koVaroma
12 Yipo nye vakwetu, tani mu likwambere monkenda zaKarunga asi mu gave marutu geni ngonzambo zonzuni ezi za pongoka ntani ezi a tambura Karunga, monkedi ezi ngomu karera Karunga nonondunge deni nadinye. 2 Ntani hagekeni kuhonena yininke yomouzuni* ou, nye pulisireni Karunga a rundurure magazaro geni yipo mu dive eyi ana mu harere mu rugane, yoyiwa, youhunga ntani eyi a tambura.
3 Morwa nkenda zonene ezi ga likida nge Karunga, tani mu korangeda namuvenye mokudira kupitakanesa kuligazara nyamweni, nye gazareni pokuhetekera kuliza nepuro eli ga mu pa Karunga. 4 Ngwendi moomu rutu rwa kara nomaruha gomanzi nye maruha ogo kapi aga rugana yokulifana, 5 nose nampili ngomu twa kara tuvanzi, ose rutu rumwe mwaKristusa. Nye ose ngwendi maruha gorutu aga ga likwatakana. 6 Natuvenye kwa kara nomauhwi gokulisiga-siga kuliza nonkenda zaKarunga zonene ezi ga tu likida, nsene asi kwa kara nouhwi wokudivisa mbudi zaKarunga, tu diviseni kuliza nepuro lyetu, 7 ano nsene kwa kara nouhwi wokuvatera, tu twikireni kuvatera, ano ogu ga kara nouhwi wokuronga, a twikire kuronga, 8 ano ogu ga kara nouhwi wokukorangeda,* a korangede,* ano ogu ga kara nouhwi wokugava, a gave nomutjima nagunye, ano ogu ga kara nouhwi wokupitisira, a pitisire nawa, ano ogu ga kara nouhwi wokulikida nkenda, a likide nkenda nomutjima gomuwa.
9 Eharo lyeni li kare lyousili. Nyengeni udona, kwaterereni unene kweyi yoyiwa. 10 Lilikideni eharo lyosili lyosiumbya. Kareni womuhowo mokulikida wopeke efumadeko. 11 Ruganeni unene,* kapisi mu kare udwa. Hwameni mompepo. Ruganeneni Jehova nomutjima nagunye. 12 Hafeni mehuguvaro. Lididimikireni momaudigu. Twikireni kukanderera. 13 Vatereni vapongoki kuliza noyihepwa yawo. Tambureni wopeke neharo. 14 Hundireni Karunga a tungike ava ava mu hepeke ntani kapisi mu va uyunge momudona. 15 Hafeseni ko ava vana hafa, liliseni ko ava vana kulira. 16 Kareni nosinka kwava wopeke moomu mwa kara nosinka kwanyamweni, mwa ha linenepeka nye linunupikeni. Mwa ha ligazara asi one vanandunge kupitakana wopeke.
17 Mwa ha tengwida kuwoko. Ruganeni eyi ava tara vantu navenye asi yiwa. 18 Kondjeni paapa mwa hulira mu tulise po mbili novantu navenye. 19 Vakwetu wokuhara, walye omu tengwida kuwoko nye sigireni Karunga a likide ehandu lyendi, yeeyi kwa tjanga asi: “Nyame ani tengwida kuwoko, ngani va futisa,” yimo ana kutanta Jehova. 20 Nye “nsene nkore zoge nzara, mu pa a lye ano nsene enota, mu pa ko yuma a nwe, pokurugana eyi kuna fana ngwendi kuna kumutura makara goupyu pomutwe gwendi.”* 21 Mwa ha pusilira udona u mu funde nye fundiseni udona kouwa.