Mateusa
19 Apa Jesus ga mene kuuyunga nonkango edi, makura ta tundu moGalireya a ze komururani gwaJudeya, mesinya mwina lyaJorodana. 2 Nombunga dononzi kwa mu kweme, makura ta ka va verwira kooko.
3 Vafalisayi makura tava wiza kwendi va mu heteke pokumupura asi: “Mugara kuvhura kuzumbira mukadendi mokonda nkenye ezi ndi?” 4 Age tava limburura asi: “Kapi mwa resa asi ogu ga ungire muntu petameko, kwa va ungire mugara nomukadi 5 nokutanta asi: ‘Eyi yiyo nye mugara a sigire oguhwe nozina, a hame kwamukadendi, ano mouvali wawo tava kara rutu rumwe tupu’ ndi? 6 Awo kapisi vavali hena, nye awo rutu rumwe tupu. Yipo nye, eyi ga gwanekedesa Karunga, muntu kapisi ayi gaunune.” 7 Awo tava mu pura asi: “Morwasinke nye Mosesa ga pangerere asi mukadi va hepa kumupa mbapira zelizumbo, va mu zumbe?” 8 Age ta va limburura asi: “Morwa kudira kulimburukwa kweni, yiyo ga yi sigilire Mosesa yokuzumba vakadi veni, nye kapisi yimo ya kere ngoso petameko. 9 Ame tani mu tantere asi ogu a zumbu mukadendi, pwa hana konda zehondero,* a ka kware ko gwapeke, age kuhondera.”
10 Varongwa tava mu tantere asi: “Nsene asi yimo va likara ngoso vantu namukadendi, yoyiwa po nani yokudira kukwara.” 11 Age ta va tantere asi: “Kapisi nkenye ogu kuvhura a sikise mo eyi nina kutanta, ntudi vaava va pa uhwi.* 12 Yeeyi pogeli marenga aga va hampuruka ngorooro ntani poveli vantu vamwe ava va ninka va kare marenga,* nye vamwe kapi ava kwara yipo va liture mo unene mweyi yoUhompa waKarunga. Nkenye ogu ana hara kukara mudike, nawa tupu.”
13 Makura tava mu retere vanonagona, a ya va kanderere pokuvakambeka mawoko, nye varongwa tava tugumukire vakurona owo. 14 Nye Jesus ta tanta asi: “Sigeni vanonagona va wize kwange, mwa ha va kondera, morwa vantu vangoso yiwo wa hamena Uhompa wemeguru.” 15 Age ta va kambeke mawoko gendi makura ta ka za.
16 Mumati gumwe ta mu wizire, ta mu pura asi: “Murongi, yisinke yoyiwa nani rugana yipo ngani ka gwane mwenyo gwanarunye?” 17 Age ta mu limburura asi: “Morwasinke ono kupulira nge kuhamena yoyiwa? Ogu ga wapa po ntudi Karunga. Ano nsene ono hara kukagwana mwenyo gwanarunye, wa hepa kusikisa mo yipango.” 18 Age ta mu pura asi: “Yipi yo?” Jesus ta mu limburura asi: “Walye o dipaga, walye o hondere, walye o vaka, walye o rundire, 19 o fumadeke oguho nonyoko ntani hara mukweni moomu wa lihara nyamoge.” 20 Mumati makura ta mu tantere asi: “Ame kwa yi sikisa mo nayinye oyo. Yisinke hena na dira kusikisa mo?” 21 Jesus ta mu limburura asi: “Nsene ono hara kusikilira mo,* zende o ka randese yiweka yoge, ano yimaliwa o ka yi gavere vahepwe, ngo gwanene po emonazuni meguru. Makura ntani nye no ka wiza, o ya kare murongwa gwange.” 22 Mumati apa ga yi zuvhire oyo, ta ka za age ana guwu morwa age kwa wekere yininke yoyinzi. 23 Jesus makura ta tantere varongwa vendi asi: “Yosili nina kumutantera asi udigu unene komuntu gongawo mokuza moUhompa wemeguru. 24 Tani mu tantere hena asi ayo ureru kongameru mokuhwilira mezuru lyonsonga, nye udigu komuntu gongawo mokuza moUhompa waKarunga.”
25 Apa varongwa va yi zuvhire eyi tava tetuka nokutanta asi: “Nsene yimo ngoso, yilye nye ngava parura?” 26 Jesus ta va tarurura, makura ta va tantere asi: “Kovantu eyi udigu, nye kwaKarunga nayinye ureru.”
27 Peturusa yipo ga mu tanterere asi: “Tara si! Ose kwa siga nayinye yiyo atu kukwama. Yisinke eyi ngatu ka gwanena po?” 28 Jesus ta va limburura asi: “Yosili nina kumutantera asi morwa one varongwa vange, none ngomu ka hingira poyipundi 12, ngomu pangure mazimo 12 gaIsraeli, apa nga hingira MunwaMuntu posipundi souyerere wendi apa ngava ninka nayinye yi kare yoyipe. 29 Ntani nkenye ogu a sigi embo lyawo ndi vakuru novamumbya vendi ndi oguhwe nozina ndi vana vendi nepya lyendi morwa kukara murongwa gwange, nga gwana yoyinzi kupitakana eyi ana kuzumbanesa ntani nga ka gwana mwenyo gwanarunye.
30 “Nye wovanzi ava ava howo ngava hulilira, ano wokuhulilira yiwo ngava hova.