Bantu mingi kekuendaka sambila diaka ve samu babakaka ve bamvutu na biuvu ya bau yina metala luzingu mpe babakaka ve lukindusu. Kansi, samu na yinki yakele mbote nge kutakanaka na balukutanu ya Bambangi ya Yehova? Wapi mambu nge ketala kuna?

Nge ketala kiese ya kuvuanda kintuadi na bantu yina kezolanaka mpe kekipeke bampangi. Baklisto ya ntete babongisamaka na kati ya bimvuka mpe bavuandaka sala balukutakanu samu na kusambila Nzambi, kulonguka Biblia mpe kukindasana. (Baebre 10:24, 25) Na balukutakanu yango, kisika bavuandaka lakisana luzolo, bavuandaka talana ti bakele kintuadi na bankundi ya kedikakedika, yazola tuba bampangi na bau baklisto. (2 Batesalonika 1:3; 3 Yoane 14) Beto mpe beto kelandaka kifuani ya bau mpe beto ketala kiese ya mutindu yina.

Nge ketala ti kulonguka kusadila malongi ya Biblia yakepesaka mambote. Mutindu mosi kaka na ntangu ya ntama, bubu yayi diaka, babakala, bakento mpe bana bau kekutakanaka kisika mosi. Babakala yina mezaba kulonga mbote bakesadilaka Biblia samu na kusadisa beto beto zaba kusadila malongi na yau na luzingu na beto ya kilumbu na kilumbu. (Kulonga Misiku 31:12; Nehemia 8:8) Muntu nyonso lenda pesa bamvutu kana disolo melomba bakutakani bazonza, mpe muntu nyonso lenda yimba. Yau kepesaka beto nzila ya kuzonzila kivuvu na beto.​—Baebre 10:23.

Nge ketala ti kiminu na nge kekuma ngolo. Ntumua Paulo tubilaka kimvuka mosi ya ntangu na yandi ti: “Munu kele na nsatu ya ngolo ya kutala beno, . . . samu beto kindasana, muntu na muntu kindusua na kiminu ya muntu ya nkaka, ya beno kindisa munu, mpe ya munu kindisa beno.” (Baroma 1:11, 12, NW) Ntangu beto kekutakanaka mbala na mbala na balukutakanu kintuadi na bampangi na beto baklisto, kiminu ya beto mpe nsatu ya beto ya kuzitisa minsiku ya Biblia kekumaka ngolo.

Beto melomba nge nge kuiza na lukutakanu ya beto ya mbala yina kekuiza samu nge tala nge mosi mambu beto mekatuka zonza. Beto keyamba nge na kiese mingi. Balukutakanu nyonso kele kondua kufuta mbongo; beto kesalaka bansisani ve.

• Kifuani ya banani beto kelandaka na mutindu ya kusala balukutakanu ya beto?

• Yinki mambote beto lenda zua kana beto kena kutakanaka?

Beto Bambangi ya Yehova beto kesalaka nyonso beto kondua ve balukutakanu ya beto, yavuanda muini ya ngolo, mvula, madidi ya ngolo, to ata kana yamelomba beto zengisa mfinda ya nene to maza. Samu na yinki beto kesalaka ngolo beto kutakana kintuadi na bampangi ya beto ata kana beto kele na bampasi ya luzingu, to beto melemba na manima ya kisalu?

Yau kele samu na mambote ya beto mosi. Ntumua Paulo sonikaka samu na bayina beto kekutakanaka na bau na kimvuka ti: “Beto banzila bantu ya nkaka na kati na beto.” (Baebre 10:24) Mpova yina melakisa ti beto fuana sosa kuzabana mbotembote na bayankaka. Ntangu beto kena kusosa kuzaba bampangi ya nkaka ya kimvuka, beto ketala ti bayankaka kati na bau nungaka bampasi ya mutindu mosi na ya beto, mpe balenda sadisa beto na kununga.

Yau kekudisaka kinkundi ya beto. Bantu beto kekutakanaka na bau na balukutakanu ya beto bakele tsyeleka bankundi na beto, kansi kaka ve bantu yina beto mezabana na bau. Ntangu ya nkaka, beto kelutisaka ntangu na bampangi samu na kuyangalala kintuadi na mutindu yina mefuanana. Wapi mambote beto kezuaka? Yau kesadisaka beto na kuzaba mpe na kusepela ya kulutila na binkadulu ya mbote ya bampangi na beto, mpe yau kekudisaka luzolo na beto. Na manima, kana bampangi ya beto mekutana na mambu ya mpasi, beto kezingilaka ve samu na kusadisa bau, samu beto mekumaka tsyeleka bampangi. (Bingana 17:17) Kana beto kena kuwisanaka na bampangi nyonso ya kimvuka, beto kelakisa ti beto nyonso beto kekipeke bampangi.​—1 Bakorinto 12:25, 26.

Beto kena kukindisa nge nge sola bankundi yina kena kusala luzolo ya Nzambi. Nge kezua bankundi ya mutindu yina na kati ya Bambangi ya Yehova. Kubika ata kima mosi ve nimina nge kukutakana na beto.

• Samu na yinki kukutakana kintuadi na balukutakanu kele samu na mambote ya beto?

• Wapi kilumbu nge kesepela kukuiza tala kimvuka na beto?

Ntangu baklisto ya ntete vuandaka sala balukutakanu na bau, bavuandaka mingimingi kuyimba banzimbu, kusambila, kutanga Masonukua mpe kubangula yau; kansi, milulu vuandaka ve. (1 Bakorinto 14:26) Nge ketala ti na balukutakanu ya beto mpe, yau kevuandaka tsyeleka mutindu yina.

Malongi kekatukaka na Biblia mpe yakesadisaka. Kimvuka mosimosi kekutakanaka na kilumbu ya sabala to ya lumingu samu na kuwa diskur ya Biblia; yau kezingilaka miniti 30. Yau kelakisaka mutindu Biblia ketubilaka mambu yina metadila luzingu ya beto mpe ntangu na beto. Muntu mosimosi kekindusuaka na kulanda na Biblia na yandi. Na manima ya diskur, beto kevuandaka na Ndongokolo ya “Nzozulu ya Nkengi,” yina kezingilaka wola mosi, mpe muntu nyonso lenda pesa bamvutu na biuvu ya disolo yina mekatuka na Nzozulu ya Nkengi ya ndongokolo. Ndongokolo yango kesadisaka beto na kusadila malongi ya Biblia na luzingu na beto. Kaka ni disolo yina, kimvuka mosimosi kati na bimvuka kuluta 110 000 kelongukaka na yinza ya mvimba.

Yawu kesadisaka beto na kukudisa mayele ya beto ya kulonga. Beto kekutanaka diaka kilumbu mosi na katikati ya semaine samu na balukutakanu tatu yina ba me bokila Luzingu mpi Kisalu na Beto ya Bukristu malongi ke katukaka na Mukanda ya Lukutakanu ya Luzingu mpi Kisalu na Beto ya Bukristu yina ke basikaka nkoso ngonda. Kitini ya ntete, Bimvwama ya Ndinga ya Nzambi, kesadisaka beto ya kuzaba mbote mbote kitini ya biblia yina kimvuka metanga tekila bakuiza na lukutakanu. Kitini ya zole, Kudipesa na Kisalu ya Bilanga kevuandaka na babifuani ya masolo ya Biblia. Mpangi mosi kepeseka malongi samu na kusadisa beto ya kukudisa mutindu na beto ya kutanga mpe ya kutuba. (1 Timote 4:13) Kitini ya nsuka, Zinga Mutindu Bakristu Fwete Zinga kelongisaka beto wapi mutindu kusadila malongi ya Biblia konso kilumbu na kati ya luzingu. Yau kevuandaka na masolo ya biuvu mpe mvutu samu na kukudisa mayele ya beto ya Biblia.

Kana nge mekuiza na balukutakanu ya beto, nge keyangalala na kutala mutindu malongi ya Biblia yina nge kelanda kevuanda kitoko mingi.​—Izaya 54:13.

• Wapi mambu nge kekuwa kana nge mekuenda na balukutakanu ya Bambangi ya Yehova?

• Na wapi lukutakanu nge kezola kukuiza mbala yina kena kuiza?

Na bizizi ya mua mukanda yayi, nge metala mutindu beto Bambangi ya Yehova beto kevuataka mbote na balukutakanu ya beto? Samu na yinki beto keyidikaka mvuatulu ya beto mpe beto kebongisaka nzutu mutindu yina?

Samu na kuzitisa Nzambi ya beto. Yau kele diambu ya kedika ti Nzambi ketulaka meso mingi na ntima ya muntu kuluta mutindu yandi kena kutalanaka na meso ya bantu. (1 Samuele 16:7) Kansi, ntangu beto kekutakanaka samu na kusambila yandi, beto kevuandaka na nsatu ya ngolo ya kulakisa ti beto kezitisaka Nzambi mpe bampangi ya beto. Na kifuani, kana beto mezola kukutana na mfumu mosi, beto kevuataka mbote samu na kulakisa ti beto kena pesa yandi buzitu. Mutindu mosi mpe, mvuatulu mpe kubongisa nzutu na balukutakanu yau kelakisaka ti beto kena zitisa Yehova Nzambi, Mfumu “ya bantu nyonso,” mpe beto kena zitisa kisika yina beto kesambilaka yandi.​—Kubanda 18:25.

Samu na kulakisa ti beto kesadilaka tsyeleka malongi ya beto. Biblia mekindisa baklisto ‘bavuata na kukondua lulendo mpe bavuanda na mabanza ya mbote’ mutindu bantu yina ‘kezitisaka Nzambi.’ (1 Timote 2:9, 10) Kuvuata ‘na kukondua lulendo’ zola tuba kumanga kubenda meso ya bantu na kutala nge samu nge mevuata bilele samu na kukizangula, to bilele yina kena kuvumbula bansatu ya nzutu, to yina mebika bitini ya nzutu na nganda. Mpe, ‘kuvuanda na mabanza ya mbote’ kesadisaka beto na kuzaba kusola bilele yina kele ya mbote, kansi yina ve kele mpambampamba to ya mvuanzi. Kansi malongi yango mebikila muntu na muntu kipuanza ya kusola bilele yandi mezola. Yavuanda ata beto kena samuna ve, mvuatulu na beto ya mbote mpe yina mebonga lenda ‘pesa lukumu na malongi ya Mvuluzi na beto’ mpe ‘kupesa Nzambi nkembo.’ (Tite 2:10; 1 Piere 2:12) Kana beto kena vuata mbote na balukutakanu na beto, yau ketinda bayankaka bayangalala na nsambudulu ya Yehova.

Kubika ve bilele yau nimina nge kukutakana na Yinzo ya Kimfumu. Yau melombama ve nge vuata bilele ya ntalu to ya kitoko mingi samu nge basika kitoko mpe nge talana ya kuvedila na meso ya bantu.

• Samu na yinki yau kele mfunu beto vuataka mbote ntangu beto kena sambila Nzambi?

• Wapi dilongi ya Biblia beto kelandaka na diambu metala mvuatulu mpe kubongisa nzutu?

Kana Mbangi ya Yehova mosi kelongukaka na nge Biblia, beto mekanisa ti nge kesalaka ngolo nge tadila ntete disolo nyonso yina beno kelonguka. Kana nge mesala diaka mutindu yina tekila nge kuenda na balukutakanu, yakesadisa nge mingi. Kana nge mekumisa yau kifu ya nge, yau kevuanda mbote mingi ya kulutila.

Sola ntangu mpe kisika yina nge kelongukila. Wapi ntangu nge ketalaka ti nge kelonguka mbotembote? Na sukasuka, tekila nge banda kisalu, to na mpimpa, ntangu bana melala? Yavuanda kana nge lenda longuka bantangu mingi ve, sola ntangu yikua nge kelonguka mpe kubika kima mosi ve nimina nge kusala yau. Sosa kisika mekondua makelele; kanga kima nyonso yina lenda yiba mabanza na nge, na kifuani radio, televizyo, mpe telefone. Kusambila tekila ya kulonguka kesadisa nge nge tula bangindu nyonso na Mpova ya Nzambi, na kisika ya kutula yau na mitungisi ya kilumbu yina.​—Bafilipi 4:6, 7.

Tula bidimbu na disolo yina nge kena kubongisa, mpe kubama samu na kupesa bamvutu. Sosa kuzaba ntete diambu yina disolo yango metubila. Tadila yintu ya diambu ya disolo to ya bikapu yango, mpe mutindu bayintu ya diambu mosimosi mewisana na yintu ya diambu ya disolo. Tadila bizizi nyonso, mpe tanga biuvu ya mvutukulu yina mesimba bangindu ya mfunu. Na manima, tanga paragrafe mosimosi mpe sosa bamvutu ya biuvu yina bametula kuna. Tanga baverse yina bametula ve bangindu na yau na paragrafe, mpe yindula mutindu yamewisana na disolo. (Bisalu 17:11) Kana nge metala mvutu, tula kidimbu na mua bampova ya mfunu samu yasadisa nge nge tala mbala mosi mvutu ntangu nge kevuanda na lukutakanu. Na manima, ntangu nge kevuanda na lukutakanu, nge lenda nanguna diboko mpe kupesa mvutu ya nkufi na bampova ya nge mosi.

Kana nge kena bongisa masolo mutindu na mutindu yina kesalamaka na balukutakunu sabala na sabala, nge kekudisa nzayilu na nge ya Biblia.​—Matayi 13:51, 52.

• Wapi kifu nge lenda baka samu na kubongisa balukutakanu?

• Wapi mutindu nge lenda kukubama samu na kupesa mvutu na lukutakanu?

Banda ntama, Yehova kezolaka ti bantu ya dibuta mosi balutisaka ntangu kintuadi, samu na kukindisa nguisani ya bau na Nzambi mpe ya bau na bau. (Kulonga Misiku 6:6, 7) Yau yina mabuta ya Bambangi ya Yehova kesolaka kilumbu mosi sabala na sabala samu na kulonguka Biblia kintuadi. Na bantangu yina, bau kesololaka mambu ya Nzambi yina mewisana na bansatu ya dibuta na bau na mutindu yina kesala ti muntu nyonso vuanda mbote. Yavuanda kana nge kele nge mosi, nge lenda mpe kusola ntangu samu nge vuanda kintuadi na Nzambi mpe nge longuka disolo mosi ya Biblia yina nge mesola.

Yau kele ntangu ya kupusana penepene na Yehova. Biblia metuba mutindu yayi: “Beno kuenda penepene na Nzambi yandi [mpe kekwisa] penepene na beno.” (Zaki 4:8) Beto kezabaka Yehova mbotembote ntangu beto kena longuka mambu metadila kimuntu mpe bisalu na yandi na kati ya Biblia, Mpova na yandi. Mutindu ya pete ya kubanda nsambudulu na kati ya dibuta ya beno yau kele ya kubaka mua ntangu samu na kutanga Biblia kintuadi na ndinga ya ngolo. Na kifuani, beno lenda landa manaka ya ntangulu ya Biblia ya sabala na sabala ya lukutakanu ya Luzingu mpe Kisalu. Beno lenda pesa muntu mosimosi ya dibuta kitini yina yandi ketanga, mpe na manima, beno nyonso lenda tubila mambu yina beno melonguka na Biblia.

Yau kele ntangu ya kukumisa nguisani ya dibuta ngolo. Nguisani ya nketo na bakala mpe ya bibuti na bana kekumaka ngolo kana bau kena kulonguka Biblia na kati ya dibuta. Yau fuana vuanda ntangu ya kiese, ya kiyenge mpe yina muntu nyonso kevingilaka na kiese sabala na sabala. Bibuti balenda sola masolo na kutadila bamvula ya bana na bau. Na kifuani, balenda sadila bayintu ya masolo ya nkaka yina kebasikaka na Nzozulu ya Nkengi [La Tour de Garde] mpe ya Telema! [Réveillez-vous !] to na site ya beto jw.org. Beno lenda tubila diaka diambu mosi yina bana beno kutanaka na lukolo mpe mutindu ya kununga yau. Beno lenda kutala mpe manaka ya JW Télédiffusion (tv.jw.org). Beno lenda longuka diaka banzimbu yina bakeyimba na lukutakanu mpe kudia mua kima na manima ya ndongokolo.

Ntangu yina beno kena lutisa sabala na sabala samu na kusambila Yehova kintuadi, yau kesadisa mosimosi na kati ya dibuta yandi yangalala na Mpova ya Nzambi, mpe Nzambi kesakumuna bangolo ya beno.​—Nkunga 1:1-3.

• Samu na yinki beto kesolaka kilumbu mosi na sabala samu na nsambudulu ya dibuta?

• Wapi mutindu bibuti lenda sala ti ntangu yina pesa dibuta nyonso kiese?

Samu na yinki bizizi ya bantu yayi kele na kiese? Yau kele samu bau kele na kati ya mosi ya balukutakanu ya beto ya nene. Mutindu mosi na bisadi ya Nzambi na ntangu ya ntama yina bakaka bansiku ya kukutakanaka mbala tatu na mvula, beto kevingilaka kukutakana na balukutakanu ya beto ya nene. (kulonga Misiku 16:16) Mvula na mvula, beto kevuandaka na balukutakanu ya nene tatu: Lukutakanu ya Nziunga ya Bambangi ya Yehowa yina kesalamaka mbala zole mpe Lukutakanu ya Distrike, yina kesalaka bilumbu tatu. Wapi mambote beto kebakaka na balukutakanu yango?

Yau kekumisaka kimpangi ya beto baklisto ngolo. Mutindu kaka Baisraele vuandaka yangalala kukembela Yehova na ‘kati ya bantu mingi yina mekutakana,’ beto mpe beto keyangalalaka kusambila yandi kintuadi na bampangi ya beto na balukutakanu ya nene. (Nkunga 26:12; 111:1) Na balukutakanu yango, beto kezuaka diluaku ya kukutana mpe ya kulutisa ntangu kintuadi na bampangi ya bimvuka ya nkaka, to ya babuala ya nkaka. Na ntangu ya kupema na midi, beto kekudiaka mua kima kintuadi na bankundi na kisika ya lukutakanu. Yau kesalaka mpe ti balukutakanu ya mutindu yina vuanda ntangu mosi ya kiese. (Bisalu 2:42) Kuna, beto ketalaka sikisiki na meso luzolo yina mevukisa “kimvuka ya beto ya bampangi” na yinza ya mvimba.​—1 Piere 2:17.

Yau kesadisaka beto na kukudisa kinkundi ya beto na Nzambi. Baisraele vuandaka baka mambote na balukutakanu ya nene ya bau, samu kuna bau “bakulaka mbotembote mambu” ya Masonukua yina basansilaka bau. (Nehemia 8:8, 12) Beto mpe keyangalalaka mingi na malongi ya Biblia yina beto kezuaka na balukutakanu ya beto ya nene. Lukutakanu mosimosi kevuandaka na yintu ya diambu yina mekatuka na Biblia. Beto kelongukaka mutindu ya kusala luzolo ya Nzambi na luzingu ya beto na nzila ya badiskur yina kesimbaka ntima, ya badiskur ya bitini mingi, mpe na nzila ya bambonosono. Kuwa masolo ya baklisto yina nungaka mambu ya mpasi yina bakutanaka na yau samu bau kena kuzitisa minsiku ya Nzambi na bilumbu yayi ya mpasi, yau kekindisaka beto mingi. Na balukutakanu ya kizunga, badrame yina bantu kesalaka na bilele mutindu bantu ya ntangu ya ntama to ya bilumbu ya beto, kepesaka beto malongi mingi ya mfunu. Na balukutakanu nyonso, bantu kezuaka mbotokolo samu na kulakisa ti bamekukipesa na Nzambi.

• Samu na yinki balukutakanu ya nene kevuandaka ntangu ya kiese?

• Wapi mambote nge lenda zua kana nge mekuenda na mosi ya balukutakanu?

Mua ntangu fioti tekila Yesu kufua, yandi tubaka mutindu yayi: “Mpe nsangu yayi ya mbote ya Kimfumu kelongama na ntoto ya mvimba samu na kimbangi na bantu ya makanda nyonso, mpe na manima nsuka kekuiza.” (Matayi 24:14, NW) Kansi wapi mutindu kisalu yango zolaka kusalama na yinza ya mvimba? Na kulandaka kifuani yina Yesu bikaka ntangu yandi vuandaka awa na ntoto.​—Luke 8:1.

Beto kesalaka ngolo beto kutana na bantu na bayinzo na bau. Yesu lakisaka balongoki na yandi mutindu ya kusamuna nsangu ya mbote yinzo na yinzo. (Matayi 10:11-13; Bisalu 5:42; 20:20) Bapesaka basamuni ya nsangu ya mbote yango ya ntete bisika yina bafuanaka samuna. (Matayi 10:5, 6; 2 Bakorinto 10:13) Mutindu mosi mpe bubu yayi, kisalu ya beto ya kusamuna mebongisama mbotembote, mpe bakepesaka kimvuka mosimosi kisika yina bafuana samuna. Na mutindu yina, beto kelungisaka mambu Yesu tindaka ya ‘kusamunina bantu mpe kupesa kimbangi mbotembote.’​—Bisalu 10:42.

Beto kesalaka ngolo beto kutana na bantu bisika nyonso yina bau kele. Yesu bikaka diaka kifuani na mutindu yandi vuandaka samuna na bisika ya bantu nyonso, kifuani na ndilu ya maza to penepene ya dibulu yina bantu kekuizaka kuteka maza. (Marke 4:1; Yoane 4:5-15) Beto mpe beto kesololaka na bantu mambu ya Biblia na bisika nyonso: na balabala, na zandu, to na nzila ya telefone. Beto kesamunaka mpe bantu yina kevuandaka penepene na beto, bankundi ya beto ya kisalu to ya lukolo, mpe bampangi ya beto ya dibuta, kana diluaku metalana. Bangolo nyonso yina beto kesalaka mesala ti bamilio ya bantu na yinza ya mvimba kuwa ‘nsangu ya mbote ya mvulusu.’​—Nkunga 96:2.

Yakele na muntu mosi yina nge kesepela kutubila nsangu ya mbote ya Kimfumu ya Nzambi mpe mambote yina yau kenatina yandi na bilumbu kena kuiza? Kubumba ve nsangu yango samu na nge mosi. Banda kutubila bantu nsangu yango malumalu!

• Wapi “nsangu ya mbote” beto fuana samuna?

• Wapi mutindu Bambangi ya Yehova kelandaka mutindu yina Yesu vuandaka samunina?

“Mpasudi-nzila” kevuandaka mbala mingi muntu ya ntete yina mekuenda kisika mosi mpe yandi mezibula nzila samu bayankaka balanda. Yesu vuandaka mpasudi-nzila na mutindu yina, samu Nzambi tindaka yandi awa na ntoto samu yandi samuna nsangu yina kepesaka luzingu, mpe yandi pesaka bantu diluaku ya kuvuka. (Matayi 20:28) Bubu yayi, balongoki na yandi kelandaka kifuani na yandi na mutindu bau kesalaka mingi na kisalu ya ‘kukumisa bantu balongoki.’ (Matayi 28:19, 20) Bantu ya nkaka kevuandaka na diluaku ya kusala yina beto kebokilaka kisalu ya mpasudi-nzila.

Mpasudi-nzila kele nsamuni ya ntangu nyonso. Bambangi ya Yehova nyonso kele bansamuni ya nsangu ya mbote. Kansi, bayankaka kebongisaka mambu ya luzingu ya bau samu bau vuanda bampasudi-nzila ya ngonda na ngonda. Bau kesamunaka bawola 70 ngonda na ngonda. Samu na kusala yau, mingi kesolaka kisalu yina kebakaka bau ntangu mingi ve. Bayankaka kesolamaka samu bavuanda bampasudi-nzila ya nene na bisika yina bansamuni ya Kimfumu kele mingi ve. Bau kesamunaka bawola 130 ngonda na ngonda. Bampasudi-nzila kesepelaka kuvuanda na luzingu ya kusosa mambu mingimingi ve. Bau ketulaka kivuvu na Yehova ti yandi kepesa bau bima yina bau mefuana na yau. (Matayi 6:31-33; 1 Timote 6:6-8) Bayina lenda sala kisalu ya mpasudi-nzila ya ngonda na ngonda ve balenda sola kuvuanda bampasudi-nzila ya ntangu ya kufi, kana diluaku metalana, mpe bakesamuna bawola 30 to 50 na ngonda mosi.

Mpasudi-nzila kesamunaka mingi samu yandi kezolaka Nzambi na bantu. Mutindu mosi na Yesu, beto ketalaka mutindu bantu mingi mekondua nguisani ya mbote na Nzambi. (Marke 6:34) Kansi beto kele na nzayilu yina lenda sadisa bau banda bubu yayi, mpe kupesa bau kivuvu samu na bilumbu kena kuiza. Mpasudi-nzila kezolaka bantu, mpe ni yau ketindaka yandi yandi sadila ntangu mpe ngolo na yandi samu na kusadisa bau bazaba nsangu ya mbote. (Matayi 22:39; 1 Batesalonika 2:8) Na yau, kiminu na yandi kekumaka ngolo; yandi kekumaka diaka penepene na Nzambi mpe yandi kekumaka na kiese mingi.​—Bisalu 20:35.

• Nani kele mpasudi-nzila?

• Yinki ketindaka muntu kuma mpasudi-nzila ya ntangu nyonso?

Malongi ya mambu ya teokrasi kele diambu mosi ya nene na Bambangi ya Yehova banda ntama. Bau kepesaka malongi na bantu yina mekikupesaka ntangu nyonso na kisalu ya kusamuna Kimfumu samu ‘balungisa kisalu ya bau mbotembote.’​—2 Timote 4:5.

Lukolo ya Bampasudi-Nzila. Kana mpasudi-nzila melungisa mvula na yandi ya ntete na kisalu ya ntangu nyonso, bakebokilaka yandi na lukolo ya bilumbu sambanu yina kesalamaka mbala ya nkaka na Yinzo ya Kimfumu yina kele ntama ve na kisika bau kevuandaka. Mfunu ya lukolo yango kele ya kusadisa mpasudi-nzila yandi pusana penepene na Yehova, yandi zaba kusala kisalu na yandi mbote na mambu nyonso, mpe yandi tatamana na kisalu na yandi.

Lukolo ya Biblia samu na Bansamuni ya Nsangu ya Mbote ya Kimfumu. Lukolo yango ya bangonda zole mesalamaka samu na kupesa malongi na bampasudi-nzila yina memesana na kisalu mpe bau mendima kubika buala na bau mpe kukuenda kusala na kisika nyonso yina bakevuanda na nsatu na bau. Bau ketubaka tsyeleka ‘Munu yandi yayi! Fidisa munu!’ mutindu Yesu Klisto yina vuandaka nsamuni ya nsangu ya mbote yina meluta bansamuni nyonso awa na ntoto tubaka. (Izaya 6:8; Yoane 7:29) Kana nge mendima kukuenda vuanda na buala yina kele ntama na yina ya beno, yau lenda lomba nge ndima kuvuanda na luzingu yina mesuasana na yina nge mesanaka na yau. Bantu ya kisika nge mekuenda balenda vuanda na mimeseno yankaka, kuna muini to madidi lenda vuanda ngolo kuluta na buala na beno, nge lenda kuta madia yina nge memesana na yau ata fioti ve. Yalenda lomba nge longuka ndinga yankaka. Lukolo yango kesadisa bampangi ya babakala mpe ya bankento yina kele bampupa mpe bayina mekuelaka, banda mvula 23 ti 65 bakudisa binkadulu ya buklistu yina lenda sadisa bau na kisalu yina bakepesa bau, mpe bakudisa mayele na bau samu Yehova na nkubukulu na yandi bakoka kusadila bau mingi.

Gileade, lukolo ya Watchtower samu na malongi ya Biblia. Na ndinga ya Ebreo, “Gileade” zola zonza “kimbangi.” Banda Gileade salamaka na 1943, bantu kuluta 8 000 mebakaka formasyo na lukolo yango mpe bau tindamaka bamisionere “tii na nsuka ya ntoto ya mvimba, mpe bau pesaka kimbangi ya nene. (Bisalu 13:47) Ntangu bamisionere ya beto kumaka mbala ya ntete na buala Pérou, ata kimvuka mosi vuandaka kuna ve. Kansi bubu yayi, bimvuka mekuma kuluta 1 000. Mpe, ntangu bamisionere na beto bandaka kusamuna na Japon, Bambangi vuandaka ve ata kumi. Kansi bubu yayi, bamekuma kuluta 200 000. Malongi ya Gileade kezingilaka ngonda tanu, mpe bau kelongukaka malongi ya Biblia na bungolo nyonso. Bampasudi-nzila ya nene, bamisionere, bantu yina kele na babiro ya filiale, mpe bakengidi ya kizungidila ni bau bakebokilaka na lukolo yina. Bakebakaka formasyo ya ngolo samu na kuzaba kuvuandisa mpe kuyedisa kisalu na yinza ya mvimba.

• Lukolo ya Bampasudi-Nzila kele na wapi mfunu?

• Banani lenda kota na Lukolo ya Bansamuni ya Nsangu ya Mbote ya Kimfumu?