Na diboko ya kento: Mupepe ya ngolo na nkumbu ya Ian, yina salamá na Floride, na États-Unis, na septembre 2022 (Sean Rayford/Getty Images); na kati-kati: Mama mosi ke na sosá kuvuukisa mwana ya yandi na Donetsk, na Ukraine na Juillet 2022 (Alex Chan Tsz Yuk/SOPA Images/LightRocket via Getty Images); na diboko ya bakala: Bantu mingi ke na sosá kuzaba kana ba ke na COVID na Beijing, na Chine, na avril 2022 (Kevin Frayer/Getty Images)
BENO LALA VE!
2022 me vanda mvula mosi ya mpasi mpe ya muvusu. Yinki Biblia ke zonzaka?
Na kati ya mvula 2022, bansangu me zonzila mingi bamvita, bamambu ya mbongo, mpe bamambu ya mpasi mutindu mipepe ya ngolo mpe bamvula ya nene. Kaka ni Biblia lenda bakisa beto na kuzaba yinki bamambu yayi zola zonza.
Yinki bamambu yina me salama na mvula 2022 zola zonza?
Bamambu yina me salama na mvula 2022 me lakisa pwelele ti beto ke na zingá na ntangu yina Biblia ke bokilá “bilumbu ya nsuka.” (2 Timote 3:1) Bilumbu ya nsuka bandá na mvula 1914. Tala faso bamambu yina me salama na mvula 2022 ke na kwelaná na yina Biblia zonzá samu na ntangu ya beto:
“Bamvita.”—Matayi 24:6.
“2022 me vanda mvula yina bampasi ya mvita me vutuka na Europe.”a
Tala disolo “Russie me kota na Ukraine samu na kunwanisa bawu.”
‘Nsatu ke vanda.’—Matayi 24:7.
“Na mvula 2022, nsatu me vanda ya kulutila.”b
“Bimbevo ya nene ke vanda mingi.”—Luke 21:11.
“Polio me vutuka, kimbevo yina ba ke bokilá variole du singe ke na mwanganá mpe COVID-19 ke kaka na kwamisá bantu. Bamambu yayi ke na lakisá pwelele ti bimbevo yayi ke ngolo mpe ya ke na zwá bantu mingi. Ya ke na lakisá mpe ti bantu ke ve na ngolo na mantwala ya bamambu ya mutindu yayi.”c
Tala disolo “6 millions ya bantu me kufwa na kimbevo ya COVID-19.”
“Mambu yina ke pesaka bantu boma.”—Luke 21:11.
“Bantangu ya ngolo, kisifu ya ngolo, batiya ya brousse, mpe bamvula yina ke dyamisá bayinzo. 2022 me vanda mvula yina bantu lenda zimbana ve samu na bamambu ya kilima yina me sala ti bantu mingi kufwa, mpe ba millions ya bantu bika bayinzo ya bawu.”d
“Muvusu.”—Luke 21:9.
“Na 2022, bantu mingi vandá na nkele na yina me tadila bamambu ya mbongo, mingi-mingi samu ti bima ke na kumá kaka ntalu. Ya me sala ti na babwala mingi bantu basika na banzila samu na kulakisa ti ba ke ve na sepelá na bamfumu ya bwala ya bawu.”e
Tala disolo “Bima ke na kumá kaka ntalu.”
Yinki ke salama na 2023?
Ata muntu lenda zonza mambu yina ke salama na 2023. Kasi beto zaba ti, na mwa ntangu fioti, Kimfumu ya Nzambi, kimfumu mosi yina ke na mazulu, ke kwiza bongisa bamambu awa na ntoto. (Danyele 2:44) Kimfumu yayi ke katula bamambu nyonso yina ke na talisá bantu mpasi, mpe ke sala nyonso samu luzolo ya Nzambi lungana awa na ntoto.—Matayi 6:9, 10.
Beto ke na lombá na nge na kulanda malongi ya Yesu mpe ‘kulala ve’ samu na kutala mutindu bamambu yina ke na salamá na yinza ke na lungisá bambikudulu ya Biblia. (Marke 13:37) Mulemvo, sosa kukutana na beto kana nge ke na nsatu ya kuzaba dyaka mingi na yina me tadila lubakusu yina Biblia lenda pesa nge bubu yayi, mpe kivuvu ya kitoko yina ya lenda pesa nge na dikanda ya nge samu na bilumbu yina ke kwiza.
a Disolo “2022 me vanda mvula yina bampasi ya mvita me vutuka na Europe” (na anglais) yina soniká Jill Lawless samu AP News, na kilumbu ya 8 décembre 2022.
b Disolo “A Global Food Crises” ya Programme alimentaire mondial.
c Disolo “Living in an Age of Pandemics—From COVID-19 to Monkeypox, Polio, and Disease X,” yina Lawrence O. Gostin, soniká na Forum santé JAMA, na kilumbu ya 22 septembre 2022.
d Disolo “What’s Behind the Record-Breaking Extreme Weather Events of Summer 2022?” yina Martina Igini soniká na Earth.Org, na kilumbu ya 24 octobre 2022.
e Disolo “La colère économique a dominé les manifestations mondiales en 2022,” yina Thomas Carothers na Benjamin Feldman soniká samu na Fondation Carnegie pour la paix Internationale na kilumbu ya 8 décembre 2022.