Mutindu Yehova kepesaka bamvutu na bisambu na beto

1-2. Yinki beto lenda kukiyuvusa samu na bisambu na beto?

NGE mekukiyuvusaka deja kana Yehova kekuwaka mpenza bisambu na nge? Kana yakele mutindu yina, zaba ti nge kele nge mosi ve. Bampangi mingi ya babakala mpe ya banketo diaka tubaka ti bakekukiyuvusaka mutindu yina, mingimingi kana bakena kukutana na mambu ya mpasi. Kana beto diaka beto kena kukutana na mambu ya mpasi, yalenda vuanda mpasi samu beto zaba mutindu Yehova kena kupesa bamvutu na bisambu na beto.

² Beto tadila samu na yinki beto lenda tula ntima ti Yehova kepesaka bamvutu na bisambu ya bisadi na yandi. (1 Yn. 5:15) Beto ketadila diaka biuvu yayi: Samu na yinki na bantangu yankaka yalenda monana lokola Yehova kepesaka ve bamvutu na bisambu na beto? Na yinki mitindu Yehova kepesaka bamvutu na bisambu na beto bubu yayi?

YEHOVA LENDA PESA BETO VE BAMVUTU NA MUTINDU YINA BETO KENA KUKANISA

3. Samu na yinki Yehova kezolaka beto sambila yandi?

³ Biblia kena kundimisa beto ti Yehova kezolaka beto mingi mpe beto kele na valere na meso na yandi. (Aga. 2:7; 1 Yn. 4:10) Yau yina yandi kena kulomba beto beto sambilaka yandi samu na kulomba lusadusu. (1 Pi. 5:6, 7) Yandi kele na nsatu ya kusadisa beto samu beto bikana penepene na yandi mpe beto nunga mambu ya mpasi yina beto kena kukutana na yau.

4. Yinki mutindu beto mezaba ti Yehova kepesaka bamvutu na bisambu ya bisadi na yandi? (Tala diaka foto.)

⁴ Na Biblia, mbala mingi beto ketangaka ti Yehova vuandaka pesa bamvutu na bisambu ya bisadi na yandi. Mosi ya bifuani kele ya Ntinu Davidi. Yandi vuandaka na bambeni mingi ya yimbi na luzingu na yandi ya mvimba, mpe mbala mingi yandi vuandaka lomba Yehova lusadusu na nzila ya kisambu. Na diluaku mosi, yandi lombaka Yehova: ‘O Yehova, kuwa kisambu na munu; kuwa kisambu munu kena kusala samu na kulomba lusadusu. Na kukuikama na nge mpe na lunungu na nge, pesa munu mvutu.’ (Nk. 143:1) Yehova pesaka mvutu na bisambu ya Davidi samu na kulomba luvuluzu. (1 Sa. 19:10, 18-20; 2 Sa. 5:17-25) Davidi lendaka tuba na kivuvu nionso: ‘Yehova kele penepene ya bantu nionso yina kebokilaka yandi.’ Beto diaka beto lenda ndima diambu yango.​—Nk. 145:18.

5. Bisadi ya Yehova ya ntama vuandaka baka ntangu nionso bamvutu na bisambu na bau kaka na mutindu yina bavuandaka kanisa? Pesa kifuani. (Tala diaka foto.)

⁵ Yehova lenda pesa ve mvutu na bisambu na beto na mutindu yina beto kena kukanisa. Yau nde kuminaka ntumua Paulo. Yandi lombaka Nzambi katula ‘nsende na nsuni’ na yandi. Na maluaku tatu, Paulo sambilaka kaka samu na diambu yango ya mpasi. Yehova pesaka mvutu na bisambu yango? Ee, kasi ve na mutindu yina Paulo vuandaka kanisa. Na kisika ya kukatula mpasi na yandi, Yehova pesaka yandi ngolo yina yandi vuandaka na yau nsatu samu yandi tatamana kusadila Yandi na kukuikama nionso.​—2 Bk. 12:7-10.

6. Na bantangu yankaka, samu na yinki yalenda monana lokola Yehova kena kupesa ve bamvutu na bisambu na beto?

⁶ Na bantangu yankaka, beto diaka beto lenda baka mvutu na bisambu na beto na mutindu yina ve beto vuandaka kanisa. Beto lenda ndimisama ti Yehova mezaba mutindu yina meluta mbote ya kusadisila beto. Yandi lenda ata ‘kusala mingi mpenza kuluta mambu nionso yina beto kelombaka to beto keyindulaka.’ (Efe. 3:20) Yakele samu na yau nde bamvutu na yandi na bisambu na beto lenda kuiza na ntangu to na mutindu yina beto kanisaka ve.

7. Samu na yinki yalenda lomba beto soba mambu yina beto kena kutula na bisambu? Pesa kifuani.

⁷ Beto lenda vuanda na nsatu ya kusoba mambu yina beto kena kutula na bisambu na beto kana beto kena kubakusa mbote kuluta lukanu ya Yehova. Beto tadila kifuani ya mpangi Martin Poetzinger. Ntangu fioti na manima ya dikuela na yandi, mpangi Poetzinger kotaka buloko na kan ya bantu yina bavuandaka kanga na Banazi. Na ebandeli, yandi vuandaka lomba Yehova sadisa samu yandi bima na buloko samu yandi vuanda na dikoki ya kukipe nketo na yandi mpe kuvutukila kisalu na yandi ya kusamuna. Kasi na manima ya basabala zole, kima mosi ve vuandaka monisa ti Yehova kesadisa samu yandi bima na buloko. Na yau, yandi bandaka kusambila na bampova yayi: “Yehova, melomba nge nge monisa munu yina nge zola munu sala.” Na manima, yandi bandaka kukanisa samu na mambu yina bampangi yankaka na kan vuandaka kutana na yau. Mingi kati na bau vuandaka kukitungisa samu na banketo mpe bana na bau. Na manima, mpangi Poetzinger sambilaka: “Matondo Yehova samu na kiyekua na munu ya yimpa. Sadisa munu samu munu kindisa bampangi na munu.” Yandi lutisaka bamvula 9 yina landaka na kan na kusalaka mpenza mutindu yina!

8. Yinki kele diambu ya mfunu yina beto fueti zaba ntangu beto kena kusambila?

⁸ Beto fueti zaba ti Yehova kele na lukanu mosi, mpe yandi kekokisa yau na ntangu yina yandi mebongisaka. Lukanu yango kele kukatula samu na mvimbamvimba mambu nionso yina kena kubimisina bantu bampasi bubu yayi​—mambu lokola bisumbula yina kebimaka yau mosi, maladi, mpe lufua. Yehova kekokisa lukanu na yandi na nzila ya Kimfumu na yandi. (Dan. 2:44; Kus. 21:3, 4) Kasi, tekila ntangu yango koka, Yehova kena kubikila Satana nzila ya kuyadila yinza.b (Yoa. 12:31; Kus. 12:9) Kana bubu yayi Yehova mebongisa mambu nionso ya mpasi yina bantu kena kukutana na yau, yalenda monana lokola Satana kena kuyadila yinza yayi mbote. Kasi na ntangu beto kena kuvingila Yehova kokisa bansilulu na yandi yankaka, yazola monisa ve ti yandi kesadisa beto ve. Beto tadila ndambu ya mitindu yina Yehova kesadisilaka beto.

MITINDU YINA YEHOVA KEPESILAKA BAMVUTU NA BISAMBU BUBU YAYI

9. Yinki mutindu Yehova lenda sadisa beto ntangu beto zola baka banzengolo? Pesa kifuani.

⁹ Yandi kepesaka beto nduenga. Yehova melaka ti yandi kepesa beto nduenga yina beto kele na yau nsatu samu na kubaka banzengolo ya mbote. Beto kevuandaka na nsatu ya nduenga ya Nzambi mingimingi ntangu beto kena kubaka banzengolo yina kevuanda na bupusi na luzingu na beto, na kifuani kubikana mpupa to kukuela. (Yak. 1:5) Beto tadila disolo ya mpangi mosi ya nketo ya mpupa na nkumbu ya Maria.c Yandi vuandaka sala na kiese nionso lokola mpasudi nzila ya ngonda na ngonda ntangu yandi kutanaka na mpangi mosi ya bakala. Yandi metuba: “Lokola kinkundi na beto vuandaka kula, banguilu na beto ya kuzolana vuandaka kuma ngolo. Munu zabaka ti munu fueti baka nzengolo. Munu sambilaka mingi samu na diambu yango. Munu vuandaka na nsatu ya lutuadusu ya Yehova, kasi munu zabaka diaka ti Yehova kebaka ve nzengolo na kisika na munu.” Yandi kukimonaka ti Yehova pesaka mvutu na bisambu yina yandi vuandaka sala samu na kulomba nduenga. Na yinki mutindu? Yandi sosasosaka na mikanda na beto mpe yandi monaka masolo ya mbote yina sadisaka yandi samu yandi baka bamvutu na biuvu yina yandi vuandaka na yau. Yandi kuwaka diaka malongi ya nduenga ya mama na yandi yina vuandaka ya kukuikama na Yehova. Malongi yango sadisaka Maria samu yandi tadila banguilu na yandi. Na nsuka, yandi vuandaka na dikoki ya kubaka nzengolo ya nduenga.

10. Na kutadila Bafilipi 4:13, yinki Yehova kesala samu na kusadisa bisadi na yandi? Pesa kifuani. (Tala diaka foto.)

¹⁰ Yandi kepesaka beto ngolo samu na kukanga ntima. Mutindu kaka yandi salaka samu na ntumua Paulo, Yehova kepesa beto ngolo yina beto kele na yau nsatu samu na kukanga ntima na bampasi na beto. (Tanga Bafilipi 4:13.) Beto tadila mutindu Yehova sadisaka mpangi mosi ya bakala na nkumbu ya Benjamin samu yandi kanga ntima na mambu ya mpasi. Na bamvula mingi ya kintuenia na yandi, Benjamin mpe dibuta na yandi vuandaka zinga na Afrique na bakan ya bantu yina ketinaka babuala na bau. Benjamin metuba: “Munu vuandaka sambila ntangu nionso Yehova, munu vuandaka lomba yandi ngolo ya kusala mambu yina kesepedisa yandi. Yehova pesaka mvutu na bisambu na munu na kupesaka munu kiyenge ya makanisi, kibakala ya kutatamana kusamuna, mpe mikanda yina vuandaka sadisa munu munu bikana ngolo na kimpeve.” Yandi metuba diaka: “Kutanga masolo ya bampangi ya babakala mpe ya banketo mpe kulonguka mutindu Yehova sadisaka bau samu bakanga ntima kumisaka ngolo nzengolo na munu ya kubikana ya kukuikama.”

11-12. Yinki mutindu Yehova lenda pona kusadila dibuta na beto ya kimpeve samu na kupesa mvutu na bisambu na beto? (Tala diaka foto.)

¹¹ Yandi kesadilaka dibuta na beto ya kimpeve. Na mpipa ya nsuka tekila yandi pesa luzingu na yandi lokola nkayilu, Yesu sambilaka mingi. Yandi lombaka Yehova yandi bika ve nzila na bantu yankaka bakanisa ti yandi kele muntu yina kefingaka Nzambi mpe kupesa yandi kitumbu samu na yau. Na kisika ya kusala mutindu yina, Yehova sadisaka Yesu na kutindaka mosi ya bampangi na yandi bambasi samu na kukindisa yandi. (Luka 22:42, 43) Yehova lenda sadisa beto diaka na nzila ya mpangi mosi yina mebokila beto na telefone to yina mekuiza tala beto samu na kukindisa beto. Beto nionso beto lenda sosa maluaku ya kubimisa ‘mpova ya mbote’ na bampangi na beto Baklisto.​—Bin. 12:25.

¹² Beto tadila disolo ya mpangi mosi ya nketo na nkumbu ya Miriam. Basabala fioti na manima ya lufua ya bakala na yandi, Miriam bikanaka yandi mosi na yinzo, yandi vuandaka kukimona lokola muntu mekondua kivuvu mpe yandi vuandaka na kiadi. Yandi vuandaka lemba ve kudila mpe yandi vuandaka na nsatu ya kusolola na muntu mosi. Yandi metuba: “Munu vuandaka ve na ngolo ya kubokila muntu mosi, na yau munu sambilaka Yehova. Ntangu munu vuandaka dila mpe kusambila, telefone na munu dilaka. Yavuandaka nkulutu mosi, yina vuandaka nkundi na beto.” Miriam bakaka lukindusu na nzila na nkulutu yango mpe nketo na yandi. Yandi ndimisamaka ti Yehova tindaka mpangi yango ya bakala samu na kubokila yandi.

13. Pesa kifuani mosi yina kena kumonisa mutindu Yehova lenda sadila bantu yina kesambilaka yandi ve samu na kupesa mvutu na bisambu na beto.

¹³ Yandi lenda sadila bantu yina kesambilaka yandi ve. (Bin. 21:1) Na bantangu yankaka, Yehova kepesaka mvutu na bisambu ya bisadi na yandi na kutindaka bantu yina kesambilaka yandi ve na kusadisa bau. Na kifuani, yandi tindaka Ntinu Artazerezese na kupesa Nehemia nzila ya kuvutuka na Yerusaleme samu yandi pesa maboko na kutunga diaka mbanza yango. (Neh. 2:3-6) Bubu yayi diaka, Yehova lenda tinda ata bantu yina kesambilaka yandi ve samu na kusadisa beto ntangu beto kele na nsatu ya lusadusu.

14. Yinki mesepedisa nge na disolo ya Soo Hing? (Tala diaka foto.)

¹⁴ Mpangi mosi ya nketo na nkumbu ya Soo Hing vuandaka kukimona ti Yehova sadisaka yandi na nzila ya munganga na yandi. Muana na yandi belaka maladi ya yintu. Ntangu muana na yandi kubuaka na kisika ya yinda, yandi mpe bakala na yandi bikaka kisalu na bau samu na kukuenda sadisa yandi. Yau salaka ti bavuanda diaka na mbongo ve. Soo Hing tubaka ti yandi vuandaka kukimona lokola yandi mesuka mpe yandi kekoka diaka ve kukanga ntima. Yandi zibudilaka Yehova ntima na yandi mpe yandi lombaka yandi lusadusu. Munganga bakaka nzengolo ya kusosa mutindu ya kusadisila yandi mpe dibuta na yandi. Yau salaka ti Leta sadisa bau mpe bapesaka bau kisika ya mbote ya kuvuanda. Na manima, Soo Hing tubaka: “Beto monaka mutindu Yehova sadisaka beto. Yandi kele mpenza ‘Muntu yina kekuwaka kisambu.’”​—Nk. 65:2.

YAKELOMBAKA KUVUANDA NA KIMINU SAMU NA KUSOSA MPE KUNDIMA MVUTU YA YEHOVA

15. Yinki sadisaka mpangi mosi ya nketo samu yandi bakusa ti Yehova pesaka deja mvutu na bisambu na yandi?

¹⁵ Mbala mingi bamvutu na bisambu na beto kepesamaka ve na mutindu yina kekamuisa bantu. Kasi bamvutu yina beto kebakaka kevuandaka mpenza yina beto kele na yau nsatu samu na kubikana ya kukuikama na Tata na beto ya dizulu. Vuandaka pene ya kumona bamvutu ya Yehova na bisambu na nge. Mpangi mosi ya nketo na nkumbu ya Yoko vuandaka kukimona lokola Yehova vuandaka pesa ve mvutu na bisambu na yandi, na manima yandi bandaka kusonika mambu yina yandi vuandaka lomba Yehova. Na manima ya mua ntangu, yandi talaka karne na yandi mpe yandi monaka ti Yehova pesaka deja bamvutu na bisambu na yandi mingi, ata bisambu yankaka yina yandi mezimbakanaka. Beto fueti baka ntangu ya kukanisa na mutindu Yehova kepesaka mvutu na bisambu na beto.​—Nk. 66:19, 20.

16. Yinki mutindu beto lenda monisa kiminu ntangu beto kena kusala kisambu? (Baebreo 11:6)

¹⁶ Beto kemonisa kiminu kaka ve na kusambilaka Yehova kasi mpe na kundimaka mvutu na yandi na bisambu na beto, yavuanda yinki mutindu yandi mepesila yau. (Tanga Baebreo 11:6.) Beto tadila kifuani ya Mike mpe nketo na yandi Chrissy. Bavuandaka na lukanu ya kusala na Betele. Mike metuba: “Beto fulusaka baformilere samu na bamvula mingi mpe beto sambilaka Yehova mbala mingi samu na lukanu yango, kasi basalaka bokila beto ve na Betele.” Mike mpe Chrissy tatamanaka kutula ntima ti Yehova nde mezaba mutindu meluta mbote ya kusadila bau na kisalu na yandi. Batatamanaka kusala nionso yina balenda sala, na kifuani kusala lokola bampasudi nzila ya ngonda na ngonda kisika yina bavuandaka na nsatu ya bansamuni mpe kupesa maboko na kisalu ya kutunga bayinzo ya teokrasi. Bubu yayi bakele na kisalu ya kizungidila. Mike metuba: “Yehova vuandaka pesa ve ntangu nionso bamvutu na bisambu na beto na mutindu yina beto vuandaka kanisa, kasi yandi pesaka beto bamvutu mpe bamvutu yango kuizaka na mutindu yina lutaka yina beto vuandaka kanisa.”

17-18. Na kutadila Nkunga 86:6, 7, na yinki beto lenda tula ntima?

¹⁷ Tanga Nkunga 86:6, 7. Davidi, nsoniki ya nkunga kukindimisaka ti Yehova vuandaka kuwa mpe vuandaka pesa bamvutu na bisambu na yandi. Nge diaka nge lenda tudila Yehova ntima lokola yandi. Bifuani beto metubila na disolo yayi kena kundimisa beto ti Yehova lenda pesa beto nduenga mpe ngolo yina beto kele na yau nsatu samu na kukanga ntima. Yandi lenda sadila dibuta na beto ya kimpeve to ata mpe bantu yina kele ve bisadi na yandi bubu yayi samu basadisa beto na mutindu mosi to yankaka.

¹⁸ Atako Yehova kepesaka ve ntangu nionso bamvutu na bisambu na beto na mutindu yina beto kanisaka, kasi beto mezaba ti yandi kepesila yau bamvutu. Yandi kepesa kaka yina beto kele na yau nsatu mpe na ntangu yina beto kele na yau nsatu. Na yau, tatamana kusambila na kiminu, na kutulaka ntima ti Yehova ketudila nge dikebi mpe yandi ‘kekokisa nsatu ya kisemua nionso yina kevuanda na luzingu’ na yinza ya yimpa yina kena kuiza.​—Nk. 145:16.