DISOLO YA NDONGOKOLO 31
Tanina diluaku yina nge kele na yau ya kusambila
‘Bika kisambu na munu vuanda lokola mpaka na malasi yina bamebongisa na ntuala na nge.’—NK. 141:2.
MUYIMBU 47 Bondelá Yehova mokolo na mokolo
NA NKUFIa
1. Yinki mutindu beto fueti tadila diluaku na beto ya kusambila Yehova?
BETO kele na diluaku mosi ya nene ya kupusana penepene na Mvangi ya dizulu mpe ya ntoto na nzila ya kisambu. Kanisa ntete: Beto lenda tubila Yehova mambu nionso yina kele na ntima na beto na konso ntangu mpe na konso ndinga, kondua beto wizana ntangu mpe kisika yina beto fueti sala yau. Beto lenda sambila yandi ntangu beto kele na mfulu ya opitale to na buloko, kutulaka ntima ti Tata na beto ya nzola kekuwa beto. Beto kele mpenza na butondi samu na dikabu yango.
2. Yinki mutindu Ntinu Davidi monisaka ti yandi vuandaka sepela na diluaku ya kisambu?
2 Ntinu Davidi vuandaka sepela na diluaku yango ya kusambila. Yandi yimbidilaka Yehova: ‘Bika kisambu na munu vuanda lokola mpaka na malasi yina bamebongisa na ntuala na nge.’ (Nk. 141:1, 2) Na ntangu ya Davidi, mpaka na malasi ya nlongo yina banganga-nzambi vuandaka sadila na nsambudulu ya kuvedila, bavuandaka bongisa yau na dikebi nionso. (Kub. 30:34, 35) Davidi vuandaka sepela kukanisa mbotembote samu na mambu yina yandi vuandaka tuba ntangu yandi vuandaka sambila Yehova, mutindu kaka bantu yina vuandaka bongisa mpaka na malasi vuandaka sala yau na dikebi nionso. Yau diaka kevuandaka mpenza nsatu na beto. Beto kezolaka ti bisambu na beto sepedisa Yehova.
3. Yinki kikadulu beto fueti vuanda na yau ntangu beto kena kusambila Yehova, mpe samu na yinki?
3 Ntangu beto kena kusambila Yehova, beto fueti manga kuvutukilaka mbala na mbala kaka bampova mosi. Kasi, beto fueti sambilaka na luzitu nionso. Kanisa na bavizion yina Yezaya, Ezekiele, Daniele, mpe Yoane bakaka. Bavizion yango kele ya kusuasana, kasi yakele na kima mosi yina mekokanisa yau. Bau nionso kena kutubila Yehova lokola Ntinu yina meluta nene. Yezaya ‘monaka Yehova mevuanda na kiti mosi ya kimfumu ya yinda mpe ya kunanguka.’ (Yez. 6:1-3) Ezekiele monaka Yehova mevuanda na zulu ya dikalu na yandi na dizulu, yina ‘ntemo mosi . . . lokola arkansiele’ vuandaka nzinganzinga na yandi. (Eze. 1:26-28) Daniele monaka “Mbuta ya Bilumbu” mevuata bilele ya mpembe, kintuadi na tiya yina vuandaka katuka na kiti na Yandi ya kimfumu. (Dan. 7:9, 10) Mpe Yoane monaka Yehova mevuanda na kiti na yandi ya kimfumu yina kima mosi ya kitoko lokola arkansiele mezinga yandi. (Kus. 4:2-4) Ntangu beto kena kukanisa na nkembo ya Yehova yina kokana na ya muntu yankaka ve, beto kevuandaka na butondi na diluaku ya nene yina beto kele na yau ya kupusana penepene na yandi na nzila ya kisambu. Kasi yinki mutindu beto fueti sambila?
‘NA YAU, BENO FUETI SAMBILA MUTINDU YAYI’
4. Yinki dilongi beto mebaka na bampova ya ebandeli ya kisambu ya kifuani yina kele na Matayo 6:9, 10?
4 Tanga Matayo 6:9, 10. Na Disolo na zulu ya mongo, Yesu longaka banlonguki na yandi mutindu ya kusambila na mutindu yina kesepedisa Nzambi. Na manima ya kutuba ‘na yau, beno fueti sambila mutindu yayi,’ Yesu tubilaka ntete mambu ya mfunu yina kele mbala mosi na nguizani na lukanu ya Yehova: kukumisa nkumbu na Yandi nlongo; kukuiza ya Kimfumu ya Nzambi, yina kekuiza kufua bantu nionso yina keteleminaka Nzambi; mpe mambu ya kitoko yina Yandi kesala samu na ntoto mpe samu na bantu na bilumbu kena kuiza. Na kutubilaka mambu ya mutindu yina na bisambu na beto, beto kemonisa ti lukanu ya Nzambi kele na mfunu samu na beto.
5. Yehova kekuwaka ntangu beto kena kusambila yandi samu na mambu yina metadila beto mosi?
5 Na kitini yina melanda ya kisambu yango, Yesu monisaka ti yakele na mfunu kutubila mambu yina metadila beto mosi na kisambu. Beto lenda lomba Yehova pesa beto madia ya konso kilumbu, kunlemvukila masumu na beto, kutanina beto ntangu beto kena kumekama, mpe kuvukisa beto na maboko ya muntu ya yimbi. (Mat. 6:11-13) Ntangu beto kena kulomba Yehova mambu yango, beto kena kumonisa yandi ti beto mezaba ti beto kele na nsatu ya lusadusu na yandi mpe beto zola sepedisa yandi.
Yinki mambu bakala mpe nketo lenda tula na kisambu? (Tala paragrafe 6)b
6. Beto fueti sambila kaka samu na mambu yina kele na kisambu ya kifuani? Sasila.
6 Yesu zolaka ve ti banlonguki na yandi landa kaka mutindu bampova ya kisambu ya kifuani kele. Na bisambu yankaka yina Yesu salaka, yandi tubilaka mambu yankaka ya kusuasana yina vuandaka tungisa yandi na ntangu yango. (Mat. 26:39, 42; Yoa. 17:1-26) Mutindu mosi, beto fueti sambila samu na mambu nionso yina kena kutungisa beto. Ntangu beto kele na nzengolo mosi ya kubaka, beto lenda sambila samu na kulomba nduenga mpe mbakusulu. (Nk. 119:33, 34) Kana bamepesa beto kiyekua mosi ya mpasi, beto lenda sambila samu na kuzaba mutindu beto lenda sala yau. (Bin. 2:6) Bibuti lenda sambila samu na bana na bau, bana lenda sambila samu na bibuti na bau, mpe beto nionso beto lenda mpe beto fueti sambila samu na banlonguki na beto ya Biblia mpe samu na bantu yina beto kesamuninaka. Kasi ntangu beto kena kusambila, beto fueti suka kaka ve na kulomba Yehova lusadusu.
Yinki mambu beto lenda kukumisina mpe kupesa Yehova matondo ntangu beto kena kusambila? (Tala paragrafe 7-9)c
7. Samu na yinki beto fueti kumisa Yehova na kisambu?
7 Beto fueti zimbakana ve kukumisa Yehova na bisambu na beto. Kaka Nzambi na beto nde beto fueti kumisa mingi kuluta. Yandi kele ‘mbote mpe pene ya kunlemvukila.’ Yandi kele diaka Nzambi yina ‘kemoninaka bantu kiadi mpe kefuilaka bau nkenda, yandi kefuemaka nsualu ve mpe yandi kele ya kufuluka na nzola ya kukuikama mpe kukuikama.’ (Nk. 86:5, 15) Beto kele mpenza na mfunu ya kukumisa Yehova samu na yina yandi kele mpe samu na mambu yina yandi kesalaka.
8. Yinki kele ndambu ya mambu yina beto lenda pesila Yehova matondo? (Nkunga 104:12-15, 24)
8 Katula kukumisa Yehova na bisambu na beto, beto kepesaka yandi matondo samu na bima ya kitoko yina yandi kepesaka beto. Na kifuani, beto lenda pesa yandi matondo samu na bakulere ya kitoko yina beto kemonaka na bafololo, samu na mitindu nionso ya madia ya kitoko, mpe samu na kiese ya kuvuanda na bankundi ya mbote. Tata na beto ya nzola kepesaka beto yau mpe mingi kuluta, samu kaka yasepedisa beto. (Tanga Nkunga 104:12-15, 24.) Diaka, yina meluta mfunu, beto kepesaka Yehova matondo samu na malako nionso yina yandi kepesaka beto samu beto tanina kiminu na beto ngolo mpe samu na kivuvu ya kitoko yina beto kele na yau samu na bilumbu kena kuiza.
9. Yinki lenda sadisa beto beto zimbakana ve kupesa Yehova matondo? (1 Batesalonika 5:17, 18)
9 Yalenda vuanda pete beto zimbakana kupesa Yehova matondo samu na mambu nionso yina yandi kesadilaka beto. Yinki lenda sadisa nge samu nge zimbakana ve? Nge lenda sala liste ya mambu ya kusuasana yina nge lombaka na nzila ya kisambu mpe kutalaka yau mbala na mbala samu na kumona mutindu Yehova pesaka mvutu na bisambu yango. Na manima, sala kisambu samu na kupesa yandi matondo samu na lusadusu na yandi. (Tanga 1 Batesalonika 5:17, 18.) Kanisa na diambu yayi: Beto kevuandaka na kiese mpe beto kesepelaka ntangu bantu yankaka kemonisaka butondi samu na yina beto kesadilaka bau. Mutindu mosi, kana beto kena zimbakana ve kupesa Yehova matondo samu na bamvutu na bisambu na beto, yakepesaka yandi kiese. (Kol. 3:15) Kasi yakele diaka na diambu mosi ya mfunu mingi yina beto fueti pesila Nzambi matondo.
PESA MATONDO NA YEHOVA SAMU NA MUTINDU YANDI TINDAKA MUANA NA YANDI YA NZOLA
10. Na kutadila 1 Piere 2:21, samu na yinki beto kele na mfunu ya kupesa Yehova matondo na mutindu yandi tindaka Yesu awa na ntoto?
10 Tanga 1 Piere 2:21. Beto fueti pesa Yehova matondo na mutindu yandi pesaka Muana na yandi ya nzola samu na kulonga beto. Beto kelongukaka mambu mingi yina metadila Yehova mpe mutindu ya kusepedisa yandi na kulongukaka luzingu ya Yesu. Kana beto kena kumonisa kiminu na nkayilu ya Klisto, beto lenda vuanda na nguizani ya mbote na Yehova Nzambi mpe beto kevuanda na kiyenge na Yandi.—Bar. 5:1.
11. Yinki kiyekua Yesu kele na yau na bisambu na beto yina beto kesalaka na Yehova?
11 Beto kepesaka Yehova matondo na mutindu beto lenda sambila yandi na nzila ya Muana na yandi. Yesu kele nzila yina Yehova kesadilaka samu na kupesa beto yina beto lombaka. Yehova kekuwaka mpe yandi kepesaka bamvutu na bisambu yina beto kesalaka na nzila ya nkumbu ya Yesu. Yesu sasilaka ti: ‘Konso kima yina beno kelomba na nkumbu na munu, munu kesala yau, samu Tata baka nkembo na nzila ya Muana.’—Yoa. 14:13, 14.
12. Yinki kele mfunu yankaka beto kepesaka Yehova matondo samu na Muana na yandi?
12 Yehova kenlemvukilaka masumu na beto na nzila ya nkayilu ya nkudulu ya Yesu. Masonukua kena kumonisa Yesu lokola ‘nganga-nzambi [na beto] ya nene yina mevuanda na diboko ya kibakala ya kiti ya Kimfumu ya Nzambi na dizulu.’ (Ebr. 8:1) Yesu kele ‘nsadisi na beto na Tata.’ (1 Yn. 2:1) Beto kele mpenza na butondi na Yehova samu na mutindu yandi pesaka beto Nganga-nzambi ya Nene yina kebakusaka banzimbala na beto mpe yina ‘ketubaka samu na beto’! (Bar. 8:34; Ebr. 4:15) Beto kele bantu ya kuzanga kukoka, na yau kondua nkayilu ya Yesu beto zolaka vuanda ve na dikoki ya kupusana penepene ya Yehova na nzila ya kisambu. Kondua ntembe, nge zolaka ndima ti beto lendaka ata fioti ve kumonisa butondi na beto na mutindu ya kukoka samu na dikabu yina Yehova pesaka beto—dikabu ya Muana na yandi ya nzola!
SAMBILAKA SAMU NA BAMPANGI NA NGE
13. Na mpipa ya nsuka tekila yandi kufua, yinki mutindu Yesu monisaka ti yandi kezolaka banlonguki na yandi?
13 Na mpipa ya nsuka tekila yandi kufua, Yesu sambilaka bawola mingi samu na banlonguki na yandi, na kulombaka Tata na yandi na ‘kutanina bau samu na muntu ya yimbi.’ (Yoa. 17:15) Yau monisaka ti Yesu zolaka bau mingi! Atako yandi zabaka ti ntama mingi ve yandi kemona mpasi mingi, kasi yandi vuandaka kukitungisa samu na bantumua na yandi.
Yinki mambu beto lenda sambila samu na bampangi na beto? (Tala paragrafe 14-16)d
14. Yinki mutindu beto lenda monisa ti beto kezolaka bampangi na beto?
14 Na kulandaka kifuani ya Yesu, beto kesukaka kaka ve na kukanisa bansatu na beto mosi. Kasi, beto fueti sambilaka mbala na mbala samu na bampangi na beto. Kana beto mesala plina, beto kezitisa nsiku ya Yesu yina metuba beto zolanaka mpe beto kemonisa Yehova ti beto kezolaka mingi bampangi na beto Baklisto. (Yoa. 13:34) Kusambila samu na bampangi na beto kesadisa bau. Mpova ya Nzambi metubila beto ti ‘lilombo ya muntu ya lunungu kevuandaka na kilendo mingi.’—Yak. 5:16.
15. Samu na yinki bampangi na beto Baklisto kele na nsatu ya bisambu na beto?
15 Bampangi na beto Baklisto kele na nsatu ya bisambu na beto samu bakena kukutana na mambu mingi ya mpasi. Beto lenda lomba Yehova yandi sadisa bau bakanga ntima na bamaladi, na bisumbula yina kebimaka yau mosi, na mvita ya bana buala, na banzomono, to na mambu yankaka ya mpasi. Beto lenda sambila diaka samu na kikadulu ya kukiyimina ya bampangi na beto yina kena kusala ngolo samu na kupesa lusadusu na bampangi yina kele na nsatu ya lusadusu. Mbala yankaka nge mezaba mpangi mosi yina kena kukutana na bampasi ya mutindu yina. Samu na yinki ve kutanga nkumbu na yandi na bisambu na nge? Beto kemonisa nzola ya kedika na bampangi na beto na kulombaka Yehova sadisa bau bakanga ntima.
16. Samu na yinki beto fueti sambila samu na bampangi yina kena kutuadisa beto?
16 Bampangi yina kena kutuadisa kimvuka kevuandaka na butondi mingi na mutindu beto kesambilaka samu na bau mpe bisambu yango kesadisaka bau. Yavuandaka kedika samu na ntumua Paulo. Yandi sonikaka: ‘Beno sambila diaka samu na munu, samu dikoki ya kutuba pesamina munu ntangu munu kena kuzibula yinua, samu munu tuba na kibakala nionso ntangu munu kena kuzabisa disuekamu ya nlongo ya nsangu ya mbote.’ (Efe. 6:19) Bubu yayi diaka, beto kele na bampangi mingi ya babakala yina kena kusala kisalu ya ngolo samu na kusadisa beto. Beto kemonisina bau nzola na kulombaka Yehova sakumuna kisalu na bau.
NTANGU BAMELOMBA BETO BETO SALA KISAMBU YINA MESANGISA BANTU MINGI
17-18. Na yinki maluaku balenda lomba beto beto sala kisambu yina mesangisa bantu mingi, mpe yinki beto fueti tula na makanisi?
17 Na bantangu yankaka, bakelombaka beto beto sala kisambu yina mesangisa bantu mingi. Na kifuani, mpangi mosi ya nketo yina zola tuadisa ndongokolo ya Biblia lenda lomba na mpangi ya nketo yina mesangana na yandi yandi sala kisambu. Mpangi yango ya nketo yina mesangana na yandi lenda zaba mbote ve nlonguki yango, na yau yandi lenda sepela kusala kisambu na nsuka ya ndongokolo. Na mutindu yina, yandi lenda sala kisambu yina mekokana na bansatu ya nlonguki.
18 Balenda lomba na mpangi mosi ya bakala na kusala kisambu na lukutakanu samu na kisalu ya kusamuna to na lukutakanu ya kimvuka. Bampangi yina kebakaka maluaku yango bakezabaka lukanu ya lukutakanu. Kusala kisambu kele ve samu na kupesa malongi na kimvuka to kupesa bansangu. Samu na balukutakanu mingi ya kimvuka, miniti 5 mebongisamaka samu na kuyimbila mpe samu na kusala kisambu, na yau mpangi yina kena kusala kisambu yandi fueti sadila ve “bampova mingi,” mingimingi na ebandeli ya lukutakanu.—Mat. 6:7.
TULA KISAMBU NA KISIKA YA NTETE NA LUZINGU NA NGE
19. Yinki kesadisa beto beto bikana ya kukubama na kilumbu ya nsambusulu ya Yehova?
19 Beto fueti tula kisambu na kisika ya ntete na luzingu na beto lokola kilumbu ya nsambusulu ya Yehova kena kupusana. Samu na yau, Yesu tubaka: ‘Yau yina, beno bikana ya kulamuka beno sala malombo ntangu nionso samu beno nunga kutina mambu nionso yina fueti salama.’ (Luka 21:36) Ee, kana beto kena kusambila ntangu nionso, kiminu na beto kekuma ngolo mpe beto kevuanda ya kukubana ntangu kilumbu ya nsambusulu ya Yehova kekuiza.
20. Yinki mutindu bisambu na beto lenda vuanda lokola mpaka na malasi ya nsunga kitoko?
20 Yinki beto mekatuka tubila? Beto kebakaka diluaku ya kisambu na valere mingi. Mambu ya ngudi yina beto fueti tuba na bisambu na beto fueti vuanda na nguizani na lukanu ya Yehova. Beto kemonisaka diaka butondi samu na Muana ya Nzambi mpe na luyalu ya Kimfumu na yandi, mpe beto kesambilaka samu na bampangi na beto Baklisto. Mpe, ya kedika, beto lenda sambila samu na bansatu na beto mosi ya kinsuni mpe ya kimpeve. Ntangu beto kena kukanisa na zulu ya mambu yina beto ketuba na bisambu na beto, beto kemonisa ti beto kebakaka diluaku yango na valere mingi. Bampova na beto kevuanda lokola mpaka na malasi ya nsunga samu na Yehova—‘yina kepesaka Yandi kiese.’—Bin. 15:8.
MUYIMBU 45 Komanyola ya motema na ngai
a Beto kesepelaka mingi na diluaku ya kupusana penepene na Yehova na nzila ya kisambu. Beto zola ti bisambu na beto vuanda lokola mpaka na malasi ya nsunga, yina kesepedisa yandi. Na disolo yayi, beto ketubila mambu yina beto lenda kotisa na bisambu na beto. Beto ketadila diaka ndambu ya mambu yina beto fueti lunda na makanisi ntangu bamelomba beto beto sala kisambu yina mesangisa bantu mingi.
b BANSASULU YA FOTO: Mpangi mosi ya bakala kintuadi na nketo na yandi kena kusambila samu na lutanunu ya muana na bau na kalasi, samu na mavimpi ya bibuti na bau yina mekuma bambuta, mpe samu banlonguki na bau ya Biblia kuenda na ntuala.
c BANSASULU YA FOTO: Ntuenia mosi ya bakala kena kupesa Yehova matondo samu na nkayilu ya nkudulu ya Yesu, samu na ntoto yina kele kisika na beto ya kitoko ya kuvuanda, mpe samu na bima ya kudia ya kitoko.
d BANSASULU YA FOTO: Mpangi mosi ya nketo kena kusambila samu Yehova sakumuna Kimvuka ya Ntuadisi na kupesaka bau mpeve ya nlongo na yandi mpe yandi sadisa bantu yina kena kukutana na bampasi ya bisumbula ya nene mpe banzomono.