7. Misiku ya kimfumu ya Nzambi me lutila misiku ya bantu

Baluyalu ya bantu ke tulá misiku, samu na kusadisa bantu yina ke na yisi ya bawu. Kimfumu ya Nzambi mpe me tula misiku samu na bambote ya bantu yina ya ke yala. Tanga 1 Bakorinto 6:9-11, mpe na manima beto zonzila byuvu yayi:

• Na nge, wa’ faso yinza ke kuma ntangu muntu nyonso ke landa misiku ya Nzambi?a

• Samu na nge, ya ke kwandi mbote ti Yehova pesa misiku na ba yina nyonso ke vanda na yisi ya kimfumu ya yandi? Samu na yinki?

• Yinki ke na lakisá ti bantu yina ke tumamá ve na misiku yina lenda soba?—Tala verse 11.

Samu na bantu mingi, kuzonzila mambu ya kuvukisa nzutu ke mambu ya nsoni. Kasi Biblia ke zonzilaka yawu pwelele na buzitu nyonso. Mambu yina ya ke zonzá ke samu na bambote ya beto. Ni Yehova yidiká beto. Na yawu, yandi me zaba mambu yina ke ya kulutila mbote samu na beto. Yandi ke zonzá na beto yinki beto me bonga kusala samu na kusepelisa yandi mpe yinki beto lenda sala samu na kusepela na luzingu ya ntangu nyonso na bilumbu yina ke kwiza.

1. Wapi mutindu Yehova ke talá mambu ya kuvukisa nzutu?

Kuvukisa nzutu ke dikabu yina me katuka na Yehova. Yandi zola ti bantu sepela na yawu. Kasi yandi pesaka yawu kaka na kento na bakala yina me kwelanaa. Dikabu yayi ke sadisá ve kaka bantu ya kukwela na kubuta bana, kasi mpe samu ba lakisa luzolo na mutindu ya mbote yina ke pesa bawu kilengi. Ni na yawu Biblia ke zonzá: “Tala kilengi na kento ya nge ya buntwenya.” (Bingana 5:18, 19) Yehova ke zolá ti mukristo ya kukwela vukisa nzutu kaka na kento to bakala ya yandi mpe kubwa ata fioti ve na kinsuza.—Tanga Baebre 13:4.

2. Samu na Nzambi wapi yina ke bafaso ya yimbi ya kuvukisa nzutu?

Biblia ke zonzá ti “Bantu yina ke vukisaka nzutu na faso ya yimbi . . . ke kota ve na Kimfumu ya Nzambi.” (1 Bakorinto 6:9, 10, nwt-MK) Bantu yina soniká Biblia na ndinga ya grec, sadilá mot pornéïa samu na kuzonzila bafaso ya yimbi ya kuvukisa nzutu. Ya zola zonza (1) kuvukisa nzutu bakala na kento yina me kwelana veb, (2) kuvukisa nzutu babakala na babakala to bakento na bakento, mpe (3) kuvukisa nzutu bantu na bibulu. Kana beto “losa bafaso ya yimbi nyonso yayi ya kuvukisa nzutu,” beto ke sepelisa Yehova mpe beto ke kuzwa bambote mingi.—1 Batesalonika 4:3, nwt-MK.

SOSA KUZABA MBOTE-MBOTE

3. Kima bafaso ya kuvukisa nzutu yina ke yimbi na meso ya Nzambi

Yozefi salá nyonso samu na kukima kento yina vandá sosa kuvukisa nzutu na yandi. Tanga Kubanda 39:1-12, mpe na manima beto zonzila byuvu yayi:

• Samu na yinki Yozefi kimaka?—Tala verse 9.

• Nge me kanisa ti Yozefi baká mukanu ya mbote? Samu na yinki?

VIDEO: Kima bafaso ya yimbi ya kuvukisa nzutu (5:06)

Yehova zola ti beto kima to beto bika bafaso nyonso ya yimbi ya kuvukisa nzutu. Tanga 1 Bakorinto 6:18, mpe na manima beto zonzila byuvu yayi:

• Wapi bamambu lenda sala ti beto kubwa na bafaso ya yimbi ya kuvukisa nzutu?

• Wa’ faso nge lenda kima bafaso ya yimbi ya kuvukisa nzutu?

4. Manga mambu yina lendá nata nge na kusadila bafaso ya yimbi ya kuvukisa nzutu

VIDEO: Tanga Biblia ntangu nyonso samu na kubwa ve na mutambu (3:02)

• Ntangu mpangi ya bakala yina beto me tala na video kwizá zaba ti, makanisi mpe ndyatulu ya yandi zola nata yandi na kusala kinsuza to na kuvanda dyaka ve ya kukangama na kento ya yandi, yinki yandi salaka?

Bakristo ya kukwikama ke vandá mpe na nsatu ya kusala bangolo samu na kuvanda na makanisi ya mbote. Yinki nge lenda sala samu na kukatula makanisi ya yimbi na yintu ya nge? Tanga Bafilipi 4:8, mpe na manima beto zonzila byuvu yayi:

• Na wapi mambu ya mbote beto me bonga kukanisa?

• Wa’ faso kutanga Biblia mpe kukipesa na kisalu ya Yehova, ke sadisa beto na kukatula makanisi yina lenda nata beto na kusala disumu?

5. Malongi ya Yehova ke natina beto bambote mingi

VIDEO: Beto kukondwa ve mayela (9:31)

• Yinki ntwenya ya bakala yayi salá yina bwisaka yandi na mutambu?—Tala Bingana 7:8, 9.

• Faso Bingana 7:23, 26 me lakisa yawu, kuvukisa nzutu na faso ya yimbi lenda natina muntu bampasi mingi. Kana nge sala bangolo samu na kuvanda na ndyatulu ya kuvedila, wapi bamambu ke kumina ve nge?

• Wa’ faso ndyatulu mpe makanisi ya kuvedila, lenda sadisa beto na kuzwa luzingu ya ntangu nyonso na bilumbu yina ke kwiza?

Samu na bantu ya nkaka, mambu yina Biblia ke zonzá na yina me tadila kuvukisa nzutu babakala na babakala to bakento na bakento, ke lakisá ti Nzambi zola ve bantu. Kasi Yehova Nzambi ya luzolo, me zola ti bantu sepela na luzingu ya ntangu nyonso. Na yawu, samu na kuzwa luzingu yango, beto fwana kutadila bamambu faso Yehova ke tadilaka yawu mpe kusadila misiku ya yandi ntangu nyonso na luzingu ya beto. Tanga 1 Bakorinto 6:9-11, mpe na manima beto zonzila kyuvu yayi:

• Katula kuvukisa nzutu babakala na babakala to bakento na bakento, ya ke na mambu ya nkaka yina Yehova ke niminá beto na kusala?

Samu na kusepelisa Nzambi, beto nyonso zola soba ndyatulu ya beto. Kusala yawu ke kwandi na bambote? Tanga Nkunga 19:8, 11, mpe na manima beto zonzila kyuvu yayi:

• Nge me kanisa ti beto lenda zitisa malongi ya Yehova to ya ke mpasi na kuzitisa yawu?

NA BUNKUFI

Kuvukisa nzutu ke dikabu yina me katuka na Yehova, kasi yandi pesaka yawu kaka na kento na bakala yina ke ya kukwelana.

Mambu ya kusimba

• Wapi yina ke bafaso ya yimbi ya kuvukisa nzutu?

• Yinki beto me fwana kusala samu na kubwa ve na bafaso ya yimbi ya kuvukisa nzutu?

• Wapi bambote beto ke kuzwa kana beto tadila bamambu mutindu Yehova ke tadilaka yawu, mpe kuzitisa malongi ya yandi na yina me tadila kuvukisa nzutu?

SOSA KUZABA DYAKA

Tala samu na yinki Nzambi me zola ti bakala na kento yina ke na nsatu ya kuvanda yinzo mosi, zolá vanda ya kukwelana.

“Yinki Biblia ke zonzá na yina me tadila kento na bakala yina ke vandá yinzo mosi, kasi ba me kwelana ve?” (Tanga yawu na jw.org)

Samu na Biblia kuvukisa nzutu babakala na babakala to bakento na bakento kele yimbi. Tala samu na yinki ya zola zonza ve ti beto me bonga kuyina ba yina ke salaka yawu.

“Kuvukisa nzutu babakala na babakala to bakento na bakento kele kwandi yimbi?” (Tanga yawu na jw.org)

Tala faso malongi ya Nzambi na yina me tadila bafaso nyonso ya kuvukisa nzutu ke bumbá beto.

“Kutula kinama ya kuvukisa nzutu na yinwa, kele kwandi mutindu ya kuvukisa nzutu?” (Tanga yawu na jw.org)

Na disolo “ Ils ont respecté ma dignité, ” tala yinki natá bakala mosi yina vanda vukisá nzutu na babakala, na kubika nsalulu yina samu yandi sepelisa Nzambi.

“ La Bible transforme des vies ” (La Tour de Garde, 1^er Avril 2011)

Ata ti nge ke zolá mingi Yehova mpe ke salá bangolo samu na kusala ve mambu yina ke sala yandi mpasi, ntangu ya nkaka nge lenda sala disumu. Kasi ya ke na masumu yina me lutila nene na ya nkaka. (1 Bakorinto 6:9, 10) Kana ya me kumina nge na kusala disumu ya nene, zaba ti Yehova me bika ve kuzola nge. Yandi ke na nsatu ya kulemvokila nge mpe kusadisa nge.

1. Yinki beto me fwana kusala samu Yehova lemvokila beto?

Ba yina ke zolá Yehova ke vandá na manyongi mingi kana ya me kumina bawu na kusala disumu ya nene. Kasi ba ke kuzwá kizunu na mambu yina Yehova zonzá na dikanda ya yandi: “Ata masumu ya beno kele mbwaki mutindu menga, ya ke kuma mpembe mutindu mvula ya mpembe [neige].” (Izaya 1:18) Kana beto balula ntima, Yehova ke lemvokila beto. Kasi yinki zola zonza kubalula ntima? Ya zola zonza kunyonga na ntima nyonso mambu yina beto salá, kuvutukila dyaka ve yimbi yina, mpe kubondila Yehova samu yandi lemvokila beto. Na manima, beto ke sala bangolo samu na kusoba makanisi mpe ndyatulu ya yimbi yina me nata beto na kusumuka. Beto ke sala mpe nyonso samu na kulanda malongi ya Yehova na luzingu ya beto.—Tanga Izaya 55:6, 7.

2. Wapi mutindu Yehova ke sadilá bakuluntu samu na kusadisa beto kana beto me sala disumu?

Kana beto me sala disumu ya nene, Yehova me lomba na beto na “kubokila bakuluntu ya dibuundu.” (Tanga Zaki 5:14, 15.) Bakuluntu yayi ke zolá mingi Yehova mpe ke zolá ba yina ke sadilaka yandi. Ba zaba mutindu ya kusadisa beto na kuvutula kindiku ya mbote na Yehova.—Bagalate 6:1.

Wapi mutindu bakuluntu ke sadisá beto kana beto me sala disumu ya nene? Bakuluntu zole to tatu ke sadila malongi ya Biblia, samu na kulakisa beto na yinki mambu yina beto me sala ke yimbi. Ba ke pesa mpe beto malongi yina ke sadisa beto na kuvutukila dyaka ve disumu yina beto salaka. Kana muntu me sala disumu ya nene mpe me balula ve ntima, bakuluntu ke katula yandi na kimvuka samu yandi nata ve bampangi ya nkaka na kusala mambu ya yimbi mutindu yandi.

SOSA KUZABA MBOTE-MBOTE

3. Kuzonza pwelele masumu ke sadisa beto na kuvutula kindiku ya mbote na Yehova

Masumu nyonso yina beto ke salá, ke lwalisá ntima ya Yehova, na yawu beto me fwana kuzonzila yandi yawu nyonso. Tanga Nkunga 32:1-5, mpe na manima beto zonzila kyuvu yayi:

• Samu na yinki ya ke mbote samu na beto na kuzonza masumu ya beto nyonso na Yehova?

VIDEO: “Yehova ke sembá muntu yina yandi ke zolaka” (3:01)

• Na video, wapi mutindu bakuluntu sadisá Canon na kuvutuka na Yehova?

Beto fwana kuzonza pwelele mpe kubumba ata mambu na bakuluntu, samu ba sadisa beto na mutindu ya mbote. Tanga Zaki 5:16, mpe na manima beto zonzila kyuvu yayi:

• Wapi mutindu kuzonza matsyeleka na bakuluntu ke salá ti ya vanda ve mpasi na bawu na kusadisa beto?

4. Yehova ke lakisaka ntima ya kyadi na basumuki

Kana muntu me sala disumu ya nene mpe me manga kulanda malongi ya Yehova, ba ke katula yandi na kati ya kimvuka, mpe beto ke lutisa dyaka ve ntangu na yandi. Tanga 1 Bakorinto 5:6, 11 mpe na manima beto zonzila kyuvu yayi:

• Mutindu levure ke vimbisá pâte ya dimpa, samu na yinki kulutisa ntangu na muntu yina me sumuka mpe me manga kubalula ntima lenda bebisa kimvuka?

Wapi mutindu faso ya Yehova ya kubakila muntu yina me sala disumu ke lakisaka ti yandi ke salaka bamambu ya kulunga, ke na ntima ya kyadi mpe luzolo?

5. Yehova ke lemvokilá beto ntangu beto ke balulá ntima

Yesu sadilá kifwani mosi yina ke sadisá beto na kuzaba yinki ya ke salaka Yehova ntangu muntu ke balulá ntima. Tanga Luke 15:1-7, mpe na manima beto zonzila kyuvu ayi:

• Yinki disolo yayi ke na longá nge na yina me tadila Yehova?

Tanga Ezekiele 33:11, mpe na manima beto zonzila kyuvu yayi:

• Wapi mambu ya mfunu muntu fwana kusala samu na kulakisa ti yandi me balula ntima?

NA BUNKUFI

Kana beto me sala disumu ya nene mpe beto me nyonga na ntima nyonso mambu yina beto me sala, mpe me sala bangolo na kuvutukila dyaka ve yawu, Yehova ke lemvokila beto.

Mambu ya kusimba

• Samu na yinki ya ke mbote samu na beto na kuzonzila masumu ya beto nyonso na Yehova?

• Yinki beto fwana kusala samu Yehova lemvokila masumu ya beto?

• Kana beto me sala disumu ya nene, samu na yinki beto me fwana kuzonza na bakuluntu?

SOSA KUZABA DYAKA

Tala wa’ faso Yehova lakisá bakala mosi ntima ya mawa mutindu Izaya 1:18 ke zonzilaka yawu.

Kusala ata fioti ve ntembe na ntima ya mawa ya Yehova (5:02)

Yinki bakuluntu ke sosaka kusala samu na kusadisa muntu yina me sala disumu ya nene?

“Wa’ faso bakuluntu ke lakisaka luzolo mpe ntima ya kyadi na ba yina me sala disumu ya ngolo?” (Yinzo ya Kengidi ya Août 2024)

Longoka faso ba ke lakisaka luzolo mpe ntima ya kyadi na ba yina me sala disumu kasi me balula ve ntima.

“Mutindu bakuluntu lenda sadisa ba yina ba katulaka na kati ya kimvuka” (Yinzo ya kengidi ya Août 2024)

Na disolo “ Il fallait que je revienne vers Jéhovah, ” tala samu na yinki bakala mosi yina kwendá ntama na matsyeleka kwizá tala ti Yehova bendá dyaka yandi na sika ya yandi.

“ La Bible transforme des vies ” (La Tour de Garde, 1^er Avril 2012)