Bantangu ya ngolo yina me salama ntete ve ke na bulá na bisika mingi na yinza. Yinki Biblia ke zonzá na mambu yayi?

Na ngonda ya juillet 2022, bantangu ya ngolo me bula na bisika mingi na yinza. Beto tala mwa bamambu yina ba journal me zonza:

• “Yayi ke mbala ya zole ya ngonda yayi yina luyalu na Chine me zonza na bantu ya bambanza 70 na kusala keba samu bantangu ya ngolo ke na bulaka.”—25 juillet 2022, CNN.

• “Samu ti na Europe nyonso bantangu ke na kumá ngolo, batiya ke na salamá na bisika mingi.”—17 juillet 2022, The Guardian.

• “Na kilumbu ya lumingu, bantangu ya ngolo yina nabunu ya salama bulá na bisika mingi ya États-Unis. Mpe bangonda yayi, bantangu ke na kumá kaka ngolo na bambanza yina ke pene-pene na nzadi, bambaza yina ke na kati-kati ya États-Unis mpe bisika ya nkaka ya sude.”—24 juillet 2022, journal The New York Times.

Yinki nyonso yayi zola zonza? Ntoto ke kuma kwandi kisika yina bantu ke lenda dyaka ve kuzinga? Yinki Biblia ke zonzaka?

Bantangu ya ngolo yayi ke na lungisá kwandi bambikudulu ya Biblia?

Ee. Bantangu ya ngolo yina ke na salamá ke na lungisá bambikudulu yina Biblia zonzá samu na ntangu ya beto. Na kifwani, Yesu zonza ti “mambu yina ke pesaka bantu boma mingi ke talana.” (Luke 21:11) Samu ti bantangu ke na kumá kaka ngolo, bantu mingi ke na boma ti bamambu yina bantu ke na salá bebisa ntoto.

Ntoto ke kuma kwandi kisika yina bantu lenda zinga dyaka ve?

Ve. Nzambi yidiká ntoto samu bantu zinga na zulu ya yawu ya mankululu. (Nkunga 115:16; Longi 1:4) Nzambi ke bika ve bantu bebisa ntoto. Kasi yandi me pesa nsilulu ti yandi “ke kufwa bayina ke bebisaka yinza [to ntoto].’’—Luzabusu 11:18.

Beto tala bambikudulu zole yina ke lakisá mambu ya nkaka yina Nzambi me zonza ti yandi ke sala:

• ‘Ntoto-makanga na ntoto ya kuyuma ke vanda na kyese, mpe yinsi ya kuyuma ke yangalala mpe ke basisa bifulu mutindu safrani.’ (Izaya 35:1) Nzambi ke bika ve ti ntoto kuma kisika yina bantu lenda zinga ve, kasi yandi ke yidika bisika yina me beba.

• ‘Nge ke kebaka ntoto, nge ke salaka ti yawu buta mingi tsyeleka mpe ti yawu kuma na kimvwama mingi.’ (Nkunga 65:9) Na lusakumunu ya Yehova, ntoto ke kuma paradiso.

Samu na kuzaba dyaka mingi wa’ faso kusoba ya kilima ke na lungisá bambikudulu ya Biblia, tanga “Yinki Biblia ke zonzá samu na kusoba ya kilima mpe bilumbu yina ke na kwizaka.”

Samu na kuzaba dyaka mingi na nsilulu ya Biblia yina ke zonzá ti Nzambi ke yidika ntoto, tanga “Nani ke vuukisa ntoto?”