Ntangu Ntinu Yoziasi kumaka na bamvula 26, yandi bandaka kubongisa tempelo. Ntangu kisalu yango vuandaka salama, bamonaka ‘mukanda ya Nsiku ya ­Yehova yina yandi pesaka na nzila ya Mose.’ Ntangu ntinu kuwaka mambu mukanda yango tubaka, yandi salaka bansobolo mbala mosi samu na kuzitisa mambu yina sonamaka kuna. (2 Bans. 34:14, 19-21) Nge kesepela kutanga Biblia mbala na mbala? Kana nge kena kumeka deja kusala yau, nge kena sepela na ntangulu yango? Nge kelundaka baverse yina lenda sadisa nge? Ntangu Yoziasi kumaka na bamvula kana 39, yandi salaka nzimbala mosi yina nataka yandi na lufua. Yandi kukitudilaka ntima na kisika ya kulomba lutuadusu na Yehova. (2 Bans. 35:20-25) Yakele na dilongi beto lenda baka. Yavuanda beto kele na yinki mvula to bamvula yikua beto mesala na kulonguka Biblia, beto fueti tatamana kusosa Yehova. Yamesangisa kusambilaka mbala na mbala samu na kulomba lutuadusu na yandi, kulonguka Mpova na yandi, mpe kuwa malongi ya Baklisto yina meyela na kimpeve. Yakevuanda mpasi beto sala banzimbala ya ngolo mpe beto kevuanda na kiese mingi.​—Yak. 1:25. w23.09 12 ¶15-16

Biblia metubila banketo mingi ya mbote yina vuandaka zola Yehova mpe vuandaka sadila yandi. Bavuandaka ‘bantu yina kelutisaka ndilu ve na bikadulu na bau’ mpe ‘bantu ya kukuikama na mambu nionso.’ (1 Tim. 3:11) Diaka, bampangi ya banketo lenda mona na bimvuka na bau, banketo Baklisto ya kuyela na kimpeve yina balenda landa kifuani na bau. Bantuenia ya banketo, beno kanisaka bampangi ya banketo yina kele na bikadulu ya mbote yina beno lenda landa kifuani na bau; na manima beno kanisa na mutindu beno lenda monisa bikadulu ya mutindu yina. Kumikitisa kele kikadulu mosi ya mfunu samu na Muklisto yina meyela na kimpeve. Kana nketo kele na kumikitisa, yandi kevuanda na nguizani ya mbote na Yehova mpe na bantu yankaka. Na kifuani, nketo yina kezolaka Yehova, keponaka na kumikitisa nionso kuzitisa nsikudukusu ya kimfunu yina Tata na yandi ya dizulu metulaka. (1 Ko. 11:3) Nsikudukusu yango kele na mutindu ya kusadila yau na kati ya kimvuka mpe na nkubukulu ya dibuta. w23.12 18-19 ¶3-5

Yehova kena kulomba bakala na kuzola nketo na yandi mpe na kukokisa bansatu na yandi ya kinsuni, ya makanisi, mpe ya kimpeve. Kukudisa dikoki ya kukanisa, kuvuanda na luzitu na banketo, mpe kuvuanda muntu yina baketudilaka ntima, kesadisa nge ntangu nge kekuela. Na manima ya kukuela nge lenda kuma tata. Yinki dilongi nge lenda baka na Yehova na diambu metadila kuvuanda tata ya mbote? (Baef. 6:4) Yehova tubilaka Muana na yandi puelele ti, yandi kezolaka yandi mpe yandi kendimaka yandi. (Mat. 3:17) Kana nge mekuma tata, salaka nionso samu na kundimisa bana na nge mbala na mbala ti nge kezolaka bau. Pesaka bau bafelisitasion mbala na mbala samu na mambu ya mbote yina bakesalaka. Batata yina kelandaka kifuani ya Yehova kesadisaka bana na bau samu bakuma Baklisto ya babakala mpe ya banketo yina meyela na kimpeve. Nge lenda kukibongisa banda bubu yayi samu na kiyekua yango na kusadisaka na nzola nionso bantu yankaka ya dibuta mpe ya kimvuka na nge mpe na kutubilaka bau ti nge kezolaka bau mpe nge kesepelaka na bau.​—Yoa. 15:9. w23.12 28-29 ¶17-18