Buke zaMateusa
4 Jesus kwa mu twere mpepo zaKarunga momburundu, yipo a ka mu heteke Muzonaguli. 2 Konyima zapa ga dilire kulya mazuva 40 nomasiku 40, makura tazi mu kwata nzara. 3 Muheteki ta heda kwendi, ta mu tantere asi: “Nsene asi ove munwaKarunga, ninka mamanya aga ga lisitunuke nomboroto.” 4 Nye age ta mu limburura asi: “Kwa tjanga asi ‘muntu kapi a paruka komboroto zelike, nye kuparuka kwankenye nkango ezi azi tundu mokana kaJehova.’”
5 Kutunda opo, Muzonaguli ta mu twara kositata sokupongoka, ta ka mu tura koruhungu* rontembeli, 6 ta mu tantere asi: “Nsene asi ove munwaKarunga, vatukira pevhu, yeeyi kwa tjanga asi: ‘Age nga tantera vaengeli vendi va ku simbire pomawoko gawo, yipo mpadi zoge zi dire kupunduka kemanya.’” 7 Jesus makura ta mu limburura asi: “Kwa tjanga hena asi: ‘Walye o heteke Jehova, Karunga goge.’”
8 Muzonaguli makura ta mu twara hena kondundu zonde unene, ta ka mu likida mapangero nagenye gouzuni ou nomaufuuli gamo. 9 Ta mu tantere asi: “Nayinye eyi ono kumona tani yi ku pe, nsene o twa nongoro o karere nge.” 10 Makura Jesus ta mu limburura asi: “Zende kwina, Satana! Yeeyi kwa tjanga asi ‘o tongamene Jehova Karunga goge oku to mu karere gelike makura.’” 11 Muzonaguli makura ta mu sigi, ano vaengeli tava wiza va ya mu nkondopeke.
12 Apa Jesus ga zuvhire asi Johanesa vana mu tura modorongo, makura ta zi koGalireya. 13 Apa ga dirukire moNasareta, ta ka tunga moKaperenaumu pepi nefuta, momukunda gwaSeburoni naNafitali, 14 yipo di sike mo nonkango domuporofete Jesaya edi asi: 15 “Ove sirongo saSeburoni, nove sirongo saNafitali, koyiha yefuta, mesinya mwina lyaJorodana, ove Galireya zovanayirongo! 16 Vantu ava va kara momundema kwa mwene uzera wounene. Ano ava va tunga mosirongo somundunduma gonomfa, uzera kwa va temenene.” 17 Kutunda opo, Jesus ta tameke kuzuvhisa asi: “Litezurureni, yeeyi Uhompa wemeguru pepi una kara.”
18 Haga za mokugenda konontere defuta lyaGalireya, ta mono Simoni ogu ava tumbura hena asi Peturusa namumbyendi Andiliyasa, awo kuna kutega ekwe mefuta, morwa awo kwa kere vakwati wonomfi. 19 Makura ta va tantere asi: “Kwameni nge, ni ka mu ninke mu kare vakwati wovantu.” 20 Poopo ngoso, awo tava sigi makwe gawo, tava mu kwama.* 21 Kutunda opo, ta mono hena vantu namumbyendi, Jakopo naJohanesa, vana vaSebede, awo mowato kumwe naguhyawo Sebede, kuna kumanga makwe gawo, makura ta va zigida. 22 Poopo ngoso, tava sigi wato ntani guhyawo, makura tava mu kwama.
23 Makura ta gendi moGalireya nazinye, oku ta rongo monosinagoge* dawo nokuzuvhisa mbudi zongwa zoUhompa ntani ta verura nkenye mauvera govantu. 24 Mbudi zokuhamena kwendi tazi lihanene moSiliya nazinye. Awo makura tava mu retere navenye ava ngava vere mauvera nkenye aga nankenye kukora, nava wonompepo donondona nava wosihegani noyirema, age makura ta va verura navenye. 25 Ngoyitundwamo, nombunga dononene ngadi mu kwama-kwama, tadi tundu moGalireya nomoDekapolisi* nomoJerusarema nomoJudeya nemesinya mwina lyaJorodana.