Ntama ve na Babele vandaka na mbanza mosi yina ba vanda bokilaka Ure, kisika yina bantu vanda sambilaka banzambi mingi ya nkaka, kasi Yehova ve. Kasi ya vandaka na bakala mosi na Ure yina vanda sambilaka kaka Yehova. Nkumbu ya yandi vandaka Abrahami.

Yehova zonzaka na Abrahami: ‘Bika yinzo ya nge na dikanda ya nge, mpe kwenda na bwala yina mu ke lakisa nge.’ Na manima Yehova zonzaka na yandi: ‘Nge ke kuma dikanda mosi ya nene, mpe samu na nge, mu ke sala bamambu ya mbote samu na bantu mingi na zulu ya ntoto.’

Abrahami tulaka ntima na Yehova, ata ti yandi zabaka ve kisika yina Yehova zonzaka na yandi na kukwenda. Na yawu Abrahami, kento ya yandi Sara, tata ya yandi Tera mpe mwana-nkazi (neveu) ya yandi Loti, yidikaka bima ya bawu mpe na kutumama nyonso ba bandaka nzyetolo ya yinda yina vanda vingila bawu.

Abrahami vandaka na bamvula 75 ntangu yandi na dikanda ya yandi kumaka na bwala yina Yehova vandaka na nsatu ba tala. Ba vanda bokilaka kisika yango bwala ya Kanana. Kuna, Nzambi sololaka na Abrahami mpe zonzaka na yandi: ‘Bwala nyonso yayi nge ke na talaka pene-pene na nge, mu ke pesa yawu na bana ya nge.’ Kasi Abrahami na Sara vandaka ya kununa mpe ba vandaka ve na bana. Na yawu, wa’ faso Yehova zolaka lungisa mambu yina yandi zonzaka?

Abrahami na Sara vandaka ya kukwelana na kati ya bamvula mingi. Ba bikaka yinzo ya bawu ya kitoko na Ure mpe ba kwendaka zinga na kati ya batenta. Kasi Sara nyonginaka ve yawu, samu yandi vanda tulaka ntima na Yehova.

Sara vandaka na nsatu ya ngolo ya kuzwa mwana. Na yawu, yandi zonzaka na Abrahami: ‘Kana kisadi ya munu Agare buta mwana, yandi lenda vanda mutindu mwana ya munu.’ Na kati ya mwa bantangu, Agare butaka mwana ya bakala. Nkumbu ya yandi vandaka Ismaele.

Na manima ya bamvula mingi, ntangu Abrahami vandaka na bamvula 99 mpe Sara na bamvula 89, ba yambaka banzenza tatu. Abrahami lombaka na bawu na kuvanda na yandi na yisi ya yinti mpe na kukabula kima ya kudya. Nge zaba banani vandaka banzenza yina? Ya vandaka bambazi! Ba zonzaka na Abrahami: ‘Na mvula yina ke kwiza, kaka na ntangu ya faso yayi, nge na kento ya nge ke kuzwa mwana ya bakala.’ Sara vandaka na kati ya tenta mpe yandi vanda kuwa bawu. Yandi sekaka mpe zonzaka na yisi ya ntima: ‘Mu lenda kuzwa kwandi mwana ata ti mu me nuna?’

Na mvula yina landaka, Sara butaka mwana ya bakala kaka mutindu mbazi ya Yehova zonzaka. Abrahami bokilaka yandi Izaki, yina zola zonza “kuseka.”

Ntangu Izaki kumaka na bamvula pene-pene na 5, Sara talaka mutindu Ismaele vanda sombola Izaki. Sara vandaka na nsatu ya kubumba mwana ya yandi. Na yawu, yandi kwendaka na Abrahami mpe lombaka yandi na kubingisa Agare na mwana ya yandi Ismaele. Na kubanda, Abrahami vandaka ve na nsatu ya kusala yawu. Kasi Yehova zonzaka na Abrahami: ‘Kuwa Sara. Mu ke kipe Ismaele. Kasi nsilulu yina mu pesaka ke lungana na nzila ya Izaki.’