Kisalu ya pionnier

Beto ke sadilá mbote bangolo ya beto ntangu beto ke kanisá na yina beto lenda sala ya kulutila na kimpeve na kisalu ya Yehova. (1Ko 9:26) Ntangu me bikana kaka fioti na yinza yayi, mpe mambu yina beto ke kanisa kusala ke sadisa beto na kusadila na mayela ntangu ya beto. (Ef 5:15, 16) Na kulongoka ya dikanda, beno lenda solola na bamambu ya kimpeve yina beno ke zola kulungisa na bamvula ya kisalu yina ke kwiza. Mukanda ya lukutakanu yayi ke zonzila bisalu mingi yina beno lenda sala.Ya ke sadisa beno na ku kanisa mpe na ku sambila samu na kuzaba yinki beno lenda lungisa.—Zk 1:5.

Na kifwani, dikanda nyonso lenda sala kintwadi samu na kusadisa muntu mosi na kubanda kisalu ya pionnier. Kana nge me tala ti ya ke vanda mpasi na nge na kulungisa ba heures yina ba ke lombá na ba pionniers, solola na mpangi mosi ya pionnier yina ke na kutaná mambu mosi na nge. (Bin 15:22) Beno lenda bokila pionnier mosi na kulongoka ya beno ya dikanda, mpe kusolola na yandi. Na manima, sonika mutindu nge lenda yidika bamambu yina lenda sadisa nge na kulungisa ba heures ya ba pionnier. Kana nge vandá pionnier na ntama mpe nge biká, kanisa mbote-mbote kana nge ke na ntangu ya kuvutukila yawu ntangu yayi.

Ba ya nkaka na kati ya dikanda ya beno lenda kuma kwandi ba pionniers auxiliaire samu na ngonda mosi to mingi? Nge lenda vanda pionnier auxiliaire na kulutisá ntangu fioti na kisalu ya kusamuna bilumbu nyonso kana nge ke dyaka ve na ngolo ya kusala mingi. Kana kisalu to l’école ya nge ke na kangá nge nzila na kusala mingi na kisalu ya kusamuna na kati ya lumingu, nge lenda sola ngonda yina nge ke vanda na vacances to yina ke na ba samedi tanu (5) to ba dimanche tanu. Na kati ya dikanda, beno baka ntangu ya kukanisa na bamambu ya kimpeve yina beno ke lungisa na mvula ya kisalu yina ke kwiza. Beno sonika na calendrier ntangu yina beno me kanisa kubanda kisalu ya pionnier auxiliaire, mpe yina beno lenda sala samu na kulungisa dikanisi yina.—Bin 21:5.

LUTISA VIDEO VANDA PIONNIER . . . YINA KE NA BUKINDI, MPE NA MANIMA YUFULA KYUVU YAYI:

• Na yina me tadila mutindu Yehova ke kipeke ba yina ke salá bangolo na kukuma ba pionnier, yinki beto lenda longoka na disolo ya mpangi Aamand?