KoVaefeso

4 Ame Paurusa ogu na kara modorongo morwa Hompa gwetu, tani mu likwambere mu paruke kuliza neyi va mu zigidira. 2 Omu linunupike nkenye apa nokukara nougomoki oku tomu lididimike nokulitekura neharo, 3 kareni nombili nava wopeke nokukondjera kukara mouumwe ou mwa gwana kupitira mompepo zokupongoka. 4 Rutu rumwe tupu rwa kara po, ano mpepo nazo zimwe tupu za kara po, moomu tupu lya kara po ehuguvaro limwe eli va mu zigidira. 5 Hompa gumwe tupu, epuro limwe tupu, ekuho limwe tupu, 6 Karunga gumwe tupu, Guhya gwanavenye ogu ga pitakana navenye, age kuruganesa navenye ntani mpepo zendi kurugana mwanavenye.

7 Nkenye gumwe gwetu kwa gwana nkenda zonene kwaKarunga ntani Kristusa yige ga pa nkenye gumwe gwetu uhwi owo. 8 Yeeyi kwa tanta asi: “Apa ga rondere keguru, age kwa pitwire vanadorongo ntani age kwa geve vagara ngomauhwi.” 9 Yisinke adi tanta nonkango edi asi ‘age kwa rondere’? Ado kutanta asi age kwa hovere kuhumburuka pevhu. 10 Ogu ga humburukire pevhu, kwa rondere hena kondaga-ndaga zeguru yipo yi sike mo nayinye.

11 Age kwa horowora vamwe va kare vapositoli, vamwe vaporofete, vamwe vaudisi,* vamwe vasita ntani vamwe varongi 12 nositambo sokudewira vapongoki mosirugana sokuvatera wopeke yipo va tunge rutu rwaKristusa, 13 dogoro natuvenye ngatu kare nepuro limwe tupu nokugwana ediwo lyene-lyene kuhamena MunwaKarunga yipo ngatu kare ngwendi vakurona, ngatu ka sike koukurona wene-wene ngwendi Kristusa. 14 Yipo nye asi kapisi tu kare ngwendi vanona, morwa ogu a kwama marongo goyimpempa yovantu ava ava gendi wopeke konhi, nga kara ngwendi sikepa esi a zi yeragwire noku-noku mpepo nomankupi. 15 Atu uyungeni usili, eharo ngano li tu ninkise tu kure mwanayinye yipo tu li ze naKristusa, mutwe gwetu. 16 Kwendi yiko va gwanekedesa nawa rutu narunye ntani maruha nagenye kulivatera, yipo rutu ru wapere. Apa nkenye ruha aru rugana nawa sirugana saro, eyi kuvatera rutu ru kure yipo rutu narunye ru pame meharo.

17 Yipo nye nina kumupamperekedera mwaHompa asi hagekeni kuparuka ngwendi vantu wokonomuhoko dapeke, yeeyi awo kuparuka kuliza nomagazaro gawo gougova.* 18 Awo kwa kara momundema panandunge ntani awo kwa kara ure neparu eli lya hamena kwaKarunga, yeeyi awo kapi va hara kudiva Karunga, morwa nomutjima dawo kwa kukuta.* 19 Awo kapi ava kwata egano youhunga, yiyo va lisigilira monkareso zokunyata,* yipo va rugane nkenye apa yokudira kukuhuka.

20 Nye one kapisi yimo ngoso mwa lironga kuhamena Kristusa, 21 Jesus kwa rongere usili. Nsene mwa mu zuvhire ntani kwa mu ronga kupitira mwendi, one mwa diva nawa-nawa yininke eyi. 22 One kwa mu ronga mu huture muntu gomukuru-kuru ogu nga pangere nkareso zeni zanare, yeeyi nkareso zeni zanare kwa zi zonagura madowo geni aga aga mu pukisa. 23 Twikireni kuwapukurura omu omu gazara* 24 ntani dwareni muntu gomupe ogu va sita kuliza nompango zaKarunga mouhungami nomoulimburukwi wene-wene.

25 Moomu nye ngoso mwa zumba yimpempa, nkenye gumwe gweni a uyunge namukwawo yousili, morwa natuvenye maruha gorutu rumwe tupu. 26 Nsene mu handuka, mwa ha zona, mwa ha tarerera ezuva li ka toke one simpe ha mwa handukira, 27 mwa ha pa Muzonaguli mpito.* 28 Ogu a vaka, ga ha vaka hena nye a rugane unene yirugana yoyiwa nomawoko gendi, yipo a kare noyuma eyi na vhura kugava kogu ana yi hepa. 29 Motuna tweni mwa ha pwaga nonkango dokunyata nye mu pwage nonkango donongwa dokunkondopeka, ngamoomu ya fira, yipo di korangede ava vana kudizuvha. 30 Ntani hena, mwa ha guvisa mpepo zaKarunga zokupongoka. Yeeyi azo kwa zi mu pa ngosinongweneso asi ngava mu mangurura kupitira mosizoweseso mezuva lyezoworo.

31 Kandwireni kwina nyengo nazinye nehandu noukenya nokuliharukira-harukira nononkango donondona ntani noudona naunye. 32 Lifira-fireni nkenda nokulidongwenena-dongwenena po nomutjima nagunye ngamoomu ga mu dongwenena po Karunga mwaKristusa.