Na kati ya Biblia ke na bifwani mingi ya bantu yina vandá na ntima ya yinda. Ya ke vanda mbote nge longoka bifwani ya bawu. Na kifwani, Davidi vandá ntete ntwenya ntangu ba tulak’ yandi mafuta samu na kukuma mfumu ya Izraele. Kasi, yandi vingilá bamvula mingi tekila yandi kuma mfumu. Simeyoni na Ana yina vandá ya kukangama na Yehova vingilá kulungana ya nsilulu na yina me tadila Masiya. (Luke 2:25, 36-38) Ntangu nyonso nge ke na longoká bifwani yayi, sosa kuzwa bamvutu na byuvu yayi: Yinki sadisá bantu yayi na kulakisa ntima ya yinda? Wapi bambote ba kuzwaka? Wa’ faso mu lenda landa kifwani ya bawu? Nge lenda kuzwa mpe bambote na kulongoka bifwani ya bantu yina lakisá ve ntima ya yinda. (1 Sa. 13:8-14) Mpe ntangu nge ke na longoká bifwani ya bawu, sosa kuzwa bamvutu na byuvu yayi: Yinki salá ti ba vanda ve na ntima ya yinda? Samu ba vandá ve na ntima ya yinda, wapi mambu ya mpasi kuminá bawu? w23.08 25 §15

Ntumwa Piere vandá ya kukwikama. Yandi biká ata kima kanga yandi nzila ya kulanda Yesu. Kilumbu mosi, ntangu Yesu zonzá mambu mosi yina bilandi ya yandi vandá lenda ve kubakula, Piere lakisá kukwikama ya yandi. (Yoa. 6:68) Bantu mingi biká kulanda Yesu. Kasi Piere ve. Ata ti yandi zabá ve mbote-mbote yina Yesu vandá sosa kuzonza, yandi vingilá ve samu na kuzonza ti Yesu vandá na “mambu yina ke pesaka luzingu ya seko.” Ya ke na lakisá ti yandi vandá ya kukwikama. Yesu biká ve Piere. Na nkokila ya nsuka yina yandi lutisá awa na ntoto, Yesu zabá ti Piere na bantumwa ya nkaka zolá bika yandi. Ata faso yina, Yesu vandá lakisa ti yandi vandá tula ntima na Piere, ntangu yandi zonzá na Piere ti yandi ke vutuka mpe ke bikana kaka ya kukangama na yandi. (Luke 22:31, 32) Yesu zabá ti “ntima ya muntu kele ya kufuluka na nsatu ya kusala mambu ya mbote, kasi nzutu kele ya kulemba.” (Mrk. 14:38) Na yawu, ntangu Piere mangá ti yandi zabá ve Yesu, Yesu biká ve yandi. Na manima ya kuvumbuka na lufwa, Yesu talaná na Piere. Ya lenda vanda ti Yesu salak’ yawu ntangu Piere vandá yandi mosi. (Mrk. 16:7; Luke 24:34; 1 Ko. 15:5) Kanisa na ngolo yina ya pesá Piere, yina vandá ya kulemba. w23.09 22 §9-10

Nzambi ke lemvokilá masumu ya ba yina ke vandá na kiminu na yandi. Ntangu Yehova ke lemvokilá bawu, yandi ke kanisá dyaka ve na yawu. (Nku. 32:1, 2) Samu na kiminu ya bawu, Yehova ke talá bawu mutindu bantu ya lunungu. Ata ti, Abrahami, Davidi, mpe bisadi ya Yehova ya nkaka vandá bantu ya masumu, Yehova bokilá bawu bantu ya lunungu. Samu na kiminu ya bawu, Yehova ke talá bawu faso mosi ve na bantu yina ke tulá ve kiminu na yandi. Yehova ke talá bantu yina ke tulá kiminu na yandi mutindu bantu ya kulunga. (Ef. 2:12) Kaka mutindu ntumwa Polo sonikak’ yawu, samu na kukuma ndiku ya Nzambi beto me lunga kuvanda na kiminu na yandi, kaka faso salak’ yawu Abrahami na Davidi. w23.12 3 §6-7