LUZABUSU YINA BA PESAKA YOANE

1 Luzabusu* ya Yesu Kristo yina Nzambi pesaka yandi, samu na kulakisa na bisadi ya yandi bamambu yina me fwana kusalama na mwa ntangu fioti. Mpe yandi filisaka mbazi ya yandi, mpe na nzila ya yandi, yandi lakisaka yawu na bidimbu na kisadi ya yandi Yoane, 2 yina pesaka kimbangi samu na dyambu ya Nzambi, mpe samu na kimbangi ya Yesu Kristo, ee, samu na mambu nyonso yina yandi talaka. 3 Kyese na muntu yina ke tangaka na ndinga ya ngolo, mpe na bantu yina ke kuwaka bamambu ya mbikudulu yayi mpe yina ke tumamaka na bamambu yina ba me sonika na kati, samu ntangu yina ba tulaka me kuma pene-pene.

4 Munu Yoane, mu ke na sonikaka na bimvuka 7 yina ke na kizunga ya Aziya:

Bika ti beno kuzwa ntima ya kulutila mbote mpe kizunu yina me katuka na sika ya “Muntu yina kele, yina vandaka, mpe yina ke na kwizaka,” mpe na sika ya bampeve 7 yina ke na mantwala ya kiti ya kimfumu ya yandi, 5 mpe na sika ya Yesu Kristo, “Mbangi ya Kukwikama,” “muntu ya ntete yina vumbukaka na lufwa” mpe “Mfumu ya bantinu ya ntoto.”

Na yandi yina ke zolaka beto, mpe yina basisaka beto na masumu ya beto na nzila ya menga ya yandi 6 (mpe yina me kumisa beto kimfumu, banganga-nzambi samu na Nzambi mpe Tata ya yandi), ee, bika yandi kuzwa nkembo mpe ngolo samu na ntangu nyonso. Ameni.

7 Beno tala, yandi ke na kwizaka na matuti, mpe meso ya bantu nyonso ke tala yandi, na ba yina tobolaka yandi. Mpe mabuta nyonso ya ntoto ke bula banzutu ya bawu na mawa samu na yandi. Ee, Ameni.

8 Yehova* Nzambi me zonza: “Mu ke Alfa mpe Omega,* Muntu yina kele, yina vandaka, mpe yina ke na kwizaka, Muntu ya Ngolo-Nyonso.”

9 Munu Yoane, mpangi ya beno mpe muntu yina ke na kabulaka na beno mpasi, kimfumu mpe kukanga ntima, kintwadi na Yesu, mu vandaka na kisanga* yina ba ke bokilaka Patmose, samu mu vanda zonzila mambu yina me tadila Nzambi mpe mu vanda pesa kimbangi na yina me tadila Yesu. 10 Na nzila ya mpeve ya santu, mu kumaka na kilumbu ya Mfumu, mpe mu kuwaka na manima ya munu ndinga mosi ya ngolo mutindu makelele ya mpungi.* 11 Ya zonzaka: “Mambu yina nge ke na talaka, sonika yawu na kati ya rulo mpe filisa yawu na bimvuka 7: na Efeze, na Simirne, na Pergame, na Tiatire na Sarde, na Filadelfi mpe na Lawodise.”

12 Mu balukaka samu na kutala nani vanda zonza na munu, mpe ntangu mu balukaka, mu talaka bima 7 ya wolo ya kutudila bamwinda, 13 mpe na kati-kati ya bima ya kutudila bamwinda yina, mu talaka muntu mosi mutindu mwana ya muntu. Yandi vandaka ya kulwata lele mosi yina vanda kubwa yandi tii na makulu, mpe yandi kangaka kitambala ya wolo na ntulu. 14 Yintu ya yandi mpe bansuki ya yandi vandaka mpembe mutindu mika ya mpembe ya mameme, mutindu neje, mpe meso ya yandi vandaka mutindu tiya yina ke na pelaka, 15 mpe makulu ya yandi vandaka mutindu kwivre ya kitoko ntangu ya ke ngengaka na kati ya kisika yina ke na tiya ya ngolo, mpe ndinga ya yandi vandaka mutindu makelele ya bamaza mingi. 16 Yandi vandaka na bambwetete 7 na diboko ya yandi ya bakala, mbele mosi ya yinda yina ke meno na balweka nyonso zole vanda basika na yinwa ya yandi, mpe kizizi ya yandi vandaka mutindu ntangu, ntangu ya ke ngengaka na ngolo nyonso. 17 Ntangu mu talaka yandi, mu kubwaka na makulu ya yandi mutindu muntu yina me kufwa.

Mpe yandi tulaka diboko ya yandi ya bakala na zulu ya munu mpe zonzaka: “Kuvanda ve na boma, mu ke Muntu ya Ntete, mpe Muntu ya Nsuka, 18 mpe muntu ya moyo. Mu vandaka ya kufwa, kasi tala, mu ke moyo samu na mvula na mvula, mpe mu ke na bafungula ya lufwa mpe ya Ndyamu.* 19 Na yawu, sonika bamambu yina nge me tala, mpe bamambu yina ke na salamaka ntangu yayi, mpe bamambu yina ke salama na manima. 20 Na yina me tadila kinsweki ya santu ya bambwetete 7 yina nge talaka na kati ya diboko ya munu ya bakala, mpe bima 7 ya wolo ya kutudila bamwinda, zaba ti bambwetete 7 kele bambazi 7 ya bimvuka, mpe bima 7 ya kutudila bamwinda kele bimvuka 7.

2 “Sonikila mbazi ya kimvuka ya Efeze mutindu yayi: Muntu yina me simba bambwetete 7 na diboko ya yandi ya bakala mpe yina ke na tambulaka na kati-kati ya bima 7 ya wolo ya kutudila bamwinda me zonza bamambu yayi: 2 ‘Mu zaba bamambu yina nge ke salaka, kisalu ya nge ya ngolo mpe kifu ya nge ya kukangaka ntima. Mu zaba mpe ti nge ke sepelaka ve na bantu ya yimbi mpe nge mekaka ba yina ke zonzaka ti ba ke bantumwa, kasi ba kele ve yawu. Mpe nge me tala ti ba ke bantu ya luvunu. 3 Nge ke na kangaka mpe ntima mpe nge me ndima kutala mpasi samu na nkumbu ya munu, mpe nge me lemba ve. 4 Kasi mu me tala mambu ya yimbi yayi na nge: nge me bika luzolo yina vandaka na nge na kubanda.

5 “ ‘Ni na yawu, kanisa na kisika yina nge vandaka tekila nge kubwa, balula ntima, mpe sala bamambu yina nge vanda sala na kubanda. Kana nge balula ve ntima, mu ke kwizila nge mpe mu ke katula kima ya nge ya kutudila bamwinda na kisika ya yawu. 6 Kasi nge ke na dyambu mosi ya mbote: nge ke yiinaka bisalu ya mwa dibuundu ya Nikola yina munu mpe ke yiinaka. 7 Bika ti muntu yina ke na makutu, kuwa mambu yina mpeve ke na zonzaka na bimvuka: muntu yina ke nunga, mu ke pesa yandi luve ya kudya bambuma ya yinti ya luzingu yina ke na kati ya paradiso ya Nzambi.’

8 “Sonikila mbazi ya kimvuka ya Simirne mutindu yayi: ‘Muntu ya Ntete mpe Muntu ya Nsuka’, yina kufwaka mpe yina vutukaka dyaka na luzingu me zonza bamambu yayi: 9 ‘Mu zaba mpasi ya nge mpe bupovre ya nge, kasi nge ke mvwama. Mu zaba mpe kuvweza ya ba yina ke zonzaka ti ba ke Bazwife, kasi ba ke ve yawu ya tsyeleka, ntyo, ba ke sinagoge* ya Satana. 10 Kuvanda ve na boma ya mambu yina ke kumina nge na mwa ntangu fioti. Tala, Dyabulu ke tatamana na kulosa ba ya nkaka na kati ya beno na boloko, samu ba meka beno na faso ya kulunga mpe beno ke tala mpasi na kati ya bilumbu 10. Vanda ya kukwikama tii na lufwa, mpe mu ke pesa nge yimpu ya kimfumu ya luzingu. 11 Bika ti muntu yina ke na makutu, kuwa mambu yina mpeve ke na zonzaka na bimvuka: Muntu yina ke nunga, lufwa ya zole ke sala yandi ata kima.’

12 “Sonikila mbazi ya kimvuka ya Pergame mutindu yayi: Muntu yina ke na mbele ya yinda, yina ke meno na balweka nyonso zole me zonza mutindu yayi: 13 ‘Mu zaba kisika nge ke zingaka, ya zola zonza kisika yina kiti ya kimfumu ya Satana kele. Mpe ata faso yina nge ke na kangamaka ngolo na nkumbu ya munu mpe nge me manga ve kiminu yina nge ke na yawu na munu ata na bilumbu ya Antipase, mbangi ya munu ya kukwikama yina ba kufwaka na meso ya beno kisika yina Satana ke zingaka.

14 “ ‘Kasi mu me tala mwa bamambu ya yimbi yayi na nge: nge ke na bantu na kati ya nge yina ke landaka malongi ya Balami, muntu yina longaka Balake na kutula na mantwala ya bana ya Izraele kima yina ke salaka ti bantu bula dibaku, samu ba kudya bima yina ba me pesa na munkayulu na biteki, mpe ba sala kinsuza.* 15 Mutindu mosi nge ke mpe na bantu yina ke landaka malongi ya mwa dibuundu ya Nikola. 16 Na yawu, balula ntima. Kana nge sala ve yawu, mu ke na kwizilaka nge na mbangu mpe mu ke nwanisa bawu na mbele ya yinda yina ke na yinwa ya munu.

17 “ ‘Bika ti muntu yina ke na makutu, kuwa mambu yina mpeve ke na zonzaka na bimvuka: Muntu yina ke nunga, mu ke pesa yandi ndambu ya mane yina ke ya kubumbana, mpe mu ke pesa yandi ditadi ya mpembe yina ba ke ya kusonika na zulu ya yawu nkumbu ya malu-malu yina ata muntu zaba, katula kaka muntu yina me kuzwa yawu.’

18 “Sonikila mbazi ya kimvuka ya Tiatire mutindu yayi: Mwana ya Nzambi, yina ke na meso mutindu tiya yina ke na pelaka, mpe yina ke na makulu mutindu kwivre ya kitoko, me zonza bamambu yayi: 19 ‘Mu zaba bamambu yina nge ke salaka, luzolo ya nge, kiminu ya nge, kisalu ya nge mpe kifu ya nge ya kukangaka ntima mpe mu zaba ti bamambu yina nge ke na salaka ntangu yayi ke mingi kulutila yina nge salaka na kubanda.

20 “ ‘Kasi mu me tala mambu ya yimbi yayi na nge: nge ke na ndimaka kento ya yimbi yayi, Yezabele, yina ke zonzaka ti yandi ke mbikudi. Yandi ke longaka mpe ke vunaka bisadi ya munu samu ba sala kinsuza,* mpe ba kudya bima yina ba me pesa na munkayulu na biteki. 21 Mu pesaka yandi ntangu samu yandi balula ntima, kasi yandi zola ve kubalula ntima mpe kubika kinsuza* ya yandi. 22 Tala! Ya me bikana kaka fioti mu losa yandi na mfulu ya maladi, mpe mu ke talisa ba yina ke salaka kinsuza na yandi mpasi ya nene, katula kaka kana ba balula ntima, mpe ba bika bisalu ya yandi. 23 Mpe mu ke kufwa bana ya yandi na kimbevo ya yimbi yina ke kufwaka. Na yawu bimvuka nyonso ke zaba ti mu ke talaka makanisi yina ke ya kubumbana* mpe bantima, mpe mu ke pesa muntu na muntu na kati ya beno difuta yina me lunga na kutadilaka mambu yina yandi ke salaka.

24 “ ‘Kasi mu ke na zonzaka na beno, bantu ya nkaka yina ke na Tiatire, ba yina nyonso ke landaka ve malongi yayi, bantu yina zaba ve bamambu yina ba ke bokilaka “bamambu ya sunda ya Satana”:* Mu ke ve na bwelaka beno kilo ya nkaka. 25 Kaka ti beno kangama ngolo na yina beno ke na yawu tii ntangu mu ke kwiza. 26 Mpe na muntu yina ke nunga mpe ke bumba bisalu ya munu tii na nsuka, mu ke pesa yandi lutumu na zulu ya makanda, 27 mpe yandi ke twadisa bantu na yinti ya kisengo. Mutindu yina, ba ke mwangana mutindu bakopo yina ba me yidika na ntoto. Lutumu yango, munu mosi mpe mu kuzwaka yawu na Tata. 28 Mpe mu ke pesa yandi mbwetete ya suka. 29 Bika ti muntu yina ke na makutu, kuwa mambu yina mpeve ke na zonzaka na bimvuka.’

3 “Sonikila mbazi ya kimvuka ya Sarde mutindu yayi: Muntu yina ke na bampeve 7 ya Nzambi, mpe bambwetete 7 me zonza mambu yayi: ‘Mu zaba bamambu yina nge ke salaka. Nge ke ya kuzabana* ti nge ke moyo, ntyo, nge ke ya kufwa. 2 Fungula meso, mpe pesa ngolo na bima yina me bikana, yina kumaka pene-pene na kufwa, samu mu me tala ti nge me lungisa* ve mbote-mbote bamambu yina nge ke salaka na mantwala ya Nzambi ya munu. 3 Ni na yawu, kanisa* ntangu nyonso na yina nge me kuzwa, mpe na yina nge me kuwa. Tatamana na kubumba yawu, mpe balula ntima. Ya tsyeleka kana nge vumbuka ve, mu ke kwiza mutindu muyibi, mpe nge ke zaba ata fioti ve ngunga yina mu ke basikila nge.

4 “ ‘Ata faso yina, nge ke na mwa bantu* na Sarde yina kumisaka ve bilele ya bawu mvindu, mpe ba ke tambula kintwadi na munu na bilele ya mpembe, samu ba me lunga kuzwa yawu. 5 Muntu yina ke nunga, ba ke lwatisa yandi bilele ya mpembe, mpe mu ke katula* ata fioti ve nkumbu ya yandi na buku ya luzingu. Mu ke ndima na mantwala ya Tata ya munu mpe ya bambazi ya yandi ti mu zaba nkumbu ya yandi. 6 Bika ti muntu yina ke na makutu kuwa mambu yina mpeve ke na zonzaka na bimvuka.’

7 “Sonikila mbazi ya kimvuka ya Filadelfi mutindu yayi: Muntu yina ke santu, yina ke zonzaka matsyeleka, yina ke na fungula ya Davidi, yina kana yandi me fungula ata muntu lenda kanga, mpe kana yandi me kanga ata muntu lenda fungula, me zonza bamambu yayi: 8 ‘Mu zaba bamambu yina nge ke salaka. Kuwa! Mu me tula na mantwala ya nge mwelo ya kufunguka yina ata muntu lenda kanga. Mu zaba ti nge ke kaka na ngolo fioti, kasi ata faso yina, nge me tumama na mambu ya munu mpe nge me manga ve nkumbu ya munu. 9 Kuwa! Bantu ya sinagoge* ya Satana, yina ke zonzaka ti ba ke Bazwife, ntyo ba ke ve Bazwife, kasi ba ke na vunaka, kuwa, mu ke sala ti ba kwiza fukama na makulu ya nge,* mpe mu ke sala ti ba zaba ti mu zolaka nge. 10 Samu nge bumbaka mambu yina ba zonzaka na yina me tadila kifu ya munu ya kukangaka ntima,* munu mpe mu ke bumba nge na ngunga ya kumeka yina ke kwiza na zulu ya ntoto ya muvimba, kisika bantu ke vandaka, samu na kumeka bantu yina ke vandaka na ntoto. 11 Mu ke na kwizaka mbangu. Kangama ngolo na mambu yina nge ke na yawu samu ata muntu baka yimpu ya nge ya kimfumu.

12 “ ‘Muntu yina ke nunga, mu ke kumisa yandi dikunzi* na kati ya tempelo ya Nzambi ya munu. Yandi ke basika dyaka ve ata fioti na kati ya yawu, mpe mu ke sonika na zulu ya yandi nkumbu ya Nzambi ya munu, mpe nkumbu ya mbanza ya Nzambi ya munu, Yeruzalemi ya Malu-malu, yina ke na katukaka na zulu, na sika ya Nzambi ya munu mpe ke na kulumukaka, mpe nkumbu ya munu ya malu-malu. 13 Bika ti muntu yina ke na makutu kuwa mambu yina mpeve ke na zonzaka na bimvuka.’

14 “Sonikila mbazi ya kimvuka ya Lawodise mutindu yayi: Ameni, mbangi ya kukwikama mpe ya tsyeleka, kubanda ya bima yina Nzambi yidikaka me zonza bamambu yayi: 15 ‘Mu zaba bamambu yina nge ke salaka. Mu zaba ti nge ke ve madidi to tiya. Mu zolaka ti nge vanda madidi to tiya. 16 Kasi samu nge ke kaka mwa tiya, mpe nge ke ve tiya to madidi, mu ke luka nge. 17 Samu nge ke na zonzaka, “Mu ke mvwama, me kuzwa bimvwama, mu ke na nsatu ya ata kima mosi ve,” kasi nge zaba ve ti nge ke muntu ya mawa, nge ke povre, muntu ya meso ya kufwa mpe mutakala. 18 Mu ke na pesaka nge malongi na kusumba na sika ya munu wolo yina ba me kumisa kitoko na tiya, samu nge kuma mvwama, na kusumba bilele ya mpembe samu nge lwata mpe samu bantu tala ve mutakala ya nge, mpe nge kufwa ve nsoni, na kusumba mpe manganga ya meso samu nge pakula yawu na meso ya nge samu nge tala.

19 “ ‘Bantu nyonso yina mu ke zolaka mingi, mu ke ngalaka bawu mpe mu ke sembaka bawu. Ni na yawu, vanda na manzangu mpe balula ntima. 20 Kuwa! Mu ke ya kutelama na mantwala ya mwelo mpe mu ke na konkotaka. Kana muntu kuwa ndinga ya munu mpe fungula mwelo, mu ke kota na yinzo ya yandi, mpe mu ke kudya madya ya nkokila na yandi, mpe yandi na munu. 21 Muntu yina ke nunga, mu ke pesa yandi nzila ya kuvanda na munu na kiti ya munu ya kimfumu, kaka mutindu munu mpe mu nungaka mpe mu vandaka na Tata ya munu na kiti ya yandi ya kimfumu. 22 Bika ti muntu yina ke na makutu kuwa mambu yina mpeve ke na zonzaka na bimvuka.’ ”

4 Na manima ya mambu yayi, mu talaka, mpe tala! mwelo mosi ya mwasi na zulu, mpe ndinga ya ntete yina mu kuwaka yina vanda zonza na munu vandaka mutindu mpungi.* Ya zonzaka na munu: “Kwiza na zulu awa, mpe mu ke lakisa nge bamambu yina ke salama.” 2 Kaka na manima ya yawu, mpeve ya Nzambi bandaka kusala na kati ya munu, mpe tala! kiti mosi ya kimfumu na mazulu mpe muntu mosi vandaka ya kuvanda na zulu ya kiti ya kimfumu yango. 3 Mpe muntu yina vandaka ya kuvanda vanda talana mutindu ditadi ya yasipe mpe ya sardwane,* mpe zinga-zinga ya kiti ya kimfumu, ya vandaka na mukyama* yina vanda talana mutindu emerode.

4 Bakiti ya kimfumu 24 vandaka zinga-zinga ya kiti ya kimfumu yango, mpe mu talaka bakuluntu 24 ya kuvanda na zulu ya bakiti ya kimfumu yango. Ba vandaka ya kulwata bilele ya mpembe, mpe na zulu ya bayintu ya bawu, ya vandaka na bayimpu ya kimfumu ya wolo. 5 Bansemo ya kidumu,* bandinga mpe bidumu vanda basika na kiti yango ya kimfumu, mpe ya vandaka na bamwinda ya tiya 7 yina vanda pela na mantwala ya kiti ya kimfumu. Bamwinda yango ke na lakisaka bampeve 7 ya Nzambi. 6 Na mantwala ya kiti ya kimfumu yango, ya vandaka na kima mosi yina vandaka mutindu mubu ya kitala-tala, mutindu ditadi ya ntalu ya kristale.

Na kati-kati ya kiti ya kimfumu* mpe zinga-zinga ya yawu, ya vandaka na bivangu yiya ya moyo yina vandaka ya kufuluka na meso, na mantwala mpe na manima. 7 Kivangu ya ntete ya moyo vandaka mutindu nkosi, kivangu ya zole ya moyo vandaka mutindu mwana ya ngombe ya bakala, kivangu ya tatu ya moyo vandaka na kizizi mutindu ya muntu, mpe kivangu ya yiya ya moyo vandaka mutindu mbemba* yina ke na pumbukaka. 8 Bivangu yiya ya moyo yina, vandaka mosi na mosi ya bawu na mapapu 6, yina vandaka ya kufuluka na meso zinga-zinga ya yawu mpe na yisi ya yawu. Mpe mpimpa na ntangu ba vanda bika ve kuzonza: “Santu, santu, santu ke Yehova* Nzambi, Muntu ya Ngolo-Nyonso, yina vandaka, yina kele, mpe yina ke na kwizaka.”

9 Bambala nyonso yina bivangu ya moyo vanda pesa nkembo, lukumu mpe matondo na Muntu yina vandaka ya kuvanda na kiti ya kimfumu, Muntu yina ke zingaka mvula na mvula, 10 bakuluntu 24 vanda kubwa na mantwala ya Muntu yina vandaka ya kuvanda na kiti ya kimfumu, mpe vanda sambila Muntu yina ke zingaka mvula na mvula, mpe ba vanda losa bayimpu ya bawu ya kimfumu na mantwala ya kiti ya kimfumu, mpe ba vanda zonza: 11 “Yehova* Nzambi ya beto, nge me lunga kuzwa nkembo, lukumu mpe ngolo, samu nge yidikaka bima nyonso mpe ni na luzolo ya nge ya kwizaka na luzingu, mpe ya yidamaka.”

5 Mpe mu talaka na diboko ya kibakala ya Muntu yina vandaka ya kuvanda na kiti ya kimfumu, rulo mosi yina ba vandaka ya kusonika na balweka nyonso zole.* Ya vandaka ya kukangama ngolo na binyemo 7.  2 Mpe mu talaka mbazi mosi ya ngolo kuzonza* na ndinga ya ngolo: “Nani ke ya kulunga samu na kufungula rulo mpe kumwangisa binyemo ya yawu?” 3 Kasi ata muntu na zulu, to na ntoto to na yisi ya ntoto vanda lenda kufungula rulo mpe kutala na kati ya yawu. 4 Mu bandaka kudila mingi samu ba kuzwaka ata muntu yina vandaka ya kulunga samu na kufungula rulo mpe kutanga na kati ya yawu. 5 Kasi mosi ya bakuluntu zonzaka na munu: “Bika kudila. Tala! Nkosi ya dibuta ya Yuda, mwanzi ya Davidi, me nunga. Na yawu, yandi lenda fungula rulo mpe binyemo ya yawu.”

6 Mpe mu talaka na kati-kati ya kiti ya kimfumu mpe ya bivangu yiya ya moyo, mpe na kati-kati ya bakuluntu, mwana mosi ya dimeme yina vanda talana mutindu ba kufwaka yandi. Yandi vandaka na mampoka 7 mpe meso 7, mpe meso yango ke lakisaka bampeve 7 ya Nzambi yina ba filisaka na ntoto nyonso. 7 Na mbala mosi, yandi kwizaka na mantwala mpe bakaka rulo na diboko ya kibakala ya Muntu yina vandaka ya kuvanda na kiti ya kimfumu. 8 Ntangu yandi bakaka rulo yango, bivangu yiya ya moyo, mpe bakuluntu 24 fukamaka na mantwala ya Mwana ya Dimeme, mpe mosi na mosi ya bawu vandaka na gitare* mpe bandonga ya wolo ya kufuluka na ansan. (Ansan ke lakisaka balusambu ya basantu.) 9 Mpe ba ke na yimbaka nzimbu mosi ya malu-malu yina ke na zonzaka: “Nge ke ya kulunga samu na kubaka rulo mpe kufungula binyemo ya yawu, samu ba kufwaka nge mpe na menga ya nge, nge sumbaka samu na Nzambi bantu ya mabuta nyonso, bandinga* nyonso, makanda nyonso mpe bayinsi nyonso, 10 mpe nge me kumisa bawu kimfumu mpe banganga-nzambi samu na Nzambi ya beto, mpe ba me fwana kuyala mutindu bamfumu na zulu ya ntoto.”

11 Mpe mu talaka mpe mu kuwaka ndinga ya bambazi mingi zinga-zinga ya kiti ya kimfumu mpe ya bivangu ya moyo mpe ya bakuluntu, mpe lutangu ya bawu vandaka bamiriade ya bamiriade,* mpe mafunda ya mafunda, 12 mpe ba vanda zonza na ndinga ya ngolo: “Mwana ya Dimeme yina ba kufwaka ke ya kulunga na kuzwa lutumu, bimvwama, ndwenga, ngolo, lukumu, nkembo mpe lusakumunu.”

13 Mpe mu kuwaka bivangu nyonso yina vandaka na mazulu, na ntoto, na yisi ya ntoto, mpe na mubu mpe bima nyonso yina ke na kati ya yawu kuzonza: “Bika ti lusakumunu, lukumu, nkembo mpe ngolo vanda na Muntu yina ke ya kuvanda na zulu ya kiti ya kimfumu mpe na Mwana ya Dimeme samu na mvula na mvula.” 14 Bivangu yiya ya moyo vanda zonza: “Ameni!” mpe bakuluntu kubwaka mpe sambilaka.

6 Mpe mu talaka ntangu Mwana ya Dimeme fungulaka mosi ya binyemo 7, mpe mu kuwaka mosi ya bivangu yiya ya moyo kuzonza na ndinga mosi mutindu kidumu: “Kwiza!” 2 Mpe mu talaka, mpe tala! mpunda mosi ya mpembe, mpe muntu yina vandaka ya kuvanda na zulu ya yawu vandaka na munduki ya madyonga. Ba pesaka yandi yimpu ya kimfumu, mpe yandi basikaka samu na kununga, mpe kununga tii na nsuka.

3 Ntangu Mwana ya Dimeme fungulaka kinyemo ya zole, mu kuwaka kivangu ya zole ya moyo kuzonza: “Kwiza!” 4 Mpunda ya nkaka basikaka. Ya vandaka mbwaki mutindu tiya, mpe ba pesaka na muntu yina vandaka ya kuvanda na zulu ya yawu lutumu ya kukatula kizunu na ntoto, samu bantu kufwa bampangi, mpe ba pesaka yandi mbele ya nene.

5 Ntangu Mwana ya Dimeme fungulaka kinyemo ya tatu, mu kuwaka kivangu ya tatu ya moyo kuzonza: “Kwiza!” Mpe mu talaka, mpe tala! mpunda ya ndombe, mpe muntu yina vandaka ya kuvanda na zulu ya yawu vandaka na kitezolo* na diboko ya yandi. 6 Mu kuwaka mutindu ndinga mosi na kati-kati ya bivangu yiya ya moyo kuzonza: “Kilo* mosi ya ble samu na denie mosi, mpe bakilo tatu ya orze samu na denie mosi,* mpe kubebisa ve mafuta ya olive mpe vinu.”

7 Ntangu Mwana ya Dimeme fungulaka kinyemo ya yiya, mu kuwaka ndinga ya kivangu ya yiya ya moyo kuzonza: “Kwiza!” 8 Mpe mu talaka, mpe tala! mpunda mosi ya kunzuluka, mpe muntu yina vandaka ya kuvanda na zulu ya yawu, nkumbu ya yandi vandaka Lufwa. Mpe Ndyamu* vanda landa yandi na manima, pene-pene na yandi. Ba pesaka bawu lutumu na zulu ya ndambu mosi na kati ya bandambu yiya ya ntoto, samu na kufwa bantu na mbele ya yinda mpe na nsatu, na maladi yina ke kufwaka, mpe na bibulu ya nsisi ya ntoto.

9 Ntangu Mwana ya Dimeme fungulaka kinyemo ya tanu, mu talaka na yisi ya kisika ya minkayulu bamwela* ya ba yina ba kufwaka samu na dyambu ya Nzambi, mpe samu na kimbangi yina ba pesaka. 10 Ba vanda ganga na ndinga ya ngolo na kuzonzaka: “Mfumu ya Kulutila Nene, muntu ya santu mpe yina ke zonzaka matsyeleka, tii wapi ntangu nge ke vingila samu na kusambisa mpe kuvutula yimbi na bantu yina ke zingaka na ntoto samu na menga ya beto?” 11 Ba pesaka na mosi na mosi ya bawu dizwela* ya mpembe, mpe ba zonzaka na bawu na kupema dyaka mwa fioti tii ntangu lutangu ya bampangi ya bawu bisadi mpe bampangi ya bawu yina ba zola kufwa mutindu bawu, ke lunga.

12 Mpe mu talaka ntangu Mwana ya Dimeme fungulaka kinyemo ya sambanu,* mpe ntoto ninganaka na ngolo nyonso, mpe ntangu kumaka ndombe mutindu ngoto ya ndombe,* mpe ngonda nyonso kumaka mutindu menga, 13 mpe bambwetete ya mazulu kubwaka na ntoto mutindu ntangu mupepe ya ngolo ke ningisaka yinti ya bafige, mpe ke bwisaka bafige ya yawu yina ke ntete nkunzu. 14 Mpe mazulu katukaka mutindu rulo yina ba me futika, mpe ba katulaka bamongo nyonso mpe bisanga nyonso na bisika ya yawu. 15 Na yawu, bamfumu ya ntoto, bamfumu ya nene, bamfumu ya basoda, bamvwama, bantu ya ngolo, bangaamba nyonso, mpe muntu nyonso yina ke na kimpwanza bumbanaka na kati ya mabulu ya matadi mpe na kati-kati ya matadi ya nene ya bamongo. 16 Mpe ba ke na bikaka ve kuzonza na bamongo mpe na matadi ya nene: “Beno bwidila beto, mpe beno bumba beto na mantwala ya kizizi ya Muntu yina ke ya kuvanda na zulu ya kiti ya kimfumu mpe na nkele ya Mwana ya Dimeme, 17 samu kilumbu ya nene ya nkele ya bawu me kuma, mpe nani lenda vuuka?”*

7 Na manima ya yawu, mu talaka bambazi yiya ya kutelama na bansongi yiya ya ntoto. Ba vanda simba mipepe yiya ya ntoto, samu mupepe mosi ve bula na ntoto to na mubu to na ata yinti. 2 Mu talaka mbazi ya nkaka yina katukaka na kisika yina ntangu ke basikaka,* mpe yandi vanda nanguka. Yandi vandaka na kinyemo ya Nzambi ya moyo. Yandi zonzaka na ndinga ya ngolo na bambazi yiya yina ba pesaka lutumu na kusala yimbi na ntoto mpe na mubu: 3 “Beno bebisa ve ntoto to mubu to bayinti, tii ntangu beto ke manisa kutula kinyemo na bambunzu ya bisadi ya Nzambi ya beto.”

4 Mu kuwaka lutangu ya bantu yina ba tulaka kinyemo, bantu 144 000 yina ba tulaka kinyemo, na mabuta nyonso ya bana ya Izraele:

9 Na manima ya yawu mu talaka, mpe tala! kimvuka ya nene ya bantu yina ata muntu mosi ve lendaka kutanga.* Ba katukaka na makanda nyonso, na mabuta nyonso, na bayinsi nyonso, mpe na bandinga* nyonso. Ba vandaka ya kutelama na mantwala ya kiti ya kimfumu mpe na mantwala ya Mwana ya Dimeme. Ba vandaka ya kulwata mazwela* ya mpembe, mpe ba simbaka mandala na maboko ya bawu. 10 Ba vanda bika ve kuganga na ndinga ya ngolo na kuzonzaka: “Luvuukusu ya beto me katuka na Nzambi ya beto, yina ke ya kuvanda na zulu ya kiti ya kimfumu, mpe na Mwana ya Dimeme.”

11 Bambazi nyonso vandaka ya kutelama zinga-zinga ya kiti ya kimfumu, ya bakuluntu, mpe ya bivangu yiya ya moyo, mpe ba fukamaka na mantwala ya kiti ya kimfumu, mpe ba sambilaka Nzambi. 12 Ba zonzaka: “Ameni! Bika ti masiika, nkembo, ndwenga, matondo, lukumu, lutumu mpe ngolo vanda na Nzambi ya beto mvula na mvula. Ameni.”

13 Na yina, mosi ya bakuluntu yufulaka munu: “Bantu yayi yina ke ya kulwata mazwela* ya mpembe, ba ke banani, mpe wapi kisika ba me katuka?” 14 Na mbala mosi mu vutulaka: “Mfumu ya munu, ni nge zaba.” Mpe yandi zonzaka na munu: “Ba ke ba yina me katuka na mpasi ya nene, mpe ba me sukula mazwela* ya bawu, mpe ba me kumisa yawu mpembe na kati ya menga ya Mwana ya Dimeme. 15 Ni na yawu, ba ke na mantwala ya kiti ya kimfumu ya Nzambi mpe ba ke na sadilaka yandi kisalu ya santu mpimpa na ntangu na kati ya tempelo ya yandi. Mpe Muntu yina ke ya kuvanda na kiti ya kimfumu ke tanda tenta* ya yandi na zulu ya bawu. 16 Mpe ba ke vanda dyaka ve na nsatu ya madya mpe ya maza, mpe ntangu to tiya ya ngolo ke bula dyaka ve bawu, 17 samu Mwana ya Dimeme yina ke na kati-kati ya kiti ya kimfumu ke vanda mvungi ya bawu mpe ke twadisa bawu na mikelo* ya bamaza ya luzingu. Mpe Nzambi ke kusuna mansangasa nyonso na meso ya bawu.”

8 Ntangu Mwana ya Dimeme fungulaka kinyemo ya sambwadi,* zulu kumaka swi pene-pene na kati-kati ya ngunga mosi. 2 Mpe mu talaka bambazi 7, yina ke ya kutelama na mantwala ya Nzambi, mpe ba pesaka bawu bampungi* 7.

3 Mbazi ya nkaka yina simbaka ndonga ya wolo yina ba ke sadilaka samu na kuyoka ansan, kwizaka mpe telamaka pene-pene na kisika ya minkayulu. Ba pesaka yandi ansan mingi, samu yandi pesa yawu na zulu ya kisika ya minkayulu, yina vandaka na mantwala ya kiti ya kimfumu, ntangu balusambu ya basantu nyonso vanda kwenda na zulu. 4 Mulinga ya ansan yina vanda katuka na diboko ya mbazi, kwendaka na mantwala ya Nzambi kintwadi na balusambu ya basantu. 5 Kasi na mbala mosi mbazi bakaka ndonga yina ba ke sadilaka samu na kuyoka ansan. Yandi fulusaka yawu na ndambu ya tiya yina yandi bakaka na kisika ya minkayulu, mpe losaka yawu na zulu ya ntoto. Bidumu mpe bandinga wakanaka, nsemo ya kidumu* talanaka, mpe ntoto ninganaka. 6 Mpe bambazi 7 yina vandaka na bampungi 7 bongamaka samu na kusika yawu.

7 Mbazi ya ntete sikaka mpungi* ya yandi. Mpe mvula ya matadi mpe tiya yina ba me vukisa na menga kubwaka na ntoto. Mpe ndambu mosi na kati ya bandambu tatu ya ntoto nyengaka. Mpe ndambu mosi na kati ya bandambu tatu ya bayinti nyengaka. Mpe matiti nyonso ya mubisu nyengaka.

8 Mbazi ya zole sikaka mpungi ya yandi. Mpe ba losaka na kati ya mubu kima mosi mutindu mongo ya nene yina vanda kuya. Mpe ndambu mosi na kati ya bandambu tatu ya mubu kumaka menga, 9 mpe ndambu mosi na kati ya bandambu tatu ya bibulu* ya mubu kufwaka, mpe ndambu mosi na kati ya bandambu tatu ya bamasuwa dyamaka.

10 Mbazi ya tatu sikaka mpungi ya yandi. Mpe mbwetete mosi ya nene yina vanda pela mutindu mwinda, katukaka na zulu mpe kubwaka. Ya kubwaka na kati ya ndambu mosi na kati ya bandambu tatu ya banzadi mpe mikelo* ya bamaza. 11 Nkumbu ya mbwetete yango kele Yinti ya Ndudi. Mpe ndambu mosi na kati ya bandambu tatu ya bamaza kumaka ndudi, mpe bantu mingi kufwaka samu na bamaza yango, samu ya kumaka ndudi.

12 Mbazi ya yiya sikaka mpungi ya yandi. Mpe ndambu mosi na kati ya bandambu tatu ya ntangu, ndambu mosi na kati ya bandambu tatu ya ngonda mpe ndambu mosi na kati ya bandambu tatu ya bambwetete bebanaka, samu ndambu mosi na kati ya bandambu tatu ya yawu kuma kitombi, mpe samu ndambu mosi na kati ya bandambu tatu ya kilumbu vanda ve na nsemo, mpe mutindu mosi samu na mpimpa.

13 Mpe mu talaka, mpe mu kuwaka mbemba* mosi yina vanda pumbuka na kati-kati ya zulu. Yandi vanda zonza na ndinga ya ngolo: “Kyadi, kyadi, kyadi na bantu yina ke zingaka na zulu ya ntoto, samu na bampungi tatu yina me bikana, yina bambazi tatu ke na sosaka kusika.”

9 Mbazi ya tanu sikaka mpungi ya yandi. Mpe mu talaka mbwetete mosi katukaka na zulu mpe kubwaka na ntoto, mpe ba pesaka yandi fungula ya dibulu ya yinda. 2 Yandi fungulaka dibulu ya yinda, mpe mulinga basikaka na dibulu yango mutindu mulinga ya kisika mosi ya nene yina ke na tiya ya ngolo. Mpe ntangu na mupepe kumaka ndombe samu na mulinga ya dibulu. 3 Makonko basikaka na mulinga yango mpe ba mwanganaka na ntoto mpe ba pesaka bawu lutumu mutindu lutumu yina ke na bankala-nseke* ya ntoto. 4 Ba zonzaka na bawu na kusala ve yimbi na matiti yina ke na ntoto, na ata kima ya nkaka yina ke menaka mpe na ata yinti, kasi kaka na bantu yina ke ve na kinyemo ya Nzambi na bambunzu ya bawu.

5 Mpe ba pesaka ve makonko nzila ya kufwa bantu, kasi ba pesaka bawu muswa ya kutalisa bawu mpasi na kati ya bangonda tanu. Mpe mpasi yina ba vanda talisa bawu, vandaka mutindu mpasi yina muntu ke talaka ntangu nkala-nseke* me tatika yandi. 6 Na bilumbu yina, bantu ke sosa lufwa, kasi ba ke kuzwa ve yawu ata fioti. Ba ke vanda na nsatu ya kufwa, kasi lufwa ke kima bawu.

7 Makonko yango vandaka mutindu bampunda yina ba me bongisa samu na mvita. Bayintu ya bawu vandaka na bima mutindu bayimpu ya wolo ya kimfumu, mpe bizizi ya bawu vandaka mutindu bizizi ya bantu. 8 Kasi ba vandaka na bansuki mutindu bansuki ya bakento, mpe meno ya bawu vandaka mutindu meno ya bankosi. 9 Ba vandaka na binkuti ya bisengo yina ke bumbaka ntulu. Makelele ya mapapu ya bawu vandaka mutindu makelele ya bapusu-pusu yina bampunda ke na bendaka mbangu samu na kukwenda nwana mvita. 10 Dyaka, ba ke na mikila yina ke na bantumbu mutindu ya bankala-nseke,* mpe na kati ya mikila ya bawu, ya ke na ngolo ya bawu ya kusala yimbi na bantu na kati ya bangonda tanu. 11 Ba ke na mfumu, mbazi ya dibulu ya yinda. Na Kiebre, nkumbu ya yandi kele Abadoni,* kasi na Kigreke, nkumbu ya yandi kele Apolioni.*

12 Kyadi mosi me luta. Tala! Ya ke vanda dyaka na bamambu zole ya kyadi na manima ya bamambu yayi.

13 Mbazi ya sambanu* sikaka mpungi ya yandi. Mpe mu kuwaka ndinga mosi yina katukaka na mampoka ya kisika ya wolo ya minkayulu yina ke na mantwala ya Nzambi. 14 Ya zonzaka na mbazi ya sambanu* yina vandaka na mpungi: “Fungula bambazi yiya yina kele ya kukangama pene-pene na nzadi ya nene ya Efrate.” 15 Mpe bambazi yiya yango yina ba bongisaka samu na ngunga yina, kilumbu yina, ngonda yina mpe mvula yina, ba fungulaka bawu samu na kufwa ndambu mosi na kati ya bandambu tatu ya bantu.

16 Lutangu ya bimvuka ya basoda yina vandaka na zulu ya bampunda, vandaka bamiriade zole ya bamiriade.* Mu kuwaka lutangu ya bawu. 17 Mpe ni mutindu yayi vandaka bampunda yina mu talaka na kimona-meso mpe ba yina vandaka ya kuvanda na zulu ya bawu: Ba vandaka na bima yina ke bumbaka ntulu ya mbwaki mutindu tiya, ya bleu mutindu yasinte, mpe ya jone mutindu sufre.* Bayintu ya bampunda vandaka mutindu bayintu ya bankosi, mpe tiya, mulinga na sufre vanda basika na bayinwa ya bawu. 18 Ndambu mosi na kati ya bandambu tatu ya bantu kufwaka samu na bamambu tatu ya mpasi yayi: tiya, mulinga mpe sufre yina vanda basika na bayinwa ya bawu. 19 Ngolo ya bampunda ke na kati ya bayinwa ya bawu mpe na mikila ya bawu, samu ti mikila ya bawu ke mutindu banyoka mpe ya ke na bayintu, mpe ba ke sadilaka yawu samu na kutalisa bantu mpasi.

20 Kasi bantu yina bikanaka, ba yina kufwaka ve na bamambu ya mpasi yayi, balulaka ve ntima na bisalu ya maboko ya bawu. Ba bikaka ve kusambila bambazi ya yimbi, mpe biteki ya wolo, ya arza, ya kwivre, ya matadi mpe ya mabaya, yina lenda tala ve, lenda kuwa ve mpe lenda tambula ve. 21 Mpe ba balulaka ve ntima na bisalu ya bawu ya kufwa bantu, na bansalulu ya bampeve ya yimbi, na kinsuza* ya bawu mpe na muyibi ya bawu.

10 Mpe mu talaka mbazi ya nkaka ya ngolo yina vanda katuka na mazulu mpe kulumukaka. Yandi vandaka ya kulwata* dituti, mukyama* vandaka na zulu ya yintu ya yandi, mpe kizizi ya yandi vandaka mutindu ntangu, mpe makulu ya yandi mutindu makunzi* ya tiya. 2 Yandi vandaka ya kusimba na diboko ya yandi rulo mosi ya fioti ya kufunguka. Yandi tulaka dikulu ya yandi ya bakala na zulu ya mubu, mpe dikulu ya yandi ya kento na zulu ya ntoto, 3 mpe yandi gangaka na ndinga ya ngolo mutindu nkosi ke gangaka. Ntangu yandi gangaka, bandinga ya bidumu 7 wakanaka.

4 Ntangu bidumu 7 zonzaka, mu zola sonika, kasi mu kuwaka ndinga mosi yina katukaka na zulu kuzonza: “Bumba bamambu yina bidumu 7 me zonza, mpe kusonika ve yawu.” 5 Mbazi yina mu talaka ya kutelama na zulu ya mubu mpe na zulu ya ntoto, nangunaka diboko ya yandi ya bakala na zulu. 6 Yandi zengaka ndefi na nkumbu ya Muntu yina ke zingaka mvula na mvula, yina yidikaka zulu na bima yina ke na kati ya yawu, ntoto na bima yina ke na kati ya yawu, mpe mubu na bima yina ke na kati ya yawu. Yandi zonzaka: “Ntangu ya kuvingila ke vanda dyaka ve. 7 Kasi na bilumbu yina mbazi ya sambwadi* ke kuma pene-pene na kusika mpungi ya yandi, kinsweki ya santu yina Nzambi zabisaka mutindu nsangu ya mbote na bisadi ya yandi bambikudi, ke lungana ya tsyeleka.”

8 Mpe mu kuwaka ndinga mosi yina katukaka na zulu, kusolola dyaka na munu, mpe ya zonzaka: “Kwenda, baka rulo ya mwasi yina ke na diboko ya mbazi yina ke ya kutelama na zulu ya mubu mpe ya ntoto.” 9 Mu kwendaka na sika ya mbazi, mpe mu zonzaka na yandi na kupesa munu rulo ya fioti yina. Yandi zonzaka na munu: “Baka yawu mpe kudya yawu. Ya ke kumisa kivumu ya nge ndudi, kasi na yinwa ya nge, ya ke vanda sukadi mutindu mafuta ya nyosi.” 10 Mu bakaka rulo ya fioti yina na diboko ya mbazi, mpe mu kudyaka yawu. Na yinwa ya munu, ya vandaka sukadi mutindu mafuta ya nyosi. Kasi ntangu mu minaka yawu, kivumu ya munu kumaka ndudi. 11 Mpe ba zonzaka na munu: “Nge me fwana kubikula dyaka samu na bayinsi, makanda, bandinga* mpe bamfumu mingi.”

11 Mpe ba pesaka munu didyadya yina vandaka mutindu yinti,* ntangu ndinga mosi zonzaka na munu: “Telama mpe teza* kisika ya santu ya tempelo ya Nzambi, mpe kisika ya minkayulu, mpe bantu yina ke na sambilaka kuna. 2 Kasi samu na lupangu yina ke na ngaanda ya kisika ya santu ya tempelo, bika yawu mpe kuteza ve yawu, samu ba me pesa yawu na makanda mpe ba ke dyata mbanza ya santu na makulu na kati ya bangonda 42. 3 Mu ke filisa bambangi ya munu zole samu ba bikula na kati ya bilumbu 1 260, ya kulwata bangoto.” 4 Bambangi zole yina, kele bayinti zole ya olive mpe bima zole ya kutudila bamwinda mpe ba ke ya kutelama na mantwala ya Mfumu ya ntoto.

5 Kana muntu zola kusala bawu yimbi, tiya ke basikaka na bayinwa ya bawu mpe ke nyengisaka bambeni ya bawu. Kana muntu zola kusala bawu yimbi, ni mutindu yina ba me fwana kufwa yandi. 6 Bambangi zole yina, ke na lutumu ya kukanga zulu samu mvula noka ve bilumbu yina ba ke na bikulaka, mpe ba ke na lutumu na zulu ya bamaza, samu na kukumisa yawu menga, mpe ya kusala ti bamambu ya mpasi ya mutindu nyonso kubwa na ntoto bambala nyonso yina ba zola.

7 Ntangu ba ke manisa kupesa kimbangi ya bawu, kibulu ya nsisi yina ke basika na dibulu ya yinda, ke nwanisa bawu, ke nunga bawu, mpe ke kufwa bawu. 8 Mpe bamvumbi ya bawu ke vanda na bala-bala ya nene ya mbanza ya nene, yina ba ke bokilaka na mutindu ya kifwani Sodome na Ezipte, kisika yina ba kufwaka mpe Mfumu ya bawu na zulu ya yinti. 9 Mpe bantu ya bayinsi, ya mabuta, ya bandinga* mpe ya makanda ke tala bamvumbi ya bawu na kati ya bilumbu tatu na ndambu, mpe ba ke ndima ve ti ba tula bamvumbi ya bawu na kati ya ndyamu. 10 Ba yina ke vandaka na ntoto ke yangalala samu na lufwa ya bawu mpe ke sala mukembo. Ba ke filisa bampangi makabu samu bambikudi zole yango vanda talisa bawu mpasi.

11 Na manima ya bilumbu tatu na ndambu, ngolo ya luzingu yina me katuka na Nzambi, kotaka na kati ya bawu. Ba telamaka mpe bantu yina talaka bawu kumaka na boma mingi. 12 Ba kuwaka ndinga ya ngolo yina vanda katuka na mazulu kuzonza na bawu: “Beno kwiza na zulu awa.” Mpe ba kwendaka na mazulu na kati ya dituti, mpe bambeni ya bawu talaka bawu. 13 Na ngunga yina, ntoto ninganaka na ngolo nyonso, mpe ndambu mosi na kati ya bandambu 10 ya mbanza kubwaka. Kuningana yango ya ntoto kufwaka bantu 7 000. Ba yina bikanaka kumaka na boma mingi, mpe pesaka nkembo na Nzambi ya mazulu.

14 Kyadi ya zole me luta. Tala! Kyadi ya tatu ke na kwizaka na mbangu.

15 Mbazi ya sambwadi* sikaka mpungi ya yandi. Bandinga ya ngolo wakanaka na mazulu mpe vanda zonza: “Kimfumu ya yinza me kuma Kimfumu ya Mfumu ya beto mpe ya Kristo ya yandi, mpe yandi ke yala mutindu mfumu mvula na mvula.”

16 Mpe bakuluntu 24 yina vandaka ya kuvanda na bakiti ya bawu ya kimfumu na mantwala ya Nzambi, kubwaka bizizi na ntoto mpe sambilaka Nzambi. 17 Ba vanda zonza: “Beto ke na vutulaka nge matondo, Yehova* Nzambi, Muntu ya Ngolo-Nyonso, muntu yina kele mpe yina vandaka, samu nge me baka ngolo ya nge ya nene mpe nge me banda kuyala.* 18 Kasi makanda kumaka na nkele, nge mpe lakisaka nkele ya nge, mpe ntangu yina ba tulaka kumaka, samu na kusambisa bantu ya kufwa mpe samu na kupesa difuta na bisadi ya nge bambikudi, na basantu mpe na ba yina ke na boma ya nkumbu ya nge, na bantu ya fioti mpe bantu ya nene, mpe na kufwa ba yina ke na bebisaka* ntoto.”

19 Mpe kisika ya santu ya tempelo ya Nzambi fungukaka na mazulu, mpe sanduku ya luwawanu ya yandi talanaka na kisika ya santu ya tempelo ya yandi. Bansemo ya kidumu* basikaka, bandinga mpe bidumu wakanaka, ntoto ninganaka, mpe mvula ya nene ya matadi nokaka.

12 Na manima, kidimbu mosi ya nene talanaka na mazulu: Kento mosi vandaka ya kulwata ntangu, mpe ngonda vandaka na yisi ya makulu ya yandi, mpe na yintu ya yandi, ya vandaka na yimpu ya kimfumu ya bambwetete 12, 2 mpe yandi vandaka na kivumu. Yandi vanda ganga samu na mpasi mpe misongo ya yandi ya kubuta.

3 Kidimbu ya nkaka talanaka na mazulu. Tala! Dragoni mosi ya nene, yina vandaka mbwaki mutindu tiya, vandaka na bayintu 7, mampoka 10, mpe bayimpu ya kimfumu 7 na zulu ya bayintu ya yandi. 4 Mpe mukila ya yandi ke na bendaka ndambu mosi na kati ya bandambu tatu ya bambwetete ya mazulu, mpe yandi losaka yawu na ntoto. Mpe dragoni yango vandaka ya kutelama na mantwala ya kento yina zola buta, samu ti ntangu yandi ke buta, yandi kudya mwana ya yandi.

5 Mpe yandi butaka mwana, ee mwana ya bakala, yina ke twadisa makanda nyonso na yinti ya kisengo. Mpe na mbala mosi ba nataka mwana ya yandi na sika ya Nzambi mpe na kiti ya yandi ya kimfumu. 6 Mpe kento yango kimaka na ntoto ya kuyuma, na kisika yina Nzambi yidikilaka yandi. Mpe kuna ba ke dikisa yandi na kati ya bilumbu 1 260.

7 Mpe mvita kubwaka na mazulu: Mikayele* na bambazi ya yandi nwanisaka dragoni, mpe dragoni na bambazi ya yandi nwanaka, 8 kasi ba nungaka ve,* mpe kisika vandaka dyaka ve samu na bawu na mazulu. 9 Na yawu, ba losaka na yisi dragoni ya nene, nyoka ya kubanda, yina ba ke bokilaka Dyabulu mpe Satana, yina ke vunaka ntoto nyonso. Ba losaka yandi na ntoto, mpe ba losaka mpe bambazi ya yandi kintwadi na yandi. 10 Mu kuwaka ndinga mosi ya ngolo na mazulu kuzonza:

“Ntangu yayi, luvuukusu, ngolo mpe Kimfumu ya Nzambi ya beto, mpe lutumu ya Kristo ya yandi me kuma, samu ba me losa na yisi muntu yina ke fundaka bampangi ya beto, yina ke fundaka bawu mpimpa na ntangu na mantwala ya Nzambi ya beto. 11 Mpe ba me nunga yandi na lusalusu ya menga ya Mwana ya Dimeme, mpe na kimbangi ya bawu, mpe ba me zola ve bamwela* ya bawu ata na mantwala ya lufwa. 12 Na yawu, beno yangalala, beno mazulu, mpe beno ba yina ke zingaka kuna. Kyadi samu na ntoto, mpe samu na mubu, samu Dyabulu me kulumuka na sika ya beno, yandi ke na nkele mingi samu yandi me zaba ti kaka ntangu fioti me bikana na yandi.”

13 Ntyo, ntangu dragoni talaka ti ba losaka yandi na ntoto, yandi nyokolaka kento yina butaka mwana ya bakala. 14 Kasi ba pesaka na kento yango mapapu zole ya mbemba* ya nene, samu yandi pumbuka tii na ntoto ya kuyuma, na kisika yina ba yidikilaka yandi, kisika yina ba ke dikisa yandi samu na ntangu mosi, bantangu, mpe kati-kati ya ntangu mosi,* ntama na nyoka.

15 Mpe nyoka lukaka na manima ya kento maza mutindu nzadi, samu na kudyamisa yandi na kati ya nzadi yango. 16 Kasi ntoto kwizaka sadisa kento, mpe ntoto fungulaka yinwa ya yawu mpe minaka nzadi yina dragoni lukaka na yinwa ya yandi. 17 Na yawu, dragoni kumaka na nkele mingi na ntadisi ya kento, mpe yandi kwendaka nwanisa bana* ya kento yango yina bikanaka, ba yina ke tumamaka na misiku ya Nzambi, mpe yina ke na kisalu ya kupesa kimbangi na yina me tadila Yesu.

13 Mpe yandi* telamaka na zyelo* ya mubu.

Mpe mu talaka kibulu mosi ya nsisi yina vanda basika na mubu. Yandi vandaka na mampoka 10 mpe bayintu 7. Na zulu ya mampoka ya yandi, yandi vandaka na bayimpu ya kimfumu 10, kasi na bayintu ya yandi vandaka na bankumbu ya bifingu. 2 Ntyo, kibulu ya nsisi yina mu talaka vandaka mutindu yingo,* kasi makulu ya yandi vandaka mutindu makulu ya urse, mpe yinwa ya yandi vandaka mutindu yinwa ya nkosi. Kibulu yango kuzwaka ngolo ya yandi, kiti ya yandi ya kimfumu, mpe lutumu ya yandi ya nene na sika ya dragoni.

3 Mu talaka ti mosi ya bayintu ya yandi vandaka mutindu ya lwalaka mputa yina zola nata yandi na lufwa. Kasi mputa yango yina zola nata yandi na lufwa belukaka. Mpe ntoto nyonso landaka kibulu yango ya nsisi na kuyituka nyonso. 4 Mpe ba sambilaka dragoni samu yandi pesaka lutumu na kibulu ya nsisi, mpe ba sambilaka kibulu ya nsisi na kuzonzaka: “Nani ke mutindu kibulu ya nsisi mpe nani lenda nwanisa yandi?” 5 Ba pesaka yandi yinwa yina ke zonzaka bamambu ya nene mpe yina ke vwezaka, mpe ba pesaka yandi lutumu ya kusala bamambu na kati ya bangonda 42. 6 Mpe yandi fungulaka yinwa ya yandi samu na kuvweza Nzambi, kuvweza nkumbu ya yandi mpe kisika yina yandi ke zingaka, ya zola zonza ba yina ke vandaka na zulu. 7 Ba pesaka yandi nzila ya kunwanisa basantu mpe kununga bawu, mpe ba pesaka yandi lutumu na zulu ya mabuta nyonso, bayinsi nyonso, bandinga* nyonso mpe makanda nyonso. 8 Mpe ba yina nyonso ke vandaka na ntoto ke sambila yandi. Katuka mbandukulu ya yinza, ata nkumbu mosi ya bawu sonamaka na rulo ya luzingu ya Mwana ya Dimeme yina ba kufwaka.

9 Kana muntu ke na makutu, bika yandi kuwa. 10 Kana ba me fwana kukanga muntu, ba ke kanga yandi. Kana muntu me kufwa mpangi na mbele,* ba me fwana kufwa yandi na mbele. Ni awa basantu me fwana kukanga ntima mpe kuvanda na kiminu.

11 Na manima, mu talaka kibulu ya nkaka ya nsisi kubasika na ntoto. Yandi vandaka na mampoka zole mutindu mampoka ya mwana mosi ya dimeme, kasi yandi bandaka kuzonza mutindu dragoni mosi. 12 Yandi ke na sadilaka lutumu nyonso ya kibulu ya ntete ya nsisi na meso ya yandi. Mpe yandi ke na nataka ntoto mpe bantu yina ke zingaka na zulu ya yawu na kusambila kibulu ya ntete ya nsisi, yina belukaka na mputa ya yandi yina zola nata yandi na lufwa. 13 Mpe yandi ke na salaka bidimbu ya nene, tii na kusala ti tiya katuka na mazulu mpe kukulumuka na zulu ya ntoto na meso ya bantu.

14 Yandi ke na vunaka bantu yina ke zingaka na zulu ya ntoto samu na bidimbu yina ba pesaka yandi nzila ya kusala na meso ya kibulu ya nsisi, mpe yandi ke na zonzaka na ba yina ke zingaka na zulu ya ntoto na kusala kifwani ya kibulu ya nsisi yina ba lwalisaka na mbele kasi vutukaka na luzingu. 15 Mpe ba pesaka yandi nzila ya kupesa luzingu* na kifwani ya kibulu ya nsisi, samu kifwani ya kibulu ya nsisi zonza mpe sala ti ba kufwa ba yina nyonso ke manga kusambila kifwani ya kibulu ya nsisi.

16 Yandi ke na nataka bantu nyonso na ngolo (bantu ya fioti mpe bantu ya nene, bamvwama mpe bapovre, bantu yina ke na kimpwanza mpe bangaamba) samu ba kuzwa kidimbu na diboko ya bawu ya bakala mpe na mbunzu ya bawu, 17 samu ata muntu lenda kusumba to kutekisa kana yandi ke ve na kidimbu, ya zola zonza nkumbu ya kibulu ya nsisi, to lutangu ya nkumbu ya yandi. 18 Ni awa ya ke lombaka ndwenga: Bika ti muntu yina ke na mayela ya kubakula, tanga lutangu ya kibulu ya nsisi, samu ya ke lutangu ya muntu, mpe lutangu ya yandi kele 666.

14 Na manima mu talaka, mpe tala! Mwana ya Dimeme ya kutelama na zulu ya Mongo ya Siyoni, mpe kintwadi na yandi ya vandaka na bantu 144 000 yina vandaka na nkumbu ya yandi mpe nkumbu ya Tata ya yandi ya kusonama na bambunzu ya bawu. 2 Mu kuwaka makelele mosi yina katukaka na zulu mutindu makelele ya bamaza mingi mpe mutindu makelele ya kidumu ya ngolo. Mpe makelele yina mu kuwaka vandaka mutindu makelele ya miyimbidi yina ke na yimbaka na kusikaka gitare.* 3 Mpe ba ke na yimbaka nzimbu mosi yina ke na talanaka mutindu nzimbu ya malu-malu, na mantwala ya kiti ya kimfumu, na mantwala ya bivangu yiya ya moyo, mpe bakuluntu. Mpe ata muntu vanda lenda kulongoka nzimbu yango mbote-mbote katula kaka bantu 144 000 yina ba sumbaka na ntoto. 4 Ba ke ba yina me kumisa ve bawu mosi mvindu na bakento. Ba ke mutindu bakento yina zaba ntete ve babakala. Ba ke ba yina ke na bikaka ve kulanda Mwana ya Dimeme, kisika nyonso yina yandi ke na kwendaka. Ba sumbaka bawu na kati ya bantu mutindu bambuma ya ntete samu na Nzambi mpe samu na Mwana ya Dimeme. 5 Mpe ba talaka ve mambu ya luvunu na bayinwa ya bawu. Ba ke ve na mvindu.

6 Mpe mu talaka mbazi ya nkaka yina vanda pumbuka na kati-kati ya zulu,* mpe yandi vandaka na nsangu ya mbote ya ntangu nyonso ya kusamuna na bantu yina ke zingaka na ntoto, na makanda nyonso, na mabuta nyonso, na bandinga* nyonso mpe na bayinsi nyonso. 7 Yandi vanda zonza na ndinga ya ngolo: “Beno vanda na boma ya Nzambi mpe beno pesa yandi nkembo, samu ngunga ya yandi ya kusambisa me kuma. Ni na yawu beno sambila muntu yina salaka mazulu, ntoto, mubu mpe mikelo* ya maza.”

8 Mbazi ya nkaka, ya zole landaka, mpe vanda zonza: “Yandi me kubwa! Babiloni ya nene me kubwa, yandi yina nwikisaka makanda nyonso vinu ya nsatu* ya ngolo ya kinsuza* ya yandi.”

9 Mbazi ya nkaka, ya tatu landaka bawu, mpe vanda zonza na ndinga ya ngolo: “Kana muntu sambila kibulu ya nsisi mpe kifwani ya yandi mpe kuzwa kidimbu na mbunzu ya yandi to na diboko ya yandi, 10 yandi ke kunwa mpe vinu ya nkele ya Nzambi yina ba me vukisa na ata kima, mpe yina ba me dukula na kopo ya nkele ya yandi, mpe ba ke talisa yandi mpasi na tiya mpe sufre,* na meso ya bambazi ya santu mpe na meso ya Mwana ya Dimeme. 11 Mpe mulinga ya mpasi ya bawu ke nanguka mvula na mvula. Mpe ba yina ke sambilaka kibulu ya nsisi mpe kifwani ya yandi, mpe muntu nyonso yina me kuzwa kidimbu ya nkumbu ya yandi, ke pema ve mpimpa na ntangu. 12 Ni awa basantu me fwana kukanga ntima, ba yina ke na tumamaka na misiku ya Nzambi, mpe ke na kiminu ya ngolo na Yesu.”

13 Mpe mu kuwaka ndinga mosi yina katukaka na zulu mpe zonzaka, “Sonika: Kyese na bantu ya kufwa yina ke na kufwaka na bumosi na Mfumu banda ntangu yayi. Ee, mpeve me zonza, bika ba pema na bisalu ya bawu ya ngolo, samu bamambu yina ba salaka ke na landaka* bawu.”

14 Na manima mu talaka, mpe tala! dituti mosi ya mpembe, mpe muntu mosi mutindu mwana ya muntu vandaka ya kuvanda na zulu ya dituti yango. Yandi vandaka na yimpu ya wolo ya kimfumu na zulu ya yintu ya yandi, mpe na mbele ya meno na diboko ya yandi.

15 Mbazi ya nkaka basikaka na kisika ya santu ya tempelo. Yandi zonzaka na ndinga ya ngolo na muntu yina vandaka ya kuvanda na zulu ya dituti: “Sadila mbele ya nge, mpe buka bambuma, samu ngunga ya kubuka bambuma me kuma, samu bambuma ya ntoto me yela mbote-mbote.” 16 Mpe muntu yina vandaka ya kuvanda na zulu ya dituti lutisaka mbele ya yandi na ntoto mpe yandi bukaka bambuma ya ntoto.

17 Mpe mbazi ya nkaka dyaka basikaka na kisika ya santu ya tempelo yina ke na mazulu, mpe yandi mpe vandaka na mbele ya meno.

18 Mpe mbazi ya nkaka dyaka basikaka na kisika ya minkayulu, mpe yandi vandaka na lutumu na zulu ya tiya. Yandi zonzaka na ndinga ya ngolo na muntu yina vandaka na mbele ya meno: “Lutisa mbele ya nge ya meno, mpe vukisa byazi ya bambuma ya yinti ya vinu ya ntoto, samu bambuma ya yawu me yela.” 19 Mbazi lutisaka mbele ya yandi na zulu ya ntoto mpe vukisaka bambuma ya yinti ya vinu ya ntoto, mpe yandi losaka yawu na kati ya kikamununu ya nene ya vinu ya nkele ya Nzambi. 20 Ba dyataka bambuma ya vinu na kisika ya kukamuna yawu na ngaanda ya mbanza, mpe menga basikaka na kikamununu ya vinu. Ya kumaka tii na bisengo yina ba ke tulaka na bayinwa ya bampunda, mpe ya mwanganaka na yinda ya basitade 1 600.*

15 Mpe mu talaka na mazulu kidimbu ya nkaka ya nene mpe ya ngitukulu: bambazi 7 na bampasi 7. Yayi ni bampasi ya nsuka, samu na nzila ya yawu nkele ya Nzambi ke kuma na nsuka.

2 Mpe mu talaka kima mosi yina vanda talana mutindu mubu ya kitala-tala yina ba me vukisa na tiya. Ba yina me nunga kibulu ya nsisi mpe kifwani ya yandi, mpe lutangu ya nkumbu ya yandi, vandaka ya kutelama pene-pene na mubu ya kitala-tala, mpe ba vandaka ya kusimba bagitare ya Nzambi. 3 Ba vanda yimba nzimbu ya Moyize kisadi ya Nzambi, mpe nzimbu ya Mwana ya Dimeme na kuzonzaka:

“Yehova* Nzambi, Muntu ya Ngolo-Nyonso, bisalu ya nge ke nene mpe ya ngitukulu. Mfumu ya Ntangu-Nyonso, banzila ya nge kele ya lunungu* mpe ya matsyeleka. 4 Yehova,* nani ya tsyeleka ke tala ve nge boma mpe ke kembila ve nkumbu ya nge? Samu ti kaka nge ke ya kukwikama! Samu makanda nyonso ke kwiza mpe ke sambila na mantwala ya nge, samu misiku ya nge ya lunungu* me talana pwelele.”

5 Na manima ya mambu yayi mu talaka, mpe kisika ya santu ya tenta* ya kimbangi fungukaka na mazulu, 6 mpe bambazi 7 yina vandaka na bampasi 7 basikaka na kisika ya santu. Ba vandaka ya kulwata lino ya bunkete mpe yina vanda ngenga, mpe ba kangaka bitambala ya wolo na bantulu ya bawu. 7 Mosi ya bivangu yiya ya moyo pesaka bambazi 7 bandonga 7 ya wolo yina ke ya kufuluka na nkele ya Nzambi yina ke zingaka mvula na mvula. 8 Mpe kisika ya santu fulukaka na mulinga samu na nkembo ya Nzambi mpe samu na ngolo ya yandi, mpe ata muntu lendaka kukota na kati ya kisika ya santu tii ntangu bampasi 7 ya bambazi 7 manisaka.

16 Mpe mu kuwaka ndinga mosi ya ngolo yina vanda katuka na kisika ya santu kuzonza na bambazi 7: “Beno kwenda mpe beno dukula na zulu ya ntoto nkele ya Nzambi yina ke na kati ya bandonga 7.”

2 Mbazi ya ntete kwendaka mpe dukulaka bima yina vandaka na ndonga ya yandi na zulu ya ntoto. Mpe mputa mosi ya yimbi, mpe yina ke kudyaka nzutu bulaka bantu yina vandaka na kidimbu ya kibulu ya nsisi, mpe yina vanda sambila kifwani ya yandi.

3 Mbazi ya zole dukulaka bima yina vandaka na ndonga ya yandi na kati ya mubu. Mpe ya kumaka menga mutindu menga ya muntu ya kufwa, mpe bivangu* nyonso ya moyo yina vandaka na kati kufwaka, ee, bima nyonso yina vandaka na kati ya mubu.

4 Mbazi ya tatu dukulaka bima yina vandaka na ndonga ya yandi na kati ya banzadi mpe mikelo* ya maza. Mpe ya kumaka menga. 5 Mu kuwaka mbazi yina vandaka na lutumu na zulu ya bamaza kuzonza: “Nge, Muntu yina kele mpe yina vandaka, Muntu ya kukwikama, nge ke ya kudedama,* samu nge me zenga bamambu mutindu yayi. 6 Samu ba mwangisaka menga ya basantu mpe ya bambikudi, nge me pesa bawu menga samu ba kunwa. Ya me lunga na bawu.” 7 Mpe mu kuwaka kisika ya minkayulu kuzonza: “Ee, Yehova* Nzambi, Muntu ya Ngolo-Nyonso, balusambusu* ya nge ke ya tsyeleka mpe ya lunungu.”*

8 Mbazi ya yiya dukulaka bima yina vandaka na ndonga ya yandi na zulu ya ntangu, mpe ba pesaka ntangu lutumu ya kuyoka bantu na tiya ya yawu. 9 Bantu kuyaka na tiya ya ngolo yina, kasi ba vwezaka nkumbu ya Nzambi yina ke na lutumu na zulu ya bampasi yayi, mpe ba balulaka ve ntima mpe pesaka ve yandi nkembo.

10 Mbazi ya tanu dukulaka bima yina vandaka na ndonga ya yandi na zulu ya kiti ya kimfumu ya kibulu ya nsisi. Mpe kimfumu ya yandi kumaka kitombi, mpe ba bandaka kutatika baludimi ya bawu samu na mpasi, 11 kasi ba vwezaka Nzambi ya mazulu samu na mpasi ya bawu mpe bamputa ya bawu, mpe ba balulaka ve ntima na bisalu ya bawu.

12 Mbazi ya sambanu* dukulaka bima yina vandaka na ndonga ya yandi na kati ya nzadi ya nene ya Efrate, mpe maza ya yawu yumaka, samu na kubongisa nzila samu na bamfumu yina ke na katukaka na kisika ntangu ke basikaka.*

13 Mpe mu talaka banzonzolo tatu ya mvindu yina katukaka na mpeve. Ya vandaka mutindu bisyoto yina vanda basika na yinwa ya dragoni, mpe na yinwa ya kibulu ya nsisi mpe na yinwa ya mbikudi ya luvunu. 14 Ya tsyeleka, ya kele banzonzolo yina me katuka na bambazi ya yimbi, mpe ya ke na lungisaka bidimbu, mpe ya ke na kwendaka na sika ya bamfumu ya ntoto ya muvimba, samu na kuvukisa bawu samu na mvita ya kilumbu ya nene ya Nzambi, Muntu ya Ngolo-Nyonso.

15 “Kuwa! Mu ke na kwizaka mutindu muyibi. Kyese na muntu yina ke na lalaka ve pongi mpe ke na bumbaka bilele ya yandi ya zulu, samu yandi tambula ve kimpene, mpe bantu tala ve nsoni ya yandi.”

16 Mpe ba vukisaka bawu na kisika yina ba ke bokilaka na ndinga ya Kiebre, Armagedoni.*

17 Mbazi ya sambwadi* dukulaka bima yina vandaka na ndonga ya yandi na mupepe. Na yawu, ndinga mosi ya ngolo basikaka na kisika ya santu katuka na kiti ya kimfumu, mpe zonzaka: “Ya me salama!” 18 Mpe bansemo ya kidumu* basikaka, bandinga mpe bidumu wakanaka, mpe ntoto ninganaka na ngolo nyonso mutindu ya vandaka nabunu ya salama kubanda ntangu yina bantu ke na zulu ya ntoto. Kuningana ya ntoto yayi vandaka nene mpe ngolo na faso ya kusakana ve. 19 Mbanza ya nene kabukaka na bitini tatu, mpe bambanza ya makanda kubwaka. Mpe Nzambi bambukaka Babiloni ya Nene moyo, samu na kupesa yandi kopo ya vinu ya nkele ya yandi ya ngolo. 20 Mpe bisanga* nyonso kimaka, mpe bamongo vanda talana dyaka ve. 21 Na manima, mvula ya matadi ya nene, yina konso ditadi vandaka na bakilo pene-pene na talanta mosi,* katukaka na zulu mpe bwidilaka bantu, mpe bantu vwezaka Nzambi samu na mpasi ya mvula ya matadi, samu mpasi yayi vandaka ngolo mingi.

17 Mosi ya bambazi 7 yina vandaka na bandonga 7 kwizaka mpe zonzaka na munu: “Kwiza, mu ke lakisa nge lusambusu yina ba ke pesa na kento ya ndumba ya nene, yina ke ya kuvanda na zulu ya bamaza mingi, 2 yina bamfumu ya ntoto salaka kinsuza* na yandi, mpe bantu yina ke zingaka na zulu ya ntoto kolaka vinu ya kinsuza* ya yandi.”

3 Mpe na ngolo ya mpeve, yandi nataka munu tii na ntoto ya kuyuma. Mpe mu talaka kento mosi ya kuvanda na zulu ya kibulu mosi ya nsisi ya mbwaki ya ngolo, yina vandaka ya kufuluka na bankumbu ya bifingu, mpe yina vandaka na bayintu 7 mpe mampoka 10. 4 Kento yango vandaka ya kulwata bilele ya mbwaki-viole mpe ya mbwaki ya ngolo. Yandi bongisaka nzutu ya yandi na bima ya wolo, na matadi ya ntalu, mpe na badzeke ya ntalu, mpe yandi vandaka ya kusimba na diboko ya yandi kopo mosi ya wolo yina vandaka ya kufuluka na bima ya nganzi mpe ya mvindu ya kinsuza* ya yandi. 5 Nkumbu mosi vandaka ya kusonama na mbunzu ya yandi, kinsweki mosi: “Babiloni ya Nene, mama ya bakento ya kindumba mpe ya bima ya nganzi ya ntoto.” 6 Mpe mu talaka ti kento yango vandaka ya kukola menga ya basantu mpe menga ya bambangi ya Yesu.

Ee, ntangu mu talaka yandi, mu yitukaka mingi. 7 Na yawu, mbazi zonzaka na munu: “Samu na yinki nge me yituka? Mu ke zonzila nge kinsweki ya kento yango mpe ya kibulu ya nsisi yina ke na nataka yandi, yina kele na bayintu 7 mpe mampoka 10: 8 Kibulu ya nsisi yina nge me tala, vandaka, kasi yandi kele ve, mpe ata faso yina, ya me bikana kaka fioti yandi basika na dibulu ya yinda, mpe yandi ke kwenda na lufwa. Mpe bantu yina ke zingaka na ntoto (ba yina ba sonikaka ve bankumbu ya bawu na rulo ya luzingu katuka mbandukulu ya yinza) ke yituka ntangu ba ke tala ti kibulu ya nsisi vandaka, kasi kele ve, mpe ata faso yina yandi ke vanda.

9 “Muntu ya mayela mpe ya ndwenga me fwana kusimba nsasa ya mambu yayi: Bayintu 7 ke lakisaka bamongo 7, kisika yina kento me vandila. 10 Mpe ya ke na bamfumu 7: Tanu me kubwa, mosi kele, mpe ya nkaka nabunu yandi kwiza. Kasi ntangu yandi ke kwiza, yandi me fwana kubikana kaka samu na ntangu fioti. 11 Mpe kibulu ya nsisi yina vandaka, kasi kele ve, ya ke mpe mfumu ya 8. Yandi me katuka na bawu 7, mpe yandi ke na kwendaka na lufwa.

12 “Mampoka 10 yina nge talaka ke na lakisaka bamfumu 10 yina nabunu ba kuzwa kimfumu, kasi ba me kuzwa lutumu mutindu bamfumu samu na ngunga mosi, kintwadi na kibulu ya nsisi. 13 Ba ke na dikanisi kaka mosi, ni na yawu, ba me pesa ngolo mpe lutumu ya bawu na kibulu ya nsisi. 14 Ba ke nwanisa Mwana ya Dimeme, kasi samu yandi kele Mfumu ya bamfumu mpe Ntinu ya bantinu, Mwana ya Dimeme ke nunga bawu. Dyaka, ba yina ke na yandi, ba yina ba bokilaka mpe ba soolaka, mpe yina ke ya kukwikama, bawu mpe ke nunga.”

15 Yandi zonzaka na munu: “Bamaza yina nge me tala, yina kento ya ndumba ke ya kuvandila, ke lakisaka bayinsi, bantu mingi, makanda mpe bandinga.* 16 Mpe mampoka 10 yina nge me tala mpe kibulu ya nsisi ke yiina kento ya ndumba, ba ke botola bima ya yandi nyonso, ba ke bika yandi kimpene, ba ke kudya musuni ya yandi mpe ba ke yoka yandi ya muvimba na tiya. 17 Samu Nzambi me tula na bantima ya bawu dibanza ya kulungisa dikanisi ya yandi, ee, kulungisa dikanisi ya bawu kaka mosi, ya kupesa kimfumu ya bawu na kibulu ya nsisi, tii ntangu bamambu yina Nzambi zonzaka ke lungana. 18 Mpe kento yina nge talaka ke lakisaka mbanza ya nene yina ke na kimfumu na zulu ya bamfumu ya ntoto.”

18 Na manima ya mambu yayi, mu talaka mbazi ya nkaka yina vanda katuka na mazulu mpe kukulumuka. Yandi vandaka na lutumu ya nene, mpe ntoto ngengaka na nkembo ya yandi. 2 Yandi gangaka na ndinga ya ngolo na kuzonzaka: “Yandi me kubwa! Babiloni ya Nene me kubwa, mpe yandi me kuma kisika yina bambazi ya yimbi ke zingaka, mpe kisika yina bampeve nyonso ya mvindu* mpe bandeke nyonso ya mvindu mpe yina ba ke yiinaka, ke bumbanaka! 3 Samu makanda nyonso me kola vinu ya nsatu* ya ngolo ya kinsuza* ya yandi, mpe bamfumu ya ntoto me sala kinsuza na yandi, mpe bantu ya mumbungu* ya ntoto me kuma bamvwama samu na ngolo ya bima mingi ya yandi ya ntalu yina yandi ke tadilaka ve nsoni.”

4 Mpe mu kuwaka ndinga ya nkaka yina katukaka na zulu mpe zonzaka: “Beno bantu ya munu, beno basika na kati ya yandi, kana beno zola ve kukota na masumu ya yandi, mpe kana beno zola ve kuzwa ndambu ya bampasi ya yandi. 5 Samu masumu ya yandi me fuluka tii na mazulu, mpe Nzambi me bambuka bisalu ya yandi ya kukondwa lunungu.* 6 Beno sala yandi mutindu yandi mpe salaka bantu ya nkaka, ee, beno vutula yandi bambala zole mambu yina yandi salaka. Na kati ya kopo yina yandi vukisaka malafu, beno vukisila yandi yawu bambala zole. 7 Mutindu yandi kumisaka yandi mosi, mpe vandaka na bima mingi ya ntalu yina yandi vanda tadila ve nsoni, beno pesa yandi mpasi mpe mawa ya mutindu mosi, samu yandi ke na bikaka ve na kuzonza na kati ya ntima ya yandi: ‘Mu ke ya kuvanda mutindu mfumu ya kento, mpe mu ke ve mufwidi ya kento, mpe mu ke vanda ve na kati ya mawa ata kilumbu mosi.’ 8 Ni na yawu, bampasi ya yandi ke kwiza kaka na kilumbu mosi: lufwa, mawa mpe nsatu. Mpe ba ke yoka yandi ya muvimba na tiya, samu Yehova* Nzambi, yina me sambisa yandi, ke ngolo.

9 “Mpe bamfumu ya ntoto yina salaka kinsuza* na yandi, mpe yina vanda zinga na yandi na kati ya bima mingi ya ntalu yina ba vanda tadila ve nsoni, ke dila mpe ke bula banzutu ya bawu na mawa samu na yandi, ntangu ba ke tala mulinga ya tiya yina ke na yokaka yandi. 10 Ba ke telama ntama samu na boma ti ba tala mpasi mutindu yandi, mpe ba ke zonza: ‘Kyadi mingi, kyadi mingi na nge mbanza ya nene, Babiloni mbanza ya ngolo, samu kaka na ngunga mosi, lusambusu ya nge me kwiza!’

11 “Dyaka, bantu ya mumbungu ya ntoto ke dila mpe ke vanda na kati ya mawa samu na yandi, samu ata muntu ke sumba dyaka bima ya bawu nyonso, 12 bima nyonso ya wolo, ya arza, ya matadi ya ntalu, ya badzeke ya ntalu, ya lino ya kitoko, ya bilele ya mbwaki-viole, ya swa, bilele ya mbwaki ya ngolo, mpe bima nyonso yina ba yidikaka na mabaya ya kitoko, mpe bima nyonso yina ba yidikaka na meno ya nzawu, na mabaya ya ntalu, na kwivre, na kisengo mpe na matadi ya mabre, 13 dyaka, kanele, bima ya kulambila ya nsunga ya kitoko ya Inde, ansan, mafuta ya nsunga ya kitoko, maaka ya nsunga ya kitoko, vinu, mafuta ya bayinti ya olive, farine ya kitoko, ble, bangombe, mameme, bampunda, bapusu-pusu, bangaamba, mpe bantu.* 14 Ee, bima ya kitoko* yina nge* vanda zola kuzwa me kwenda ntama na nge, mpe madya nyonso ya kitoko mpe bima nyonso ya kitoko me zimbana na sika ya nge, mpe ya ke talana dyaka ve.

15 “Bantu ya mumbungu yina vanda tekisa bima yango mpe yina kumaka bamvwama samu na yandi, ke telama ntama samu ba ke vanda na boma ti ba tala mpasi mutindu yandi, mpe ba ke dila mpe ke vanda na kati ya mawa, 16 mpe ba ke zonza: ‘Kyadi mingi, kyadi mingi na mbanza ya nene, yina vandaka ya kulwata lino ya kitoko, bilele ya mbwaki-viole mpe ya mbwaki ya ngolo, mpe yina ke ya kubongama na bima ya kitoko ya wolo, matadi ya ntalu, mpe badzeke ya ntalu, 17 samu kaka na ngunga mosi, bimvwama nyonso ya nene yayi me bebana!’

“Mpe binati nyonso ya masuwa mpe bantu nyonso yina ke salaka banzyetolo bisika mingi na masuwa, bantu nyonso yina ke salaka na kati ya masuwa, mpe bantu nyonso yina ke sosaka luzingu ya bawu na mubu, ke telama ntama 18 mpe ntangu ba ke tala mulinga ya tiya yina ke yoka yandi, ba ke zonza na ndinga ya ngolo: ‘Wapi mbanza ke mutindu mbanza ya nene?’ 19 Ba losaka fundu-fundu na bayintu ya bawu, ba dilaka mpe ba kumaka na mawa. Ba vanda zonza na ndinga ya ngolo: ‘Kyadi mingi, kyadi mingi na mbanza ya nene yina na kati ya yawu bantu nyonso yina vandaka na bamasuwa na mubu kumaka bamvwama samu ya kimvwama ya yandi, samu ti kaka na ngunga mosi ba me bebisa yandi!’

20 “O zulu, sepela na mambu yina me kumina yandi, mpe beno mpe basantu, bantumwa mpe bambikudi, samu Nzambi me sambisa yandi samu na mbote ya beno!”

21 Mpe mbazi mosi ya ngolo nangunaka ditadi mosi yina vandaka mutindu ditadi ya nene ya kunikila, mpe losaka yawu na kati ya mubu mpe zonzaka: “Ni mutindu yayi na mbala mosi ba ke losa Babiloni, mbanza ya nene, mpe ba ke tala dyaka ve yawu ata fioti. 22 Mpe ba ke kuwa dyaka ve na sika ya nge makelele ya miyimbidi yina ke yimbaka na kusikaka gitare, ya bantu yina ke bulaka miziki, ya ba yina ke bulaka tuutu,* mpe ya ba yina ke bulaka mpungi. Mpe ata muntu mosi ve ya bisalu ya maboko ya mutindu na mutindu ke talana dyaka na sika ya nge, mpe ba ke kuwa dyaka ve makelele ya ditadi ya kunikila na sika ya nge. 23 Nsemo ya mwinda ke ngenga dyaka ve na sika ya nge, mpe ba ke kuwa dyaka ve na sika ya nge ndinga ya bakala yina me kwela to ya kento yina me kwela, samu bantu ya nge ya mumbungu vandaka bantu ya nene ya ntoto, mpe na bansalulu ya nge ya bampeve ya yimbi, nge me vuna makanda nyonso.* 24 Ee, na sika ya yandi ba me kuzwa menga ya bambikudi, ya basantu mpe ya bantu nyonso yina ba kufwaka na zulu ya ntoto.”

19 Na manima ya mambu yayi, mu kuwaka ndinga mosi mutindu ndinga ya kimvuka mosi ya nene na zulu, yina zonzaka: “Beno kembila Yah!* Luvuukusu, nkembo mpe ngolo kele ya Nzambi ya beto, 2 samu balusambusu ya yandi ke ya tsyeleka mpe ya lunungu.* Samu yandi me pesa kitumbu na kento ya nene ya ndumba yina vanda bebisa ntoto na kinsuza* ya yandi, mpe yandi me vutula yandi yimbi samu na menga ya bisadi ya yandi yina ke na maboko ya kento ya ndumba.”* 3 Mpe kaka na ntangu yina, ba zonzaka mbala ya zole: “Beno kembila Yah!* Mpe mulinga ya mbanza ya nene ke na bikaka ve kunanguka mvula na mvula.”

4 Mpe bakuluntu 24 na bivangu yiya ya moyo kubwaka mpe sambilaka Nzambi yina ke ya kuvanda na zulu ya kiti ya kimfumu, mpe zonzaka: “Ameni! Beno kembila Yah!”*

5 Dyaka ndinga mosi katukaka na kiti ya kimfumu mpe zonzaka: “Beno kembila Nzambi ya beto, beno nyonso bisadi ya yandi, beno ba yina ke na boma ya yandi, bantu ya fioti mpe bantu ya nene.”

6 Mpe mu kuwaka ndinga mosi mutindu ndinga ya kimvuka ya nene, mpe mutindu makelele ya bamaza mingi, mpe mutindu makelele ya bidumu ya ngolo. Ba zonzaka: “Beno kembila Yah,* samu Yehova* Nzambi ya beto, Muntu ya Ngolo-Nyonso me banda kuyala!* 7 Beto sepela mpe beto yangalala, mpe beto pesa yandi nkembo samu makwela ya Mwana ya Dimeme me kuma, mpe kento ya yandi me bongama. 8 Ee, ba pesaka yandi muswa ya kulwata lino ya kitoko, ya bunkete, yina ke na ngengaka, samu lino ya kitoko ke lakisaka bisalu ya lunungu* ya basantu.”

9 Mpe yandi zonzaka na munu, “Sonika: Kyese na bantu yina ba me bokila na madya ya nkokila ya makwela ya Mwana ya Dimeme.” Yandi bwelaka: “Yayi mambu ya tsyeleka yina Nzambi me zonza.” 10 Na yina, mu kubwaka na makulu ya yandi samu na kusambila yandi. Kasi yandi zonzaka na munu: “Keba! Kusala ve mutindu yayi! Mu ke kaka kisadi mutindu nge, mpe mutindu bampangi ya nge yina ke na kisalu ya kupesa kimbangi samu na Yesu. Sambila Nzambi! Mpamba ve, bambikudulu kele samu na kupesa kimbangi na yina me tadila Yesu.”

11 Mu talaka zulu mwasi, mpe tala! Mpunda mosi ya mpembe. Nkumbu ya muntu yina vandaka ya kuvanda na zulu ya yawu kele Kukwikama mpe Tsyeleka, mpe yandi ke sambisaka mpe ke nwanaka mvita na lunungu.* 12 Meso ya yandi ke tiya yina ke na pelaka, mpe yandi ke na bayimpu mingi ya kimfumu na yintu ya yandi. Yandi ke na nkumbu mosi ya kusonama yina ata muntu mosi ve me zaba, katula kaka yandi mosi. 13 Yandi ke ya kulwata kilele ya zulu yina me kuzwa menga,* mpe ba ke bokilaka yandi Ndinga ya Nzambi. 14 Dyaka, bimvuka ya basoda ya mazulu vanda landa yandi ya kuvanda na zulu ya bampunda ya mpembe. Ba vandaka ya kulwata lino ya kitoko ya mpembe mpe ya bunkete. 15 Mpe mbele mosi ya yinda ya meno vanda basika na yinwa ya yandi samu na kubula makanda, mpe yandi ke twadisa bawu na yinti ya kisengo. Dyaka, yandi ke na dyataka bambuma na kikamununu ya vinu ya nkele ya ngolo ya Nzambi, Muntu ya Ngolo-Nyonso. 16 Na zulu ya kilele ya yandi ya zulu, ee na dikulu* ya yandi, yandi ke na nkumbu ya kusonama, Ntinu ya bantinu mpe Mfumu ya bamfumu.

17 Mu talaka mpe mbazi mosi ya kutelama na kati ya ntangu. Yandi gangaka na ndinga ya ngolo mpe zonzaka na bandeke nyonso yina ke pumbukaka na kati-kati ya zulu:* “Beno kwiza awa, beno vukana samu na mukembo ya nene ya nkokila ya Nzambi, 18 samu beno kudya misuni ya bamfumu, misuni ya bamfumu ya basoda, misuni ya bantu ya ngolo, misuni ya bampunda mpe ya ba yina ke ya kuvanda na zulu ya bawu, misuni ya bantu nyonso, ya bantu yina ke na kimpwanza mpe bangaamba, ya bantu ya fioti mpe ya nene.”

19 Mpe mu talaka kibulu ya nsisi, mpe bamfumu ya ntoto, mpe bimvuka ya basoda ya bawu ya kuvukana samu na kunwanisa muntu yina ke ya kuvanda na zulu ya mpunda, mpe kimvuka ya yandi ya basoda. 20 Mpe ba kangaka kibulu ya nsisi kintwadi na mbikudi ya luvunu yina salaka bidimbu na mantwala ya yandi. Na nzila ya bidimbu yina, yandi vunaka bantu yina kuzwaka kidimbu ya kibulu ya nsisi, mpe ba yina ke sambilaka kifwani ya yandi. Ntangu ba vandaka ntete moyo, ba losaka bawu nyonso zole na kati ya dyanga ya tiya yina ke pelaka na sufre. 21 Kasi ba yina bikanaka, ba kufwaka bawu na mbele ya yinda yina vanda basika na yinwa ya muntu yina ke ya kuvanda na zulu ya mpunda. Mpe bandeke nyonso yukutaka na misuni ya bawu.

20 Mpe mu talaka mbazi mosi yina katukaka na zulu mpe kulumukaka na fungula ya dibulu ya yinda mpe singa ya nene ya kisengo na diboko ya yandi. 2 Yandi simbaka dragoni, nyoka ya kubanda, yina kele Dyabulu mpe Satana, mpe kangaka yandi samu na bamvula 1 000. 3 Mpe yandi losaka yandi na kati ya dibulu ya yinda, kangaka yawu mpe tulaka kinyemo na zulu ya yawu, samu yandi vuna dyaka ve makanda tii ntangu bamvula 1 000 ke manisa. Na manima ya yawu, ba ke basisa yandi samu na mwa ntangu fioti.

4 Mpe mu talaka bakiti ya kimfumu, mpe ba yina vandaka ya kuvanda na zulu ya yawu kuzwaka lutumu ya kusambisa. Ee, mu talaka bamwela* ya ba yina ba kufwaka* samu na kimbangi yina ba pesaka na yina me tadila Yesu, mpe samu ba zonzilaka mambu yina me tadila Nzambi, mpe ba yina sambilaka ve kibulu ya nsisi to kifwani ya yandi, mpe yina kuzwaka ve kidimbu na mbunzu to na diboko. Ba vutukaka na luzingu mpe ba yalaka mutindu bamfumu kintwadi na Yesu samu na bamvula 1 000. 5 (Bantu ya kufwa yina bikanaka vutukaka ve na luzingu tii ntangu bamvula 1 000 manisaka.) Yayi ni mvumbukulu ya ntete. 6 Ba yina nyonso me kuzwa mvumbukulu ya ntete ke bantu ya kilengi mpe basantu. Lufwa ya zole ke ve na lutumu na zulu ya bawu, kasi ba ke vanda banganga-nzambi samu na Nzambi mpe samu na Kristo, mpe ba ke yala mutindu bamfumu kintwadi na yandi samu na bamvula 1 000.

7 Ntangu bamvula 1 000 ke manisa, ba ke basisa Satana na boloko ya yandi, 8 mpe yandi ke basika samu na kuvuna makanda yina ke na bansongi yiya ya ntoto, Gogi na Magogi, samu na kuvukisa bawu samu na mvita. Lutangu ya bawu ke mutindu zyelo ya mubu. 9 Mpe ba mwanganaka na zulu ya ntoto nyonso mpe ba zungaka kisika ya basantu, mpe mbanza yina Nzambi ke zolaka. Kasi tiya katukaka na mazulu mpe kulumukaka, mpe ya nyengisaka bawu. 10 Mpe Dyabulu yina vanda vuna bawu, ba losaka yandi na dyanga ya tiya mpe ya sufre, kisika yina kibulu ya nsisi mpe mbikudi ya luvunu vandaka. Mpe ba ke talisa bawu mpasi* mpimpa na ntangu, mvula na mvula.

11 Mpe mu talaka kiti mosi ya nene ya kimfumu ya mpembe, mpe Muntu yina vandaka ya kuvanda na zulu ya yawu. Zulu na ntoto kimaka na mantwala ya yandi, mpe ya vandaka dyaka ve na kisika samu na yawu. 12 Mpe mu talaka bantu ya kufwa, bantu ya nene mpe bantu ya fioti, ya kutelama na mantwala ya kiti ya kimfumu, mpe ba fungulaka barulo. Kasi ba fungulaka rulo ya nkaka. Ya ke rulo ya luzingu. Ba sambisaka bantu ya kufwa na kulandaka bamambu yina vandaka ya kusonama na kati ya barulo, na kutadilaka bisalu ya bawu. 13 Mpe mubu vutulaka bantu ya kufwa yina vandaka na kati ya yawu, mpe lufwa mpe Ndyamu* vutulaka bantu ya kufwa yina vandaka na kati ya yawu, mpe ba sambisaka mosi na mosi ya bawu na kutadilaka bisalu ya yandi. 14 Mpe ba losaka lufwa mpe Ndyamu* na kati ya dyanga ya tiya. Dyanga yango ya tiya ke na lakisaka lufwa ya zole. 15 Dyaka, muntu nyonso yina nkumbu ya yandi vandaka ve ya kusonama na buku ya luzingu, ba losaka yandi na kati ya dyanga ya tiya.

21 Mpe mu talaka zulu ya malu-malu mpe ntoto ya malu-malu, samu zulu ya ntama mpe ntoto ya ntama zimbanaka, mpe mubu ke dyaka ve. 2 Mu talaka mpe mbanza ya santu, Yeruzalemi ya malu-malu, kukatuka na zulu na sika ya Nzambi mpe kukulumuka. Ya vandaka ya kubongama mutindu kento yina ke na kwelaka, yina me bongisa nzutu samu na bakala ya yandi. 3 Na yina, mu kuwaka ndinga mosi ya ngolo yina katukaka na kiti ya kimfumu kuzonza: “Tala! Tenta ya Nzambi ke na bantu, mpe yandi ke zinga na bawu, mpe ba ke vanda bantu ya yandi. Mpe Nzambi yandi mosi ke vanda na bawu. 4 Mpe yandi ke kusuna mansangasa nyonso ya meso ya bawu, mpe lufwa ke vanda dyaka ve; mafwa, bidilu ya ngolo mpe mpasi ke vanda dyaka ve. Bamambu ya ntama me zimbana.”

5 Mpe Muntu yina vandaka ya kuvanda na zulu ya kiti ya kimfumu zonzaka: “Tala! Mu ke na salaka bima nyonso ya malu-malu.” Mpe yandi bwelaka: “Sonika, samu bamambu yayi ke ya kukwikama* mpe ya tsyeleka.” 6 Mpe yandi zonzaka na munu: “Ya me salama! Mu kele Alfa mpe Omega,* kubanda mpe nsuka. Muntu nyonso yina ke na nsatu ya maza, mu ke pesa yandi ya mpamba maza yina me katuka na mukelo* ya maza ya luzingu. 7 Muntu yina ke nunga ke byadila bima yayi, mpe mu ke vanda Nzambi ya yandi, mpe yandi ke vanda mwana ya munu. 8 Kasi, samu na bayuma, mpe bantu yina ke ve na kiminu, ba yina ke mvindu mpe nganzi, ba yina ke kufwaka bantu, ba yina ke salaka kinsuza,* ba yina ke salaka bansalulu ya bampeve ya yimbi, ba yina ke sambilaka biteki, mpe bantu nyonso ya luvunu, kikunku ya bawu ke vanda na kati ya dyanga yina ke na pelaka na tiya mpe sufre. Yayi ke na lakisaka lufwa ya zole.”

9 Mosi ya bambazi 7 yina vandaka na bandonga 7 ya kufuluka na bampasi 7 ya nsuka, kwizaka mpe zonzaka na munu: “Kwiza, mpe mu ke lakisa nge kento yina ke na kwelaka, kento ya Mwana ya Dimeme.” 10 Na yawu, yandi nataka munu na ngolo ya mpeve, tii na mongo mosi ya nene mpe ya yinda, mpe yandi lakisaka munu mbanza ya santu Yeruzalemi, yina vanda katuka na zulu na sika ya Nzambi mpe kukulumuka, 11 mpe ya vandaka na nkembo ya Nzambi. Kungenga ya yawu vandaka mutindu ditadi mosi ya kulutila ntalu, mutindu ditadi ya yasipe, yina ke na ngengaka mutindu kristale ya kukondwa mvindu. 12 Ya vandaka na kibaka mosi ya nene mpe ya yinda, mpe ya vandaka na bamwelo 12. Mpe na bamwelo yango, ya vandaka na bambazi 12, mpe bankumbu ya mabuta 12 ya bana ya Izraele vandaka ya kusonama na bamwelo yango. 13 Ya vandaka na bamwelo tatu na esti, bamwelo tatu na nore, bamwelo tatu na sude, mpe bamwelo tatu na westi. 14 Kibaka ya mbanza yango vandaka mpe na matadi 12 na yisi* ya yawu, mpe na zulu ya matadi yango, ya vandaka na bankumbu 12 ya bantumwa 12 ya Mwana ya Dimeme.

15 Muntu yina vanda solola na munu vandaka ya kusimba yinti ya wolo ya didyadya mutindu kitezolo samu na kuteza* mbanza yango, bamwelo ya yawu, mpe kibaka ya yawu. 16 Mbanza yango ke kare, yinda ya yawu ke faso mosi na nene ya yawu. Yandi tezaka mbanza yango na yinti ya didyadya. Ya pesaka basitade 12 000.* Yinda ya yawu, nene ya yawu, mpe ntela ya yawu ke faso mosi. 17 Yandi tezaka mpe kibaka ya yawu. Ya vandaka bakude 144,* na kulandaka kitezo ya muntu, yina ke mpe kitezo ya mbazi. 18 Kibaka vandaka ya kutungama na yasipe, mpe mbanza vandaka ya kutungama na wolo ya kuvedila mutindu kitala-tala ya kristale. 19 Ba bongisaka bayisi ya kibaka ya mbanza na matadi ya ntalu ya mutindu nyonso: yisi ya ntete vandaka yasipe, ya zole safire, ya tatu kalsedwane, ya yiya emerode, 20 ya tanu sardonikse, ya sambanu* sardwane, ya sambwadi* krizolite, ya nana* berile, ya ivwa* topaze, ya kumi* krizopraze, ya kumi na mosi* yasinte, mpe ya kumi na zole* ametiste. 21 Dyaka, bamwelo 12 vandaka badzeke 12 ya ntalu. Ba yidikaka konso mwelo na dzeke mosi ya ntalu. Mpe bala-bala ya nene ya mbanza vandaka ya wolo ya kuvedila, mutindu kitala-tala yina ba lenda tala na lweka ya nkaka.

22 Mu talaka ve tempelo na mbanza, samu Yehova Nzambi, Muntu ya Ngolo-Nyonso ke tempelo ya yawu, na Mwana ya Dimeme. 23 Mbanza vandaka ve na nsatu ya ntangu, to ti ngonda ngenga na zulu ya yawu, samu nkembo ya Nzambi vanda pesa yawu nsemo, mpe mwinda ya yawu vandaka Mwana ya Dimeme. 24 Mpe makanda ke tambula na nsemo ya yawu, mpe bamfumu ya ntoto ke nata nkembo ya bawu na kati ya yawu. 25 Ba ke kanga ve bamwelo ya yawu na ntangu, samu mpimpa ke vanda ve kuna. 26 Mpe ba ke nata nkembo mpe lukumu ya makanda na kati ya yawu. 27 Kasi kima nyonso ya mvindu, mpe muntu nyonso yina ke salaka bamambu ya nganzi mpe ya luvunu ke kota ata fioti ve na kati ya yawu. Kaka ba yina ke na nkumbu ya kusonama na rulo ya luzingu ya Mwana ya Dimeme ke kota kuna.

22 Mpe mbazi lakisaka munu nzadi mosi ya maza ya luzingu, ya kukondwa mvindu mutindu kristale. Ya vanda katuka na kiti ya kimfumu ya Nzambi mpe ya Mwana ya Dimeme, 2 mpe ya vanda lutila na kati-kati ya bala-bala ya nene ya mbanza. Na balweka nyonso zole ya nzadi, ya vandaka na bayinti ya luzingu, yina vanda buta bambuma bambala 12. Ya vanda buta bambuma ya yawu konso ngonda. Mpe makasa ya bayinti vandaka samu na kubelusa makanda.

3 Mpe kulooka ke vanda dyaka ve. Kasi kiti ya kimfumu ya Nzambi mpe ya Mwana ya Dimeme ke vanda na kati ya mbanza, mpe bisadi ya yandi ke sadila yandi kisalu ya santu. 4 Mpe ba ke tala kizizi ya yandi, mpe nkumbu ya yandi ke vanda na bambunzu ya bawu. 5 Dyaka, mpimpa ke vanda dyaka ve, mpe ba ke vanda ve na nsatu ya nsemo ya mwinda to nsemo ya ntangu, samu Yehova Nzambi ke mwangisa nsemo na zulu ya bawu, mpe ba ke yala mutindu bamfumu mvula na mvula.

6 Yandi zonzaka na munu: “Bamambu yayi ke ya kukwikama* mpe ya tsyeleka. Ee, Yehova Nzambi yina zonzaka na nzila ya bambikudi filisaka mbazi ya yandi samu na kulakisa na bisadi ya yandi bamambu yina me fwana kusalama na mwa ntangu fioti. 7 Tala! Mu ke na kwizaka na mbangu. Kyese na muntu yina ke na tumamaka na bamambu ya mbikudulu yina ke na rulo yayi.”

8 Ya tsyeleka, ni munu Yoane kuwaka mpe talaka bamambu yayi. Ntangu mu kuwaka mpe talaka yawu, mu kubwaka na makulu ya mbazi yina vanda lakisa munu bamambu yayi, samu na kusambila yandi. 9 Kasi yandi zonzaka na munu: “Keba! Kusala ve mutindu yayi! Mu ke kaka kisadi mutindu nge, mpe mutindu bampangi ya nge bambikudi mpe ba yina ke tumamaka na bamambu yina ke na rulo yayi. Sambila Nzambi.”

10 Yandi bwelaka: “Kubumba ve bamambu ya mbikudulu yina ke na rulo yayi, samu ntangu yina ba tulaka me kuma pene-pene. 11 Bika ti muntu ya kukondwa lunungu* tatamana na kukondwa lunungu, mpe ti muntu ya mvindu tatamana na mvindu ya yandi. Kasi bika ti muntu ya lunungu* tatamana na lunungu, mpe ti musantu tatamana na busantu.

12 “ ‘Tala! Mu ke na kwizaka na mbangu, mpe mu ke na difuta yina mu ke pesa, samu na kufuta konso muntu na kutadilaka bisalu ya yandi. 13 Mu kele Alfa mpe Omega,* muntu ya ntete mpe muntu ya nsuka, kubanda mpe nsuka. 14 Kyese na ba yina ke na sukulaka mazwela ya bawu samu na kuzwa luve ya kudya bambuma ya bayinti ya luzingu mpe kukota na mbanza na nzila ya bamwelo ya yawu. 15 Bayimbwa,* ba yina ke salaka bansalulu ya bampeve ya yimbi, ba yina ke salaka kinsuza,* ba yina ke kufwaka bantu, ba yina ke sambilaka biteki mpe muntu nyonso yina ke zolaka mpe ke na kifu ya kuvunaka, ba ke na ngaanda.’

16 “ ‘Munu, Yesu, mu filisaka mbazi ya munu samu na kupesa beno kimbangi ya bamambu yayi samu na bimvuka. Mu ke mwanzi mpe mwana ya Davidi, mpe mbwetete ya suka yina ke ngengaka.’ ”

17 Mpe mpeve na kento yina ke na kwelaka ke na bikaka ve kuzonza, “Kwiza!” mpe bika ti muntu nyonso yina ke na kuwaka zonza, “Kwiza!” mpe ti muntu nyonso yina ke na nsatu ya maza, kwiza, mpe ti muntu nyonso yina zola, kuzwa ya mpamba maza ya luzingu.

18 “Mu ke na pesaka kimbangi na muntu nyonso yina ke na kuwaka bamambu ya mbikudulu yina ke na rulo yayi: Kana muntu bwela mambu ya nkaka na zulu ya bamambu yayi, Nzambi ke bwela yandi bampasi yina ke ya kusonama na rulo yayi, 19 mpe kana muntu katula mwa mambu na bamambu yina ke na rulo ya mbikudulu yayi, Nzambi ke katula kikunku ya yandi ya bamambu yina ke ya kusonama na rulo yayi. Yandi ke pesa ve yandi muswa ya kudya bambuma ya bayinti ya luzingu mpe ya kukota na mbanza ya santu.

20 “Muntu yina ke na pesaka kimbangi samu na bamambu yayi ke na zonzaka, ‘Ee, mu ke na kwizaka na mbangu.’ ”

“Ameni! Kwiza, Mfumu Yesu.”

21 Bika ti ntima ya kulutila mbote ya Mfumu Yesu vanda na basantu.