Mbilive zokuhova zaJohanesa

1 Ose kuna kumutjangera kuhamena ogu ga kere ko petameko, ogu twa zuvha nokumona nomeho getu ntani twa mu kwata nomawoko getu, age kuna kara nkango zomwenyo, 2 (ose kwa tu horwera mwenyo gwanarunye, twa gu mona ntani ose kuna kugugavera umbangi nokugumudivisa. Mwenyo gwanarunye ogu kwa tunda kwaGuhya ntani ago kwa gu tu horwera.) 3 Ose kuna kumutantera kuhamena eyi twa mona neyi twa zuvha, yipo mu kare mouumwe nose, ngwendi moomu twa kara mouumwe naGuhya ntani naMunendi Jesus Kristusa. 4 Ose kuna kumutjangera yininke eyi, yipo tu hafe unene.

5 Mbudi ezi yizo twa zuvha kwendi ntani ose kuna kuzimudivisa asi: Karunga yige uzera, ano mwendi mutupu mundema nampili nakauke. 6 Nsene tu tanta asi: “Ose kwa kara mouumwe nage,” nye ose simpe kuna kugenda momundema, tatu likumbagere ntani kapi tuna kuparuka kuliza nousili. 7 Nye nsene ose kuna kugenda mouzera, ngwendi moomu ga kara age mouzera, ose ngoso kwa kara mouumwe novakwetu ntani honde zaMunendi Jesus kutukuhura kononzo detu nadinye.

8 Nsene tu tanta asi: “Ose kapi atu zono,” tatu likumbagere nyamwetu ntani usili mwetu mutupu. 9 Nsene tu tanta nonzo detu, age nga tu dongwenena po kononzo detu ntani nga tu kuhura komaudona getu nagenye, morwa age mulimburukwi ntani kuvhura kumuhuguvara. 10 Nsene tu tanta asi: “Ose kapi twa zona,” ngoso ose kuna kumumona asi munayimpempa ntani nonkango dendi mwetu mutupu.