Deuteronomium

34 Makura Mosesa ta tundu momazana gaMowaba a ronde koNdundu zaNebo, kondundu zaPisiga ezi za livyuka naJeliko. Ano Jehova ta mu likida sirongo nasinye, kutundilira koGiliyata dogoro koDana, 2 ntani nosirongo nasinye saNafitali, Efurayimi, Manase ntani sirongo nasinye saJuda dogoro kefuta lyokoUtokero,* 3 koNegebu, mukunda gwaJorodana, muramba gwaJeliko, sitata soyitji yonongone dogoro koSowara.

4 Jehova makura ta tantere Mosesa asi: “Esi yiso sirongo na tumbwidira Abirahamu, Isaka naJakopo asi ngani si pa ruvharo* rwawo. Ame nina kupulisire o si mone, nye ove kapi ngo za mo.”

5 Makura Mosesa mukareli gwaJehova ta fire kooko, mosirongo saMowaba ngwendi moomu ga yi tente Jehova. 6 Makura age* ta mu horeke momuramba gomosirongo saMowaba, ogu gwa livyuka naBete-peoro ntani kwato ogu ga diva oku va mu horeka dogoro naina. 7 Apa ga dogorokere Mosesa, nomvhura dendi kwa kere 120. Meho gendi kwa kere mawaawa ntani age simpe kwa kere nononkondo. 8 Vaisraeli kwa lilire Mosesa mazuva 30 momazana gaMowaba, makura mazuva gokulira Mosesa taga piti.

9 Josuwa munaNunu kwa zulire unongo, morwa Mosesa kwa mu kambekere mawoko gendi ano Vaisraeli kwa mu purakenene ntani kwa rugene ngwendi moomu Jehova ga pangerere Mosesa. 10 MoIsraeli kapi mwa kere hena muporofete gokufana ngwendi Mosesa, ogu ga divire nawa Jehova. 11 Age kwa rugene yidiviso noyitetu eyi ga mu tanterere Jehova a rugane komeho zaFarawo novakareli vendi navenye ntani nosirongo sendi nasinye saEgipite. 12 Mosesa kwa likidire hena nonkondo dononene komeho zoVaisraeli navenye.