Nose kuvhura kulikida eharo kovanavazinyetu pokukara vakaume vawo ntani poku kara kumwe nawo. (2 Kol. 6:11-13) Sinzi setu kwa kara monombungakriste omu mwa kara vanavazinyetu ava va tundilira konontundiliro dokulisiga-siga ntani ava va kara noyikara yokulisiga-siga. Ose kuvhura kulikida eharo kwanavenye pokudemenena koyikara yawo yoyiwa. Apa atu hetekere ko kutara wopeke ngwendi moomu Jehova a va tara, ose ku yi likida asi twa va hara. Ose ngatu hepa kulikida eharo lyenene kovanavazinyetu poudigu wounene. Apa ngau tameka udigu wounene, kupi ko ngatu gwana epopero? Konekeni eyi Jehova ga tanterere vantu vendi va rugane apa va va homokerere Vababironi. Age kwa tente asi: “Hwilireni mononzugo deni, vantu vange, zedireni ko mavero geni. Vandeni tanko noku nali pwa ehandu lyaKarunga.” (Jes. 26:20) Ayo kumoneka asi ose nampo ngatu hepa kukwama mavyukiso gokulifana poudigu wounene. w23.07 6-7 ¶14-16

Kara nonkareso ezi nazi ninkisa vantu va ku mone asi ove muntu gougomoki. Lipura nyamoge asi: ‘Vantu kutara nge asi ame muntu gougomoki, goureru ntani ogu a tambura yininke ndi? Ndi vantu kutara nge asi ame muntu ogu ga hara kutulisa po noveta, goukenya ndi muntu gondino? Ame kupurakena wopeke noku rugana yininke eyi vana hara apa ayi wapere ku yi rugana? Moomu tuna kukara nougomoki, yimo hena ngatu honena Jehova naJesus. Ose twa hepa kukara nougomoki apa yininke ayi litjindji meparu lyetu. Malitjindjo gangoso kuvhura kuturetera maudigu aga atu dili kundindira. Pasihonena, ose kuvhura tu li gwanekere nouvera wohararasi. Ndi ekonomi kuvhura li li tjindje hara-rasi ndi epangero eli ali pangere oku twa tunga kuvhura kudigopeka eparu lyetu. (Muud. 9:11) Kuvhura hena yi tu karere udigu apa mbunga zaJehova azi tu pura tu karere Jehova monkedi zapeke ndi kevango lyapeke. Ose kuvhura ngayi tu tompoke kutambura ukaro woupe, nsene tu rugana yininke yine eyi yina kukwama ko: (1) yi tambura asi ukaro woge una litjindji, (2) nwika kweyi yokomeho, (3) demenena koyininke yoyiwa ntani (4) ruganena wopeke yininke yoyiwa. w23.07 21-22 ¶7-8

Muporofete Ndaniyera kwa kere mudinkantu apa va mu twere kodorongo moBabironi nokulikara ure nembo lyawo. Nye Ndaniyera kwa tetwire vantu ava va mu kwete. Awo kwa dimbwilire asi age kwa kere muwa mosipa ntani asi age kwa tundilire morudi rwaJuda. (1 Sam. 16:7) Morwa nokonda odo, Vababironi kwa mu dewire a rugane mombara. (Ndan. 1:3, 4, 6) Jehova ga here Ndaniyera morwa yeeyi ga kere nonkareso zongwa. Apa Jehova ga uyungire asi Ndaniyera kwa fene ngwendi Nowa ntani Joba, age nampo kwa kere koyiha yonomvhura 20. Yipo nye Jehova kwa tere mudinkantu Ndaniyera asi age muhungami ngwendi Nowa naJoba ava ngava mu karere noulimburukwi nomvhura dononzi. (Gen. 5:32; 6:9, 10; Joba 42:16, 17; Hes. 14:14) Ntani Jehova kwa twikilire kuhara Ndaniyera meparu lyendi nalinye.​—Ndan. 10:11, 19. w23.08 2 ¶1-2