Na manima ya kubasika na bilanga ya Edeni, Adami na Eva butaka bana mingi. Mwana ya bawu ya ntete Kayini vanda salaka bilanga, mpe Abele mwana ya zole, vandaka muvungi.

Kilumbu mosi, Kayini na Abele pesaka minkayulu na Yehova. Nge zaba munkayulu kele yinki? Ya ke dikabu yina ba ke pesaka na Nzambi. Yehova sepelaka na munkayulu ya Abele, kasi yandi sepelaka ve na ya Kayini. Ya salaka ti Kayini kuma na nkele mingi. Yehova kebisaka Kayini ti nkele ya yandi lenda nata yandi na kusala mambu ya yimbi. Ata faso yina, yandi kuwaka ve Yehova.

Kayini zonzaka na Abele: ‘Kwiza beto kwenda na bilanga.’ Ntangu ba kumaka kaka bawu zole na bilanga, Kayini bulaka leki ya yandi mpe yandi kufwaka yandi. Yinki Yehova salaka? Yehova pesaka Kayini kitumbu mpe bingisaka yandi ntama na dikanda ya yandi. Yandi pesaka ata fioti ve Kayini nzila ya kuvutuka.

Wapi kileso samu na beto? Beto lenda banda kuvanda na nkele kana bamambu ke na salamaka ve faso beto zola ya salama. Kana beto tala ti nkele ke na kumaka ngolo na kati ya beto, to kana bampangi kebisa beto samu ba me tala nkele ya beto, beto me bonga kubongisa makanisi ya beto mpe kukutika yawu tekila ya nata beto na kusala mambu ya yimbi.

Samu Abele vandaka na luzolo na Yehova mpe samu yandi vanda salaka mambu ya mbote, Yehova ke zimbana ata fioti ve yandi. Nzambi ke vutula Abele na luzingu ntangu yandi ke kumisa ntoto paradiso.

Malembe-malembe, bantu kumaka mingi na zulu ya ntoto. Mingi na kati ya bawu kumaka na bifu ya yimbi. Bambazi ya nkaka mpe na mazulu, kumaka na bifu ya yimbi. Bambazi yango bikaka mazulu mpe ba kwizaka awa ya ntoto. Nge zaba samu na yinki ba salaka yawu? Samu na kulwata banzutu ya bantu samu na kukwela bakento.

Bambazi yayi butaka bana na bakento yina ba kwelaka. Ntangu bana yango kulaka, ba kumaka na ngolo mingi mpe ba vanda nyokola bantu. Ba vanda talisa bantu mpasi. Yehova bikaka ve mambu yayi baka ntangu mingi. Na yawu, Yehova bakaka mukanu ya kunokisa mvula ya nene samu na kufwa bantu nyonso yina vanda sala mambu ya yimbi.

Kasi ya vandaka na bakala mosi yina vandaka ve faso mosi na bantu ya yimbi yina. Yandi vanda zolaka Yehova. Nkumbu ya yandi vandaka Nowe. Yandi vandaka ya kukwela, mpe yandi vandaka na bana tatu ya babakala: Semi, Kami, na Yafeti, mpe bawu nyonso tatu vandaka ya kukwela. Yehova zonzaka na Nowe na kutunga masuwa ya nene, samu yandi na dikanda ya yandi lenda kuvuuka na mvula ya nene. Masuwa ke sanduku to caisse ya nene ya mabaya, yina lenda tambula na zulu ya maza. Yehova zonzaka mpe na Nowe na kukotisa bibulu mingi na kati ya masuwa samu bawu mpe, ba lenda kuvuuka.

Na mbala mosi, Nowe bandaka kutunga masuwa. Nowe na dikanda ya yandi lutisaka bamvula pene-pene na 50 samu na kutunga masuwa. Ba tungaka yawu kaka faso Yehova lombaka na bawu na kusala yawu. Na kati ya bantangu yina, Nowe vanda kebisa bantu ti mvula ya nene ke kubwa. Kasi, ata muntu kuwaka yandi.

Mpe na manima, ntangu kumaka samu na kukota na kati ya masuwa. Beto ke tala yinki salamaka na disolo yina ke landa.