gideoni: ‘Ntangu mekoka samu na kunuanisa bantu ya Madiani!’ Gideoni pesaka bantu na yandi bampoka mpe bibungu ya nene yina vuandaka na batorshe na kati na yau. Yandi tubilaka bau: ‘Beno tala munu, mpe beno sala kaka mutindu munu kesala.’ Gideoni bulaka mpoka na yandi, yandi tololaka kibungu na yandi, yandi vuandaka ningisa torshe na yandi, mpe yandi gangaka: ‘Mupanga ya Yehova mpe ya Gideoni!’ Babakala nionso 300 salaka kaka mutindu yina. Bantu ya Madiani bangaka mpe batinaka na bandambu nionso. Na mvualangani yango, babandaka kuvondasana bau na bau. Na mbala yayi diaka, Yehova sadisaka Bayisaele samu banunga bambeni na bau.