Bana ya Izraele bikaka Mongo ya Sinayi mpe salaka nzyetolo na kati ya ntoto ya kuyuma ya Parani. Ba kumaka kisika yina ba ke bokilaka Kadeshi. Kuna Yehova zonzaka na Moyize: ‘Filisa babakala 12 ya konso dikanda na kukwenda tala bwala ya Kanana na mansweki, bwala yina mu ke pesa bana ya Izraele.’ Na yawu, Moyize soolaka babakala 12 mpe zonzaka na bawu: ‘Beno kwenda na Kanana, mpe beno tala kana ntoto ya kuna ke butaka mbote. Beno tala mpe kana bantu ya kuna ke ya kulemba to ke na ngolo, mpe kana ba ke zingaka na batenta to na bambanza.’ Yozue na Kalebe vandaka mpe na kati ya babakala 12 yina kwendaka na Kanana.

Na manima ya bilumbu 40, ntangu ba vutukaka, ba nataka bafige, bambuma ya grenade, mpe bambuma ya vinu. Babakala yayi zonzaka: ‘Ya ke bwala ya kitoko, kasi bantu ya kuna ke na ngolo mpe bambanza ke na bibaka ya yinda.’ Kasi Kalebe zonzaka: ‘Beto lenda nunga bawu. Beto kwenda kuna malu-malu yayi!’ Nge zaba samu na yinki Kalebe zonzaka faso yina? Ya ke samu yandi na Yozue vanda tulaka ntima na Yehova. Babakala 10 ya nkaka zonzaka: ‘Ve! Bantu ya kuna ke nene, ba ke na ngolo! Beto ke mutindu makonko na mantwala ya bawu.’

Bana ya Izraele kumaka ya kulemba. Ba bandaka kuzonza bawu na bawu: ‘Bika beto soola ntwadisi ya nkaka mpe beto vutuka na Ezipte. Samu na yinki beto zolaka kwenda na kisika yina samu ba kufwa beto?’ Yozue na Kalebe zonzaka: ‘Beno kumanga ve kutumama na Yehova, mpe beno kuvanda ve na boma. Yehova ke bumba beto.’ Kasi bana ya Izraele kuwaka ve. Ba sosaka tii na kufwa Yozue na Kalebe!

Yinki Yehova salaka? Yandi zonzaka na Moyize: ‘Na manima ya bamambu nyonso yina mu me sala samu na bana ya Izraele, ba ke na tumamaka kaka ve na munu. Na yawu, ba ke bikana na ntoto ya kuyuma na kati ya bamvula 40, mpe ni kuna ba ke kufwa. Kaka bana ya bawu mpe Yozue na Kalebe ke zinga na bwala yina mu salaka nsilulu ti mu ke pesa bawu.’

Na manima ya mwa bantangu, ntangu bana ya Izraele vandaka na ntoto ya kuyuma, Kora, Datani, Abirami, mpe bantu 250 teleminaka Moyize. Ba zonzaka na yandi: ‘Beto me lemba nge! Samu na yinki kaka ni nge me lunga kuvanda ntwadisi ya beto mpe Aroni nganga-nzambi ya nene? Yehova ke na beto nyonso awa, yandi ke ve kaka na nge mpe Aroni.’ Yehova sepelaka ve na mambu yayi. Yandi talaka ti ni yandi ba me telemina!

Moyize zonzaka na Kora mpe na bantu yina vandaka na yandi: ‘Mbasi beto kutana na tabernakle, mpe muntu nyonso nata kima ya yandi ya kutudila tiya na mananasi ya nsunga ya kitoko. Yehova ke lakisa beto nani yandi me soola.’

Kilumbu yina landaka, Kora na bantu 250 yina vandaka na yandi kwendaka kutana na Moyize na tabernakle. Kuna ba yokaka mananasi ya nsunga ya kitoko faso banganga-nzambi vanda salaka yawu. Yehova zonzaka na Moyize na Aroni: ‘Beno katuka na kati ya Kora na bana ya yandi.’

Kasi Kora kwendaka kutana Moyize na kati ya tabernakle. Datani, Abirami, mpe makanda ya bawu mangaka kukwenda. Yehova zonzaka na bana ya Izraele na kukwenda ntama na batenta ya Kora, Datani, na Abirami. Na mbala mosi, bana ya Izraele kwendaka ntama. Datani, Abirami, mpe makanda ya bawu telamaka na ngaanda ya tenta ya bawu. Kaka na ntangu yina ntoto fungukaka mpe minaka bawu! Na tabernakle, tiya katukaka na zulu mpe ya yokaka Kora na bantu 250 yina vandaka na yandi.

Na manima Yehova zonzaka na Moyize: ‘Lomba na konso mfumu ya makanda na kupesa nge yinti, mpe sonika nkumbu ya konso mfumu na yinti ya yandi. Kasi, na yinti ya dikanda ya Levi, sonika nkumbu ya Aroni. Tula bayinti yango nyonso na kati ya tabernakle, mpe yinti ya muntu yina mu me soola ke basisa bafololo.’

Kilumbu yina landaka, Moyize basisaka bayinti nyonso mpe lakisaka yawu na bamfumu ya makanda. Yinti ya Aroni basisaka bafololo na bambuma ya kuyela ya amandes. Ni na mutindu yina, Yehova lakisaka pwelele ti ni Aroni yandi me soola na kuvanda nganga-nzambi ya nene.