Nsangu ya kimfumu ya Nzambi ke nsangu ya kulutila mfunu na kati ya Biblia. Yehova ke sadila kimfumu ya yandi samu na kulungisa luzolo ya yandi samu na ntoto. Kasi, kimfumu ya Nzambi kele yinki? Wa’ faso beto me zaba ti ya ke na yalaka? Wapi mambu ya me lungisaka? Mpe wapi mambu ya ke lungisa na bilumbu yina ke kwiza? Kileso yayi na bileso zole yina ke landa, ke pesa bamvutu na byuvu yayi.

1. Kimfumu ya Nzambi kele yinki, mpe nani ke mfumu ya yawu?

Kimfumu ya Nzambi kele luyalu (gouvernement) yina Yehova Nzambi tulaka na zulu. Ni Yesu ke na twadisaka yawu. (Matayi 4:17; Yoane 18:36) Ntangu Biblia ke zonzilá Yesu, ya ke zonzá: “Yandi ke yala seko.” (Luke 1:32, 33) Samu Yesu ke Mfumu ya kimfumu ya Nzambi, yandi ke yala na zulu ya ntoto nyonso.

2. Nani ke yala na Yesu?

Yesu ke yala ve yandi mosi. Bantu yina me katuka na “[. . .], bandinga nyonso, makanda nyonso mpe bayinsi nyonso . . . ke yala yinza nyonso.” (Luzabusu 5:9, 10) Bantu yikwa ke yala na Yesu? Banda ntangu yina Yesu kwizá na ntoto, bantu mingi ke na kumá bilandi ya yandi. Kasi, kaka 144 000 na kati ya bawu ke kwenda na zulu samu na kuyala na Yesu. (Tanga Luzabusu 14:1-4.) Bakristo nyonso ya nkaka ke kuzwa bambote ya kimfumu ya Nzambi awa na ntoto.—Nkunga 37:29.

3. Samu na yinki kimfumu ya Nzambi me lutila bimfumu nyonso ya bantu?

Ata ti bamfumu ya yinza yayi ke sosá kusala mambu ya mbote, ba ke lendá ve kusala nyonso yina ba me zola, samu ti ba ke ve na makoki ya kusala yawu. Ntangu ya nkaka, ba yina ke kwizá na manima ya bawu ke salá bamambu na faso ya yimbi, mpe ke bebisá yina bampangi salaka. Kasi Yesu, mfumu ya kimfumu ya Nzambi, ke yala ntangu nyonso. Nzambi me “tula kimfumu mosi yina ke kufwa ve ata fioti.” (Danyele 2:44) Yesu ke yala na zulu ya ntoto nyonso, mpe yandi ke bakila bantu nyonso faso mosi. Yandi ke na luzolo, ntima ya mbote, mpe lunungu—mpe yandi ke longa bantu nyonso na kubakila bampangi ya bawu na luzolo, ntima ya mbote, mpe lunungu.—Tanga Izaya 11:9.

4. Kimfumu ya Nzambi ke yala na zulu ya ntoto nyonso

Yesu Kristo ke mfumu yina me lutila bamfumu nyonso ya yinza na ngolo. Tanga Matayi 28:18, mpe na manima beto zonzila kyuvu yayi:

• Samu na yinki kimfumu ya Yesu me lutila baluyalu ya bantu?

Luyalu ya bantu ke vandá kaka ntangu fioti mpe na manima bantu ya nkaka ke baká kimfumu. Konso luyalu ke kaka na yinsi to kisika mosi yina ya ke yalaka. Kasi yinki beto ke zonza samu na kimfumu ya Nzambi? Tanga Danyele 7:14, mpe na manima beto zonzila byuvu yayi:

• Samu na yinki ya ke mbote ti kimfumu ya Nzambi “kufwa ve” to vanda ntangu nyonso?

• Samu na yinki ya ke mbote ti kimfumu ya Nzambi yala na zulu ya ntoto nyonso?

5. Ba me bonga kukatula bimfumu nyonso ya bantu

Samu na yinki kimfumu ya Nzambi me bonga kukatula bimfumu nyonso ya bantu? Tala VIDEO, mpe na manima beto zonzila kyuvu yina ke landa.

VIDEO: Kimfumu ya Nzambi ke yinki?—Ndambu (1:41)

• Wapi bamambu luyalu ya bantu nataka?

Tanga Longi 8:9, mpe na manima beto zonzila kyuvu yayi:

• Nge me kanisa ti kimfumu ya Nzambi me bonga kukatula bimfumu nyonso ya bantu? Samu na yinki?

6. Bamfumu ya kimfumu ya Nzambi me zaba mbote bantu

Samu mfumu ya beto, Yesu, zingá awa na ntoto, yandi ke “talaka beto kyadi na bamambu yina ke lembisaka beto.” (Baebre 4:15) Yehova soolá bakento mpe babakala ya kukwikama 144 000 samu na kuyala na Yesu. Yandi soolá bawu na “bifumba nyonso, bandinga nyonso, makanda nyonso mpe bayinsi nyonso.”—Luzabusu 5:9.

• Ya ke na salá nge yinki na kuzaba ti, Yesu na ba yina nyonso ke yala na yandi zingaka awa na ntoto, mpe me zaba mbote-mbote bamambu ya bantu?

7. Misiku ya kimfumu ya Nzambi me lutila misiku ya bantu

Baluyalu ya bantu ke tulá misiku, samu na kusadisa bantu yina ke na yisi ya bawu. Kimfumu ya Nzambi mpe me tula misiku samu na bambote ya bantu yina ya ke yala. Tanga 1 Bakorinto 6:9-11, mpe na manima beto zonzila byuvu yayi:

• Na nge, wa’ faso yinza ke kuma ntangu muntu nyonso ke landa misiku ya Nzambi?a

• Samu na nge, ya ke kwandi mbote ti Yehova pesa misiku na ba yina nyonso ke vanda na yisi ya kimfumu ya yandi? Samu na yinki?

• Yinki ke na lakisá ti bantu yina ke tumamá ve na misiku yina lenda soba?—Tala verse 11.

NA BUNKUFI

Ya tsyeleka kimfumu ya Nzambi ke luyalu yina ke na mazulu, mpe ntangu fioti kaka me bikana, ya ke yala ntoto nyonso.

Mambu ya kusimba

• Banani ke yala na kimfumu ya Nzambi?

• Samu na yinki kimfumu ya Nzambi me lutila bimfumu nyonso ya bantu?

• Yinki Yehova me lomba na ba yina ke na yisi ya kimfumu ya yandi na kusala?

SOSA KUZABA DYAKA

Tala yinki Yesu zonzá na yina me tadila kisika yina kimfumu ya Nzambi kele.

“Kimfumu ya Nzambi ke kwandi na kati ya bantima ya bantu?” (Tanga yawu na jw.org)

Samu na yinki Bambangi ya Yehova ke soolá kutumama na nyonso yina kimfumu ya Nzambi ke zonzá, kasi ba ke tumamá ve na nyonso na bimfumu ya yinza?

Beto vandá ya kukangama na kimfumu ya Nzambi (1:43)

Longoka yinki Biblia ke zonzá na yina me tadila ba 144 000 yina Yehova me soola samu na kuyala na Yesu.

“Banani ke kwenda na zulu?” (Tanga yawu na jw.org)

Yinki natá kento mosi yina vandá na boloko, na kundima ti kaka ni Nzambi lenda yidika yinza yayi?

“ J’ai découvert la solution à l’injustice ” (Réveillez-vous !, Novembre 2011)

Yesu longá ti bilandi ya yandi me lunga kuvanda ve “bantu ya yinza.” (Yoane 15:19) Ya zola zonza ti beto ke vandá ya kukangama kaka na kimfumu ya Nzambi. Na kifwani beto ke kotá ve na politique mpe na ba guerres to na muvusu ya yinza. Ntangu ya nkaka, kutula ve yintu na mambu ya politique lenda vanda mpasi. Bantu lenda seka beto samu beto ke kotá ve na mambu ya politique to na mambu ya nkaka ya yinza. Wa’ faso beto lenda vanda kaka ya kukangama na Nzambi ya beto Yehova mpe na kimfumu ya yandi?

1. Wapi mutindu bakristo ya tsyeleka ke tadilá baluyalu ya bantu?

Bakristo ke zitisá baluyalu ya bantu. Beto ke salá mutindu Yesu zonzá mpe “ke [pesaka] na ntinu Sezale bima yina kele ya Sezale.” Na yawu, beto ke tumamá na misiku ya bwala mutindu musiku ya kufuta mpaku. (Marke 12:17) Biblia ke longá ti kana baluyalu ya bantu kele, ya ke samu ni Yehova me bika ya salama mutindu yina. (Baroma 13:1) Ni yawu ke na natá beto na kuzaba ti, bimfumu ya bantu ke kaka na lutumu ya fioti na mantwala ya Nzambi. Beto ke kwikilá ti kaka ni Nzambi na kimfumu ya yandi lenda yidika bamambu ya yinza.

2. Wa’ faso beto lenda lakisa ti beto ke ya kukangama kaka na kimfumu ya Yehova?

Mutindu Yesu, beto ke kotá ve na mambu ya politique. Ntangu bantu talá mosi ya bimangu ya Yesu, ba sosá kutula yandi mfumu ya bawu awa na ntoto. Kasi Yesu mangaka (Yoane 6:15) Samu na yinki yandi mangaka? Mutindu yandi zonzá na manima, “Kimfumu ya munu kele ve ya yinza yayi.” (Yoane 18:36) Mutindu bilandi ya Yesu, beto ke lakisá ti beto ke kaka ya kukangama na kimfumu ya Nzambi na bafaso mingi. Na kifwani, beto ke nwaná ve ba guerres. (Tanga Mika 4:3.) Beto ke zitisá bidimbu ya bwala mutindu drapeau, beto ke pesá ve yawu nkembo yina beto me lunga kupesa na Nzambi. (1 Yoane 5:21) Beto ke soolá ve bimvuka ya politique to bantu yina zola kubaka kimfumu. Ni na kusalá mutindu yayi mpe mitindu mingi ya nkaka beto ke lakisá ti beto ke ya kukangama kaka na kimfumu ya Nzambi.

SOSA KUZABA MBOTE-MBOTE

3. Bakristo ya tsyeleka ke kotá ve na mambu ya politique

Yesu na bilandi ya yandi bikilá beto kifwani samu na mambu yayi. Tanga Baroma 13:1, 5-7 na 1 Piere 2:13, 14. Na manima, tala VIDEO mpe beto zonzila byuvu yina ke landa.

VIDEO: Bakristo ya tsyeleka ke kotá ve na mambu ya politique—Kitini 1 (4:28)

• Samu na yinki beto me lunga kuzitisa bantu ya luyalu?

• Wa’ faso beto lenda lakisa ti beto ke tumamá na bawu?

Na bantangu ya guerre, bayinsi ya nkaka ke zonzá ti ba ke ve na kati ya mambu yina, kasi ba ke sadisá bayinsi yina ke nwanaka. Yinki bakristo ya tsyeleka me lunga kusala? Tanga Yoane 17:16. Na manima, tala VIDEO mpe beto zonzila kyuvu yina ke landa.

VIDEO: Bakristo ya tsyeleka ke kotá ve na mambu ya politique—Kitini 2 (3:11)

• Yinki zola zonza kukota ve na mambu ya politique?

Yinki beto ke sala kana bamfumu ya yinsi me lomba beto na kusala mambu yina ke na kwelaná ve na luzolo ya Nzambi? Tanga Bisalu 5:28, 29. Na manima, tala VIDEO mpe beto zonzila byuvu yina ke landa.

VIDEO: Bakristo ya tsyeleka ke kotá ve na mambu ya yinza—Kitini 3 (1:18)

• Kana musiku ya luyalu ke na kwelaná ve na musiku ya Nzambi, na wapi yina beto ke tumama?

• Na wapi bamambu nge me kanisa ti mukristo me lunga ve kutumama na luyalu ya bantu?

4. Beto kukota ve na mambu ya yinza na makanisi mpe na ndyatulu ya beto

Tanga 1 Yoane 5:21. Na manima, tala VIDEO mpe beto zonzila byuvu yina ke landa.

VIDEO: Bakristo ya tsyeleka ke na nsatu ya kuvanda na bukindi samu na kukota ve na mambu ya yinza (2:49)

• Na video, samu na yinki Ayenge mangá kupesa nkembo to mbote na drapeau, kuyimba nzimbu ya yinsi ya yandi (hymne nationale), to kukota na mambu ya politique?

• Nge me kanisa ti yandi baká mukanu ya mbote?

Wapi mambu ya nkaka lenda sala ti ya vanda mpasi samu na beto na kukota ve na mambu ya politique? Tala VIDEO, mpe na manima beto zonzila byuvu yina ke landa.

VIDEO: Malongi yina beto me kuzwa na Yinzo ya Kengidi—Beto vanda ntama na mambu ya yinza ya kukabuka (5:16)

• Wa’ faso beto lenda lakisa ti beto ke kotá ve na mambu yina ke kabulá yinza, na ntangu ya bansaka ya nene yina ke vukisá babwala mingi (compétition sportive internationale)?

• Wa’ faso beto lenda lakisa ti beto ke na kotá ve na mambu ya politique, ata ntangu mambu yina bantu ya politique ke zonzá mpe ke salá lenda natina beto bambote to ve?

• Yinki lenda kumina beto kana beto ke lutisá ntangu mingi na kuwa, kutala to kutanga mambu ya politique to na bantu yina ke zonzilá mingi mambu ya politique?

NA BUNKUFI

Bakristo ke salá nyonso samu na kukota ve na mambu ya politique na makanisi, nzonzolo mpe ndyatulu ya bawu.

Mambu ya kusimba

• Wa’ faso beto ke tadilá baluyalu ya bantu?

• Samu na yinki beto me lunga kukota ve na mambu ya politique na makanisi, nzonzolo mpe ndyatulu ya beto?

• Wapi bamambu lenda sala ti ya vanda mpasi samu na beto na kukota ve na bamambu yina ke kabulá yinza?

SOSA KUZABA DYAKA

Wapi bangolo beto me lunga kusala samu na kukota ve na mambu ya politique?

Yehova ke bika ve beto ata fioti (3:14)

Yinki bantu ya dikanda lenda sala samu na kubongama na mantwala ya bamambu yina lenda nata bawu na kuvanda ve ya kukangama na kimfumu ya Nzambi?

Kukota ve na bamambu yina ke pesá lukumu na bwala (4:25)

Tala samu na yinki kunwanina yinsi ya nge ke ve mambu ya kulutila mbote yina muntu lenda sala

‘Na Nzambi mambu nyonso lenda salama’ (5:19)

Tala wa’ faso kuvanda ve “bantu ya yinza” ntangu beto ke baká mikanu na yina me tadila kisalu.

“ Chacun portera sa propre charge ” (La Tour de Garde, 15 Mars 2006)