2 Vakolinte
5 Yeeyi twa yi diva asi nzugo zetu ezi zepevhu, tenta, nsene ngava zi zungurura po, Karunga nga ka tu pa nzugo zokukarerera meguru ezi va dira kurugana nomawoko. 2 Monzugo ezi, ose kuhanda morwa kuna kundindira nononkondo mokukagwana nzugo ezi va tu wapaikira meguru, azo ngazi tu kudumika ngwendi yikoverero, 3 yipo nye asi apa ngazi tu kudumika, kapi ngava ya tu gwana ose rutu-rutu. 4 Ose ava twa kara motenta ezi, kuhanda nokukara nosinka sosinene, yeeyi kapi tuna hara kusiga tenta ezi ngwendi kuna kuhutura yikoverero, nye ose kuna hara tu dware zemeguru yipo eparu ngali pinganene po eyi ayi zonauka. 5 Yeeyi Karunga yige ga tu wapaikira eparu eli ntani yige ga tu pa mpepo zendi yipo tu kare nehuguvaro lyeyi yokomeho.*
6 Ose twa kara nehuguvaro ntani twa yi diva asi siruwo esi tuna kara momarutu aga,* kapi tuna kara naHompa, 7 ose twa yi diva eyi morwa ose kwa kara mepuro nye kapisi mweyi yokumona. 8 Ose twa kara nehuguvaro ntani tuna hara kusiga marutu aga yipo tu ka kare naHompa. 9 Yi kare asi nage tuna kara ndi kapi tuna kara nage, ose kukondja yipo a tu tambure. 10 Yeeyi natuvenye ngatu ka sikama* kosipundi saKristusa sokupangwira yipo nkenye ogu ngava ka mu pangure kuliza neyi ga rugana apa ga kere simpe morutu ropanyama, yi kare asi yoyiwa ndi yoyidona.
11 Mokumona asi ose twa diva eyi ayi tanta kutjira Hompa, eyi yiyo atu vaterere vantu va pure eyi atu rongo. Karunga ga tu diva ntani na yi huguvara asi none mwa tu diva asi ose vantu musinke. 12 Kapi tuna hara hena kulikanganga kweni nye tuna hara tu mu ninkise mu tu likangangere yipo mu limburure ava ava likangangere emoneko lyokontunda nye va hana kulikangangera eyi ya kara momutjima. 13 Nsene asi ose kwa rugene yininke ngwendi muntu gokuzaruka, ose kwa yi ruganenene Karunga, ano nsene asi ose kwa rugene yininke ngwendi muntu gonondunge, kwa yi ruganenene mu gwanene mo uwa. 14 Eharo lyaKristusa kututumangeda morwa twa yi kwata egano asi muntu gumwe kwa fira navenye, yeeyi vantu navenye kwa fa. 15 Age kwa fira navenye yipo asi ava vana kuparuka kapisi va paruke moomu vana hara nye va paruke kuliza nomu ga hara ogu ga va fira yiyo va mu pindura koufe.
16 Kutunda apa ngesi kapi hena atu tara vantu kuliza neyi atu mono. Nampili ngomu vamwe vetu nare ngatu tara Kristusa kuliza neyi atu mono nye ngesi kapi tuna kuyirugana hena. 17 Yeeyi nkenye ogu ga kara mouumwe naKristusa, age sisitwa sosipe; yininke yanare ya haga po, ano ngesi yininke yoyipe yiyo yina kara po. 18 Nye yininke nayinye kwa tunda kwaKarunga ogu ga tu kwatakanesa namwene mwaKristusa ntani age kwa tu pa sirugana sokuvatera vantu va likwatakane nage, 19 eyi kutanta asi Karunga kwa kwatakanesa vantu namwene kupitira mwaKristusa, kapi hena a va pangura kononzo dawo ntani age kwa tu pa sirugana sokukwatakanesa vantu kumwe nage.
20 Yipo nye, ose vatumwa ava va karera po Kristusa, ava a ruganesa Karunga mokuzigida vantu kwendi. Ngovakareli po vaKristusa, ose kulikwambera asi: “Likwatakaneni naKarunga.” 21 Kristusa kapi ga zona nye Karunga yiyo ga mu ninkire a kare ngwendi munanzo* yipo tu hungame kosipara saKarunga kupitira mwendi.