14. Na wapi ntangu Yoele 2:28, 29 lunganaka?

¹⁴ Kima ya mbote ya kusimba ke ni nsangu ya mbote yina Yoele ke na pesá: Ntoto ke buta dyaka bambuma. (Yoe. 2:23-26) Na yina, na bilumbu yina zola kwiza, madya ya kimpeve zolá kuma dyaka mingi samu na bantu nyonso. Yehova zonzá: “Na manima mu ke mwangisa mpeve ya munu na zulu ya bantu nyonso, mpe bana ya beno ya bakala na ya kento ke [zonza baprofesi] . . . mpe ata na zulu ya bangaamba ya munu ya bakala mpe ya kento, mu ke mwangisa mpeve ya munu.” (Yoe. 2:28, 29) Mambu yango salamá ve ntangu ba-izraelite katuká na Babilone mpe vutuká na bwala ya bawu. Kasi ya salamá basiekle mingi na manima, na Pentecote ya mvula 33 N.B. Wa’ faso beto me zaba yawu?

15. Na Bisalu 2:16, 17, wapi mambu apotre Piere zonzá na zulu ya mambu yina ke zonzilá Yoele 2:28, mpe yinki ya ke na lakisaka?

¹⁵ Na ngolo ya mpeve ya santu, apotre Piere zonzá ti, Yoele 2:28, 29 lunganá na faso ya kitoko na kilumbu ya pentecote. Na 9 heure ya suka yina, Nzambi mwangisá mpeve ya yandi ya santu, mpe ba yina yambak’ yawu, bandá kuzonza “mambu ya [kitoko] ya Nzambi.” (Bis 2:11) Kaka na ngolo ya mpeve ya santu, Piere sadilá mambu ya nkaka samu na kuzonzila Profesi ya Yoele. Nge mpe me tala faso ya nkaka yina yandi me zonzila profesi yayi? (Tanga Bisalu 2:16, 17.) Piere sadilá ve ba-mot “na manima” faso na profesi ya Yoele, kasi yandi zonzá: “Mpe na bilumbu ya mansukina,” samu na kuzonzilá mansukina ya dikanda ya bajwif. Na ntangu yina, Nzambi mwangisá mpeve ya yandi ya santu “na zulu ya bantu nyonso.” Ya me lakisa ti, ntangu zolá luta avant profesi ya Yoele lungana.

16. Na siekle ya ntete wa’ faso mpeve ya santu sadisá bakristo na kisalu ya predikasion, mpe wa’ faso ya ke na sadisá beto bubu yayi?

¹⁶ Na manima ya kumwangisa mpeve ya yandi ya santu na zulu ya bakristo ya siekle ya ntete, ba bandá na ntangu yina, kusala kisalu ya predikasion na yinza nyonso. Ni na ntangu yina mpe, apotre Paul vandá sonika mukanda na kimvuka ya Bakolose, na mvula 61 N.B., yandi zonzá ti nsangu ya mbote mwanganá deja “na yinza [nyonso].” (Kol. 1:23) Ntangu Paul zonzá “yinza [nyonso]”, yandi vandá zonzila bisika nyonso ya yinza yina yandi mpe bakristo ya nkaka kwendá longa bantu mambu ya Nzambi. Ngolo yina mpeve ya Yehova ke pesá beto me sadisa beto bubu yayi na kusala kisalu ya predikasion “tii kisika yina ntoto suká”!—Bis. 13:47; tala tablo “Mu ke mwangisa mpeve ya munu.”