Buke zokuhova zoVahompa
4 Hompa Saromo kwa pangerere Vaisraeli navenye. 2 Aga kwa kere marenga gendi:* Asaliya munaSadoko kwa kere mupristeli; 3 Elihorefu naAhiya vana vaSisa kwa kere vahamutjanga; Jehosafata munaAhirudi nga tjanga ehistoli; 4 Benaya munaJehoyada kwa kere mukurona govakwayita; Sadoko naAbiyatara kwa kere vapristeli; 5 Asaliya munaNatana kwa kere mukurona govanguuru; Sabudi munaNatana kwa kere mupristeli ntani kaume kahompa; 6 Ahisara nga pakere mbili mbara; ano Adoniramu munaAbuda nga pitisire vantu ava ngava ruganene hompa.
7 Saromo kwa kere novanguuru 12 ava ngava pitisire Vaisraeli navenye ava ngava pe hompa nondya novantu ava va tungire mombara. Nkenye ogu nga gava nondya kwedi kumwe momvhura. 8 Ava yiwo vanguuru: munaHuru ogu ga tungire momukunda gonondundu gwaEfurayimi; 9 munaDekere ogu nga pangere moMakasi; Saliboni, Bete-semesi ntani moEroni-bete-hanani; 10 munaHesedi ogu nga pangere moAruboti (age nga pangere hena Soko ntani sirongo nasinye saHefere); 11 munaAbinadaba ogu nga pangere nondundu daDoro (age kwa kwere munaSaromo gedina Tafati); 12 Bana munaAhirudi ogu nga pangere moTanaki, moMegido ntani sitata nasinye saBete-seni esi sa livyuka naSaretana. Ano sitata saJesireli kwa kere kondundu kutundilira koBete-seni o ze koAbeli-mehora dogoro komukunda gwaJokimeyamu; 13 munaGebere ogu nga pangere moRamoto-giliyata (age nga pangere hena nomukunda donotende daJaire munaManase edi da kara moGiliyata ntani nomukunda gwaArogobo ogu gwa kara moBasani. Amo kwa kere mo yitata 60 yoyinene eyi va kundurukidire nomakuma noyininke yongoporo yokupatesa ko);* 14 Ahinaba munaIdo, ogu nga pangere moMahanayimu; 15 Ahimasi, ogu nga pangere momukunda gwaNafitali (age kwa kwere munaSaromo gedina Basemati); 16 Bana munaHusayi, ogu nga pangere momukunda gwaAseli ntani moBearoto; 17 Jehosafata munaParuwa, ogu nga pangere momukunda gwaIsasikali; 18 Simeyi munaEra, ogu nga pangere momukunda gwaMbenyameni; 19 Gebere munaUli, ogu nga pangere momukunda gwaGiliyata ntani sirongo saSihoni hompa goVaamoli nesi saOgo hompa gwaBasani. Mosirongo mwa kere hena nguuru gumwe ogu nga pitisire vanguuru vakwawo.
20 Vantu womorudi rwaJuda noVaisraeli vanzi unene va kere ngwendi muheke gwekefuta. Awo ngava li oku tava nu ntani kwa hefe.
21 Saromo kwa pangerere yirongo nayinye kutundilira komukuro* dogoro kosirongo soVafilisiti ntani komururani gosirongo saEgipite. Vantu womoyirongo oyo ngava gava mutero* ntani kwa ruganenene Saromo eparu lyendi mudima.
22 Nkenye ezuva, Saromo ngava mu wapaikire nondya pokuruganesa eyi: usura wouwa wonokilograma 3 300,* usura wonokilograma 6 600,* 23 nongombe 10 edi adi lire mohambo, nongombe 20 edi ava lisire mowiza, nonzwi 100, nompengu, nompara, nompengu dorudi rwapeke noyidira yokuneta. 24 Saromo nga pangere nayinye eyi ya kere mesinya eli lyomukuro* kutundilira koTifisa dogoro koGasa, kukwatera mo vahompa navenye ava va kere mesinya eli lyomukuro. Age kwa kere nombili kumwe nonomukunda nadinye edi da mu kundurukidire. 25 Momazuva gaSaromo, vantu womorudi rwaJuda noVaisraeli kwa tungire mompora ntani nkenye ogu kwa hingilire mositji sendi somandjembere nesi soukuzu, kutundilira koDana dogoro koBere-seba.
26 Saromo kwa kere nononzugo 4 000* omu ngava tura nonkambe edi ngadi koko matemba gendi ntani age kwa kere nononkambe* 12 000.
27 Vanguuru ava, ngava gava nondya kwahompa Saromo nokovantu ava ngava li kositafura sendi. Nkenye nguuru nga gava nondya kwedi kumwe ntani nga divilisa asi kwato eyi yina dili po. 28 Awo ngava twarere hena nonkambe wayi nonondya dapeke nkenye oku va va tanterere, kukwatera mo nonkambe edi ngadi koko matemba, nkenye ogu nga reta kuliza neyi va mu tanterere.
29 Karunga kwa pere Saromo unongo wounzi nonondunge ntani kwa mu vaterere a kwate egano yininke yoyinzi unene ngwendi muheke gokonontere defuta. 30 Saromo kwa kere nonondunge kupitakana vantu ava va tungire koUpumezuva ntani kupitakana unongo ou va kere nawo Vaegipite. 31 Age kwa kere nonondunge kupitakana vantu navenye kukwatera mo Etani gomoruvharo rwaZera, Hemani, Kalikoli, Darada, vana vaMaholi. Saromo kwa divikwire konomuhoko nadinye edi da mu kundurukidire. 32 Age kwa tjenge* yisewe 3 000 ntani nonsumo dendi kwa kere 1 005. 33 Age nga uyunga kuhamena yitji, kutundilira koyitji yosedeli yomoLibanoni dogoro koyitji yohisopo eyi ngayi mene mekuma. Age nga uyunga kuhamena yikorama, yidira,* yininke yokuwovana* nonomfi. 34 Vantu wokonomuhoko nadinye ngava wiza va ya purakene kounongo waSaromo, kukwatera mo vahompa womouzuni mudima ava va zuvhire kuhamena unongo wendi.