Nzambi salaka bakala mpe nketo ya ntete

Yehova kunaka bilanga na kisika mosi yina babokidilaka Edeni. Bilanga yango vuandaka ya kufuluka na bafololo, bayinti, mpe bibulu. Na manima Nzambi salaka bakala ya ntete, Adamu, na fundufundu ya ntoto mpe yandi fulaka yandi mupepe na mbombo. Nge mezaba diambu yina salamaka? Adamu kumaka muntu ya luzingu! Yehova pesaka Adamu kiyekua ya kutanina bilanga yango, mpe Nzambi tubilaka yandi yandi pesa bibulu nionso bankumbu.

Yehova pesaka Adamu nsiku mosi ya mfunu mingi. Yandi tubilaka Adamu: ‘Nge lenda kudia mbuma ya bayinti nionso katula kaka mbuma ya yinti mosi. Kana nge mekudia mbuma ya yinti yango nge kekufua.’

Na manima Yehova tubaka: ‘Munu kesadila Adamu nsadisi.’ Yandi lekisaka Adamu pongi ya ngolo, mpe na manima Nzambi katulaka kivisi mosi ya mupanzi ya Adamu samu na kusadila yandi nketo. Nkumbu ya nketo yango vuandaka Eva. Adamu mpe Eva nde salaka dibuta ya ntete. Yinki mutindu Adamu kukimonaka samu na nketo na yandi? Adamu vuandaka na kiese mingi, mpe yandi tubaka: ‘Tala muntu Yehova mesala na kivisi na munu! Ee! Yayi muntu yina mefuanana na munu.’

Yehova tubilaka Adamu mpe Eva babuta bana mpe bafulusa ntoto. Yandi zolaka basala kintuadi samu na kukumisa ntoto ya mvimba paradiso, to parke mosi ya kitoko, lokola kaka bilanga ya Edeni. Kasi mambu salamaka ve mutindu yina. Samu na yinki? Beto kelonguka yau na kikapu melanda.