Buke zEhororo
17 Gumwe govaengeli ntambali ava va kwaterere marupasa ntambali ta tantere nge asi: “Wiza ni ya ku likide omu ngava pangura hondedi zonene ogu ga hingira pomema gomanzi, 2 age kwa hondera* novahompa vepevhu ntani age kwa ninkisa ava va tunga pevhu va nwe vhinyu zendi ezi za fanekesa ruhonda* rwendi.”
3 Age kwa twere nge momburundu nompepo zokupongoka. Makura tani mono mukadi ana hingire posikasama sosigeha ge, esi sa kere nomadina gokuswaukisa Karunga. Aso kwa kere nonomutwe ntambali ntani nonombinga murongo. 4 Mukadi ogo kwa dwere yikoverero yopurupuli neyi yoyigeha ntani age kwa dwere yiranda yongorodo notumanya tondiro ntani nonombamba. Age kwa kwaterere nkinda zongorodo, omu mwa zulire yininke yokunyata ntani noruhonda* rwendi. 5 Posipara sendi kwa tjenge po edina eli lya horama eli asi: “Babironi zonene, zinya vanaruhonda noyininke yokunyata yepevhu.” 6 Makura tani dimburura asi mukadi ogu kwa korwere kohonde zovapongoki ntani kohonde zonombangi daJesus.
Apa na mu mwene tani tetuka unene. 7 Muengeli makura ta pura nge asi: “Yisinke ono tetukire? Tani ku tantere yininke eyi ya horama kuhamena mukadi ogo ntani nosikasama sonomutwe ntambali nonombinga murongo, apa ga hingira mukadi ogo: 8 Sikasama esi ono mono yipo sa kere, ngesi kapi sina kara po, nye ntaantani ngasi tunde mekero ntani aso ngava si zonagura po. Vantu ava va tunga pevhu, ava va dira kutjanga madina gawo mobukegango zomwenyo kutunda ketameko lyouzuni, ngava tetuka apa ngava mona asi sikasama yipo sa kere, ngesi kapi sina kara po, nye ngasi moneka hena.
9 “Muntu ga hepa unongo mokukwata egano yininke eyi: Nomutwe ntambali kwa fanekesa nondundu ntambali apa ga hingira mukadi. 10 Ntani pwa kara vahompa ntambali: Vatano va gwa, gumwe kuna kupangera, ano gumwe simpe kuna kuwiza, nye kapi nga kara siruwo sosire. 11 Ntani sikasama esi sa kere po, nye ngesi kapi sina kara po, age kuna kara hompa gwauntantatu. Nye aso kwa tundilira movahompa ntambali ntani ngava si zonagura po.
12 “Nombinga murongo edi ono mono kwa fanekesa vahompa murongo ava vana kudira kupangera, nye ngava gwana nonkondo va pangere vili zimwe kumwe nosikasama. 13 Awo kwa kara nositambo simwe, yiyo ava gavere nonkondo noupangeli wawo kosikasama. 14 Awo ngava rwisa Nzwigona, nye Nzwigona ngazi va funda, morwa age Hompa govahompa ntani mupangeli govapangeli. Ntani hena, vantu wovalimburukwi ava ga horowora nokuvazigida, nawo ngava funda.”
15 Age kwa tanterere nge asi: “Ano mema aga ono mono, apa ana hingire hondedi, kwa fanekesa vantu nonombunga nonomuhoko ntani nomaraka. 16 Ano nombinga murongo edi ono mono nosikasama, ngadi nyenga hondedi ntani ado ngadi mu hakana yiweka yendi nokumusiga muhere-here, ado ngadi lya nyama zendi nokumuhwika momundiro. 17 Yeeyi Karunga yige ava ninkisa va rugane eyi ana hara, kutanta asi va sikise mo sitambo sawo pokugava upangeli wawo kosikasama, dogoro ngadi sike mo nonkango daKarunga. 18 Ano mukadi ogu ono mono, kwa fanekesa sitata sosinene esi asi pangere vahompa navenye vepevhu.”