Yehova ketadila nge ve lokola muntu yina nunga ve kaka samu nge kokisa ve lukanu yina nge vuandaka ve na dikoki ya kukokisa. (2 Ko. 8:12) Baka dilongi na ntangu yina mesala ti lukanu na nge bika kukokisama. Tatamana kulunda na makanisi mambu yina nge mekokisaka deja. Biblia metuba ti ‘Nzambi kondua ve lunungu samu yandi zimbakana kisalu na beno.’ (Baeb. 6:10) Na yau, nge fueti zimbakana ve mambu yina nge mesalaka. Kanisaka na mambu yina nge mekokisaka deja​—yalenda vuanda, nge kudisaka nguizani ya mbote na Yehova, nge ketubilaka bantu yankaka mambu na yandi, to nge mebakaka mbotama. Mutindu kaka nge kuendaka na ntuala mpe nge kokisaka balukanu yina nge kukitudilaka, nge lenda tatamana kukuenda na ntuala samu na kukokisa lukanu yina nge kele na yau bubu yayi. Na lusadusu ya Yehova, nge lenda kokisa lukanu na nge. Lokola nge kena kutatamana kusala ngolo samu na kukokisa lukanu na nge ya kimpeve, kuzimbakana ve kusosa kumona mutindu Yehova kena kusadisa mpe kena kusakumuna nge samu nge kokisa yau. (2 Ko. 4:7) Kana nge bika ve, nge kebaka balusakumunu mingi kuluta.​—Bag. 6:9. w23.05 31 ¶16-18

Yehova kesosaka mitindu ya kutubila bisadi na yandi ti yandi kendimaka bau mpe yandi kesepelaka na bau. Masonukua metubila maluaku zole ntangu Yandi tubilaka Yesu ti yandi kele Muana na Yandi ya nzola, mpe yina yandi mendima. (Mat. 3:17; 17:5) Nge kesepela kuwa Yehova kena kutubila nge ti yandi kesepelaka na nge? Yehova ketubaka na beto ve mbala mosi kukatuka na dizulu, kasi yandi ketubaka na beto na nzila ya Mpova na yandi. Beto lenda “kuwa” ndinga ya Yehova yina kena kutuba ti yandi kendimaka beto ntangu beto kena kutanga bampova ya Yesu yina kele na Baevanjile. Yesu monisaka na mutindu ya kukoka kimuntu ya Tata na yandi. Na yau ntangu beto kena kutanga bampova ya Yesu yina kena kumonisa ti yandi ndimaka banlonguki na yandi ya kukondua kukoka kasi ya kukuikama, beto lenda mona kaka lokola Yehova kena kutubila beto bampova yango. (Yoa. 15:9, 15) Kana mambu ya mpasi mekumina beto, yazola monisa ve ti Nzambi kena kundima beto diaka ve. Kutu, yakepesaka beto maluaku ya kumonisa nzola ya mpinda yina beto kele na yau samu na Nzambi mpe yakemonisaka ti beto ketudilaka yandi ntima.​—Yak. 1:12. w24.03 28 ¶10-11

Kana nge kele kibuti, sadisa bana na nge babongisa bakomantere yina mebonga na kutadila bamvula na bau. Na bantangu yankaka, yalenda vuanda na masolo ya mfunu mingi samu na ndongokolo, na kifuani masolo yina ketubilaka mambu metadila makuela to bikadulu, kasi kondua ntembe, yakevuanda na paragrafe mosi to zole yina muana na nge lenda pesila komantere. Katula yau, sadisa bana na nge babakusa mfunu yina kesala ti mbala yankaka babika pona bau ntangu bakena kumonisa diboko na bau. Kusasila bau mfunu yango lenda sala ti babika lemba nzutu ntangu bakena kumona ti bakena kupona bantu yankaka kasi bau ve. (1 Tim. 6:18) Beto nionso beto lenda bongisa bakomantere yina ketungaka, yina kepesa Yehova lokumu mpe yina kekindisa bampangi na beto Baklisto. (Bing. 25:11) Ntangu beto mebaka diluaku ya kupesa komantere yina metadila diambu yina beto kutanaka na yau na luzingu na beto, beto kemanga kutuba mingi mambu metadila beto mosi. (Bing. 27:2; 2 Ko. 10:18) Na kisika ya kusala plina, beto kesala ngolo samu na kutula makanisi na beto na Yehova, na Mpova na yandi, mpe na bisadi yandi.​—Kus. 4:11. w23.04 24-25 ¶17-18