Na manima ya kubima na bilanga ya Edeni, Adamu mpe Eva butaka bana mingi. Muana na bau ya ntete ya bakala, Kaina, kumaka kisadi ya bilanga, mpe muana na bau ya zole ya bakala, Abele, kumaka mvungi.

Kilumbu mosi Kaina mpe Abele pesaka Yehova bankayilu. Nge mezaba yinki kele nkayilu? Yakele dikabu mosi ya spesiale. Yehova sepelaka na nkayilu ya Abele, kasi yandi sepelaka ve na yina ya Kaina. Yasalaka ti Kaina kuma na nganzi ya ngolo. Yehova kebisaka Kaina ti nganzi na yandi lenda nata yandi na kusala diambu mosi ya yimbi. Kasi Kaina mangaka kuwa.

Kutu, Kaina zabisaka Abele ti: ‘Kuiza beto kuenda na mfinda.’ Ntangu bavuandaka bau mosi na mfinda, Kaina bulaka mpangi na yandi mpe yandi kufuaka yandi. Yinki Yehova salaka na diambu yango? Yehova pesaka Kaina kitumbu na mutindu yandi tindaka yandi yandi kuenda zinga ntama ya dibuta na yandi. Kaina vuandaka diaka ve na yinsua ya kuvutuka na dibuta na yandi.

Yinki dilongi beto lenda baka? Beto lenda banda kukuma na nganzi kana mambu kena salama ve mutindu beto kena kuzodila. Kana beto mebanda kukuma na nganzi​—to kana bantu yankaka mekebisa beto samu na nganzi yango—​beto fueti sala nionso kondua kuvingila samu na kuyala banguilu na beto tekila yatuadisa beto.

Lokola Abele vuandaka zola Yehova mpe yandi vuandaka sala mambu ya mbote, Yehova kezimbakana yandi ata fioti ve. Nzambi kefutumuna Abele ntangu Yandi kekumisa ntoto paradiso.

Na manima, bantu kumaka mingi na ntoto. Mingi kati na bau vuandaka bantu ya yimbi. Ata bambasi yankaka na dizulu kumaka bantu ya yimbi. Babikaka bisika na bau na dizulu mpe bakitaka na ntoto. Nge mezaba samu na yinki basalaka mutindu yina? Samu bavuata nzutu ya bantu mpe bakuela banketo.

Bambasi yango butaka bana na banketo yina babakaka. Bana yango vuandaka ngolo mingi mpe bakumaka na kinkesi ya ngolo. Bavuandaka niokola bantu. Yehova lendaka ve kubika mambu tatamana kuvuanda kaka mutindu yina. Na yau, yandi bakaka nzengolo ya kunokisa mvula mosi ya nene yina fulusaka ntoto ya mvimba samu na kufua bantu ya yimbi.

Kasi yavuandaka na muntu mosi yina vuandaka ya kusuasana na bantu yankaka. Yandi vuandaka zola Yehova. Nkumbu na yandi vuandaka Noa. Yandi vuandaka na nketo mpe na bana tatu ya babakala, Seme, Kame, mpe Jafete, mpe konso muana vuandaka na nketo na yandi. Yehova tubilaka Noa yandi tunga nzaza mosi ya nene samu yandi mpe dibuta na yandi bavuka na Nkuka ya maza. Nzaza yango vuandaka kesi mosi ya nene yina lenda tepatepa na zulu ya maza. Yehova tubilaka diaka Noa yandi kotisa bibulu mingi na kati ya nzaza samu bau diaka bavuka.

Noa bandaka kutunga nzaza kondua kuvingila. Noa mpe dibuta na yandi salaka bamvula kana 50 samu na kutunga nzaza yango. Batungaka nzaza yango kaka mutindu Yehova tubilaka bau. Na ntangu yango, Noa vuandaka luengisa bantu ti Nkuka ya maza zola kuiza. Kasi muntu mosi ve wilaka yandi.

Nsukansuka, ntangu ya kukota na masuwa kokaka. Beto tala mambu yina salamaka na manima.