Esitera
5 Mezuva lyautatu, Esitera ta dwara yikoverero yendi yosiuhompa, ta zi ta ka sikama meharango lyomombara lyomonda. Age kwa pirukilire kombara zahompa, ano hompa kwa hingilire posipundi sendi souhompa mombara zendi ntani kwa pirukilire kevero. 2 Hompa kwa hefe apa ga mwene mukadendi Esitera kuna sikama meharango, makura ta mu zerwire mburo zendi zongorodo ezi za kere mokuwoko kwendi. Esitera makura ta zi kwahompa, ta ka kwata komutwe gomburo.
3 Makura hompa ta pura Esitera asi: “Udigu musinke ono kara nawo mukadange? Yisinke ono hara ni ku ruganene? Ame kuvhura ni ku pe nampili harufa zosirongo sange!” 4 Esitera ta mu limburura asi: “Nsene asi ove hompa no yi kwatesa ko, nina hara kukuzigida kumwe naHamani o wize kosipito esi nina kuwapaikire naina.” 5 Makura hompa ta tantere vakareli vendi asi: “Ka tantereni Hamani a wize usimbu morwa Esitera ana tu zigida.” Konyima, hompa ta zi kumwe naHamani kosipito esi ga wapaikire Esitera.
6 Konyima zapa va nwine vhinyu, hompa ta pura Esitera asi: “Tantera nge eyi ono hara, ame nani yi kuruganena. Ame kuvhura ni ku pe nampili harufa zosirongo sange!” 7 Makura Esitera ta limburura asi: “Eyi yiyo nina hara o ruganene nge: 8 Nsene asi ove hompa no yi kwatesa ko ntani no yi hafera, nina hara kukuzigida hena kumwe naHamani ngomu wize kosipito esi ngani mu wapaikira mungura, makura ntani ngani ya ku tantera eyi nina hara o ruganene nge.”
9 Ezuva olyo, Hamani kwa zire kembo age ana hafa unene. Nye apa ga sikire perungavero lyombara zahompa, ta dimburura asi Moredekayi kapi ana kusikama ntani kapi ana kumutjira, makura Hamani ta handuka unene. 10 Nye Hamani kwa lipangerere, ta zi kembo lyendi. Makura ta ninki va ka zigide vakwawo ntani namukadendi Seresi. 11 Age kwa likangangere komeho zawo. Age kwa va tanterere kuhamena ungawo wendi novana vendi wovanzi wovagara ntani nomu ga mu pere hompa sipundi sosinene kupitakana marenga novakareli vahompa.
12 Hamani ta va tantere hena asi: “Esitera mukadahompa nyamelike tupu ana zigida ni ze kumwe nahompa kosipito esi ana wapaike. Age kuna zigida nge hena kumwe nahompa ngatu ze kwendi mungura. 13 Nye nampili ngoso, ame kapi nina hafa morwa Moredekayi goMujuda ogu a hingire perungavero lyombara zahompa.” 14 Makura mukadendi Seresi novakwawo navenye tava mu tantere asi: “Siminina sitji sonometa 22,3* makura ngurangura ngo ka tantere hompa nga mangerere ko Moredekayi, ano konyima ntani nye ngomu za nahompa kosipito mu ka lihafese.” Hamani kwa haferere egano eli ano age ta zi, ta ka siminina sitji oso.