KoVagarata
4 Ano ngesi tani mu tantere asi nsene mupingi simpe munona, pwato apa ga lisigira nomupika nampili ngomu yininke nayinye ya kara yendi. 2 Nye age kwa kara konhi zovatareli nomarenga dogoro ngali sike mo ezuva eli va tura po oguhwe. 3 Nose apa twa kere vanona, kwa kere vapika komagazaro nonkareso zouzuni ou. 4 Nye apa sa sikire mo siruwo, Karunga yipo ga tumine Munendi, age mukadi ga mu hampurukire ntani kwa mu hampurukire moveta, 5 yipo a ya fute mfeto zokuzowora ava va kara moveta, ano Karunga a tu ninke tu kare vana vendi.
6 Morwa one vana vaKarunga, age kwa tura mpepo zokupongoka monomutjima detu, azo kutuninkisa tu zigire asi: “Aba,* Tate!” 7 One kapisi vapika hena nye vana vaKarunga. Ano nsene asi one vana vaKarunga, age nga mu pa upingwa.
8 Nye apa mwa dilire kudiva Karunga, one kwa kere vapika wovakarunga woyimpempa. 9 Ano ngomu muna ya diva Karunga ndi ni tante asi Karunga ana ya mu diva, ngapi nye omu nomu tengwira hena koyininke yomawoko-woko youzuni ou mu kare vapika vayo? 10 One kukoneka nawa-nawa mazuva nomakwedi noyinema ntani nomvhura. 11 Nina kara nosinka asi nayinye eyi na lizambera mokumuvatera kuna kara yomawoko-woko.
12 Vakwetu, tani mu likwambere mu kare ngwendi moomu na kara ame, yeeyi name kwa kere ngwendi moomu muna kara one. Kwato yoyidona mwa rugana nge. 13 One mwa yi diva asi ame kwa mu zuvhisilire mbudi zongwa sikando sange sokuhova morwa uvera wange. 14 Nampili ngomu uvera wange wa kere eheteko kweni, kapi mwa seraukire nge ndi asi mu tonde nge* nye one kwa tambwire nge ngwendi muengeli gwaKarunga, ngwendi Jesus Kristusa. 15 Ruhafo rwina mwa kere naro kupi? Yeeyi tani gava umbangi asi nare one kwa liwapaikilire kukorora mo meho geni mu ga pe nge nsene ngano asi ya vaterere nge. 16 Ngoso nina kara nye nkore zeni morwa kuna kumutantera usili ndi? 17 Awo kuna mu tokomene nye kapisi nositambo sosiwa, awo kuna hara va mu guse ko kwange yipo mu hare kuvakwama. 18 Ayo yiwa nsene gumwe a mu tokomena nye ntudi nositambo sosiwa ntani, eyi kapisi yi horoke tupu nsene asi none nina kara. 19 Vana vange, ame kuna kuzuvha hena kukora ngwendi oku a zuvhu mukadi ogu ana kuhampuruka mwarweni dogoro ngomu likide yikara yaKristusa. 20 Ame kuna hara asi ngesi ngano none nina kara yipo ni uyunge none monkedi zombili, morwa kapi nina diva asi ngapi nani mu rugana.
21 Tantereni nge, one ava mwa hara kulimburukwa veta, nani kapi mwa diva eyi azi tanta Veta? 22 Pasihonena, kwa tjanga asi Abirahamu kwa kere novana vavali gumwe gopomupika ano gumwe gopomukadi gokumanguruka. 23 Muna gopomupika kwa mu hampurukire ngwendi vanona navenye nye muna gopomukadi gokumanguruka, kwa mu hampurukire morwa etumbwidiro. 24 Yininke eyi kuvhura kuyikwata egano pasifanekeso: Vakadi ava vavali kwa fanekesa magwanekero gavali, limwe kwa litulisire po poNdundu zaSinayi ano navenye ava va hamena megwanekero eli, vapika ntani egwanekero eli, Hagara. 25 Hagara kwa fanekesa Sinayi, ndundu zomoArabiya ntani kwa fanekesa Jerusarema naina, yeeyi age kwa kara moupika kumwe novana vendi. 26 Nye Jerusarema zemeguru kwa manguruka ntani azo yizo zinyetu.
27 Yeeyi kwa tjanga asi: “Hafa ove mukadi gonganze ogu a dili kureta, zigira kehafo ove mukadi ogu a dili kuligwanekera nokukora kokuhampuruka, yeeyi vana womukadi ogu va zumba vanzi kupitakana wogu ga kara nomugara.” 28 Vakwetu, one vana vetumbwidiro ngwendi moomu ga kere Isaka. 29 Nye ngwendi moomu tupu ogu va reta ngwendi vanona navenye ga hepekere ogu va reta kupitira mompepo zokupongoka, nantaantani yimo. 30 Nye yisinke lya tanta etjangwa? Alyo kwa tanta asi: “Tjida mo mupika ogu namunendi gomugara, yeeyi munendi kapi nga gwana ko koupingwa womuna gomukadi gokumanguruka.” 31 Yipo nye vakwetu, ose kapisi vana womupika nye womukadi gokumanguruka.