Buke zaMarukusa

14 Mazuva gavali tupu ga hupire ko va dane Paska nosipito soNomboroto da hana yihaheso. Ano vapristeli wovanene novalirongi womatjangwa kwa paparere mpito va kwate Jesus va mu dipage,* 2 awo kwa uyungire asi: “Twa ha yi rugana posipito, kuvhura yi rete epiyagano movantu.”

3 Apa ga kere moBetani membo lyaSimoni ogu nga vere nare yingondwe, mukadi ta mu wizire nosipako semanya omu mwa kere magadi gondiro gonarudisi* zene-zene. Makura ta si paturura noku ga mu tjira komutwe gwendi. 4 Apa vamwe va yi mwene, tayi va handukisa, tava tanta asi: “Morwasinke vana kuhepekera aga magadi? 5 Magadi aga ngano kuna ga randesa madenali* gokupitakana po 300, ano yimaliwa va yi pe vahepwe!” Awo kwa mu handukilire unene. 6 Nye Jesus ta va tantere asi: “Mu sigeni. Morwasinke muna kumutekwira ngoso? Age kuna ruganene nge yoyiwa. 7 Vahepwe nawo ngomu kara nkenye apa, ntani kuvhura mu va ruganene uwa nkenye apa muna harere, nye ame kapi ngomu kara name nkenye apa. 8 Age kuna rugana yeeyi ana vhuru, age kuna tjire magadi korutu rwange mokuruwapaikira evhumbiko. 9 Yosili nina kumutantera asi nkenye oku ngava udisira mbudi zongwa mouzuni mudima, eyi ana rugana ogu mukadi nayo ngava yi divisa yipo ngava mu diworokere po.”

10 Judasa Isikalyoto, gumwe gowo ronambali, ta zi kovapristeli wovanene a ka mu va horwere. 11 Apa va yi zuvhire, tava hafa, tava mu tumbwidire asi ngava mu pa yimaliwa yosisiliveli. Age nga papara mpito zokumuhorora va mu kwate.

12 Mezuva lyokuhova lyosipito soNomboroto da hana yihaheso, posiruwo esi ngava dipaga simuna soPaska, varongwa vendi tava mu pura asi: “Kupi ono hara natu ka kuwapaikira Paska?” 13 Makura ta tumu varongwa vendi vavali, ta va tantere asi: “Zendeni mositata nomu ka gwanekera nomugara ana simbi kavaza komema. Ka mu kwameni, 14 ano omu membo na ka hwilira, ka tantereni nturagumbo asi ‘Murongi kuna kupura asi: “Nzugo zipi zo nani ya lira Paska novarongwa vange?”’ 15 Age na ka mu likida nzugo zekeguru zonene ezi vana wapaike. Omo yimo nye nomu ka zi wapaikira.” 16 Varongwa tava zi, tava ka hwilira mositata, tava ka yi gwana moomu ga va tanterere, makura tava liwapaikire Paska.

17 Apa lya gombokere, ta wiza novarongwa vendi ronambali. 18 Ngomu va hingilire kositafura nokulya, Jesus ta tanta asi: “Yosili nina kumutantera asi gumwe gweni na horora nge.” 19 Tava guwu makura navenye tava mu pura asi: “Na yi panga kapisi nyame?” 20 Age ta va limburura asi: “Gumwe gweni, ogu nani verera nendi posiyaha. 21 MunwaMuntu ngayi mu gwana moomu va yi mu tjangera. Nye ehudi lyomuntu ogu ana kuhorora MunwaMuntu mutupu omu. Muntu ogo ngano kapi va mu hampuruka, ngano hansa.”

22 Awo simpe kuna kulya, ta gusa mboroto, ta kanderere, ta zi bamagura, ta zi va pe nokutanta asi: “Guseni, mboroto ezi kwa fanekesa rutu rwange.” 23 Ta gusa nkinda, ta pandura oGuhwe, ta zi va pe makura awo tava nwaa-nwaa mo. 24 Makura ta va tantere asi: “Vhinyu ezi kwa fanekesa ‘honde zange zegwanekero’ ezi ngazi tjikanga zi parure vantu wovanzi. 25 Yosili nina kumutantera asi kapi hena ngani nwa yoyiyimwa eyi yosindjembere, dogoro nekezuva eli ngani ka nwa yoyipe moUhompa waKarunga.” 26 Apa va mene kudimba mokuhamberera Karunga, tava pwaga, va ze koNdundu zoMauzwe.

27 Jesus makura ta va tantere asi: “Namuvenye tomu ka siga nge, yeeyi kwa tjanga asi: ‘Ngani dipaga musita, makura nonzwi ngadi lihane.’ 28 Konyima zapa ngava pindura nge koufe, nyame ngani mu hovera kuza koGalireya.” 29 Nye Peturusa ta mu tantere asi: “Nampili navenye va ku sige, ame kapi nani kusiga.” 30 Jesus makura ta mu tantere asi: “Yosili nina kukutantera asi masiku ganaina, komeho sikondomboro si zige ruvali, ove no ka patana nge rutatu.” 31 Nye age kwa twikilire kupatana asi: “Nampili kufa, kufa tupu nove, ame nokukupatana si.” Vakwawo navenye nawo kwa uyungire yokulifana.

32 Ta va ya siki pevega ava tumbura asi Gesemani, makura ta tantere varongwa vendi asi: “Hingireni apa siruwo esi nina kukanderera.” 33 Ta pitura Peturusa naJakopo naJohanesa, makura ta vareke kuguva unene. 34 Ta va tantere asi: “Ame* nina guwu, ngwendi ni fe. Kareni paapa, mu vangarare.” 35 Ta linapuka nawo kanunu, makura ta tongamene nokunyongeka mutwe gwendi a kanderere asi nsenesi kuvhura, siruwo sosidigu sa ha wiza. 36 Age ta tanta asi: “Aba,* Tate, ove koge nayinye ureru, gusa nge nkinda* ezi. Nye kapisi moomu nina panga, hawe, moomu ono panga.” 37 Ta tengura, ta ka va gwana awo vana rara. Ta tantere Peturusa asi: “Simoni, nani ove kuna rara? Kapi nani ono vhuru kuvangarara nampili vili zimwe? 38 Vangarareni oku tomu kanderere, yipo ga dire kumufunda maheteko. Mutjima kupura* usimbu, nye rutu kapi rwa paka nonkondo.” 39 Makura ta zi hena noku ka kanderera nonkango doodina domuhowo. 40 Apa ga ka tengwire hena, kuyavagwana vana rara morwa nompofu kwa va kwete unene, kapi va divire asi ngapi omu nava mu limburura. 41 Ta ka tengura hena rwautatu, ta va tantere asi: “Posiruwo soudigu ngesi, one kuna rara nokupwizumuka? Pindukeni! Siruwo sina siki mo, MunwaMuntu tava mu gava momawoko govananzo. 42 Katukeni, tu ze. Ogu ana kuhorora nge gogo ana kuwiza.”

43 Poopo ngoso, age kuna kuuyunga, va tara ko, Judasa, gumwe gowo murongo navavali kuna kuwiza kumwe nombunga zonene nonomfuro nonomuramu dawo. Awo kwa va tumine vapristeli wovanene novalirongi womatjangwa nomasimbi goVajuda. 44 Muhoroli gwendi kwa va pere sidiviso asi: “Ogu nani ka ncumita, yige googo, ka mu kwateni nokumutwara oku tomu mu nomene.” 45 Age ta vyukilire kwendi nokutanta asi: “Murongi!”* Makura ta mu ncumita. 46 Makura vena tava mu kwata nokumutwara. 47 Nye gumwe ogu ga sikamene po, ta pweza mo rufuro rwendi, ta tete* ko kutwi komukareli gomupristeli gomunene, taku ndembuka ko. 48 Jesus kwa va tanterere asi: “One kuna wiza mu ya kwate nge nonomfuro nonomuramu ngwendi moomu ava wizire munamahaka ndi? 49 Nkenye ezuva none ngani kara montembeli, oku tani mu rongo, nye kapi mwa kwete nge. Nayinye eyi kuna kuhorokera asi Matjangwa ga sike mo.”

50 Makura navenye tava mu zumbu, tava ka duka. 51 Nye mumati ogu ga dwere sikoverero tupu sokonhi, kwa kweme Jesus, awo kwa hetekerere ko asi va mu kwate, 52 nye age ta va sigire sikoverero, ta ka duka rutu-rutu.*

53 Kutunda opo, Jesus tava mu twara komupristeli gomunene po, oku va pongere vapristeli vamwe wovanene nomasimbi ntani valirongi womatjangwa. 54 Nye Peturusa kwa mu kwamenene koure dogoro nemeharango lyomupristeli gomunene. Ta ka hingira kumwe novakareli a lidurure. 55 Vapristeli wovanene nosigongi mudima somasimbi kwa paparerere Jesus umbangi woyimpempa ou nau ninkisa va mu dipage, nye kapi va u gwene. 56 Sinzi sawo yimpempa va uyungire kumuhamena, morwa maumbangi gawo kapi ga lizire. 57 Vamwe hena kwa katukire nokugava umbangi woyimpempa kumuhamena asi: 58 “Ose kwa mu zuvhire ta tanta asi: ‘Ngani zungurura ntembeli ezi va tunga nomawoko, ano momazuva gatatu ngani tunga ko zimwe ezi va dira kutunga nomawoko.’” 59 Nye nampili ngoso, eyi va uyungire kapi ya lizire.

60 Mupristeli gomunene makura ta katuka nokupura Jesus asi: “Ove kwato eyi ono kulimburura ko? Kapi ono kuyizuvha eyi vana kukuuyunga ava vagara ndi?” 61 Nye age teete, kapi ga limbwilire. Mupristeli gomunene ta mu pura hena asi: “Nyove Kristusa MunwaKarunga ogu ga pongoka?” 62 Jesus makura ta mu limburura asi: “Nhi, ntani ngomu mona MunwaMuntu ana hingire korulyo rwaKarunga Munankondo nadinye, age kuna kuwiza pomaremo.” 63 Apa mupristeli gomunene ga yi zuvhire eyi, ta taura yikoverero yendi nokutanta asi: “Nombangi musinke hena natu hepa? 64 Muna lizuvhire ko omu ana swaura Karunga. Yisinke muna tokora?” Navenye tava mu tokwere konomfa. 65 Vamwe tava tameke kumufizira nokumukudumika kosipara oku tava mu toona nononyongo nokutanta asi: “Nsene asi ove muporofete, tu tantera asi yilye ogu ana kutoona!” Vakareli tava mu kapagura mosipara makura tava mu twara.

66 Peturusa age kuna hingire peharango, makura mukareli gumwe gomupristeli gomunene gomukadona ta mu wizire. 67 Apa ga mwene Peturusa kuna kulidurura, ta mu tarurura nokutanta asi: “Nove kwa kere kumwe naJesus, Munasareta.” 68 Nye age ta patana pokutanta asi: “Kapi na mu diva ntani kapi nina kuyikwata egano eyi ono kuuyunga,” makura ta pwaga a ka ze kevero. 69 Mukareli gumwe gomukadona ta mu mono, age ta tantere ava va sikeme po asi: “Ogu nage gumwe gwawo.” 70 Age ta patana hena. Konyima zokaruwogona, ava va sikeme po tava tantere Peturusa asi: “Yosili, nove gumwe gwawo, yeeyi nove Mugalireya.” 71 Nye age ta fingilire nokugana asi: “Mugara ogo muna kuuyunga, ame kapi na mu diva!” 72 Poopo ngoso, sikondomboro tasi zigi rwauvali, Peturusa makura ta diworoka eyi ka mu tantere Jesus asi: “Sikondomboro aso sa hana kuziga ruvali, ove no ka patana nge rutatu.” Ta guwu unene nokutameka kulira.