BAMAMBU YA BA YINA ME BASISA YAWU

Ba sonikaka Biblia na lutwadusu ya mpeve ya santu na Kiebre, na Kiarami mpe na Kigreke. Samu bantu ya “makanda nyonso” kuzwa bamambu ya mbote yina ke na kati ya Dyambu ya Nzambi, ya lombaka ti ba bangula yawu na bandinga mingi. (Matayi 24:14) Ba ke bokilaka babuku 27 kubanda na Matayi tii na Luzabusu “Masonoko ya Kigreke ya Bukristo” samu na kubanda ya sonamaka na Kigreke na Bakristo ya siècle ya ntete N.B., na lutwadusu ya mpeve ya santu.

Biblia. Mbangudulu ya Yinza ya Malu-Malu Matayi-Luzabusu basikaka na mbala ya ntete na Anglais na 1950. Ba sadilaka masonoko ya Kigreke ya Westcott na Hort yina ke na nsangu mingi, na kulandaka bamaniskri ya kulutila ntama ya Kigreke. Na kukwikama nyonso, Mbangudulu ya Yinza ya Malu-Malu ke salaka nyonso samu na kuvutula dikanisi ya masonoko ya Kigreke mutindu ya vandaka na ntama. Ba me sadila mbangudulu ya Anglais yina basikaka na 2013 samu na kubasisa Biblia yayi ya Kituba, mpe ba me sala nyonso samu awa mpe ba vutula bamambu na kukwikama nyonso. Mukanu ya beto vandaka ni ya kubasisa mbangudulu yina ke vanda ve kaka ya kukwikama na masonoko ya ntete, kasi yina ke vanda mpe pwelele mpe pete na kutanga. Yina ba me bwela “Misiku ya kubangula Biblia,” “Mambu ya mfunu ya mbangudulu yayi,” mpe “Mutindu Biblia kumaka na beto” ke zonzilaka mwa mikanu na yina me tadila mbangudulu ya Biblia yayi.

Nkumbu ya Nzambi, Yehova, me basika bambala 237 na Biblia. Mbangudulu ya Yinza ya Malu-Malu Matayi-Luzabusu. Ya ke lakisaka mfunu ya kukumisa santu nkumbu ya Nzambi mpe ti bantu nyonso kubokila nkumbu yayi samu na kuvuuka. Mbangudulu yayi me vutulaka nkumbu ya Yehova na bisika yina ya vandaka na Masonoko ya Santu. (Matayi 6:9; Baroma 10:13) Yina ba me bwela “Nkumbu ya Nzambi na Masonoko ya Kigreke ya Bukristo” ke zonzilaka mwa bamambu yina me nata na kukotisa nkumbu Yehova na kati ya Biblia yayi.

Nkumbu Mbangudulu ya Yinza ya Malu-Malu, ke ya kuvanda na nsilulu ya Nzambi ya kupesa yinza ya malu-malu ya lunungu samu na mbote ya bantu nyonso. (2 Piere 3:13) Bantu yina me sala kisalu ya kubangula yayi, yina ke zolaka Nzambi muntu ya kuzwa Masonoko ya Santu, me baka kiyeko ya nene yayi na mantwala ya yandi, na kusala bangolo samu na kubangula makanisi ya yandi mpe bamambu ya yandi na kukwikama nyonso. Lusambu ya beto ke ti, mbangudulu yayi sadisa bantu ya ntima ya mbote yina ke na salaka bangolo na “kuzaba mbote-mbote matsyeleka.”—1 Timote 2:4.