Marukusa

10 Kutunda opo, ta katuka a ze komururani gwaJudeya, mesinya mwina lyaJorodana, makura mbunga tazi ya pongo pwendi. Ta tameke hena kuvaronga ngwendi moomu ga yika. 2 Vafalisayi makura tava mu hedere va mu heteke pokumupura nsene asi mugara kuvhura kuzumba mukadendi. 3 Age ta va pura asi: “Yisinke ga mu pangera Mosesa?” 4 Awo tava limburura asi: “Mosesa kwa pulisilire yokutjanga mbapira zelizumbo, va mu zumbe.” 5 Nye Jesus ta va tantere asi: “Age kwa tulisire po mpangera ezi, morwa kudira kulimburukwa kweni. 6 Nye pesito, ‘Karunga kwa va ungire mugara nomukadi. 7 Eyi yiyo nye mugara a sigire oguhwe nozina, 8 ano mouvali wawo tava kara rutu rumwe tupu.’ Awo kapisi vavali hena, nye awo rutu rumwe tupu. 9 Yipo nye, eyi ga gwanekedesa Karunga, muntu kapisi ayi gaunune.” 10 Apa va kere hena membo, varongwa vendi makura tava mu pura kuhamena yininke eyi. 11 Age ta va tantere asi: “Ogu a zumbu mukadendi a ka kware ko gwapeke, age kuhondera, 12 ndi mukadi nsene a zumba mugara gwendi a ka kware ko gwapeke, age kuhondera.”

13 Makura vantu tava mu retere vanonagona, a ya va kambeke mawoko nokuvatungika, nye varongwa vendi tava tugumukire vakurona owo. 14 Apa ga yi mwene eyi, Jesus ta va handukire nokuvatantera asi: “Sigeni vanonagona va wize kwange, mwa ha va kondera, morwa vantu vangoso yiwo wa hamena Uhompa waKarunga. 15 Yosili nina kumutantera asi, ogu a dili kutambura Uhompa waKarunga ngwendi munonagona ogu, kapi nga za mo.” 16 Age makura ta va lidingire, ta va tungike pokuvakambeka mawoko gendi.

17 Haga za mokugenda monzira, mugara gumwe ta duka a wize kwendi, ta ya mu twire nongoro, ta mu pura asi: “Murongi gomuwa, yisinke nani rugana yipo ngani ka gwane mwenyo gwanarunye?” 18 Jesus ta mu limburura asi: “Morwasinke ono kutumbwira nge asi ni muwa? Kwato ogu ga wapa, ntudi Karunga. 19 Amesi wa diva yipango eyi asi: ‘Walye o dipaga, walye o hondere, walye o vaka, walye o rundire, walye o ninkilire mo wopeke, o fumadeke oguho nonyoko.’” 20 Mugara makura ta mu limburura asi: “Murongi, yininke nayinye oyo ame kwa yi sikisa mo kutunda unona wange.” 21 Jesus ta mu tara, ta mu fire nkenda, ta mu tantere asi: “Kosili sininke simwe simpe wa hepa kurugana, zende o ka randese eyi wa kara nayo, ano yimaliwa o ka yi gavere vahepwe, ngo gwanene po emonazuni meguru. Makura ntani nye no ka wiza, o ya kare murongwa gwange.” 22 Nonkango odo kwa mu guvisire unene, makura ta ka za age ana guwu morwa age kwa wekere yininke yoyinzi.

23 Jesus ta tara kovantu makura ta tantere varongwa vendi asi: “Ayo udigu unene kwava va kara noyimaliwa yoyinzi mokuza moUhompa waKarunga!” 24 Nye nonkango odo kwa tetukisire varongwa. Jesus yipo ga va tanterere asi: “Vana vange, ayo udigu unene kuza moUhompa waKarunga! 25 Ayo ureru kongameru mokuhwilira mezuru lyonsonga, nye udigu komuntu gongawo mokuza moUhompa waKarunga.” 26 Eyi kwa va tetukisire unene, makura tava mu pura asi:* “Nsene yimo ngoso, yilye nye ngava vhura kuparura?” 27 Makura Jesus ta va tara, ta va limburura asi: “Kovantu eyi udigu, nye kapisi kwaKarunga, yeeyi kwaKarunga nayinye ureru.” 28 Peturusa makura ta mu tantere asi: “Tara si! Ose kwa siga nayinye yiyo atu kukwama.” 29 Jesus ta tanta asi: “Yosili nina kumutantera asi kwato ogu a sigi embo lyawo ndi vakuru novamumbya vendi ndi vampanza vendi ndi oguhwe nozina ndi vana vendi nomapya gendi, morwa kukara murongwa gwange nombudi zongwa 30 ogu nga dira kugwana yoyinzi kupitakana yikando 100 kweyi ana kuzumbanesa ngesi. Age nga gwana mambo novakuru novamumbya novazinya novana nomapya nampili va mu hepeke ntani mouzuni* wokomeho nga gwana mwenyo gwanarunye. 31 Nye wovanzi ava ava howo ngava hulilira, ano wokuhulilira yiwo ngava hova.”

32 Apa va kere monzira zokukanduka va ze koJerusarema, Jesus kwa pitire komeho zawo, nye varongwa vendi kwa tetukire, ano ava va mu kweme, tava tukuka. Makura ta zigida hena varongwa vendi ronambali, makura ta va tantere eyi nayi ka mu horokera asi: 33 “Tareni, tatu kandukeni koJerusarema, ano MunwaMuntu ngava mu gava kovapristeli wovanene nokovalirongi womatjangwa. Yiwo ngava mu tokwera konomfa nokumugava kovantu wokonomuhoko dapeke, 34 awo ngava ka mu swaura nokumufizira ntani ngava mu sopora,* makura ngava ka mu dipage, nye konyima zomazuva gatatu, nga pinduka koufe.”

35 Jakopo naJohanesa vana vaSebede, tava mu hedere, tava mu tantere asi: “Murongi, tuna hara o tu ruganene nkenye eyi natu kupura.” 36 Age ta va pura asi: “Yisinke muna hara nani mu ruganena?” 37 Awo tava limburura asi: “Tu pulisira tu ka hingire gumwe korulyo roge ano gumwe korumoho roge, mouyerere woge.” 38 Nye Jesus ta va tantere asi: “One kapi muna diva eyi muna kuhundira. Nkinda* ezi nina kunwa none kuvhura kuzinwa, ndi va mu kuhwe nekuho eli vana kukuhwisa nge ndi?” 39 Awo tava mu limburura asi: “Nhi, kuvhura.” Makura Jesus ta va tantere asi: “Nkinda ezi nina kunwa, none ngomu zi nwa, ano ekuho eli vana kukuhwisa nge, none ngava li mu kuhwisa. 40 Nye yokukahingira korulyo ndi korumoho rwange, ame nokuvhura si kuyigava, ayo kwa hamena tupu vaava va yi wapaikira.”

41 Apa vakwawo murongo va yi zuvhire oyo, tava handukire Jakopo naJohanesa. 42 Nye Jesus ta va zigida, ta va tantere asi: “Mwa diva asi ava ava pangere nomuhoko, kupangera nomuhoko dawo moomu vana harere, ano mapangero kuruganesa nonkondo dago mokuninkilira mo vantu. 43 Nye kweni one ya ha kara ngoso, ogu ga hara kukara gomunene mokatji keni, a kare mukareli gweni, 44 ano ogu ga hara kukara gokuhova, a kare ngwendi mupika gwanavenye. 45 Nampili MunwaMuntu nage si kapi ga wizira asi va ya mu karere, nye a ya karere nokuyagava mwenyo* gwendi mokuyazowora wovanzi.”

46 Kutunda opo tava wiza koJeliko. Nye apa ga pwege moJeliko kumwe novarongwa vendi ntani nombunga, Baratimeusa (munwaTimeusa), mutwiku ogu nga hundagere, kwa hingilire konontere donzira. 47 Apa ga zuvhire asi Jesus goMunasareta ana kupita po, ta zigire asi: “Jesus, MunwaNdafita, fira nge nkenda!” 48 Sinzi sawo tava mu tugumukire asi a mwene, nye age ta zigire unene asi: “MunwaNdafita, fira nge nkenda!” 49 Makura Jesus ta sikama nokuuyunga asi: “Mu zigideni a wize kwange.” Awo tava zigida mugara ogo gomutwiku pokumutantera asi: “Wa ha tjira! Katuka, kuna kukuzigida.” 50 Age ta katuka usimbu, ta hutura sikoverero sendi sokontunda a ze kwaJesus. 51 Jesus makura ta mu pura asi: “Yisinke ono hara nani kuruganena?” Mugara gomutwiku ta mu limburura asi: “Murongi,* ninka nge ni mone hena.” 52 Jesus makura ta mu tantere asi: “Zende. Epuro lyoge lina kuverura.” Poopo ngoso, ta tameke kumona makura ta mu kwama.