Moyize lutisaka bamvula 40 na bwala ya Madiani. Yandi kwelaka mpe butaka. Kilumbu mosi, ntangu yandi vanda kipe mameme ya yandi pene-pene ya Mongo ya Sinayi, yandi talaka mambu mosi ya ngitukulu. Yinti mosi ya bansende vanda baka tiya, kasi ya vanda nyenga ve! Ntangu Moyize pusanaka pene-pene na kutala samu na yinki ya vanda nyenga ve, yandi kuwaka ndinga mosi katukaka na kati ya yinti mpe zonzaka: ‘Moyize! Kupusana ve pene-pene. Katula mapapa ya nge samu nge ke ya kutelama na ntoto ya santu.’ Ya vandaka ni Yehova vanda zonza na nzila ya mbazi.

Moyize kumaka na boma mpe yandi kangaka kizizi. Ndinga zonzaka: ‘Mu me tala mpasi ya bantu ya Izraele. Mu ke vuukisa bawu na maboko ya bantu ya Ezipte mpe mu ke nata bawu na bwala ya mbote. Ni nge me soola samu na kubasisa dikanda ya munu na Ezipte.’ Ntembe ve mambu yayi kamwisaka Moyize.

Moyize yufulaka: ‘Yinki mu ke zonza kana bantu yufula munu nani me filisa nge?’ Nzambi vutulaka: ‘Zonza na bawu ti Yehova, Nzambi ya Abrahami, Nzambi ya Izaki, mpe Nzambi ya Yakobi muntu me filisa munu.’ Na manima Moyize zonzaka: ‘Kasi, kana bantu manga kuwa munu?’ Yehova lakisaka Moyize bamambu yina ke sadisa yandi na kuzaba ti Yehova ke vanda na yandi. Yehova zonzaka na Moyize na kulosa na ntoto yinti yina yandi vandaka ya kusimba. Na yawu, yinti yango kumaka nyoka! Ntangu Moyize simbaka nyoka yango na mukila, ya vutukaka yinti. Yehova zonzaka: ‘Ntangu nge ke sala bamambu nyonso yayi, ya ke lakisa ti ni munu muntu me filisa nge.’

Moyize zonzaka: ‘Mu zaba ve kuzonza mbote.’ Yehova pesaka yandi nsilulu: ‘Mu ke zonzila nge mambu yina nge ke zonza, mpe mu ke filisa mpangi ya nge Aroni samu na kusadisa nge.’ Awa Moyize me zaba ti Yehova ke na yandi. Na yawu, yandi bakaka kento ya yandi na bana ya yandi mpe ba vutukaka na Ezipte.

Ba nataka bantu ya Izraele na ngolo na kusala mutindu bangaamba. Yehova filisaka Moyize na Aroni na sika ya Faraoni na nsangu yayi: ‘Bika bantu ya munu kwenda, samu ba lenda kusambila munu na ntoto ya kuyuma.’ Na lulendo nyonso Faraoni vutulaka: ‘Mambu yina Yehova me zonza me tala ve munu, mu ke bika ve bantu ya Izraele kwenda.’ Na manima, Faraoni bwesaka dyaka bana ya Izraele kisalu ya ngolo. Yehova vandaka na nsatu ya kulonga Faraoni kileso mosi. Nge zaba wa’ faso yandi salaka yawu? Yehova salaka ti bamambu 10 ya mpasi bula bwala ya Ezipte. Yehova zonzaka na Moyize: ‘Faraoni ke na kuwaka ve munu. Na suka Faraoni ke vanda na Nzadi Nile. Kwenda kisika yandi kele mpe zonza na yandi ti samu yandi me bika ve dikanda ya munu kwenda, maza nyonso ya Nile ke kuma menga.’ Moyize tumamaka mpe kwendaka kisika Faraoni vandaka. Faraoni talaka mutindu Aroni bulaka maza ya Nile na yinti ya yandi, mpe nzadi kumaka menga. Nzadi vanda basisa nsunga ya yimbi, bambisi kufwaka, mpe bantu vanda lenda dyaka ve kunwa maza ya Nile. Kasi Faraoni vanda manga kaka kubika bantu ya Izraele kwenda.

Bilumbu 7 na manima, Yehova vutulaka Moyize na sika ya Faraoni na nsangu yayi: ‘Kana nge bika ve bantu ya munu kwenda, Ezipte ke vanda ya kufuluka na bampangu to ba grenouilles.’ Aroni nangunaka yinti ya yandi mpe bampangu bandaka kufuluka na bwala. Bantu bandaka kutala bampangu na kati ya bayinzo ya bawu, na bamfulu ya bawu, mpe na kati ya bandonga ya bawu. Bampangu vandaka bisika nyonso! Faraoni zonzaka na Moyize: ‘Bondila Yehova samu yandi katula yawu.’ Faraoni pesaka nsilulu ti yandi ke bika bantu ya Izraele kwenda. Mpe bantu ya Ezipte lokotaka bampangu nyonso ya kufwa, mpe tulaka yawu na bikunku. Bwala nyonso kumaka nsunga ya yimbi. Dyaka, Faraoni mangaka kubika bantu ya Izraele kwenda.

Na manima Yehova zonzaka na Moyize: ‘Aroni fwana kubula ntoto na yinti ya yandi, mpe fundu-fundu ke kuma bangungu.’ Na mbala mosi bangungu kumaka bisika nyonso. Bisadi ya nkaka ya Faraoni zonzaka na yandi: ‘Mambu ya mpasi yayi me katuka na Nzambi.’ Kasi, Faraoni mangaka dyaka kubika bantu ya Izraele kwenda.