Mbilive zokuhova kwaTimoteusa
5 Walye o tugumukire vagara wovakondi, nye va uyungisa ngwendi moomu o uyungisa oguho ano vadinkantu wovagara va uyungisa ngwendi vamumbya woge novakuru woge wovagara. 2 Vakadi wovakondi va uyungisa moomu o uyungisa onane woge ano vadinkantu wovakadi ngwendi moomu o uyungisa vamumbya woge novakuru woge wovakadi, va tekura monkedi zoukuhuki.
3 Fumadeka nokupakera mbili vafisavaya vawo ava vana hepa evatero.* 4 Nye nsene pweli mufisayendi ogu ga kara novana ndi vatekuru, vana ava ndi vatekuru va hove tanko kulikida asi va tjira Karunga pokupakera mbili vepata lyawo. Va gave kovakurona vawo nokovazinyakurwawo eyi ya va fira, yeeyi eyi yiyo ga hara Karunga. 5 Mufisayendi ogu ga dira kukara noyuma kwa huguvara mwaKarunga ntani kutwikira kulikwambera nokukanderera masiku nomutenya. 6 Nye mufisayendi ogu a lizumbilire mokuhafesa madowo gendi goruhonda, nare ga fa nampili ngomu ana kuparuka. 7 Twikira kuvapa mapukururo* aga, yipo va dire kuswauka. 8 Nsene pweli ogu a dili kupakera mbili vekoro lyendi unene po vemembo lyendi, ogo epuro a patana ntani udona wendi wa pita wogu ga dira kupura.
9 Mufisayendi va mu tjange pelikwamo nsene ga pitakana nomvhura 60 ntani nsene kwa kere tupu nomugara gumwe 10 ntani nsene kwa divikwira koyirugana yendi yoyiwa ngwendi kurera vanona nokutambura vagenda nokukuhwa nompadi dovapongoki nokuvatera ava vana kara moudigu ntani nsene kwa litura mo moyirugana nayinye yoyiwa.
11 Ano vafisavaya vawo wovadinkantu mwa ha va tjanga pelikwamo, yeeyi madowo gawo gokuligwanekera panyama neisi naga donganesa sirugana sawo kwaKristusa makura va tokore kukwara, 12 ngava kare nousima morwa va teza po etumbwidiro lyawo lyokuhova. 13 Ntani hena, yipo va dire kulironga udwa, va gendagure tunda embo zende embo, kapisi udwa welike nava lironga, nye hena norugambo ntani nokulitura moyininke yovantu oku tava uyunga yininke eyi ya dira kuvafira. 14 Yipo nye asi, ame kwa hara asi vafisavaya vawo wovadinkantu va kware nokurera vanona, va gendese embo yipo va dire kupa mpito varwanesi va va uyunge momudona. 15 Nayene vafisavaya vawo vamwe nare va zumba usili makura yiyo ava kwama Satana. 16 Nkenye mukadi gomupuli ogu ga kara novanekoro wovafisavaya vawo, a va pakere mbili yipo yi dire kugava mudigo kombungakriste. Monkedi ezi azo kuvhura zi kwafe ava vana hepa evatero.*
17 Vakuronambunga ava ava pitisire monkedi zongwa va fira kuvafumadeka unene, unene po ava va litura mo unene mokuuyunga nokuronga. 18 Yeeyi etjangwa kutanta asi: “Walye o manga ntwedu kokana apa azi hwaga mbuto,” ntani hena asi: “Murugani ga fira mfeto zoyirugana yendi.” 19 Wa ha rugana ko yuma nsene gumwe a pa mukuronambunga usima, ntudi pa kare umbangi wovantu vavali ndi vatatu. 20 Pukurura moyitarameho navenye ava ava zono, yipo yi kare erondoro kwanavenye.* 21 Tani kuganesa komeho zaKarunga naJesus Kristusa ntani komeho zovaengeli ava ga horowora asi o konakone nawa yininke nayinye komeho o ture po etokoro pwa hana elitondororo nompongo.
22 Wa ha genderera kukambeka mawoko goge nkenye mugara* ndi asi o lihameke mononzo dava wopeke nye kara ono kuhuka.
23 Wa ha nwa mema gelike* nye o nwe ko vhinyu zonsesu morwa udigu wezimo lyoge ntani morwa kuvera-vera koge.
24 Nonzo davamwe kulihorora poruzera, ano eyi kuvaninkisa va va pangure, nye davamwe kuyalihorora konyima zosiruwo. 25 Mokulifana, yirugana yoyiwa kudivikwa, ano eyi ayi dili kudivikwa kuyadivikwa konyima zosiruwo.