Yinzo ya yinda ya Babele

Na manima ya Mvula ya Nene, bana ya Nowe na bakento ya bawu butaka bana. Makanda ya bawu vanda kula, mpe ba bandaka kumwangana na bisika mingi na zulu ya ntoto, kaka mutindu Yehova zonzaka na bawu na kusala.

Kasi makanda ya nkaka tumamaka ve na Yehova. Ba zonzaka: ‘Beto tunga mbanza mpe beto bikana awa. Beto ke tunga yinzo ya yinda yina ke kwenda tii na zulu. Na yawu beto ke zabana.’

Mambu yina bantu yayi vanda sala sepelisaka ve Yehova. Na yawu, yandi bakaka mukanu ya kukanga bawu nzila. Nge zaba wa’ faso yandi salaka yawu? Na mbala mosi, Yehova salaka ti bawu nyonso zonza dyaka ve ndinga mosi. Na yawu, samu bawu nyonso vanda zonza dyaka ve ndinga mosi, ya salaka ti ba zenga kisalu ya kutunga. Mbanza yina ba vanda tunga kwizaka zabana na nkumbu ya Babele, yina zola zonza “mvwanzi.” Bantu bandaka kumwangana mpe kwendaka zinga na bisika mingi na zulu ya ntoto. Kasi ata na bisika yina ba kwendaka zinga, ba bikaka ve kusala bamambu ya yimbi. Ya vandaka kwandi na bantu yina vanda zolaka Yehova? Beto ke zonzila yawu na disolo yina ke landa.