Vuanda na kibakala

Mambu yina Yesu salaka

VIDEO: Yesu kena kupesa malongi na ntuenia mosi yina vuandaka mfumu mpe mvuama

1. Tala VIDEO, to tanga Marko 10:17-22. Na manima tadila biuvu yayi melanda:

1. Yinki bikadulu Yesu monaka na ntuenia yina vuandaka mfumu?

2. Samu na yinki yalombaka Yesu vuanda na nzola mpe kibakala samu na kupesa bakala yango malongi?

Yinki dilongi beto mebaka na kifuani ya Yesu?

2. Beto fueti monisa nzola, kasi beto fueti sasila diaka puelele mambu yina nlonguki fueti sala samu yandi tatamana kukuenda na ntuala na kimpeve.

Landa kifuani ya Yesu

3. Sadisa nlonguki na nge yandi kukitudila balukanu mpe yandi kokisa yau.

1. Sadila kitini “Lukanu” na konso dilongi ya Zinga mvula na mvula na kiese!

2. Sadisa nlonguki na nge samu yandi zaba mambu yina yandi fueti sala samu na kukokisa balukanu ya ntangu ya nkufi mpe ya ntangu ya yinda.

3. Pesaka mbala na mbala nlonguki na nge felisitasion samu na mutindu yandi kena kukuenda na ntuala.

4. Sosa kuzaba mambu yina kena kupekisa nlonguki na nge samu yandi kuenda na ntuala, mpe sadisa yandi yandi nunga yau.

1. Kukiyuvusa:

   • ‘Kana nlonguki na munu kena kukuenda ve na ntuala tii na kubaka mbotama, yinki kena kupekisa yandi?’

   • ‘Yinki lusadusu ya mfunu mulenda pesa yandi?’

2. Sambila samu na kulomba kibakala samu na kusolola na nlonguki na nge na puelele mpe na nzola nionso samu na kutubila yandi yina yandi fueti sala.

5. Zenga ndongokolo kana nlonguki na nge kena kuenda ve na ntuala.

1. Sosa kuzaba kana ndongokolo na beno kena kubuta mbuma na kukiyuvusaka:

   • ‘Nlonguki na munu kena kusadila mambu yina yandi kena kulonguka?’

   • ‘Yandi kekuendaka na balukutakanu ya kimvuka mpe yandi ketubilaka bantu yankaka kedika?’

   • ‘Na manima ya kulonguka samu na mua ntangu, yandi kele na nsatu ya kukuma Mbangi ya Yehova?’

2. Kana nlonguki ya Biblia kena zola ve kukuenda na ntuala:

   • Lomba yandi yandi kanisa na zulu ya mambu yina kena kupekisa yandi.

   • Sasila yandi na mayele nionso mfunu yina nge kena kuzenga ndongokolo na yandi.

   • Tubila yandi mambu yina yandi fueti sala tekila beno vutukila diaka ndongokolo.