Loti vanda vandaka na mpangi ya tata ya yandi Abrahami na bwala ya Kanana. Na kati ya mwa bantangu, Abrahami na Loti kumaka na bibulu mingi mpe ya salaka ti kisika yina ba vandaka, kumaka fioti samu na bawu zole. Abrahami zonzaka na Loti: ‘Beto zole lenda vanda dyaka ve kisika mosi. Mulemvo, soola kisika yina nge me zola kukwenda mpe munu, mu ke kwenda kisika ya nkaka.’ Abrahami lakisaka kifu ya kutula bansatu ya mpangi na kisika ya ntete.

Pene-pene na mbanza yina ba vanda bokilaka Sodome vandaka na bwala mosi ya kitoko, mpe ni yina Loti talaka. Kisika yango vandaka na maza mingi mpe matiti mingi. Na yawu, Loti soolaka kisika yina mpe kwendaka kuna na dikanda ya yandi.

Bantu ya Sodome na ya Gomore, mbanza yina vandaka pene-pene na Sodome, vandaka bantu ya yimbi. Ba vandaka na mambu mingi ya yimbi, mpe ni yina salaka ti Yehova baka mukanu ya kufwa bambanza yayi. Kasi Nzambi vandaka na nsatu ya kubumba Loti na dikanda ya yandi. Na yawu, yandi filisaka bambazi zole samu na kukebisa bawu: ‘Beno basika na mbanza yayi! Beno sala mbangu! Yehova ke kufwa yawu.’

Kasi Loti basikaka ve na mbangu. Yandi bakaka mwa ntangu. Na yawu bambazi simbaka Loti, kento ya yandi mpe bana ya bawu zole ya bakento na maboko mpe ba basisaka bawu na mbangu na ngaanda ya mbanza, mpe ba zonzaka: ‘Beno kima! Beno bumba luzingu ya beno, mpe beno kutala ve na manima. Kana beno tala na manima, beno ke kufwa!’

Ntangu ba kumaka na mbanza yina ba vanda bokilaka Zoare, Yehova nokisaka tiya na zulu ya mbanza ya Sodome na ya Gomore. Bambanza zole yayi kufwaka. Samu kento ya Loti tumamaka ve na Yehova mpe talaka na manima, yandi kumaka kiteki ya mungwa. Kasi Loti na bana ya yandi ya bakento vuukaka samu ba tumamaka na Yehova. Ntembe ve, ya salaka bawu mpasi samu kento ya Loti tumamaka ve. Kasi ba vandaka na kilengi samu ba landaka malongi ya Yehova.

Abrahami longaka mwana ya yandi Izaki na kuzola Yehova mpe na kutula ntima na bansilulu ya yandi nyonso. Kasi ntangu Izaki kumaka na bamvula pene-pene na 25, Yehova lombaka na Abrahami na kusala kima mosi yina vandaka mpasi mingi. Yinki ya vandaka?

Nzambi zonzaka na Abrahami: ‘Mulemvo, baka mwana ya nge kaka mosi ya bakala, mpe pesa yandi mutindu munkayulu na zulu ya mongo yina ke na bwala ya Moriya.’ Abrahami zabaka ve samu na yinki Yehova lombaka yandi na kusala mambu ya faso yina. Kasi yandi tumamaka na Yehova.

Na suka-suka ya kilumbu yina landaka, Abrahami bakaka Izaki na bisadi zole, mpe ba kwendaka na Moriya. Na manima ya bilumbu tatu, mongo bandaka kutalana na ntama. Abrahami zonzaka na bisadi ya yandi na kuvingila bawu ntangu yandi na Izaki ke kwenda na kupesa munkayulu. Abrahami pesaka Izaki bankuni na kunata, mpe yandi mosi bakaka mbele. Izaki yufulaka tata ya yandi: ‘Wapi kisika ke kibulu yina beto ke pesa na munkayulu?’ Abrahami vutulaka: ‘Mwana ya munu, Yehova ke pesa yawu.’

Ntangu ba kumaka na mongo, ba tungaka kisika ya kuyoka munkayulu. Mpe Abrahami kangaka Izaki maboko na makulu mpe tulaka yandi na zulu ya kisika ya kuyoka munkayulu.

Abrahami nangunaka mbele. Kaka na ntangu yina, mbazi ya Yehova bokilaka yandi katuka na mazulu: ‘Abrahami! Kutalisa ve mwana mpasi! Ntangu yayi mu me zaba ti nge ke na kiminu na Nzambi samu nge me ndima na ntima mosi na kupesa mwana ya nge na munkayulu.’ Na manima, Abrahami talaka mwana mosi ya dimeme yina mampoka to ba cornes ya yandi kangamaka na mwa bayinti. Na mbangu nyonso, yandi fungulaka Izaki basinga yina yandi kangaka yandi mpe yandi pesaka dimeme na munkayulu na kisika ya Izaki.

Banda kilumbu yina, Yehova bokilaka Abrahami ndiku ya yandi. Nge zaba samu na yinki? Abrahami vanda salaka mambu ni mambu yina Yehova vandaka na nsatu yandi sala, ata ntangu yandi zabaka ve samu na yinki Yehova ke na lombaka yandi na kusala yawu.

Yehova zonzilaka dyaka na Abrahami nsilulu yina yandi pesaka yandi: ‘Mu ke sakumuna nge, mpe mu ke kumisa bana ya nge mpe mitekolo ya nge mingi.’ Ya zolaka zonza ti Yehova ke sakumuna bantu nyonso ya mbote na nzila ya dikanda ya Abrahami.