Mbilive koVahebeli

5 Nkenye mupristeli ogu ava horowora mokatji kovantu, kumuhorowera a vatere vantu koyininke yokuhamena kwaKarunga, yipo a gave mauhwi nononzambo dononzo. 2 A kare nonkenda* nava ava dili kuzuvha ntani nava ava zono, morwa nage ga kara nomaupirankondo gamwene, 3 eyi yiyo ga hepera kugava nzambo zononzo dendi moomu a gava nzambo zononzo dovantu.

4 Muntu kapi a li pe mwene situmbukira esi, nye age kusigwana kwaKarunga, ngwendi moomu ga si gwene Arona. 5 Kristusa nage kapi ga liyererepekere mwene pokukara mupristeli gomunene, nye Karunga ga mu yererepekere ogu ga tente asi: “Ove munange, naina ame nina kara oguho.” 6 Metjangwa limwe age kwa tanta hena asi: “Ove mupristeli gwanarunye ngwendi Merekisedeki.”

7 Apa Kristusa ga kere pevhu,* age kwa likwamberere nokukanderera oku ta kugu noruhodi, kogu ga ya mu parwire monomfa, age kwa mu zuvhire morwa kwa tjira Karunga. 8 Nampili ngomu ga kere munwaKarunga, age ga lirongere ulimburukwi momahepeko aga ga ligwanekerere nago. 9 Konyima zapa ga limburukwire mwanayinye, age kwa gava mpito kwanavenye ava ava mu limburukwa ngava ka zowokerere, 10 morwa Karunga ga mu horowora a kare mupristeli gomunene ngwendi Merekisedeki.

11 Tuna kara neyi yoyinzi yokuuyunga kumuhamena, nye udigu kuyifaturura morwa kapi muna hara kuyikwata egano. 12 Yeeyi nampili ngomu ngesi muna fire kukara varongi, simpe mwa hepa gokumuronga yininke yokuhova eyi mwa lirongere mononkango daKarunga ntani one hena masini mwa hepa, kapisi nondyaandya. 13 Yeeyi nkenye ogu a twikire kunwa masini, kapi ga diva kuhamena nonkango daKarunga douhungami, yeeyi muntu gwangoso munona. 14 Nye nondyaandya, dovantu ava va lironga kuruganesa nondunge dawo mokuhangura uwa koudona.