Vakolinte wokuhova
8 Kuhamena nondya dokuzamba koyikarunga yoyimpempa, natuvenye twa kara nediwo kuhamena eyi. Ediwo kuninkisa muntu a linenepeke nye eharo kumunkondopeka. 2 Nkenye ogu a gazara asi ga diva yuma, kapi ga diva nayinye kuhamena yuma oyo. 3 Nye ogu ga hara Karunga, Karunga ga mu diva.
4 Ano kuhamena kulya nondya dokuzamba koyikarunga yoyimpempa, twa yi diva asi sikarunga soyimpempa nayimwe si ntani asi Karunga gumwe tupu ga kara po. 5 Nampili ngomu pwa kara ava ava tumbura asi vakarunga yi kare asi meguru ndi pevhu, ngamoomu tupu pwa kara “vakarunga” wovanzi “novahompa” wovanzi, 6 ose twa yi diva asi Karunga gousili gumwe tupu ga kara po, Guhyetu gemeguru. Age kwa sita nayinye ntani ose kwa karera po mwarwendi. Ntani Hompa, gumwe tupu ga kara po, Jesus Kristusa, mwendi yimo twa karera po ntani yimo va sitira yininke nayinye.
7 Nye kapisi navenye va yi diva eyi. Nye vamwe morwa ngava karere yikarunga yoyimpempa, apa ava li nondya dokuzamba koyikarunga yoyimpempa, awo kugazara asi kuna kukarera sikarunga soyimpempa makura ezwi lyawo lyokomutjima lyokudira nonkondo kuvapangura. 8 Nye nondya kapi ngadi tu hedesera pepi naKarunga. Nsene tu dira kudilya, kwato eyi ngatu zumbanesa ano nsene tu di lya, kwato eyi ngatu gwanena po. 9 Nye takameseni asi umanguruki weni wokutokora kapisi u pundukise ava va dira kukara nezwi lyokomutjima lyokupama. 10 Nsene ove wa kara nediwo a ku mona muntu ove kuna kulya montembeli omu ava karere yikarunga yoyimpempa, ezwi lyendi lyokomutjima lyokudira kupama kapi nali mu ninkisa nage a lye nondya edi ava zamba koyikarunga yoyimpempa? 11 Mukweni ogu ga fira Kristusa ogu ga kara nezwi lyokomutjima lyokudira kupama ta zumbanesa epuro morwa ediwo lyoge. 12 Apa omu zonene vakweni monkedi ezi, one kuna kuvaninkisa va rugane yininke eyi ali va silike ezwi lyawo lyokomutjima, one ngoso kuna kuzona kwaKristusa. 13 Yipo nye, nsene nondya kupundukisa mukwetu, kapi ngani lya hena nyama yipo ni dire kupundukisa mukwetu.