NA BAGALATE

1 Ni munu Polo, yina ke ntumwa na luve ya bantu ve to na lusalusu ya muntu ve, kasi na lusalusu ya Yesu Kristo mpe ya Tata yina vumbulaka yandi na lufwa. 2 Kintwadi na bampangi nyonso yina ke na munu, beto ke na sonikilaka bimvuka ya Galate:

3 Bika ti ntima ya kulutila mbote mpe kizunu ya Nzambi Tata ya beto, mpe ya Mfumu Yesu Kristo, vanda na beno. 4 Yandi pesaka nzutu ya yandi samu na masumu ya beto, samu na kuvuukisa beto na yinza ya yimbi yayi, na mutindu yina ke ya kukwelana na luzolo ya Nzambi, Tata ya beto. 5 Bika ti yandi kuzwa nkembo mvula na mvula. Ameni.

6 Ya ke na kamwisaka munu na kutala ti beno me balula mukongo na mbangu na muntu yina bokilaka beno na ntima ya kulutila mbote ya Kristo mpe beno me banda kulanda nsangu ya mbote ya mutindu ya nkaka. 7 Ya ke ve dyaka na nsangu ya mbote ya nkaka, kasi ya ke na bantu ya nkaka yina ke na tulaka muvusu na kati ya beno mpe ke na sosaka kutengimisa nsangu ya mbote na yina me tadila Kristo. 8 Kasi, ata kana mosi ya beto to mbazi yina me katuka na mazulu me kwiza zonzila beno nsangu ya mbote ya mambu yina ke ve faso mosi na nsangu ya mbote yina beto zonzilaka beno, bika yandi vanda ya kuloka. 9 Mutindu beto vandaka me zonza yawu, mu ke na zonzaka dyaka yawu, muntu nyonso yina ke zonzila beno nsangu ya mbote yina ke ve faso mosi na mambu yina beno ndimaka, bika yandi vanda ya kuloka.

10 Ntangu yayi, ya ke kwandi ni bantu mu ke na sosaka kundimisa, to Nzambi? To ni bantu kwandi mu ke na sosaka kusepelisa? Kana mu vanda tatamana na kusepelisa bantu, mu zolaka vanda ve kisadi ya Kristo. 11 Bampangi, mu zola beno zaba ti nsangu ya mbote yina mu me zonzila beno me katuka ve na bantu, 12 samu mu kuzwaka ve yawu na muntu mpe ba longaka ve munu yawu. Kasi ni Yesu Kristo muntu lakisaka munu yawu.

13 Ya tsyeleka, beno kuwaka nsangu ya ndyatulu yina mu vandaka na yawu ntangu mu vandaka na dibuundu ya Bazwife. Na tiya nyonso* mu vanda tatamana na kukwamisa dibuundu ya Nzambi mpe kumwangisa yawu. 14 Mu vanda kula mingi na mambu yina me tadila dibuundu ya Bazwife, kulutila bantu mingi yina beto vandaka bamvula mosi na bwala ya munu. Mu vandaka na tiya mingi na yina me tadila bansalulu ya bankooko ya munu. 15 Kasi Nzambi yina me sala ti mu butuka mpe yina bokilaka munu na nzila ya ntima ya yandi ya kulutila mbote, talaka ti ya ke mbote 16 na kulakisa Mwana ya yandi na nzila ya munu samu mu zonzila nsangu ya mbote na yina me tadila yandi na makanda. Mu kwendaka sosa ve dikanisi ya muntu* na ntangu yina. 17 Mu kwendaka mpe ve na Yeruzalemi na bantu yina vandaka bantumwa tekila munu, kasi mu kwendaka na Arabia mpe na manima mu vutukaka na Damase.

18 Bamvula tatu na manima, mu kwendaka na Yeruzalemi samu na kutala Sefase,* mpe mu lutisaka bilumbu 15 na yandi. 19 Mu kutanaka ve na bantumwa ya nkaka, kasi mu kutanaka kaka na Zaki, mpangi ya Mfumu. 20 Na yina me tadila bamambu yina mu ke na sonikilaka beno, mu ke na zengaka ndefi na mantwala ya Nzambi ti mu ke na vunaka ve.

21 Na manima, mu kwendaka na kizunga ya Siri mpe ya Silisi. 22 Kasi bimvuka yina vandaka na bumosi na Kristo na Zude, zabaka ve munu. 23 Ba vanda kuwaka kaka ti: “Bakala yina vanda kwamisaka beto ke na zonzilaka ntangu yayi nsangu ya mbote na yina me tadila kiminu yina yandi vanda sosaka kufwa.” 24 Na yawu, ba bandaka kupesa nkembo na Nzambi samu na munu.

2 Na manima ya bamvula 14, mu vutukaka na Yeruzalemi na Barnabasi mpe mu nataka Tite na munu. 2 Mu kwendaka kuna samu mu kuzwaka luzabusu mpe mu zonzilaka bawu nsangu ya mbote yina mu ke na samunaka na kati ya makanda. Mu zonzilaka ve bawu yawu na meso ya bantu nyonso, kasi mu salaka yawu na mantwala ya bantu yina ba ke zitisaka mingi samu na kuzaba kana mu vanda kima ve mbangu, to mu kimaka ve mbangu ya mpamba. 3 Ata ti Tite yina kwendaka na munu vandaka Mugreke, ba nataka ve yandi na ngolo na kuzengisa kibakala. 4 Ni bampangi ya luvunu yina kotaka na kimvuka basisaka mambu yayi. Ba vanda sosa kubebisa kimpwanza yina ke na beto samu beto ke na bumosi na Kristo Yesu. Ba vanda sosa kunata beto na ngolo samu beto vanda dyaka bangaamba ya Musiku. 5 Beto pesaka ve bawu nzutu, beto tumamaka ve na bawu, ata samu na ntangu fioti, samu matsyeleka ya nsangu ya mbote vanda kaka ya kusikama na kati ya beno.

6 Kasi na yina me tadila ba yina vanda tala ti ba ke mfunu, kuzaba wapi mutindu ya bantu ba kele ke ve mfunu samu na munu, samu ti Nzambi ke talaka ve muntu mutindu yandi ke talanaka na meso ya bantu. Ya tsyeleka, bantu yayi yina beno ke pesaka buzitu mingi me lakisa munu ata kima ya malu-malu. 7 Kasi ntangu ba talaka ti ba pesaka munu kisalu ya kuzonzila nsangu ya mbote na bantu yina vandaka ve ya kuzenga kibakala, kaka mutindu ba pesaka yawu na Piere samu na bantu yina vandaka ya kuzenga kibakala, 8 samu muntu yina pesaka Piere ngolo ya kuvanda ntumwa samu na bantu yina ke ya kuzenga kibakala, ni yandi mpe pesaka munu ngolo ya kuvanda ntumwa samu na bantu ya makanda, 9 ntangu ba kwizaka zaba ti Nzambi lakisaka munu ntima ya kulutila mbote, Zaki, Sefase, mpe Yoane, ba yina ke mutindu bapoto yina ke simbaka yinzo samu na kimvuka, pesaka Barnabasi na munu diboko ya bakala samu na kulakisa ti ba me ndima ti beto kwenda na bantu ya makanda, mpe bawu na bantu yina ba zengaka kibakala. 10 Mambu nyonso yina ba lombaka na beto na kusala vandaka ni na kukanisa na bapovre. Mpe na ntima ya munu nyonso mu ke na salaka bangolo na kulungisa yawu.

11 Ntangu Sefase* kwizaka na Antyose, mu teleminaka yandi samu mambu yina yandi vanda sala vandaka yimbi. 12 Ya tsyeleka, ntangu bantu yina Zaki filisaka vandaka nabunu ba kuma, yandi vanda kudya na bantu ya makanda. Kasi ntangu ba kumaka, yandi bikaka kudya na bawu mpe yandi bendaka nzutu samu yandi vandaka na boma ya bantu yina vandaka ya kuzenga kibakala. 13 Bazwife ya nkaka mpe landaka yandi na luvunu yina. Ata Barnabasi mpe landaka bawu. 14 Kasi ntangu mu talaka ti ba vanda tambula ve na matsyeleka ya nsangu ya mbote, mu zonzaka na Sefase* na mantwala ya bantu nyonso: “Kana nge, ata ti nge ke Zwife, nge ke na zingaka mutindu muntu ya makanda, kasi ve mutindu Zwife, wapi mutindu nge lenda nata na ngolo bantu ya makanda na kusadila bansalulu ya Bazwife na luzingu ya bawu?”

15 Beto ba yina butukaka na dikanda ya Bazwife, beto ke ve bantu ya masumu yina me katuka na makanda. 16 Beto zaba ti Nzambi ke ndimaka muntu mutindu muntu ya lunungu* na nzila ya bisalu ya musiku ve, kasi kaka na nzila ya kiminu na Yesu Kristo. Na yawu, beto me tula kiminu ya beto na Kristo Yesu, samu Nzambi ndima beto mutindu bantu ya lunungu na nzila ya kiminu na Kristo, kasi na nzila ya bisalu ya musiku ve. Nzambi lenda ndima ata muntu mosi ve mutindu muntu ya lunungu na nzila ya bisalu ya musiku. 17 Ntangu yayi, kana ba me tala beto mutindu bantu ya masumu samu beto ke na sosaka kuvanda bantu ya lunungu* na nzila ya Kristo, ya zola zonza kwandi ti Kristo ke kisadi ya disumu? Ata fioti ve. 18 Kana mu tunga dyaka bima yina mu mwangisaka na ntama, mu ke lakisa ti mu ke muntu yina ke vwezaka musiku. 19 Na nzila ya musiku mu ke ya kufwa na yina me tadila musiku, samu na kukuma moyo samu na Nzambi. 20 Ba ke ya kutula munu na zulu ya yinti na Kristo. Ya ke dyaka ve ni munu muntu ke na zingaka, kasi ni Kristo muntu ke na zingaka na bumosi na munu. Ya tsyeleka, luzingu yina mu ke na yawu ntangu yayi na kinsuni, mu ke na zingaka yawu na nzila ya kiminu na Mwana ya Nzambi, Mwana ya Nzambi yina zolaka munu mpe pesaka luzingu ya yandi samu na munu. 21 Mu me manga ve* ntima ya kulutila mbote ya Nzambi, samu kana mambu ya lunungu* ke kwizaka na nzila ya musiku, ya zola zonza ti Kristo kufwaka kaka ya mpamba.

3 O bantu ya Galate, beno ke bazoba! Nani me vuna beno, beno ba yina ba lakisaka pwelele mutindu ba tulaka Yesu Kristo na zulu ya yinti? 2 Mu ke na kyuvu kaka mosi ya kuyufula beno: Beno kuzwaka kwandi mpeve na nzila ya bisalu ya musiku, to samu beno vandaka na kiminu na bamambu yina beno kuwaka? 3 Buzoba ya beno ke kwandi ya kulutila? Samu na manima ya kubanda kutambula na bumosi na ngolo ya mpeve ya Nzambi, beno ke manisa kwandi na kinsuni?* 4 Ya ke kwandi ya mpamba beno me tala mpasi mingi? Mu lenda ndima ve ti ya me vanda ya mpamba. 5 Na yawu, muntu yina ke pesaka beno mpeve mpe yina ke salaka bamambu ya ngitukulu na kati ya beno, ke na salaka kwandi yawu samu na bisalu ya musiku yina beno ke na salaka, to samu na kiminu yina beno me lakisa na mambu yina beno kuwaka? 6 Kaka mutindu Abrahami “tulaka kiminu na Yehova,* mpe ya salaka ti Nzambi bakila yandi mutindu muntu ya lunungu.”*

7 Ya tsyeleka, beno zaba ti kaka ba yina ke ya kukangama na kiminu ke bana ya Abrahami. 8 Banda ntama Nzambi zonzaka na kati ya masonoko ya yandi ti yandi ke ndima bantu ya makanda mutindu bantu ya lunungu* na nzila ya kiminu. Na yawu yandi zonzilaka nsangu ya mbote yayi na Abrahami na mantwala: “Makanda nyonso ke kuzwa lusakumunu na nzila ya nge.” 9 Ni na yawu, bantu yina ke ya kukangama na kiminu ke na kuzwaka lusakumunu kintwadi na Abrahami muntu yina vandaka na kiminu.

10 Ba yina nyonso ke tulaka ntima na bisalu ya musiku, ba ke ya kuloka. Samu ya ke ya kusonama: “Bika ti muntu nyonso yina landaka ve mambu nyonso yina ke ya kusonama na rulo ya Musiku mpe ke zitisaka ve yawu, vanda ya kuloka.” 11 Dyaka, ya ke ya tsyeleka ti Nzambi ke ndimaka ve muntu mutindu muntu ya lunungu* na nzila ya musiku, samu “muntu ya lunungu ke zinga samu na kiminu ya yandi.” 12 Musiku ke ve ya kuvanda na zulu ya kiminu. Kasi “muntu nyonso yina ke salaka bamambu yayi ke zinga na nzila ya yawu.” 13 Ya ke ya kusonama mpe ti: “Bika ti muntu nyonso yina ba me tula na zulu ya yinti vanda ya kuloka.” Na kukumaka ndoko na kisika ya beto, Kristo katulaka beto na ndoko yayi ya Musiku. Ni na mutindu yina, yandi sumbaka beto. 14 Ya salamaka mutindu yina samu makanda nyonso kuzwa lusakumunu ya Abrahami na nzila ya Kristo Yesu, samu ti na nzila ya kiminu ya beto, beto kuzwa mpeve yina ba pesaka nsilulu.

15 Bampangi, mu ke na sadilaka kifwani ya mambu mosi yina ke na salamaka konso kilumbu samu na kuzonza na beno, ntangu luwawanu ke salamaka, ata kaka ni muntu mosi me sala yawu, muntu mosi ve lenda kufwa yawu to kubwela mambu na zulu ya yawu. 16 Ba pesaka nsilulu na Abrahami mpe na mwana* ya yandi. Ya ke zonzaka ve, “mpe na mitekolo* ya yandi,” na mutindu yina me tadila bantu mingi. Kasi ya ke zonzaka, “mpe na mwana ya yandi,” na mutindu yina me tadila muntu mosi, yina ke Kristo. 17 Mu ke na zonzaka dyaka mambu yayi: Musiku yina basikaka bamvula 430 na manima, me kufwa ve luwawanu yina Nzambi ndimaka, ya me kufwa mpe ve nsilulu. 18 Kana dikabu ke ya kuvanda na zulu ya musiku, ya ke dyaka ve ya kuvanda na zulu ya nsilulu. Kasi na luzolo nyonso, Nzambi pesaka yawu na Abrahami na nzila ya nsilulu.

19 Na yawu, samu na yinki Nzambi pesaka Musiku? Ya vandaka samu na kubasisa pwelele mambu ya kuvweza musiku, tii ntangu mwana* yina ba pesaka nsilulu zolaka kwiza. Musiku yango ba pesaka yawu na nzila ya bambazi, na maboko ya nzonzi. 20 Nzonzi ke vandaka ve mfunu kana ya me tadila kaka muntu mosi. Kasi Nzambi ke kaka mosi. 21 Ya zola zonza kwandi ti Musiku me kanga bansilulu ya Nzambi nzila? Samu kana ba pesaka bantu musiku yina lenda pesa luzingu, Nzambi zolaka tadila bantu nyonso mutindu bantu ya lunungu* na nzila ya musiku yina. 22 Kasi Dyambu ya Nzambi tulaka bima nyonso na yisi ya lutumu ya disumu, samu ba yina ke na kiminu kuzwa bima ya mbote yina ba pesaka nsilulu na ba yina ke na kiminu na Yesu Kristo.

23 Kasi tekila kiminu kwiza, musiku vanda kengidila beto. Ya vandaka ya kukanga beto mutindu bangaamba, mpe beto zolaka vingila kiminu yina zolaka talana. 24 Na yawu Musiku kumaka ntwadisi* yina ke nataka na Kristo, samu Nzambi ndima beto mutindu bantu ya lunungu* na nzila ya kiminu. 25 Kasi ntangu yayi yina kiminu ya tsyeleka me kwiza, beto ke dyaka ve na nsatu musiku twadisa beto.

26 Ya tsyeleka, beno nyonso beno ke bana ya Nzambi na nzila ya kiminu ya beno na Kristo Yesu. 27 Samu beno nyonso yina kuzwaka mbotokolo na Kristo, beno lwataka Kristo. 28 Zwife kele ve, Mugreke kele ve, kisadi kele ve, muntu ya kimpwanza kele ve, bakala kele ve, kento mpe kele ve. Samu beno nyonso ke kaka muntu mosi na bumosi na Kristo Yesu. 29 Dyaka, kana beno ke bantu ya Kristo, beno ke ya tsyeleka bana* ya Abrahami, bantu yina ke kuzwa dikabu yina ba pesaka na nsilulu.

4 Kana muntu yina ke kuzwa* dikabu ke ntete mwana ya fioti, ata ti bima nyonso ke ya yandi, yandi me lutila ata fioti ve kisadi ya yinzo, ya ke ve mutindu yina? 2 Yandi ke vanda na yisi ya bantu yina ke kengidilaka yandi mpe yina ke kipeke yinzo ya yandi tii kilumbu yina tata ya yandi soolaka. 3 Mutindu mosi, beto mpe ntangu beto vandaka bana, beto vandaka bangaamba ya bamambu ya fioti-fioti ya yinza. 4 Kasi ntangu ntangu lungaka, Nzambi filisaka Mwana ya yandi yina butukaka na kento mosi, mpe Mwana yango vandaka na yisi ya musiku, 5 yandi futaka ntalu ya kupesa kimpwanza na ba yina ke na yisi ya musiku, samu Nzambi ndima beto mutindu bana ya yandi.

6 Samu beno ke bana, Nzambi me filisa mpeve ya Mwana ya yandi na kati ya bantima ya beto mpe mpeve yango ke na zonzaka na ndinga ya ngolo: “Abba,* Tata!” 7 Na yawu nge ke dyaka ve ngaamba, kasi nge ke mwana. Kana nge ke mwana, nge ke mpe muntu yina ke kuzwa dikabu na nzila ya Nzambi.

8 Kasi ntangu beno zabaka ve Nzambi, beno vandaka bangaamba ya banzambi yina ke ve ya tsyeleka. 9 Kasi ntangu yayi beno me zaba Nzambi, to Nzambi me zaba beno. Na yawu, wapi mutindu beno ke na sosaka dyaka kulanda bima ya kukondwa mfunu ya yinza yayi? 10 Ya tsyeleka, beno ke zitisaka mbote-mbote bilumbu, bangonda, bantangu mpe bamvula. 11 Mu ke na boma ti bangolo nyonso yina mu me sala samu na beno, vanda kaka ya mpamba.

12 Mu ke na bondilaka beno bampangi, beno kuma mutindu mu kele samu munu mpe, mu vandaka mutindu beno kele. Beno salaka ve munu yimbi. 13 Kasi beno zaba ti ni kimbevo salaka ti mu kwiza zonzila beno nsangu ya mbote mbala ya ntete. 14 Ata ti ya vandaka mpasi samu na beno na kutala munu na kimbevo yayi, beno vwezaka ve munu mpe beno talaka ve munu nganzi. Kasi beno yambaka munu mutindu mbazi ya Nzambi, mutindu Kristo Yesu. 15 Wapi kisika me kwenda kilengi yina vandaka na beno? Mu ke na pesaka kimbangi samu na beno ti, beno zolaka katula meso ya beno samu na kupesa munu yawu, kana beno vandaka na makoki ya kusala yawu. 16 Mu me kuma kwandi mbeni ya beno samu mu ke na zonzilaka beno matsyeleka? 17 Kasi, ba ke na sosaka kununga beno na dikanisi ya yimbi. Ba ke na sosaka kunata beno ntama na munu, samu beno vanda na nsatu ya ngolo ya kulanda bawu. 18 Ya ke vanda ntangu nyonso mbote kana muntu ya nkaka ke na sosaka kununga beno, kaka kana ni dikanisi ya mbote ke na nataka yandi na kusala yawu, mpe ya zolaka salama ve kaka ntangu mu ke na beno. 19 Bana ya munu, mu ke na talaka dyaka mpasi samu na beno. Mpe mpasi yayi ke na munu ke mutindu mpasi ya misongo yina kento ke vandaka na yawu. Na yawu, mu ke tatamana na kutala mpasi yayi tii ntangu kimuntu ya Kristo ke talana na beno. 20 Mu ke na nsatu ya ngolo ya kuvanda na beno ntangu yayi, mpe kuzonzila beno na mutindu ya nkaka. Samu mu zaba ve yinki ya kukanisa samu na beno.

21 Beno bantu yina ke zolaka kuvanda na yisi ya musiku beno zonza na munu. Beno ke kuwaka ve mambu Musiku ke zonzaka? 22 Na kifwani, ya ke ya kusonama ti Abrahami butaka bana zole. Mosi na kento yina vandaka kisadi, mpe ya nkaka na kento ya kimpwanza. 23 Kasi mwana yina butukaka na kento yina vandaka kisadi, butukaka mutindu bantu nyonso ke butukaka,* mpe mwana yina butukaka na kento ya kimpwanza, butukaka na nzila ya nsilulu. 24 Bamambu yayi ke kifwani. Bakento yayi ke na fwanikisaka baluwawanu zole. Mosi ya mongo ya Sinayi, yandi ke na butaka bana samu ba vanda bangaamba, mpe ya ke ni Agare. 25 Agare ke fwanikisaka Sinayi, mongo mosi na bwala ya Arabia, mpe yandi me fwanana na Yeruzalemi ya bubu yayi, samu yandi na bana ya yandi ke bangaamba. 26 Kasi Yeruzalemi ya mazulu ke na kimpwanza. Mpe ni yandi ke mama ya beto.

27 Samu ya ke ya kusonama: “Vanda na kilengi, nge kento ya kisita yina ke butaka ve. Yangalala, nge kento yina nabunu nge kuzwa misongo. Samu bana ya kento yina ba losaka ke mingi kuluta bana ya kento yina ke na bakala.” 28 Ntangu yayi bampangi, beno ke bana ya nsilulu kaka mutindu Izaki vandaka. 29 Kaka faso mwana yina butukaka mutindu bana nyonso ke butukaka* bandaka kukwamisa mwana yina butukaka na nzila ya mpeve, ya ke mpe mutindu mosi ntangu yayi. 30 Kasi yinki masonoko ke zonzaka? “Bingisa kento yina ke kisadi na mwana ya yandi. Samu mwana ya yandi ke kuzwa ata fioti ve dikabu kintwadi na mwana ya kento ya kimpwanza.” 31 Na yawu bampangi, beto ke ve bana ya kento yina ke kisadi, kasi beto ke bana ya kento ya kimpwanza.

5 Kristo salaka ti beto vanda dyaka ve bangaamba ya musiku. Ni na yawu, beno telama ngolo. Beno kundima dyaka ve ti beno vutuka bangaamba.

2 Beno tala! Munu Polo, mu ke na zonzaka na beno ti kana beno zengisa kibakala, Kristo ke vanda dyaka ve mfunu samu na beno. 3 Mu ke na zonzaka dyaka na muntu nyonso yina ke na zengisaka kibakala ti yandi fwana kuzitisa Musiku nyonso. 4 Beno ke ya kukabuka na Kristo, beno bantu yina ke na sosaka ti Nzambi ndima beno mutindu bantu ya lunungu* na nzila ya musiku. Beno me pesa mukongo na ntima ya yandi ya kulutila mbote. 5 Beto ke na vingilaka na kukuma bantu ya lunungu* na meso ya Nzambi, na mutindu yina ya lenda salama kaka na nzila ya mpeve ya santu mpe na nzila ya kiminu ya beto. 6 Samu na ba yina ke na bumosi na Kristo, ya ke ve ni kuzengisa kibakala to kuzengisa ve kibakala muntu ke mfunu. Kasi ni kiminu yina ke salaka na nzila ya luzolo ke mfunu.

7 Beno vanda kimaka mbote. Nani kangaka beno nzila ya kutatamana na kutumama na matsyeleka? 8 Makanisi ya mutindu yayi me katuka ve na Muntu yina ke na bokilaka beno. 9 Mwa ndambu ya levire ke vimbisaka pate nyonso. 10 Mu ke na kundima ti beno bantu yina ke na bumosi na mfumu, beno ke kanisa ve na mutindu ya nkaka, kasi muntu yina ke kotisa muvusu na kati ya beno ata nani yandi kele, yandi ke kuzwa kitumbu yina me lunga na yandi. 11 Bampangi ya kento na ya bakala, kana mu ke na longaka ntete kuzengisa kibakala, ba zolaka kwamisa ve munu. Mpe malongi ya munu na yina me tadila lufwa ya Yesu na zulu ya yinti ya mpasi* zolaka budisa dyaka ve bantu dibaku. 12 Mu zola ti ba yina ke na salaka muvusu na kati ya beno, zenga binama ya bawu yina ke sadisaka na kubuta.*

13 Bampangi, ba bokilaka beno na kimpwanza, kasi beno kusadila ve kimpwanza yango mutindu nzila ya kulungisa bansatu ya kinsuni. Kasi na luzolo nyonso, beno sala mutindu bangaamba samu na bampangi. 14 Samu Musiku nyonso ke ya kulungana* na musiku kaka mosi yayi: “Nge fwana kuzola mpangi ya nge mutindu nge mosi.” 15 Kasi kana beno tatamana na kulwalisa* mpe na kutalisa bampangi mpasi, beno keba, samu beno lenda kufwa bampangi beno na beno.

16 Mu ke na zonzaka na beno: Beno tatamana na kutambula na lutwadusu ya mpeve, mpe beno ke lungisa ata fioti ve bansatu ya kinsuni. 17 Nzutu samu na bansatu ya yawu, ke teleminaka mpeve, mpe mpeve ke teleminaka nzutu. Bawu nyonso zole ke wisanaka ve. Ni na yawu, mambu yina beno ke na nsatu ya kusala, beno ke salaka ve yawu. 18 Dyaka, kana beno ke na bikaka mpeve twadisa beno, beno ke ve na yisi ya musiku.

19 Bisalu ya kinsuni ke talanaka pwelele. Ya kele: kinsuza,* mambu ya mvindu, ndyatulu ya busafu mpe ya nko,* 20 kusambila biteki, bansalulu ya bampeve ya yimbi,* kuyiina bampangi, kuswana, kimbanda, nkele ya kulutila, kukondwa kuwisana, kukabuka, kulanda malongi ya bantu, 21 kusosa kuzwa bima ya bampangi, kukola malafu, mikembo ya kidi-kidi, mpe bamambu ya nkaka ya mutindu yayi. Na bamambu yayi, mu ke na kebisaka beno, mutindu mu kebisaka ntete beno, ti ba yina ke salaka bamambu ya mutindu yayi ke kota ve na Kimfumu ya Nzambi.

22 Kasi mbuma ya mpeve kele, luzolo, kilengi, kizunu, ntima ya yinda, ntima ya mbote, bumbote, kiminu, 23 lembami, kuzaba kukutika nzutu. Ya ke ve na musiku yina ke teleminaka bamambu yayi. 24 Dyaka, ba yina ke bantu ya Kristo Yesu, komaka na zulu ya yinti nzutu mpe bansatu ya yawu ya ngolo mpe mambu yina nzutu ke zolaka.

25 Kana beto ke zingaka na mpeve, bika beto tatamana mpe na kutambula na mutindu yina ke ya kulunga na lutwadusu ya mpeve. 26 Beto fwana kuvanda ve na lunangu, beto bika kusombola bampangi, beto bika kuvanda na musoki na kati ya beto.

6 Bampangi kana muntu me sala mambu ya yimbi yina yandi ke ve na zabaka, beno ba yina ke na makoki ya kimpeve, beno sosa kusungika muntu yina na ntima ya lembami. Kasi sala keba na nge mosi samu nge mpe kubwa ve. 2 Beno tatamana na kunata bizitu ya bampangi. Na kusalaka mutindu yina, beno ke lungisa musiku ya Kristo. 3 Kana muntu ke na talaka ti yandi ke mfunu na ntangu yandi ke muntu ya mpamba, yandi ke na vunamaka. 4 Kasi konso muntu fwana kufyongonina bamambu yina yandi mosi ke salaka. Na yawu, yandi ke vanda na mambu yina ke sala ti yandi vanda na kilengi samu na yandi mosi, kasi ve na kufwanisaka mambu yina yandi ke salaka na yina muntu ya nkaka ke salaka. 5 Samu konso muntu ke nata kiyeko ya yandi.

6 Dyaka, konso muntu yina ba ke na longaka dyambu ya Nzambi fwana kukabula bima nyonso ya mbote na muntu yina ke na pesaka malongi yina.

7 Beno kuvunama ve: Ba ke sekaka ve Nzambi. Samu ti konso muntu ke kuzwa bambuma ya bima yina yandi me kunda. 8 Muntu yina ke landaka bansatu ya kinsuni ke kuzwa lufwa.* Kasi muntu yina ke landaka mpeve ya Nzambi ke kuzwa luzingu ya ntangu nyonso yina ke katukaka na mpeve yango. 9 Na yawu, beto lemba* ve na kusala mambu ya mbote. Samu kana beto lemba ve, beto ke kuzwa bambuma na ntangu yina me fwanana. 10 Ni na yawu, ntangu nyonso yina beto ke na makoki ya kusala mambu ya mbote, beto sala yawu na bantu nyonso, kasi mingi-mingi na bampangi ya beto na kiminu.

11 Beno tala mutindu mu me sonikila beno na bisoni ya nene na diboko ya munu mosi.

12 Ba yina nyonso ke na sosaka kutalana bantu ya mbote na kinsuni, ni bawu ke na sosaka kunata beno na kuzenga kibakala na ngolo. Ba ke na salaka yawu kaka samu ba bika kutalisa bawu mpasi samu na yinti ya mpasi* ya Kristo. 13 Ata ba yina ke na zengisaka kibakala ke tatamanaka ve na kutumama na Musiku, kasi ba zola ti beno, beno zengisa kibakala samu ba kuzwa mambu ya kubudila ntulu na nzutu ya beno. 14 Mu ke bula ntulu ata fioti ve, kasi mu lenda sala yawu kaka samu na yinti ya mpasi* ya Mfumu ya beto Yesu Kristo. Ni na nzila ya yandi ba kufwaka* yinza samu na munu, mpe munu samu na yinza. 15 Kuvanda ya kuzengisa kibakala to kuvanda ve ya kuzengisa kibakala ke ve mfunu. Kasi kima yina ke mfunu ni kuvanda kima ya malu-malu yina Nzambi me yidika. 16 Bika ti ba yina nyonso ke na tambulaka na mutindu ya kufwanana na musiku yayi, ee, Izraele ya Nzambi, vanda na kizunu mpe bika ti Nzambi lakisa bawu ntima ya kyadi.

17 Banda ntangu yayi, ata muntu fwana kutalisa dyaka munu mpasi. Samu ti mu ke na nataka na nzutu ya munu bidimbu yina ke na lakisaka ti mu ke kisadi ya Yesu.

18 Bampangi, bika ti ntima ya kulutila mbote ya Mfumu ya beto Yesu Kristo vanda na mpeve yina beno ke na lakisaka. Ameni.