Buke zaRukasa
2 Momazuva ogo, hompa gwaRoma* Augusitusi kwa geve mpangera asi vantu navenye va ka litjangese. 2 (Elitjangeso lyokuhova kwa horokere apa Kireniusi ga kere mupangeli gwaSiliya.) 3 Nkenye ogu kwa zire kositata esi va mu hampurukira a ka litjangese. 4 Josefa nage kwa tundire moNasareta, sitata somoGalireya, a ze koJudeya, sitata saNdafita esi ava tumbura asi Beterehema, morwa age kwa kere gomoruvharo rwaNdafita. 5 Age kwa zire a ka litjangese kumwe namukadendi Mariya, ogu ga kere nomarutu gavali. 6 Ngomu va ka kere oko, siruwo sokuhampuruka tasi siki mo. 7 Ta hampuruka munona gomumati, mbeli zendi, ta mu dingire pomakehe nokumurangeka mekungu lyoyimuna, morwa kapi pwa kere nzugo zokurara.
8 Momukunda ogo, mwa kere vasita ava ngava takamesa yimuna masiku mezana. 9 Hararasi, muengeli gwaJehova ta va monekere, ano uyerere waJehova tau va minikire makura tau va kwata woma wounene. 10 Nye muengeli ta va tantere asi: “Mwa ha tjira, ame tani mu tantere mbudi zongwa zoruhafo ezi ngava zuvha vantu navenye. 11 Yeeyi naina, vana mu hampurukire muzowoli, Hompa Kristusa, mositata saNdafita. 12 Esi yiso sidiviso: Nomu ka gwana mukeke vana dingire momakehe ntani kuna mu rangeke mekungu lyoyimuna.” 13 Poopo ngoso, vaengeli wovanzi tava wiza makura tava hamberere Karunga pokutanta asi: 14 “Hamberereni Karunga gemeguru, ano mbili zi kare povantu ava ga hara.”
15 Apa vaengeli va tengwire meguru, vasita tava litantere vene navene asi: “Tu zeni koBeterehema, tu ka tare eyi ana tu horwere Jehova.” 16 Tava genderere kuza, tava ka gwana Mariya naJosefa, ano mukeke age kuna rara mekungu lyoyimuna. 17 Apa va yi mwene eyi, makura tava divisa mbudi ezi va va tanterere kuhamena munona ogo. 18 Navenye ava va yi zuvhire, kwa tetukire kweyi va va tanterere vasita, 19 nye Mariya ta yi pungura komutjima nokugazadara ko eyi yina kutanta. 20 Vasita makura tava tengura, oku tava hamberere Karunga kwanayinye eyi va zuvhire neyi va mwene, moomu va yi va tanterere.
21 Konyima zomazuva ntantatu, apa sa sikire mo siruwo sokumurugana yovamba, tava mu ruku Jesus, edina eli ga va pere muengeli komeho va ka mu hampuruke.
22 Ntani apa sa sikire mo siruwo sekuhuro kuliza noVeta zaMosesa, tava mu twara koJerusarema va ka mu likide kwaJehova, 23 moomu tupu va yi tjanga moVeta zaJehova asi: “Nkenye munona gomumati gombeli va mu pongwere Jehova.” 24 Tava gava nzambo kuliza noVeta zaJehova ezi asi: “Nonkutji mbali ndi nomputukuwa mbali.”
25 Pwa kere mugara gedina Simiyoni moJerusarema, age kwa kere muhungami ntani kwa tjilire Karunga, age kwa ndindilire siruwo esi Karunga nga zowora Vaisraeli ntani mpepo zokupongoka kwa kere pwendi. 26 Ntani hena, mpepo zokupongoka kwa yi mu horwerere asi kapi nga fa age ga hana kumona Kristusa ogu nga tuma Jehova. 27 Mpepo zokupongoka ta zi mu tumangeda a ze kontembeli, ano apa vakondi va retere munona Jesus va ya mu rugane kuliza noVeta, 28 ta gusa munona a mu kwaterere makura ta hamberere Karunga, ta tanta asi: 29 “Hompa Mupangeli gwanayinye, mukareli goge ngesi kuvhura nye a fe moomu wa tente, 30 morwa meho gange gana mono ezoworo 31 eli wa wapaikira vantu navenye, 32 uzera ou ngau gusa po mundema ogu gwa kudumika nomuhoko ntani site esi ngasi minikira Israeli, vantu woge.” 33 Oguhwe nozina kwa va tetwire eyi ga uyungire kuhamena munona ogo. 34 Simiyoni makura ta va tungike, ta tantere Mariya, ozina womunona asi: “Munona ogu nga pundukisa vamwe moIsraeli, ano vamwe ngava katwisa, wovanzi ngava mu uyunga momudona nampili ngomu Karunga ngava pa sidiviso asi nage ga kara 35 (nye ove Mariya, rufuro ngaru tomona mutjima goge*), yipo magazaro govantu wovanzi ngaga lihorore.”
36 Pwa kere muporofete gomukadi gedina Ana, munwaFanuera gomorudi rwaAseli. Age kwa kurupire unene ntani kwa parukire namugara gwendi nomvhura ntambali kutunda apa va likwere, 37 age kwa kere mufisayendi gonomvhura 84. Age nkenye apa nga zi kontembeli a ka karere Karunga masiku nomutenya, a kanderere oku ta dilire. 38 Age Josefa naMariya simpe montembeli, ta heda kwawo makura ta pandura Karunga nokuuyunga kuhamena munona ogu kwanavenye ava va ndindira ezoworo lyaJerusarema.
39 Apa va mene kusikisa mo nayinye moomu za tanta Veta zaJehova, makura tava tengura koGalireya, kositata sawo Nasareta. 40 Munona makura ta kuru, ta koro, ta kara nounongo wounzi, ano Karunga kwa twikilire kumuhara.
41 Nkenye mvhura, vakondi vendi ngava zi koJerusarema kosipito soPaska. 42 Apa ga kere nonomvhura 12, tava zi kosipito soPaska moomu ngava yi rugana nkenye apa. 43 Apa sa pwire sipito, tava tengura, ano Jesus ta kara moomo moJerusarema, nye vakondi vendi kapi va yi dimbwilire. 44 Awo kwa gazarere asi mweli mombunga, tava gendi ezuva nalinye, ano konyima tava tameke kumupapara mokatji kovanekoro novandambo. 45 Nye apa va dilire kumugwana, tava tengura koJerusarema va ka mu papare. 46 Konyima zomazuva gatatu, tava ka mu gwana montembeli, age kuna hingire pokatji kovarongi, tava purakene oku ta va puragere mapuro. 47 Nye navenye ava va mu purakenene, kwa va tetwire nondunge dendi nomalimbururo gendi. 48 Apa vakondi vendi va mu mwene, ta yi va tetura, ozina tava mu pura asi: “Munange, yisinke ono tu ruganene ngesi? Name noguho kuna ku papara nompwagetjima.” 49 Nye age ta va limburura asi: “Morwasinke muna paparere nge? Kapi mwa yi diva asi na hepa kukara monzugo zoTate ndi?” 50 Nye kapi va kwete egano eyi ga va tanterere.
51 Makura ta gurumuka kumwe nawo va ze koNasareta, age nga va limburukwa.* Ozina kwa pungwire yininke nayinye eyi momutjima gwawo. 52 Jesus makura ta kuru, ta kara nounongo wounzi, ano Karunga novantu kwa twikilire kumuhara.