Varoma
6 Eyi kutanta nye asi twa hepa kutwikira kuzona yipo Karunga a tu likide nkenda zendi zonene ndi? 2 Hawe! Mokumona asi nonzo kapi adi tu pangere hena, ngapi natu twikira kuzona? 3 Ndi kapi mwa yi diva asi natuvenye ava va kuhwira mwaJesus Kristusa, kwa tu kuhwira hena monomfa dendi? 4 Yipo nye, Karunga kwa tu vhumbika kumwe nage mekuho lyetu kupitira monomfa dendi yipo asi moomu tupu Kristusa va mu pindura koufe kupitira mouyerere woGuhwe, nose twa hepa kuparuka eparu lyepe. 5 Nsene asi ose kwa likwatakana nage monomfa dendi, ngatu ka likwatakana hena nage mevhumbuko lyendi. 6 Yeeyi twa yi diva asi nkareso zetu zanare kwa zi pampara kumwe nage kositji yipo marutu getu gononzo ga dire kukara nononkondo, tu dire hena kukara vapika wononzo. 7 Yeeyi ogu a fu, kumanguruka* mo mononzo dendi.
8 Ntani hena, nsene asi ose kwa fa kumwe naKristusa, twa yi pura asi ngatu ka paruka hena kumwe nage. 9 Yeeyi twa yi diva asi Kristusa va mu pindura koufe, kapi hena nga fa ntani nomfa kapi hena da kara nononkondo kwendi. 10 Yeeyi age kwa fire rumwe tupu mokugusa po nonzo nye ngesi age kuna kuparuka mokurugana mpango zaKarunga. 11 Mokulifana, ligazareni nyamweni asi mwa fa kononzo nye kuna kuparuka mokusikisa mo mpango zaKarunga mwaJesus Kristusa.
12 Yipo nye, mwa ha pulisira nzo zi pangere ngwendi hompa momarutu geni gokufa asi mu sikise mo madowo gorutu. 13 Mwa ha gava marutu* geni kononzo asi ga kare yiruganeso koyirugana yoyidona, nye ligaveni kwaKarunga ngovantu ava va pindura koufe ntani gaveni marutu* geni kwaKarunga ga kare yiruganeso youhungami. 14 Mokumona asi one kapi mwa kara konhi zoveta nye monkenda zaKarunga zonene, nzo za ha mu pangera hena.
15 Eyi kutanta nye asi twa hepa kutwikira kuzona morwa kapi twa kara konhi zoveta nye monkenda zonene zaKarunga ndi? Hawe! 16 Diva asi ogu o limburukwa nkenye apa, ove ngoso mupika gwendi. Nsene asi one vapika wononzo, ngomu fa. Nye nsene asi one vapika vaKarunga ntani kumulimburukwa, ngomu kara vahungami. 17 Nye ame tani pandura Karunga morwa nampili ngomu mwa kere nare vapika wononzo nye one ngesi kuna kulimburukwa nomutjima nagunye erongo eli va mu ronga. 18 Mokumona asi va mu mangurura mo mononzo, one ngesi kuna kara vapika wouhungami. 19 Ame kuna kuruganesa nonkango edi va diva vantu morwa upirankondo worutu rweni. Ngwendi moomu mwa geve marutu geni mokurugana yirugana yokunyata neyi yoyidona, ngesi gaveni marutu geni moupika weyi yokuhungama, mu rugane yokupongoka. 20 Yeeyi apa mwa kere vapika wononzo, kapi mwa hepere kurugana youhunga.
21 Yisinke mwa gwanenene mo moyirugana yeni? Yininke eyi muna kulifa ngesi nomuga. Yeeyi yininke oyo, kutwaredesa konomfa. 22 Mokumona asi one kwa mu zowora mo mononzo noku kara vapika vaKarunga, ruganeni nye yirugana yokupongoka eyi ngayi mu twaredesa komwenyo gwanarunye. 23 Yeeyi mfeto zononzo nomfa nye uhwi ou a gava Karunga, mwenyo gwanarunye mwaJesus Kristusa, Hompa gwetu.