MUKANDA YA NTETE NA BATESALONIKA

1 Yayi mukanda me katuka na Polo, na Silvanuse* mpe na Timote, samu na kimvuka ya Tesalonika na bumosi na Nzambi Tata mpe na Mfumu Yesu Kristo.

Bika ti ntima ya kulutila mbote mpe kizunu vanda na beno.

2 Beto ke vutulaka ntangu nyonso matondo na Nzambi ntangu beto ke zonzilaka beno nyonso na balusambu ya beto. 3 Ntangu nyonso beto ke bambukaka moyo na kisalu ya beno ya kukwikama, na kisalu ya ngolo yina beno ke salaka na luzolo mpe na mutindu beno ke na kangamaka samu na kivuvu ya beno na Mfumu ya beto Yesu Kristo, na mantwala ya Nzambi ya beto mpe Tata. 4 Bampangi yina Nzambi ke zolaka, beto zaba ti yandi me soola beno, 5 samu nsangu ya mbote yina beto ke na samunaka kwizaka ve na sika ya beno kaka na nzonzolo, kasi mpe na ngolo mpe na mpeve ya santu mpe na kiminu ya ngolo, kaka mutindu beno zaba wapi mutindu ya bantu beto kumaka na kati-kati ya beno samu na mbote ya beno. 6 Beno ndimaka nsangu ya mbote na kati ya bankwamusu mingi na kilengi ya mpeve ya santu. Na mutindu yina, beno vanda dyatila mutindu Mfumu mpe mutindu beto. 7 Ni na yawu, beno kumaka kifwani ya bandimi nyonso ya Masedwane mpe ya Akayi.

8 Mambu ya tsyeleka ke ti, nsangu ya Yehova* katukaka na beno mpe mwanganaka kaka ve na Masedwane mpe na Akayi, kasi nsangu ya kiminu ya beno na Nzambi me mwangana na bisika nyonso. Na yawu, beto ke ve na nsatu ya kuzonza kima. 9 Samu bantu bawu mosi ke na tatamanaka na kuzonzila kukutana ya beto ya ntete na beno, mpe mutindu beno kwendaka na sika ya Nzambi ntangu beno bikaka lusambu ya biteki samu na kukuma bisadi ya Nzambi ya moyo mpe ya tsyeleka, 10 mpe samu beno vingila Mwana ya yandi katuka na zulu, Mwana yina yandi vumbulaka na lufwa, ya zola zonza Yesu, yina ke vuukisa beto na nkele yina ke na kwizaka.

2 Bampangi, ya tsyeleka beno me zaba ti, ntangu beto kwizaka tala beno, beno kondwaka ve kubuta bambuma. 2 Ata ti ba talisaka ntete beto mpasi mpe ba fwisaka beto nsoni na bwala ya Filipi, mutindu beno zaba, beto kuzwaka bukindi na Nzambi ya beto samu na kuzonzila beno nsangu ya mbote ya Nzambi na kati ya bankwamusu mingi. 3 Mambu yina beto zonzilaka beno ke ve ya luvunu mpe beto zonzilaka ve beno yawu na makanisi ya yimbi to samu na kuvuna beno. 4 Kasi samu Nzambi ndimaka beto mpe pesaka beto kisalu ya kuzonzila nsangu ya mbote, beto ke zonzaka ve yawu samu na kusepelisa bantu, kasi samu na kusepelisa Nzambi yina ke talaka mbote-mbote bantima ya beto.

5 Beno zaba ti ata mbala mosi ve beto basisaka mambu ya kitoko samu na kuzwa beno, ata mbala mosi ve beto sosaka kuvanda bantu ya mbote samu na kuzwa bima. Nzambi me zaba mambu yayi mbote-mbote. 6 Beto sosaka mpe ve nkembo na bantu, ya vanda na beno to na bantu ya nkaka, ata ti beto zola vanda kizitu ya nene samu beto ke bantumwa ya Kristo. 7 Kasi, beto kumaka bantu ya lembami na kati-kati ya beno, mutindu mama yina ke pesaka bana ya yandi mabene mpe ke kipeke bawu na luzolo nyonso. 8 Na yawu, samu beto ke na luzolo mingi samu na beno, beto bakaka mukanu* kaka ve ya kuzonzila beno nsangu ya mbote ya Nzambi, kasi mpe ya kupesa beno luzingu* ya beto samu beno kumaka bantu yina beto ke zolaka mingi.

9 Bampangi, beno ke na bambukilaka moyo kisalu ya beto ya ngolo mpe mpasi yina beto talaka. Beto vanda salaka mpimpa na ntangu samu na kuvanda ve kizitu ya nene samu na ata muntu mosi ve na kati ya beno, ntangu beto vanda zonzila beno nsangu ya mbote ya Nzambi. 10 Beno ke bambangi, Nzambi mpe ke mbangi ti beto vandaka bantu ya kukwikama, ya lunungu mpe yina vandaka ve na mambu ya kusemba na meso ya beno bandimi. 11 Beno zaba mbote-mbote ti beto bikaka ve na kukindisa beno, na kubomba beno mpe na kukebisa beno mutindu tata ke salaka yawu samu na bana ya yandi. 12 Beto salaka yawu samu beno tatamana na kutambula na mutindu ya kulunga na meso ya Nzambi, yina ke na bokilaka beno na Kimfumu ya yandi mpe na nkembo ya yandi.

13 Ni na yawu beto mpe ke vutulaka ntangu nyonso matondo na Nzambi samu ntangu beno kuwaka mambu ya Nzambi yina beto zonzilaka beno, beno ndimaka ve yawu mutindu mambu ya bantu, kasi mutindu ya kele ya tsyeleka mambu ya Nzambi, yina ke salaka mpe na kati ya beno bantu ya kukwikama. 14 Bampangi, beno kumaka bifwani ya kimvuka ya Nzambi yina ke na Zude, na bumosi na Kristo Yesu, samu bantu ya bwala ya beno talisaka beno mpasi ya mutindu mosi na yina Bazwife ke talisaka bawu. 15 Ni bawu mpe kufwaka Mfumu Yesu, bambikudi, mpe ni bawu talisaka beto mpasi. Dyaka, ba ke sepelisaka ve Nzambi, kasi ba kele bambeni ya bantu nyonso. 16 Ba ke sosaka kukanga beto nzila ya kuzabisa bantu ya makanda nsangu yina lenda sadisa bawu na kuvuuka. Ni na mutindu yina ba ke kumisaka ntangu nyonso masumu ya bawu mingi. Kasi nsuka-nsuka, Nzambi ke lakisa bawu nkele ya yandi.

17 Bampangi, ntangu beto vandaka ya kukabwana na beno kaka samu na mwa ntangu fioti (na meso, kasi na bantima ya beto ve), beto salaka nyonso samu na kutalana na beno,* samu beto vandaka na nsatu ya ngolo ya kutala beno. 18 Ni na yawu beto zola kwiza na sika ya beno, ee munu Polo, mu mekaka ve kaka mbala mosi, kasi bambala zole, kasi Satana kangaka beto nzila. 19 Wapi yina ke vanda kivuvu ya beto to kilengi ya beto to yimpu* ya beto ya nsayi na mantwala ya Mfumu Yesu, ntangu yandi ke kwiza? Ya ke ve ni beno? 20 Beno ke ya tsyeleka nkembo mpe kilengi ya beto.

3 Na yawu, ntangu beto vanda lenda dyaka ve kukanga ntima, beto talaka ti ya ke mbote beto bikana beto mosi na bwala ya Atene. 2 Beto filisaka Timote mpangi ya beto mpe kisadi ya Nzambi yina ke samunaka nsangu ya mbote ya Kristo samu na kukindisa beno mpe kupesa beno ngolo samu na kiminu ya beno, 3 samu bankwamusu yayi ningisa ata muntu. Beno zaba beno mosi ti beto lenda kima ve bamambu ya mutindu yayi, 4 samu ntangu beto vandaka na beno, beto zonzilaka beno ti na mantwala beto zola kutana na bankwamusu mpe ni yawu salamaka mutindu beno zaba yawu. 5 Ni na yawu, ntangu mu lendaka dyaka ve kukanga ntima, mu filisaka beno Timote samu na kuzwa bansangu ya kiminu ya beno. Mu vandaka na boma ti mutantu meka beno mpe kisalu ya beto zola vanda kisalu ya mpamba.

6 Kasi ntangu yayi, Timote me vutuka na sika ya beto mpe me pesa beto bansangu ya mbote ya kiminu mpe luzolo ya beno. Yandi me zabisa beto ti beno ke na tatamanaka na kubambukila beto moyo na mbote nyonso, mpe ti beno ke na nsatu ya kulutila ya kutala dyaka beto, mutindu beto mpe ke na nsatu ya kutala dyaka beno. 7 Ni na yawu bampangi, na kati ya mawa mpe bampasi ya beto nyonso, beto kuzwaka bukindi samu na beno mpe samu na lukwikulu yina beno ke lakisaka. 8 Ntangu yayi beto lenda tatamana na kuzinga kana beno vanda ya kutelama ngolo na Mfumu. 9 Wapi mutindu beto lenda vutula Nzambi matondo samu na beno mpe samu na kilengi ya mingi yina beno ke pesaka beto na mantwala ya Nzambi ya beto? 10 Mpimpa na ntangu beto ke bondilaka na bukindi samu beto lenda kutala beno* mpe kupesa beno yina ke na kondwaka na kiminu ya beno.

11 Bika ti Nzambi ya beto mpe Tata yandi mosi mpe Mfumu ya beto Yesu kuyidikila beto nzila ya kukwiza na sika ya beno. 12 Dyaka, bika ti Mfumu sala ti beno kula, ee beno kula na faso ya kulutila na luzolo samu na bampangi mpe na mambu nyonso, kaka mutindu beto ke salaka yawu samu na beno. 13 Na mutindu yina, beno ke vanda ya kusikama na bantima ya beno, ya kukondwa mambu ya yimbi na kati ya busantu na mantwala ya Nzambi ya beto mpe Tata, na kilumbu yina Mfumu ya beto Yesu ke vanda* na basantu nyonso.

4 Na kumanisa bampangi, mutindu beno kuzwaka malongi na sika ya beto na yina me tadila mutindu ya kudyatila samu na kusepelisa Nzambi, kaka mutindu beno ke salaka yawu, beto ke na lombaka na beno mpe ke na bondilaka beno na nkumbu ya Mfumu Yesu na kutatamana na kusala yawu na mutindu ya kulutila. 2 Beno zaba mambu yina beto longaka beno na nkumbu ya Mfumu Yesu.

3 Luzolo ya Nzambi kele ti beno fwana kuvanda santu mpe beno kusala ve kinsuza.* 4 Muntu nyonso na kati ya beno fwana kuzaba mutindu ya kukutika nzutu ya yandi na busantu mpe na lukumu, 5 na lukoso ve, na nsatu ya ngolo ve ya kuvukisa nzutu mutindu bantu ya makanda yina zaba ve Nzambi ke vandaka na yawu. 6 Na mambu yayi, ata muntu me fwana kutalisa mpangi ya yandi mpasi to kukanga yandi nzila na mambu yina yandi ke na luve ya kusala, samu Yehova* ke semba ba yina ke salaka bamambu ya muntindu yayi, mutindu beto zonzilaka beno yawu na ntama mpe beto lakisaka beno yawu pwelele. 7 Nzambi bokilaka ve beto samu na mambu ya mvindu kasi samu na busantu. 8 Ni na yawu, muntu yina ke vweza malongi yayi, yandi ke vweza ve muntu, kasi yandi ke vweza Nzambi yina ke pesaka beno mpeve ya santu ya yandi.

9 Kasi na yina me tadila kuzola bampangi, beno ke ve na nsatu beto sonikila beno. Samu beno mosi mpe ni Nzambi ke longaka beno na kuzolasana. 10 Ya tsyeleka, beno ke na salaka mutindu yina na bampangi ya Masedwane nyonso. Kasi beto ke na lombaka na beno bampangi na kutatamana na kusala yawu mbote-mbote na mutindu ya kulutila. 11 Beno sala ngolo na kuzinga na kizunu, beno kukota ve na bamambu ya bangana, mpe beno sala na maboko ya beno mosi mutindu beto longaka beno, 12 samu beno tambula na mutindu ya mbote na meso ya bantu ya makanda mpe samu beno kondwa ata kima mosi ve.

13 Dyaka, bampangi beto zola beno zaba mambu yina me tadila ba yina ke ya kulala na lufwa, samu beno vanda ve na mawa mutindu bantu ya nkaka yina ke ve na kivuvu. 14 Kana beto ke na kiminu ti Yesu kufwaka mpe vumbukaka na lufwa, mutindu mosi mpe beto ke na kiminu ti bantu yina kufwaka na bumosi na Yesu, Nzambi ke vutula bawu na luzingu samu ba vanda na Yesu. 15 Yayi ni mambu beto ke na zonzaka na beno na nzila ya mambu ya Yehova:* Beto ba yina ke na luzingu mpe yina ke vanda moyo tii na ntangu yina Mfumu ke vanda,* beto ke ya kulutila ata fioti ve na mfunu ba yina ke ya kulala na lufwa. 16 Samu Mfumu yandi mosi ke katuka na zulu na ndinga ya kupesa misiku, na ndinga ya mfumu ya bambazi, mpe na mpungi* ya Nzambi, mpe ba yina kufwaka na bumosi na Kristo ke vanda bantu ya ntete na kuvumbuka. 17 Beto ba yina ke na luzingu mpe ke vuuka ke vanda kintwadi na bawu. Ba ke nata beto na kati ya matuti samu na kubwabana Mfumu na mazulu. Ni na mutindu yina beto ke vanda ntangu nyonso na Mfumu. 18 Na yawu, beno tatamana na kukindisa bampangi beno na beno na bamambu yina.

5 Bampangi, samu na bantangu to bilumbu, beno ke ve na nsatu beto sonikila beno, 2 samu beno mosi me zaba mbote-mbote ti kilumbu ya Yehova* ke kwiza na mpimpa mutindu muyibi. 3 Ntangu ba ke zonza: “Kizunu mpe lukengolo!” kaka na ntangu yina lufwa ke kumina bawu na mbala mosi, mutindu misongo ke kangaka kento ya kivumu mpe ba ke lenda kukima ata fioti ve. 4 Kasi beno bampangi, beno ke ve na kitombi, samu ntangu basikila beno na ntangu yina beno vanda vingila ve mutindu ya ke basikilaka miyibi, 5 samu beno nyonso ke bana ya nsemo mpe bana ya kilumbu. Beto kele ve bantu ya mpimpa to ya kitombi.

6 Na yawu, beto kulala ve mutindu bantu ya nkaka kasi beto vanda ekenge mpe beto bumba makanisi ya beto. 7 Samu ba yina ke lalaka, ke lalaka na mpimpa, mpe ba yina ke kolaka malafu, ke kolaka malafu na mpimpa. 8 Kasi beto ba yina ke bantu ya kilumbu, beto bumba makanisi ya beto mpe beto lwata kinkuti ya kisengo ya kiminu mpe ya luzolo yina ke bumbaka ntulu. Beto lwata mpe kivuvu ya luvuukusu mutindu yimpu ya kisengo,* 9 samu Nzambi soolaka ve beto samu na nkele, kasi yandi soolaka beto samu na kuzwa luvuukusu na nzila ya Mfumu ya beto Yesu Kristo. 10 Yandi kufwaka samu na beto. Ya vanda ti beto ke ekenge to ya kufwa, beto me fwana kuzinga kintwadi na yandi. 11 Na yawu, beno tatamana na kupesa bampangi ngolo mpe na kukindisa bampangi kaka mutindu beno ke salaka yawu.

12 Bampangi, ntangu yayi beto ke na lombaka na beno na kuzitisa bantu yina ke salaka kisalu ya ngolo na kati ya beno, ba yina ke twadisaka beno na kati ya Mfumu mpe ba yina ke kebisaka beno. 13 Beno pesa bawu lukumu mingi na kati ya luzolo samu na kisalu ya bawu. Beno vanda na kizunu beno na beno. 14 Dyaka, beto ke na lombaka na beno bampangi, na kukebisa bantu ya yintu ngolo. Beno zonza na bantu yina ke na mawa* na mutindu yina ke pesa bawu ngolo. Beno sadisa ba yina ke ya kulemba. Beno lakisa ntima ya yinda na bantu nyonso. 15 Beno sala keba, ata muntu mosi ve kuvutula yimbi na yimbi, kasi ntangu nyonso beno tatamana na kusala mambu ya mbote na kati ya beno mpe na bantu nyonso ya nkaka.

16 Beno vanda ntangu nyonso na kilengi. 17 Beno sambila ntangu nyonso. 18 Beno vutula Nzambi matondo na mambu nyonso, ni yina ke luzolo ya Nzambi samu na beno na bumosi na Kristo Yesu. 19 Beno kufwa ve tiya ya mpeve. 20 Beno kuvweza ve bambikudulu. 21 Beno sosa kuzaba mambu nyonso kana ya ke ya tsyeleka. Beno vanda ya kukangama ngolo na yina ke mbote. 22 Beno manga mambu ya yimbi ya mutindu nyonso.

23 Bika ti Nzambi ya kizunu yandi mosi kumisa beno santu na faso ya kulunga. Bika mpe ti mpeve, mwela* mpe nzutu ya beno bampangi, na mambu nyonso, vanda ya kukondwa mambu yina ba lenda semba na ntangu yina Mfumu ya beto Yesu Kristo ke vanda.* 24 Muntu yina ke na bokilaka beno ke ya kukwikama mpe ntembe ve, yandi ke sala yawu.

25 Bampangi, beno tatamana na kusambila samu na beto.

26 Beno pesa bampangi nyonso mbote na bizu ya santu.

27 Mu ke na bondilaka beno na nkumbu ya Mfumu, na kutanga mukanda yayi na mantwala ya bampangi nyonso.

28 Bika ti ntima ya kulutila mbote ya Mfumu ya beto Yesu Kristo vanda na beno.