Mukanda samu na kuzaba mingi mambu yina ba me zonzila na Mukanda ya lukutakanu luzingu mpe kisalu
© 2024 Watch Tower Bible and Tract Society of Pennsylvania
4-10 NOVEMBRE
BIMVWAMA YA BIBLIA NKUNGA 105
‘Yandi ke bambukaka na luwawanu ya yandi ntangu nyonso’
Wa’ faso beto lenda kumisa ngolo kiminu ya beto na nsilulu ya Yehova ya yinza malu-malu?
11 Kanisa na mwa bansilulu yina Yehova pesá na bantu ya nkaka na ntama. Na meso ya bantu ya vandá talana ti ya ke lungana ve. Na kifwani, ata ti Abrahami na Sara vandá ya kununa, yandi zonzá na bawu ti ba ke buta mwana. Yandi zonzá na Abrahami ti yandi ke pesa mitekolo ya yandi bwala ya kanana. (Kub. 17:15-17) Na kati ya bamvula mingi yina mitekolo ya Abrahami lutisá na Ezipte mutindu bangamba, ntangu ya nkaka ba vandá kanisa ti nsilulu yayi ke lungana ve. Kasi ya lunganaka. Na manima ya bamvula mingi, Yehova zonzá na Elizabeti yina vandá ya kununa ti yandi ke buta mwana. Yandi zonzá mpe na Maria, yina zabá ve babakala, ti yandi ke buta mwana ya yandi. Mambu yayi zolá lungisa nsilulu yina Yehova pesá bamvula mingi na manima, na bilanga ya Edeni!—Kub. 3:15.
12 Ntangu beto ke kanisá na bansilulu nyonso yina Yehova salá mpe lungisá, beto ke kwizá zaba ti Yehova ke na ngolo mingi. Ya ke salá ti kiminu ya beto na nsilulu ya yinza ya malu-malu kuma dyaka ngolo. (Tanga Yosua 23:14; Izaya 55:10, 11.) Na yawu beto ke vandá ya kubongama samu na kusadisa bantu ya nkaka na kutula ntima na nsilulu ya yinza ya malu-malu. Na yina me tadila zulu ya malu-malu mpe ntoto ya malu-malu, Yehova yandi mosi me zonza: “Mambu ya munu ke ya tsyeleka mpe ya kudedama.”—Luz. 21:1, 5.
it-2-F 493
Dyambu ya Nzambi
Bima yina Nzambi yidikaka, ya vanda yina ke ninganaka to ve kele ya kutumama na dyambu ya yandi, mpe yandi lenda sadila yawu samu na kulungisa makanisi ya yandi. (Nku 103:20; 148:8) Dyambu ya yandi ke vunaka ve; ntangu Yehova ke pesaka nsilulu, yandi ke bambukaka na yawu mpe yandi ke lungisaka yawu. (Kul 9:5; Nku 105:42-45) Mutindu yandi mosi zonzaka yawu, dyambu ya yandi ke ‘zingaka ntangu nyonso;’ ya ke vutuka ve na yandi kana ya me lungana ve.—Iza 40:8; 55:10, 11; 1Pi 1:25.
Matadi ya ntalu ya kimpeve
w86-F 1/11 19 §15
Bantwenya—Yina beno lenda sala samu dikanda vanda na nsayi mpe na bumosi
15 ‘Ba kangaka makulu ya Yozefi na basinga, ba tulaka laka ya yandi na bisengo; tii ntangu dyambu ya yandi lunganaka, mambu yina Yehova zonzaka kumisaka yandi bunkete.’ (Nkunga 105:17-19) Yozefi vandaka ngaamba mpe na boloko bamvula 13, tii ntangu nsilulu ya Yehova kwizaka lungana. Mpasi yayi kumisaka yandi bunkete. Ata ti bampasi ya Yozefi vanda katuka ve na Yehova, kasi Yehova vandaka na mambu ya mfunu yina salaka ti yandi bika yawu. Na mantwala ya bampasi nyonso yayi, Yozefi zola lenda kwandi kubumba kundima ya yandi na ‘mambu yina Yehova zonzaka’? Yandi zola lenda kwandi kukulisa bifu ya yandi ya mbote muntindu: ntima ya yinda, kukuluka, kimpeve ya ngolo mpe tiya yina zola sadisa yandi na kulungisa kisalu ya mpasi yayi? Beto lenda zonza ti Yozefi basikaka na mpasi yayi, mutindu wolo ke basikaka na tiya ya muntu yina ke kumisaka yawu bunkete. Na meso ya Yehova, yandi kumaka dyaka muntu ya kulutila bunkete mpe ntalu. Ni yina salaka ti Yehova pesa dyaka bisalu mingi na Yozefi.—Kubanda 41:14, 38-41, 46; 42:6, 9.
11-17 NOVEMBRE
BIMVWAMA YA BIBLIA NKUNGA 106
‘Ba zimbanaka Nzambi, Muvuukisi ya bawu’
w18.07-F 20 §13
‘Nani ke na lweka ya Yehova?’
13 Bantu ya Izraele kumaka na boma mingi na ntangu ba vanda tala mutindu Nzambi vanda lakisa ngolo ya yandi. Na yawu, ba lombaka na Moyize na kusolola na Nzambi samu na bawu. Yandi ndimaka kusolola na Yehova na Mongo ya Sinayi samu na bawu. (Bas. 20:18-21) Kasi, ntangu vanda luta mpe Moyize vanda vutuka ve. Samu muntu yina vanda twadisa bawu vandaka dyaka ve, bantu ya Izraele vanda kanisa kwandi ti ba me kangama na kati ya ntoto ya kuyuma? Ya vanda talana ti ba vanda tula kaka kiminu na ntangu ba vanda talaka Moyize. Ba kumaka na boma mpe zonzaka na Aroni: ‘Sadila beto nzambi yina ke tambula na mantwala ya beto, samu beto me zaba ve yinki me kumina Moyize yayi, muntu yina basisaka beto na yinsi ya Ezipte.’—Bas. 32:1, 2.
Matadi ya ntalu ya kimpeve
w06-F 15/7 13 §9
Bamambu ya mfunu yina ke na buku ya tatu mpe ya yiya ya Bankunga
106:36, 37. Baverse yayi ke na vukisaka nsambudulu ya biteki mpe kupesa minkayulu na bampeve ya yimbi. Ya zola zonza ti muntu yina ke sambilaka biteki lenda vanda na yisi ya lutumu ya bampeve ya yimbi. Biblia ke na kebisaka beto mutindu yayi: “Beno sala keba na banzambi ya biteki.”—1 Yoane 5:21.
18-24 NOVEMBRE
BIMVWAMA YA BIBLIA BANKUNGA 107-108
‘Beno vutula Yehova matondo, samu yandi ke mbote’
w07-F 15/4 20 §2
Bika kimvuka pesa Yehova lukumu
2 Kimvuka ya Yehova ke ve mutindu mosi na bimvuka ya bantu. Ya ke ve kimvuka yina ke vukisaka kaka bantu yina ke vandaka kisika mosi to bantu yina me katuka bwala mosi mpe yina ke na bansaka mosi. Kasi mambu ya ntete ya kimvuka ya Yehova, ni kupesa Yehova lukumu. Buku ya Bankunga ke lakisaka ti ni yawu vanda salama mpe na ntama. Na Nkunga 35:18, beto ke tangaka: ‘Munu ke vutula nge matondo na kati ya kimvuka ya nene. Na kati ya bantu mingi, munu ke sakumuna nge.’ Mutindu mosi, na Nkunga 107:31, 32, Biblia ke zonzaka: ‘Bika bantu pesa Yehova matondo samu na luzolo ya yandi ya kukwikama mpe samu na mambu ya yandi ya kuyituka yina yandi ke salaka samu na bana ya bantu. Bika ba kumisa yandi na kati ya kimvuka ya bantu.’
w15-F 15/1 9 §4
Vutula matondo na Yehova mpe kuzwa lusakumunu
4 Kana beto zola kuvanda na kifu ya kuvutulaka Yehova matondo, beto me bonga kusala bangolo, kubaka ntangu ya kukanisa na nyonso yina Yehova ke salaka samu na beto mpe na luzolo ya yandi ya kukwikama. Ntangu mosi ya ba yina sonikaka buku ya Bankunga kwizaka sala yawu, ya pamusaka yandi na kutala bima nyonso yina Yehova yidikaka.—Tanga Nkunga 40:5; 107:43.
Matadi ya ntalu ya kimpeve
it-2-F 303
Moabi
Na manima, ntangu Davidi kumaka mfumu, bwala ya Izraele na ya Moabi kotaka na mvita. Samu ti bantu ya Moabi kumaka na boma, ba futaka mpaku na Davidi. Ya lenda vanda ti na nsuka ya mvita yina, bantu mingi ya Moabi kufwaka. Davidi lalisaka bawu na ntoto mpe talaka yinda ya mulonga ya bawu na singa samu na kutala bikunku zole ya ba yina yandi ke kufwa mpe kikunku mosi ya ba yina yandi ke bika na luzingu. (2Sa 8:2, 11, 12; 1Ns 18:2, 11) Ya lenda vanda ti ni na mvita yina, Benaya mwana ya Yehoyada ‘kufwaka bana zole ya Ariele ya Moabi.’ (2Sa 23:20; 1Ns 11:22) Samu ti Davidi kwizaka nunga bwala ya Moabi, ya lungisaka nsilulu yina Balaami salaka bamvula 400 na manima: ‘Mbwetete ke basika na Yakobi, mpe yandi ke mwangisa mbunzu ya Moabi ti na mikwa ya yintu ya bana nyonso yina ke nwanaka.’ (Kut 24:17) Mosi ya ba yina sonikaka buku ya Bankunga vanda zonzila mvita yayi na ntangu yandi sonikaka ti Nzambi vanda tadila Moabi mutindu ‘ndonga ya yandi ya kuyobidila.’—Nku 60:8; 108:9.
25 NOVEMBRE–1er DÉCEMBRE
BIMVWAMA YA BIBLIA BANKUNGA 109-112
Beno vanda na manima ya Mfumu Yesu!
w06-F 1/9 13 §6
Bamambu ya mfunu yina ke na buku ya tanu ya Bankunga
110:1, 2—Yinki Yesu Kristo yina Davidi bokilaka awa ‘Mfumu ya munu’ vanda sala ntangu yandi vandaka na diboko ya kibakala ya Nzambi? Na manima ya kuvumbuka ya yandi na lufwa, Yesu kwendaka na zulu mpe vingilaka na diboko ya Nzambi ya kibakala tii na mvula 1914, mvula yina yandi bandaka kuyala. Ntangu yina Yesu vanda vingila, yandi vanda twadisa bilandi ya yandi yina ba tulaka mafuta, yandi vanda twadisa bawu na kisalu ya kusamuna mpe ya kukumisa bantu bilandi, mpe yandi vanda bongisa bawu samu ba yala na yandi na Kimfumu ya yandi.—Matayi 24:14; 28:18-20; Luke 22:28-30.
w00-F 1/4 18 §3
Bantu yina ke nwanisaka Nzambi ke nunga ata fioti ve!
3 Bantu bandaka kukwamisa bisadi ya Yehova na kubanda ya 20 siècle . Na babwala mingi, bantu ya ntima yimbi sosaka na kusukisa kisalu ya kusamuna nsangu ya mbote ya Kimfumu ya Nzambi. Muntu yina ke sepelaka na mambu yayi, ni mbeni ya beto ya ntete Dyabulu yina “kele mutindu nkosi yina ke na nsatu mpe ke na kutambulaka bisika nyonso samu na kusosa ntangu nyonso muntu yina yandi ke kudya.” (1 Piere 5:8) Na manima “ya ntangu ya makanda” yina manisaka na mvula 1914, Nzambi tulaka Mwana ya yandi mutindu Mfumu ya ntoto nyonso, mpe zonzaka na yandi: ‘Kwenda kuyala na kati ya bambeni na nge mpe bedisa bawu.’ (Luke 21:24; Nkunga 110:2) Ni na yawu, Yesu bingisaka Satana na zulu mpe yandi losaka yandi pene-pene na ntoto. Samu ti Dyabulu me zaba ti ntangu ya yandi me bikana kaka fioti, yandi ke na losaka nkele ya yandi na zulu ya Bakristo yina ba tulaka mafuta. (Luzabusu 12:9, 17) Bankwamusu mingi yayi ya bambeni ya Nzambi, nataka yinki?
be-F 76 §2
Sala bangolo samu na kukwenda na mantwala
Dilongi ya kusadila dikabu ya nge zola zonza mpe kusala bangolo. Nge ke salaka kwandi bangolo samu na kusamuna na bampangi ya nkaka? Nge ke sosaka kwandi bafaso ya kusadisa bantu ya kimvuka ya nge yina me zaba ve ntete mingi na kisalu ya Yehova, bantwenya, to ba yina ke na binama ya nzutu yina ke ya kubeela? Nge ke pesaka kwandi diboko samu na kusukula Yinzo ya Kimfumu to samu na kusadisa na balukutakanu ya nene? Nge ke vandaka kwandi mupasuli-nzila ya ntangu fioti bambala mingi na mvula? Nge lenda sala kwandi bangolo samu na kukuma mupasuli-nzila ya ntangu nyonso to kukwenda kisika yina ba ke na nsatu ya bantu? Kana nge ke mpangi ya bakala, nge lenda bongisa bamambu samu na kukuma kisadisi to kuluntu? Kana nge ke zolaka kupesa diboko to kulungisa biyeko ya nge, nge ke na lakisaka ti nge ke na kwendaka na mantwala.—Nku. 110:3.
Matadi ya ntalu ya kimpeve
it-1-F 80
Luwawanu
Luwawanu samu na kukuma nganga-nzambi mutindu Melkisedeki. Bankunga 110:4 ke zonzilaka na luwawanu yayi, mpe muntu yina sonikaka buku ya Baebre sadilaka mpe yawu samu na kuzonzila Yesu na Baebre 7:1-3, 15-17. Kaka ni na Yesu Kristo Yehova salaka luwawanu yayi. Yesu zonzilaka yawu ntangu yandi salaka luwawanu samu na Kimfumu na bilandi ya yandi. (Lk 22:29) Mutindu Yehova zonzilaka yawu, Yesu Kristo Mwana ya Nzambi ke vanda nganga-nzambi mutindu Melkisedeki. Melkisedeki vandaka mfumu mpe nganga-nzambi na zulu ya ntoto. Kasi, Yesu ke vanda ve Mfumu mpe nganga-nzambi ya nene na ntoto, kasi na zulu. Na ntangu yandi kwendaka na zulu, yandi kumaka mfumu mpe nganga-nzambi samu na ntangu nyonso. (Ebr 6:20; 7:26, 28; 8:1) Luwawanu yayi ke ya bantangu nyonso, samu Yehova ke twadisa Yesu samu yandi yala mutindu Mfumu mpe nganga-nzambi ya nene.—Ebr 7:3.
2-8 DÉCEMBRE
BIMVWAMA YA BIBLIA BANKUNGA 113-118
Yinki beto lenda vutula na Yehova?
w01-F 1/1 11 §13
Beno tungama na luzolo
13 Mambu yina Yesu me zonza, ke na lakisaka pwelele ti ni Yehova beto me bonga kuzola ntete. Kasi beto ke butukaka ve na luzolo samu na Yehova. Ya ke kima yina beto me lunga kukulisa. Ni bamambu yina beto kuwaka mbala ya ntete na yina me tadila Yehova, muntu bendaka beto na yandi. Malembe-malembe, beto longokaka mutindu yandi yidikaka ntoto samu na bantu. (Kubanda 2:5-23) Beto longokaka mpe mutindu yandi bakilaka bantu na ntangu disumu kotaka na yinza. Yandi losaka ve bawu, kasi yandi yidikaka bamanbu samu na kuvuukisa bawu. (Kubanda 3:1-5, 15) Yandi salaka mambu ya mbote na bantu yina vandaka ya kukwikama na yandi, mpe na manima, yandi pesaka Mwana ya yandi kaka mosi samu na kukatula beto na disumu (Yoane 3:16, 36) Ntangu beto vanda longoka mambu mingi na yina me tadila yandi, nsatu ya beto ya kuvutula matondo vanda kula. (Izaya 25:1) Mfumu Davidi zonzaka ti faso ya Yehova ya kubakila bantu na luzolo nyonso, vanda sala ti yandi zola yandi. (Nkunga 116:1-9) Bubu yayi mpe, Yehova ke bakilaka beto na luzolo, yandi ke twadisaka beto, yandi ke pesaka beto ngolo, mpe yandi ke kindisaka beto. Kana beto longoka mingi na yina me tadila Yehova, luzolo ya beto samu na yandi ke kula.—Nkunga 31:23; Sofoni 3:17; Baroma 8:28.
w09-F 15/7 29 §4-5
Vutula matondo na yina nge ke na kuzwaka mpe pesa na ntima nyonso
Mosi ya ba yina sonikaka buku ya Bankunga yufulaka: ‘Yinki mu ke pesa Yehova samu na mambu nyonso ya mbote yina yandi sadilaka munu?’ (Nku. 116:12) Na wapi bambote Davidi vandaka zonzila? Yehova sadisaka yandi na ntangu ya ‘mpasi mpe mawa.’ Dyaka, Yehova ‘vuukisaka yandi na lufwa.’ Na yawu yandi vandaka na nsatu ya “kupesa” Yehova kima, kasi yinki? Yandi zonzaka: ‘Mu ke lungisa bansilulu ya munu na Yehova.’ (Nku. 116:3, 4, 8, 10-14) Yandi bakaka mukanu ya kulungisa bansilulu yina yandi salaka na Yehova mpe na kulungisa biyeko ya yandi nyonso.
Nge mpe lenda sala mutindu mosi. Yinki nge lenda sala? Sadila misiku ya Yehova na luzingu ya nge nyonso. Sala nyonso samu kisalu ya Yehova vanda kima yina me lutila mfunu na luzingu ya nge mpe bika ti mpeve ya santu twadisa bamambu nyonso yina nge ke salaka. (Lon. 12:13; Gal. 5:16-18) Ya tsyeleka, ya ke ve na kima yina nge lenda vutula na Yehova samu na mambu nyonso yina yandi salaka samu na nge. Ata faso yina, nge ke ‘pesaka ntima ya Yehova kilengi’ ntangu yandi ke talaka mutindu nge ke salaka na ntima nyonso kisalu ya yandi. (Bin. 27:11) Kupesa Yehova kilengi na mutindu yayi, ke bweso ya nene!
w19.11-F 22-23 §9-11
Bileso yina beto lenda benda na buku ya Balevi
9 Kileso ya zole: Beto ke sadilaka Yehova samu na kuvutula yandi matondo. Samu na kuzonzila yawu mbote-mbote, beto zonzila na minkayulu ya kizunu yina vandaka kitini ya nkaka ya mfunu ya lusambu ya tsyeleka na Izraele ya ntama. Buku ya Balevi ke sadisaka beto na kuzaba ti, bantu ya Izraele vanda pesaka munkayulu ya kizunu samu na ‘kuvutula matondo.’ (Lev. 7:11-13, 16-18) Ba vanda pesaka ve minkayulu yayi samu ba lombaka bawu na kupesa yawu, kasi samu ba vandaka na nsatu ya kusala yawu. Ya vandaka dikabu ya luzolo yina ba vanda pesaka samu ba vanda zolaka Yehova Nzambi ya bawu. Muntu yina vanda pesa munkayulu yango ya kizunu, vanda kudya na dikanda ya yandi mpe na banganga-nzambi musuni ya kibulu yina ba pesaka munkayulu. Kasi ya vandaka na bitini ya nkaka ya kibulu yina ba vandi pesa kaka na Yehova. Ya vandaka yinki?
10 Kileso ya tatu: Samu beto zola Yehova, beto ke pesaka yandi bima ya beto ya kulutila ntalu. Samu na Yehova, kitini ya kulutila mbote na kibulu vandaka mafuta. Yandi lakisaka mpe ti bima ya kati (rognons), vandaka mpe ntalu samu na yandi. (Tanga Balevi 3:6, 12, 14-16.) Na yawu, ya vanda pesa Yehova kilengi kana muntu ya Izraele me pesa yandi na luzolo ya yandi mosi bitini yayi ya mfunu ya kibulu. Na ntangu ba vanda salaka yawu, ba vanda lakisaka ti ba vandaka na nsatu ya kupesa na Yehova, bima ya bawu ya kulutila mfunu. Faso mosi mpe na luzolo nyonso, Yesu pesaka na Yehova bima ya yandi ya kulutila mfunu na faso ya yandi ya kusadila Yehova na luzolo mpe na ntima ya yandi nyonso. (Yoa. 14:31) Yesu vandaka na kilengi ya kulakisa luzolo ya yandi samu na Nzambi, samu yandi vanda sepelaka na misiku ya yandi. (Nku. 40:8) Yehova sepelaka mingi na kutala mutindu Yesu sadilaka yandi na luzolo nyonso.
11 Mutindu minkayulu ya kizunu, kisalu yina beto ke salaka samu na Yehova na ntima mosi, ke lakisaka faso beto ke tadilaka yandi. Beto ke pesaka na Yehova bima ya beto ya kulutila ntalu samu beto ke zolaka yandi na ntima ya beto nyonso. Ya ke sepelisaka Yehova na kutala mutindu ba millions ya bantu ke sadilaka yandi samu ba ke zolaka yandi mpe misiku ya yandi! Ya ke salaka beto kilengi na kuzaba ti Yehova ke talaka ve kaka yina beto ke salaka kasi mpe yina ke nataka beto na kusala yawu mpe ti samu na yandi ya ke mfunu mingi. Na kifwani, kana nge ke ya kununa mpe nge na lendaka dyaka ve na kusala mingi faso na ntama, zaba ti Yehova me zaba bandilu ya nge. Nge mosi, nge na talaka ti yina nge ke na salaka ke kaka fioti, kasi Yehova ke na talaka luzolo ya nge mpe yina ke na nataka nge na kusala yina nge ke na lendaka na kusala. Yandi ke na sepelaka mingi na yina nge ke na pesaka yandi.
Matadi ya ntalu ya kimpeve
w12-F 15/5 22 §1-2
Byuvu ya ba yina ke tangaka mikanda ya beto
Mosi ya ba yina sonikaka buku ya Bankunga yimbaka: ‘Na meso ya Yehova lufwa ya bantu ya yandi ya kukwikama kele na mfunu.’ (Nku. 116:15) Samu na Yehova, luzingu ya mosi na mosi ya bisadi ya yandi kele mfunu. Kasi, verse yayi ke na zonzilaka ve na muntu kaka mosi.
Na yawu, ntangu ba ke salaka discours samu na mpangi yina me kufwa, ya me lunga ve na kusadila Nkunga 116:15 samu na kuzonzila mpangi yina me kufwa ata ti yandi me kufwa na kukwikama nyonso. Samu na yinki? Samu ti muntu yina sonikaka yawu vanda zonzila mambu ya nkaka. Yandi vandi sosa kuzonza ti Yehova ke sepelaka ata fioti ve na lufwa ya kikunku ya bisadi ya yandi nyonso ya kukwikama. Ni na yawu yandi lenda bika ve ti bisadi ya yandi nyonso kufwa.—Tala Nkunga 72:14; 116:8.
9-15 DÉCEMBRE
BIMVWAMA YA BIBLIA NKUNGA 119:1-56
‘Wapi mutindu ntwenya ya bakala lenda sala ti nzila yina yandi ke kulanda kuvanda bunkete?’
w87-F 1/11 18 §10
Beno ke vandaka kwandi na bunkete na bamambu nyonso?
10 Na Baefeze 5:5 Polo kebisaka beto: “Samu beno zaba mambu yayi mpe beno zaba ti ata muntu mosi ve yina ke salaka kinsuza, yina ke salaka mambu ya mvindu to muntu ya lukoso, yina zola zonza muntu yina ke sambilaka biteki, ke ve na dikabu na kati ya Kimfumu ya Kristo mpe ya Nzambi.” Ata faso yina bamvula nyonso, Bakristo mingi, ke na kuzwaka masembo to ba ke na basisaka bawu na kimvuka samu ti ba me sala kinsuza, ‘ba me talisa nzutu ya bawu mosi mpasi.’ (1 Bakorinto 6:18) Ya kuminaka mingi na kati ya bawu samu ti ba ‘salaka ve keba, mpe ba salaka ve bamambu na kuwaka ndinga ya Nzambi.’ (Nkunga 119:9) Na kifwani, mingi na bawu vanda sala dyaka ve keba ntangu ba vandaka kwenda na ba vacances. Ba bikaka balukutakanu, mpe salaka kindiku ya ngolo na bantu yina ke sadilaka ve Yehova. Na meso ya bawu bantu yina vanda talana mutindu ‘bantu ya mbote,’ na yawu ba bandaka kulutisa ntangu mingi na bawu. Na ba ya nkaka ya ke samu ti ba vanda lutisa bantangu mingi na bampangi ya bawu ya kisalu yina ke sadilaka ve Yehova. Na kifwani, kuluntu mosi yina kwizaka sala kindiku na mpangi ya yandi ya kento ya kisalu yina vanda sadila ve Yehova, mangaka dikanda ya yandi samu na kuvanda na kento yina, mpe na manima ba kwizaka basisa yandi na kimvuka. Ya ke na talanaka pwelele ti, mambu yayi Biblia ke zonzaka ke ya tsyeleka, “Bandiku ya yimbi ke bebisaka bifu ya mbote.”—1 Bakorinto 15:33.
w06-F 15/6 25 §1
‘Munu ke zolaka bangibusa ya nge mingi’
YEHOVA ke bambulaka ntangu nyonso bisadi ya yandi samu na kusadisa bawu na kunwana na bampasi yina ba ke na kutanaka na yawu bubu yayi. Bantangu ya nkaka, Yehova ke bambulaka beto na ntangu beto ke tangaka Biblia beto mosi mpe na ntangu yina beto ke kuwaka ba discours to bamvutu yina bampangi ke pesaka na balukutakanu ya beto. Mingi ya bamambu yina beto ke kuwaka mpe ke tangaka, ke vandaka ve mambu ya malu-malu samu na beto. Ntangu ya nkaka beto zaba kwandi yawu, kasi samu ti beto ke zimbanaka, beto ke vandaka na nsatu ba bambula beto na yina me tadila dikanisi ya Yehova, mpe misiku ya yandi. Beto me bonga kusepela na ntangu Yehova ke bambulaka beto. Ya ke vumbulaka beto na kusadisaka beto na kuzimbana ve samu na yinki beto ndimaka na kuvanda na luzingu yina ke sepelisaka Nzambi. Ni na yina, mosi ya ba yina sonikaka buku ya Bankunga yimbaka: ‘Munu ke zolaka bangibusa ya nge mingi.’—Nkunga 119:24.
w10-F 15/4 20 §2
Katula meso ya nge na mambu ya kukondwa mfunu!
2 Kasi, bima yina beto ke talaka lenda natina beto bampasi. Bumosi yina ke na meso mpe makanisi ya beto ke ngolo mingi. Ni na yawu bima yina beto ke talaka na meso ya beto ke butisaka bansatu na kati ya ntima beto. Mpe samu ti beto ke na zingaka na yinza yina ke na yisi ya lutumu ya Satana Dyabulu, kisika yina bantu ke sosaka kaka na kulungisa bansatu ya bawu mosi, ba me fulusaka beto na bizizi mpe bansangu yina lenda nata beto ntama na Yehova, ata ti beto me katula meso na mbangu. (1 Yoa. 5:19) Beto ke na talaka samu na yinki, mosi ya ba yina sonikaka buku ya Bankunga bondilaka Nzambi ‘Katula meso ya munu samu ya tala ve mambu ya kukondwa mfunu; Bumba munu na luzingu na nzila ya nge.’—Nku. 119:37.
Matadi ya ntalu ya kimpeve
w05-F 15/4 10 §2
Tula ntima na mambu ya Nzambi
2 Mambu ya ngudi ya Nkunga 119 ke ni mfunu ya mambu ya Nzambi to nsangu ya Nzambi. Mpe samu ti ya vanda ve mpasi na kusimba, musoniki sonikaka Nzimbu yayi na kulandaka alphabet. Mosi na mosi ya baverse 176 ya Nzimbu yango bandaka na kisono mosi ya alphabet ya Ki-Ebre. Na Ki-Ebre ya ntama, mosi na mosi ya bitini 22 ya nzimbu yango ke na milonga 8 yina me banda nyonso na kisono ya alphabet yina ke faso mosi. Nzimbu yayi ke na zonzilaka na: mambu ya Nzambi, musiku, bangibusa, banzila. Na disolo yayi mpe yina ke landa, beto ke zonzila Nkunga 119 na kutadilaka mbangudulu ya Biblia na ndinga ya Ki-Ebre. Kana beto kanisa na bamambu yina kutanaka na bisadi ya Yehova ya ntama mpe ya bubu yayi, ya ke sadisa beto na kutala ti nzimbu yayi yina me katuka na Yehova ke mfunu mpe beto ke zola dyaka mingi Biblia, mambu ya Nzambi.
16-22 DÉCEMBRE
BIMVWAMA YA BIBLIA NKUNGA 119:57-120
Faso ya kununga bampasi
w06-F 15/6 20 §2
‘Mu ke zolaka musiku ya nge mingi’
2 Nge lenda yufula, “Wapi mutindu musiku ya Nzambi vanda pesaka mosi ya yina sonikaka buku ya Bankunga kilengi?” Yandi vanda ya kundima ti Yehova vanda tula yandi dikebi. Ni yina vanda pesa yandi kilengi mpe ngolo. Ata ti bambeni ya yandi vanda kwamisa yandi, Davidi vandaka na kilengi samu yandi zabaka ti faso yina Yehova bongisaka bamambu na kati ya musiku vandaka na luzolo. Yandi vanda ndima ti Yehova sadilaka yandi mambu ya mbote. Dyaka, kusadila malongi ya Nzambi vanda pesa yandi ndwenga kulutila bambeni ya yandi mpe ni yina muntu vuukisaka luzingu ya yandi. Kuzitisa misiku yina, sadisaka yandi na kuvanda na kizunu mpe kimuntu ya kati ya mbote.—Bankunga 119:1, 9, 65, 93, 98, 165.
w00-F 1/12 14 §3
Nge ke zolaka kwandi na ntangu Yehova ke bambulaka nge?
3 Mosi ya ba yina sonikaka buku ya Bankunga vanda sepeleka na ntangu Yehova vanda bambulaka yandi. Ni na yawu yandi yimbaka: ‘Na mbangu nyonso munu ke landa misiku ya nge, mu ke vingila ve. Bantu ya yimbi me zunga munu na mitambu ya bawu. Kasi mu ke bika ata fioti ve misiku ya nge.’ (Nkunga 119:60, 61) Na ntangu Yehova ke bambulaka beto, ya ke sadisaka beto na kukanga ntima na mantwala ya bankwamusu, na kuvanda ya kundima ti Tata ya beto ya mazulu ke zenga bansinga yina bambeni ya beto ke na sosaka kukanga beto. Na ntangu ya kulunga, yandi ke sadisa beto ata bankwamusu, na kulenda kulungisa kisalu ya beto ya kusamuna.—Marke 13:10.
w06-F 1/9 14 §4
Bamambu ya mfunu yina ke na buku ya tanu ya Bankunga
119:71—Wapi mutindu beto lenda kuzwa bambote na ntangu beto ke kutanaka na bamambu ya mpasi? Bampasi ke sadisaka beto na kutula dyaka mingi ntima na Yehova, na kusambila yandi na tiya nyonso, na kulongoka Biblia mbote-mbote mpe na kusadila yawu na mbangu. Faso ya beto ya kubakila bampasi lenda basisa bifu yina beto me lunga kuyidika. Bampasi ke kumisa ve beto ndudi kana beto bika yawu ya bongisa kimuntu ya beto.
w17.07-F 13 §3, 5
“Beno dila na ba yina ke na dilaka”
3 Yehova, Tata ya beto ya mazulu ke muntu ya ntete yina ke lakisaka beto ntima ya kyadi. (Tanga 2 Bakorinto 1:3, 4.) Yandi zaba kuvanda na kisika ya bantu kulutila muntu ni muntu. Yandi me zonza na bisadi ya yandi: ‘Munu mosi ke bondilaka beno.’—Iza. 51:12; Nku. 119:50, 52, 76.
5 Beto me bonga kuvanda ya kundima ti Yehova ke na nsatu ya kusadisa beto. Na yawu beto bika ve kufungula yandi ntima ya beto na lusambu. Ya ke salaka beto kilengi na kuzaba ti Yehova me zaba yina ke na bantima ya beto mpe ti yandi ke sadisaka beto na ntangu ya kulunga. Kasi wa’ faso yandi ke salaka yawu?
Matadi ya ntalu ya kimpeve
w06-F 1/9 14 §4
Bamambu ya mfunu yina ke na buku ya tanu ya Bankunga
119:96—Yinki zola zonza ‘nsuka ya bima nyonso ya kulunga’? Na babiblia ya nkaka verse yayi ke zonzaka ‘Mu me zaba ti bima nyonso ya kulunga yina beto ke talaka ke na nsuka ya yawu, kasi misiku ya nge ke ve na nsuka’. Muntu yina sonikaka yawu vanda zonzila kulunga na mutindu yina bantu ke tadilaka yawu. Ntangu ya nkaka yandi vanda sosa kuzonza ti ata ti na meso ya muntu kima lenda talana ya kulunga, kasi na kutadilaka yawu mbote-mbote, ya lenda vanda ve faso yina. Kasi na yina me tadila misiku ya Nzambi, ya ke ya kulunga mpe ya ke ve na bandilu. Malongi yina ya ke pesaka ke tadilaka bamambu nyonso ya luzingu.
23-29 DÉCEMBRE
BIMVWAMA YA BIBLIA NKUNGA 119:121-176
Wa’ faso beto lenda sala ti mambu ya mpasi kumina ve beto?
w18.06-F 17 §5-6
Bika misiku ya Nzambi longa kimuntu ya nge ya kati
5 Samu misiku ya Nzambi sadisa beto, beto me bonga ve kaka kutanga mpe kuzaba yawu, kasi beto me bonga mpe kuzitisa mpe kuzola yawu. Biblia ke zonzaka: ‘Beno yiina mambu ya yimbi, mpe beno zola mambu ya mbote.’ (Amosi 5:15) Kasi, wa’ faso beto lenda sala yawu? Beto me lunga kulongoka na kutala bamambu mutindu Yehova ke talaka yawu. Na kifwani, kanisa ti nge ke na lendaka ve na kulala. Munganga me lomba nge na kudya madya ya mbote, na kuningisa nzutu mpe na kubongisa bamambu ya nkaka na kati ya luzingu ya nge. Nge me lenda na kusala mambu yina yandi me zonza, mpe ya me simba. Nge ke vanda na nsatu ya kuvutula yandi matondo samu ti malongi yina yandi me pesa nge me simba.
6 Mutindu mosi mpe, Nzambi yina yidikaka beto me pesa beto misiku yina ke bumbaka luzingu ya beto na bamambu ya yimbi yina lenda kumina beto kana beto me kuma na ndyatulu ya yimbi. Na kifwani, kanisa na misiku na yina me tadila luvunu, muyibi, kinsuza, kunwana, mpe bunganga. (Tanga Bingana 6:16-19; Luz. 21:8) Ntangu beto ke talaka bambote yina kuzitisa misiku ya Yehova ke natinaka beto, luzolo ya beto samu na yandi mpe samu na misiku ya yandi ke kumaka dyaka ngolo.
w93-F 15/4 17 §12
Bantwenya—yinki beno ke na landaka?
12 Ya kulutila mfunu beno me bonga kulongoka na kuyiina mambu ya yimbi, mpe na kulosa yawu. (Nkunga 97:10) Kasi wa’ faso kuyiina mambu yina ke na talanaka mbote na mantwala ya beto? Ni na kukanisaka na bamambu yina lenda kumina beto. “Beno vunama ve: Ba ke sekaka ve Nzambi. Samu ti konso muntu ke kuzwa bambuma ya babima yina yandi me kunda. Muntu yina ke landaka bansatu ya kinsuni ke kuzwa lufwa.” (Bagalate 6:7, 8) Kana ntima ya nge ke na sosaka kunata nge na kuwa bansatu ya nge, kanisa na mambu ya kulutila yimbi yina lenda kumina nge, kunyongisa ntima ya Yehova. (Tala na Nkunga 78:41.) Kanisa mpe na bamambu ya nkaka yina lenda kumina nge mutindu kivumu yina nge kanisaka ve, maladi mutindu SIDA, na nsoni yina nge lenda vanda na yawu. Ya lenda natina mpe nge bampasi samu na bantangu mingi. Mukristo mosi ya kento kwizaka zonza: “Munu na bakala ya munu vanda vukisa nzutu na bantu ya nkaka tekila beto zabana. Na yawu, ata ti bubu yayi beto me kuma Bakristo, bamambu yina beto salaka na ntama ke nataka kaka beto na kuswana mpe na kimbanda na dikwela ya beto.” Kuzimbana mpe ve ti, ba lenda katula nge biyeko mpe kubasisa nge na kati ya kimvuka. (1 Bakorinto 5:9-13) Samu na kilengi ya ntangu fioti, bamambu ya mpasi yina lenda kumina nge, ke mingi.
Matadi ya ntalu ya kimpeve
Vanda ya kundima ti ‘ndinga ya Nzambi kele tsyeleka’
2 Samu beto ke bisadi ya Yehova, beto ke ya kundima ti yandi ke ‘Nzambi ya tsyeleka’ mpe ti yandi zola kaka yina ke mbote samu na beto. (Nku. 31:5; Iza. 48:17) Beto zaba ti beto lenda tula ntima na mambu yina beto ke tangá na Biblia. Beto ke ndimá ti ‘ndinga ya Nzambi ya mvimba kele tsyeleka.’ (Tanga Nkunga 119:160.) Beto ke kabulá dikanisi mosi na muntu ya mayela yina zaba mingi na mambu ya Biblia. Yandi zonzaka: “Ata mambu yina Nzambi zonzá ke luvunu to ke kondwa kulungana. Bisadi ya Nzambi ke tulá ntima na bamambu yina yandi ke zonzá samu ba ke tulá ntima na Nzambi, muntu yina ke zonzaka yawu.”
30 DÉCEMBRE–5 JANVIER
BIMVWAMA YA BIBLIA BANKUNGA 120-126
Ba kundaka na mansangasa kasi ba katulaka bambuma na kilengi
w04-F 1/6 16 §10
Lusakumunu ke na bantu yina ke pesaka Nzambi lukumu
10 Ntangu beto ke kumaka bilandi ya Yesu, ya ke mutindu beto me banda kunwanisa Satana. Zaki 4:7 ke zonzaka: “Beno tatamana na kumanga Satana, mpe yandi ke kima ntama na beno”. Kasi ya zola zonza ve ti ya ke pete. Kusadila Yehova ke lombaka bangolo. (Luke 13:24) Kasi, na Nkunga 126:5 Biblia ke pesaka nsilulu yayi: ‘Bantu yina ke kundaka mbuma na mansangasa ke katula bambuma na milolo ya kyese.’ Ya tsyeleka Yehova, Nzambi yina beto ke sadilaka zaba kuvutula matondo. Yandi ke “pesaka matabisi na bantu yina ke sosaka yandi,” mpe yandi ke sakumuna bantu yina ke pesaka yandi lukumu.—Baebre 11:6.
Kiminu ya nge ke vanda kwandi ngolo?
17 Muntu yina nge ke zolá me kufwa? Kukanisa na masolo ya Biblia yina ke zonzilá bantu yina ba vumbulá na lufwa ke kulisa kiminu ya nge. Ntima ya nge ke kwandi ya kulwala samu ba me basisa muntu ya nge na kimvuka? Longoka mingi Biblia samu na kundima ti disipline ya Yehova ke vandá kaka samu na mbote ya beto. Mambu ni mambu yina lendá kumina nge, sadila yawu samu na kukulisa kiminu ya nge. Fungula ntima ya nge nyonso na Yehova. Kuvanda ve kaka nge mosi. Vanda pene-pene na bampangi ya nge ya kento na ya bakala. (Bin. 18:1) Ata ya lenda vanda mpasi, sala bima yina ke pesa nge ngolo ya kukanga ntima. (Nku. 126:5, 6) Na yawu, vanda ntangu nyonso na balukutakanu, kwenda na predikasion, mpe vanda na kifu ya kutangá Biblia. Kanisa na bamambu ya kitoko yina Yehova me bumbila nge na mantwala. Ntangu nyonso yina nge ke tala Yehova kusadisa nge, kiminu ya nge na yandi ke kula.
w01-F 15/7 18-19 §13-14
Beno bika ve kusala kisalu ya kubuka bambuma!
13 Mambu yina ke na Nkunga 126:5, 6 ke pesa kilengi na bantu yina ke salaka kisalu ya Nzambi ya kubuka bambuma, mpe mingi-mingi na ba yina ba ke talisaka mpasi: ‘Bantu yina ke kundaka mbuma na mansangasa ke katula bambuma na milolo ya kyese. Muntu yina ke basika, ata yandi ke na dilaka, yandi ke nata saki ya yandi ya bakeni, ke vutuka na milolo ya kyese, yandi ke nata bambuma ya yandi.’ Mambu yina ke na verse yayi na yina me tadila kukunda to kukatula bambuma ke na lakisaka mutindu Yehova kipeke mpe sakumunaka ba yina basikaka na bwala ya Babiloni. Ba vandaka na kilengi samu ti ba vutukaka na bwala ya bawu, kasi ya lenda vanda ti ba vanda dila na ntangu ba vanda kunda na ntoto yina kwizaka yuma mpe yina ba sadilaka ve na kati ya bamvula 70 yina ba lutisaka na Babiloni. Kasi ba yina lembaka ve na kukunda mpe na kutunga bayinzo, kuzwaka difuta mpe ba sepelaka na kisalu ya mpasi yina ba salaka.
14 Ya lenda kumina beto na kudila samu ti beto to bampangi ya nkaka ke na talaka mpasi samu ti beto ke na salaka mambu ya lunungu. (1 Piere 3:14) Na kubanda, kisalu ya beto ya kusamuna lenda talana mpasi samu ti beto lenda kanisa ti beto ke na salaka kisalu ya mpamba. Kana beto bika ve na kukunda, mpe kulosa maza, Nzambi yandi mosi ke kulisa yawu na faso yina beto ke na vingilaka ve. (1 Bakorinto 3:6) Mambu yango ke na talanaka na mutindu kisalu ya kukabula babiblia mpe mikanda yina ke zonzilaka Biblia ke na butaka bambuma.
Matadi ya ntalu ya kimpeve
cl-F 73 §15
Ngolo ya kubumba—‘Nzambi ke kisika ya beto ya kubumbana’
15 Beto zonzila ntete na kubumbana ya kinsuni. Beto bisadi ya Yehova ke tulaka ntima ti yandi ke bumba kimvuka ya beto nyonso na kinsuni. Kana faso yina ve, Satana zola manisa beto nyonso. Kanisa na mambu yayi: Satana, “mfumu ya yinza yayi,” ke vandaka na nsatu ya kubebisa lusambu ya tsyeleka. (Yoane 12:31; Luzabusu 12:17) Ba gouvernements ya ntoto me niminaka beto na kusala kisalu ya beto ya kusamuna mpe me sosaka na kumanisa beto. Kasi ata faso yina, beto me bikanaka ya kukwikama mpe me bika ve kisalu ya kusamuna. Samu na yinki bayinsi ya ngolo ya ntoto yayi me lenda ve na kukanga kisalu ya kimvuka ya fioti ya Bakristo yina ke talanaka ti ba ke ve na ngolo? Ya ke samu ti Yehova ke bumbaka beto na yisi ya mapapu ya yandi ya ngolo!—Nkunga 17:7, 8.