MUKANDA YA ZOLE NA BATESALONIKA

1 Yayi mukanda me katuka na Polo, na Silvanuse,* mpe na Timote, samu na kimvuka ya Batesalonika yina ke na bumosi na Nzambi Tata ya beto mpe na Mfumu Yesu Kristo:

2 Bika ti ntima ya kulutila mbote mpe kizunu ya Nzambi Tata mpe ya Mfumu Yesu Kristo vanda na beno.

3 Bampangi, beto me fwana kuvutula Nzambi matondo ntangu nyonso samu na beno. Ya me lunga beto sala yawu samu kiminu ya beno ke na kulaka mpe samu luzolo yina beno ke na yawu samu na bampangi ke na kulaka. 4 Na yawu, beto ke bulaka ntulu samu na beno na kati ya bimvuka ya Nzambi, samu beno ke kangaka ntima mpe ke na kiminu na kati ya bankwamusu mpe bampasi nyonso yina beno ke kutanaka na yawu. 5 Ya ke kidimbu yina ke na lakisaka ti Nzambi ke sambisaka na lunungu mpe ya ke salaka ti Nzambi tala ti beno me fwana kukota na Kimfumu ya yandi yina beno ke talaka mpasi mingi.

6 Samu Nzambi ke Nzambi ya lunungu,* yandi ke talisa mpasi ba yina ke na talisaka beno mpasi. 7 Kasi beno bantu yina ke talaka mpasi, Nzambi ke bomba beno na beto ntangu Mfumu Yesu ke talana na zulu na bambazi ya yandi ya ngolo, 8 na kati ya tiya ya nene samu na kuvutula yimbi na ba yina zaba ve Nzambi, mpe na ba yina ke tumamaka ve na nsangu ya mbote ya Mfumu ya beto Yesu. 9 Kitumbu yina ba ke kuzwa ke vanda lufwa ya ntangu nyonso. Na yawu, ba ke vanda dyaka ve na mantwala ya yandi mpe ya nkembo ya yandi ya ngolo. 10 Ntangu Mfumu ke kwiza samu na kubaka nkembo kintwadi na bampangi ya yandi basantu, bantu nyonso yina ke na kiminu na yandi ke vanda na kilengi mpe samu beno ndimaka bamambu yina beto zonzaka na beno, beno ke vanda mpe na yandi.

11 Ni na yawu, beto ke sambilaka ntangu nyonso samu na beno, samu Nzambi ya beto bakila beno mutindu bantu yina yandi me lunga kubokila. Mpe na ngolo ya yandi, yandi lungisa mambu nyonso ya mbote yina yandi zola mpe bisalu nyonso ya kiminu. 12 Ya ke mutindu yina samu nkumbu ya Mfumu ya beto Yesu kuzwa nkembo, mpe beno kuzwa nkembo kintwadi na yandi, na yina me tadila ntima ya kulutila mbote ya Nzambi ya beto mpe ya Mfumu Yesu Kristo.

2 Kasi bampangi, na yina me tadila nkwizulu ya Mfumu ya beto Yesu Kristo mpe kuvukana ya beto na yandi, beto ke na lombaka beno 2 na kubika ve mabanza ya beno kuma kidi-kidi na mbangu, mpe beno kuvanda ve na boma na bansangu yina ke talana mutindu ya me katuka na Nzambi, ya vanda na nzonzolo to na mikanda yina ke na talanaka mutindu ya me katuka na beto, yina ke zonza ti kilumbu ya Yehova* me kuma.

3 Ata muntu mosi ve kuvuna* beno na konso mutindu, samu kilumbu yango ke kwiza ntete ve tekila muntu yina ke pesa mukongo na Nzambi kuma, mpe ti muntu yina ke zitisaka ve musiku talana, mwana ya lufwa. 4 Yandi ke mbeni mpe yandi ke na zulu ya muntu nyonso yina ba ke bokilaka nzambi, to ya kima nyonso yina ba ke sambilaka. Ni na yawu yandi ke ya kuvanda na tempelo ya Nzambi mpe yandi mosi ke talanaka na meso ya bantu ti yandi ke nzambi. 5 Beno ke na zabaka dyaka ve ti ntangu mu vandaka na beno mu zonzilaka beno bamambu yayi?

6 Kasi ntangu yayi beno me zaba yinki ke na kangaka yandi nzila. Na yawu, yandi ke talana kaka na ntangu ya yandi. 7 Ya tsyeleka, mambu yayi ya kuzitisa ve musiku ke na salaka kisalu, kasi ya ke vanda kaka ya kubumbana tii ntangu muntu yina ke na kangaka yawu nzila ke vanda dyaka ve. 8 Na ntangu yina, muntu yina ke zitisaka ve musiku ke talana, Mfumu Yesu ke kufwa yandi na lubakusu ya mpeve ya yinwa ya yandi mpe ke kumisa yandi kima ya mpamba na ntangu yina kuvanda* ya Mfumu ke talana pwelele. 9 Kuvanda ya muntu yina ke zitisaka ve musiku ke bisalu ya Satana na mitindu nyonso ya bimangu mpe bidimbu ya luvunu mpe bamambu ya kuyituka, 10 mpe mambu nyonso ya kukondwa lunungu mpe ya luvunu ya bantu yina ba ke kufwa. Ba ke kuzwa kitumbu ya lufwa samu ba ndimaka ve matsyeleka mpe ba zolaka ve yawu. Kana ba salaka yawu, ba zolaka vuuka. 11 Ni na yawu, Nzambi ke bika ti ngolo mosi ya luvunu vuna bawu samu ba ndima mambu ya luvunu. 12 Na mutindu yina, ba ke sambisa bawu nyonso samu ba ndimaka ve matsyeleka, kasi ba kuzwaka kilengi na mambu ya kukondwa lunungu.

13 Kasi beto me fwana kuvutula ntangu nyonso matondo na Nzambi samu na beno bampangi yina Yehova* ke zolaka. Samu katuka mbandukulu Nzambi soolaka beno samu na kuvuuka, na kukumisaka beno santu na nzila ya mpeve ya yandi mpe na nzila ya kiminu ya beno na matsyeleka. 14 Yandi bokilaka beno na mambu yayi, na nzila ya nsangu ya mbote yina beto ke na zonzilaka, samu beno kuzwa nkembo ya Mfumu ya beto Yesu Kristo. 15 Na yawu bampangi, beno vanda ya kusikama mpe beno tatamana na kuvanda ya kukangama na bamambu yina ba longaka beno, ya vanda na nzila ya yinwa to ya mukanda yina katukaka na beto. 16 Dyaka, bika ti Mfumu Yesu Kristo yandi mosi mpe Nzambi Tata ya beto yina zolaka beto, mpe ke pesaka beto ngolo na mutindu yina ke ve na nsuka na kivuvu ya mbote na nzila ya ntima ya kulutila mbote, 17 kubomba bantima ya beno mpe kukumisa beno ngolo samu ntangu nyonso beno zonza mpe beno sala mambu ya mbote.

3 Bampangi, samu na kumanisa, beno tatamana na kusambila samu na beto, samu mambu ya Yehova* tatamana na kumwangana na mbangu mpe kuzwa nkembo kaka mutindu ya salamaka na sika ya beno, 2 mpe beto vuuka na maboko ya bantu yina ke talisaka mpasi mpe ya bantu ya yimbi, samu bantu nyonso ve ke vandaka na kiminu. 3 Kasi Mfumu ke ya kukwikama. Yandi ke pesa beno ngolo mpe ke bumba beno na muntu ya yimbi. 4 Dyaka, beto ke tulaka ntima na Mfumu samu na beno ti beno ke zitisa mpe ke tatamana na kusala bamambu yina beto longaka beno. 5 Bika ti Mfumu tatamana na kutwadisa bantima ya beno samu beno zola Nzambi mpe beno kanga ntima samu na Kristo.

6 Ntangu yayi bampangi, na nzila ya Mfumu Yesu Kristo, beto ke na zonzaka na beno ti beno vanda ntama na konso mpangi yina ke tambulaka na mutindu ya kidi-kidi mpe na mutindu yina ke ve ya kukwelana na malongi yina beno* kuzwaka na sika ya beto. 7 Beno mosi me zaba yinki beno me fwana kusala samu na kulanda kifwani ya beto, samu beto me dyatila ve na mutindu ya kidi-kidi na kati ya beno. 8 Beto me kudya mpe ve madya ya muntu ya ofele.* Kasi mpimpa na ntangu beto salaka kisalu ya ngolo yina ke lembisaka, samu beto vanda ve kizitu ya nene samu na ata muntu mosi na kati ya beno. 9 Ya ke ve ti beto ke ve na muswa ya kuzwa lubakusu ya beno, kasi beto salaka mutindu yina samu beto vanda kifwani yina beno fwana kulanda. 10 Ya tsyeleka, ntangu beto vandaka na beno, beto vanda zonzilaka beno ti kana muntu zola ve kusala, yandi kudya mpe ve. 11 Kasi beto ke na kuwaka ti bantu ya nkaka na kati ya beno ke na tambulaka na mutindu ya kidi-kidi, ti ba ke na salaka ata fioti ve kisalu, kasi ba ke na kotaka na bamambu ya bangana. 12 Na bantu yina, beto ke na pesaka musiku mpe beto ke na lombaka na nkumbu ya Yesu Kristo ti ba fwana kusala kisalu na kizunu mpe ba kudya madya yina bawu mosi me sala.

13 Kasi beno bampangi, beno bika ve kusala mambu ya mbote. 14 Kana muntu ke na tumamaka ve na bamambu yina beto me sonika na mukanda yayi, beno tala mbote-mbote ya kele nani mpe beno kuvukana ve kintwadi na yandi samu yandi kufwa nsoni. 15 Beno kubakila ve yandi mutindu mbeni, kasi beno tatamana na kukebisa yandi mutindu mpangi.

16 Bika ti Mfumu ya kizunu yandi mosi pesa beno kizunu ntangu nyonso na mutindu nyonso. Bika ti Mfumu vanda na beno nyonso.

17 Yayi mbote ya munu Polo yina mu me sonika na diboko ya munu mosi. Ya ke kidimbu ya munu na konso mukanda. Yayi ni mutindu mu ke sonikaka.

18 Bika ti ntima ya kulutila mbote ya Mfumu ya beto Yesu Kristo vanda na beno nyonso.