Kima kifu ya kuzola kaka nzutu ya nge mosi mutindu bantu ya yinza

BANTU mingi bubu yayi, ke kanisaka ti ba me lunga kubakila bawu na faso yina ke lakisaka ti ba me lutila bampangi. Ata faso yayi, samu na bawu ya me lunga ve. Muntu yina ke na makanisi ya mutindu yayi, ke na kifu ya kuzola kaka nzutu ya yandi mosi mpe ke vutulaka ve matondo na yina yandi ke na yawu. Yayi ke bifu yina Biblia ke zonzilaka ti bantu ke vanda na yawu na ntangu ya nsuka.—2 Tim. 3:2.

Kasi ni bubu yayi ve, bantu me kuma na kifu ya kuzola kaka banzutu ya bawu mosi. Na kifwani, Adami na Eva vandaka na nsatu ya kusoola na bawu mosi, mambu yina ke mbote mpe yina ke yimbi. Mukanu ya bawu natinaka bawu bampasi. Kifwani ya nkaka ke ya Uziya yina vandaka mosi ya bamfumu ya Zude. Yandi vanda kanisa ti yandi vandaka na luve ya kuyoka pudre ya mananasi na tempelo. Kasi yandi salaka mambu ya kulutila yimbi. (2 Ns. 26:18, 19) Samu ti tata ya bawu vandaka Abrahami, Bafarize mpe Basaduse vanda kanisa ti Nzambi zola bakila bawu na faso ya kulutila bampangi.—Mat. 3:9.

Beto mpe ke na zingaka kintwadi na bantu yina ke zolaka kaka banzutu ya bawu mosi. Kana beto sala ve keba, beto mpe lenda lwata kifu yango. (Gal. 5:26) Beto lenda banda kukanisa ti, ba me bonga kubakila beto na faso yina ke na lakisa ti beto me lutila bampangi. Yinki lenda sadisa beto na kukuma ve mutindu bawu? Malongi zole ya Biblia ke sadisa beto na kuzaba yinki Yehova ke kanisaka na kifu yayi.

Yehova ke muntu yina me lunga kuzonza na beto yina beto lenda kuzwa to ve. Beto tala mwa bifwani.

Na yina me tadila dikanda, Yehova zola ti bakala zola kento yandi mpe kento zitisa bakala ya yandi. (Efe. 5:33) Yehova ke mpe na vingilaka ti bakala fwana kulungisa bansatu ya kuvukisa nzutu ya kento ya yandi mpe kento me fwana na kusala mutindu mosi samu na bakala ya yandi. (1 Ko. 7:3) Dyaka, bibuti ke na vingilaka ti bana ya bawu tumama na bawu. Bana mpe ke na vingilaka ti bibuti ya bawu kipe bawu mpe lakisa bawu luzolo.—2 Ko. 12:14; Efe. 6:2.
Na kati ya kimvuka, Yehova zola ti beto zitisa bankulutu samu na kisalu bawu ya ngolo yina ba ke na salaka. (1 Tes. 5:12) Kasi ata faso yina, ya ke ve na pesaka bakuluntu luve ya kunyokola bampangi ya kento na ya bakala.—1 Pi. 5:2, 3.
Nzambi pesaka bantu ya luyalu lutumu ya kulomba paku mpe na kuzwa buzitu ya bantu yina ba ke na yalaka.—Rom. 13:1, 6, 7.

Na luzolo nyonso, Yehova ke kabulaka beto kulutila yina beto ke na kanisaka. Samu ti beto ke bantu ya masumu, beto me lunga kaka kufwa. (Rom. 6:23) Kasi, samu na luzolo ya yandi ya kukwikama, yandi ke sakumunaka beto mingi. (Nku. 103:10, 11) Yandi ke pesaka ve beto balusakumunu ya yandi samu beto me lunga kuzwa yawu, kasi samu yandi ke zolaka beto mingi mpe ti yandi ke na ntima ya mbote.—Rom. 12:6-8; Efe. 2:8.

YINKI LENDA SADISA BETO NA KUKUMA VE NA KIFU YA KUZOLA KAKA NZUTU YA BETO MOSI?

Salaka keba na faso ya kukanisa ya yinza. Na kati ya kidiba, beto lenda banda kukanisa ti beto me lutila bampangi ya nkaka. Yesu sadilaka kifwani mosi samu na kulakisa ti ya ke ve mpasi na beto na kukanisa mutindu yayi. Yandi zonzilaka na bantu yina ndimaka kusala kilumbu mosi samu ba futa bawu denie mosi. Na manima, mfumu ya bilanga ya vinu bokilaka dyaka bantu ya nkaka na kusala. Na nkokila yandi futaka konso muntu denie mosi ata ba yina salaka kaka ngunga mosi. Ntangu bisadi ya ntete kwizaka, ba vanda kanisa ti ba zola futa bawu kulutila bampangi samu ti basalaka mingi kilumbu ya muvimba na yisi ya ntangu ya ngolo. (Mat. 20:1-16) Na nzila ya kifwani yayi, Yesu vanda lakisa na bilandi ya yandi ti ba zola sepela na yina Yehova ke na pesaka bawu.

Na kifwani yina Yesu sadilaka, bantu yina ba bokilaka samu na kisalu ke na yawaluka na sika ya mfunu ya yinzo. — Babakala yina salaka kilumbu ya muvimba vanda kanisa ti ba bongaka kuzwa mbongo ya kulutila

Vanda muntu yina ke vutulaka matondo kasi ve yina ke vingilaka ti ba pesa yandi bima yina yandi me kanisa ti yandi me lunga kuzwa. (1 Tes. 5:18) Vanda mutindu ntumwa Polo, yina lombaka ve na bakristo ya Korinto na kupesa yandi bima yina yandi vandaka na yawu nsatu, ata ti yandi vandaka na muswa ya kusala yawu. (1 Ko. 9:11-14) Beto ke vutulaka matondo na nyonso yina bampangi ke pesaka beto, mpe ke vingalaka ve ti ba pesa beto yina beto ke na kanisaka ti beto me lunga kuzwa.

Ntumwa Polo na babakala zole ke na yidikaka tenta. — Ntumwa Polo vanda vingila ve ba pesa yandi mbongo samu na kusadisa yandi

Vanda ya kukuluka. Ntangu muntu ke kanisaka kaka na yandi mosi, yandi lenda banda kutala ti yina ke na yandi ke ve ya kulunga. Kana beto ke ya kukuluka, ya ke sadisa beto na kukanisa ve na faso ya yimbi yayi.

Collage: 1. Mbikudi Daniele me kuma kiboba. 2. Babiloni ya ntama. 3. Ntwenya Daniele na bandiku ya yandi tatu ya Baebre. — Kukuluka ya mbikudi Daniele salaka ti yandi vanda mfunu mingi na meso ya Yehova

Na yina me tadila kuvanda ya kukuluka, mbikudi Daniele ke kifwani ya mbote. Yandi katukaka na dikanda mosi ya mfunu ya Izraele, yandi vandaka kitoko, mayela mpe na makoki mingi yina zola sala ti ba bakila yandi na faso yina ke lakisa ti yandi lutila bampangi. (Dan. 1:3, 4, 19, 20) Kasi Daniele bikanaka ya kukuluka. Ni kifu yayi salaka ti yandi vanda mfunu mingi na meso ya Yehova.—Dan. 2:30; 10:11, 12.

Kifu ya kuzola kaka nzutu ya beto mosi ke ya kufulaka na yinza yayi. Na yawu, beto bika ve na kusepela na balusakumunu yina Yehova ke pesaka na mosi na mosi ya beto na nzila ya ntima ya yandi ya kulutila mbote.